‟Eteru 8: ‘E Lē Galue le Alii e Ala i Faapotopotoga Faalilolilo,’” Tusi Lesona a le Faiaoga o le Tusi a Mamona (2024)

“Eteru 8,” Tusi Lesona a le Faiaoga o le Tusi a Mamona

Eteru 8

‟E Lē Galue le Alii e Ala i Faapotopotoga Faalilolilo”

O faapotopotoga faalilolilo na malaia ai le tele o vaega o tagata i le Tusi a Mamona atoa. O lenei mamanu na tulai mai i totonu o Sa Iaretō ma oo ai lava ina oo atu ai i lo latou faatafunaga. A o ia tusia e uiga i Sa Iaretō, sa faaopoopo mai e le perofeta o Moronae upumoni taua e mafai ona tatou aoaoina mai nei mea faataumaoi. E mafai ona fesoasoani lenei lesona e te malamalama ai i le manaomia ona teena faapotopotoga faalilolilo e ala i le mulimuli ia Iesu Keriso.

Fesoasoani i tamaiti aoga ia saili le fesootaiga. Pe a oo ina iloa e tamaiti aoga le sootaga o mea o loo latou aoaoina i tusitusiga paia i o latou lava olaga ma tulaga, e masani lava ona sili atu ona faaosofia i latou e aoao ma faaaoga aoaoga o le talalelei. Valaaulia tamaiti aoga ia saili le fesootaiga i le fai atu lea ia i latou o fesili e pei o le “E faapefea ona talitutusa lenei mea na tupu po o le aoaoga ma ou aafiaga?” po o le “E faapefea ona faatatau lenei upumoni i lou olaga?”

Sauniuniga a le tamaitiiti aoga: Valaaulia tamaiti aoga e faitau ‟Pulega Faalilolilo” i le Taiala i Tusitusiga Paia scriptures.ChurchofJesusChrist.org.

Gaoioiga e Ono Mafai Ona Aoao Ai

Galuega faalilolilo

Tusi le upu faalilolilo i luga o le laupapa, ma fai atu lea o fesili nei:

O a nisi o auala e faaaoga ai e Satani le faalilolilo e faataunuu ai ona faamoemoega leaga?
E faapefea e lena faalilolilo ona aafia ai le sootaga a se tagata ma Iesu Keriso? Aisea?
O le a se mea e te manao ia iloa e se tasi e lagona e mafai ona latou alo ese mai mea leaga e fai ona latou te tausia faalilolilo?

O le asō o le a e aoao ai e uiga i se vaega o tagata o e sa auai i faatinoga faalilolilo o le amioleaga ua ta‘ua o se faapotopotoga faalilolilo. A o e suesue, vaavaai mo aoaoga e fesoasoani e te malamalama ai i le matautia o faapotopotoga faalilolilo.

O le amioleaga sa i ai i Sa Iaretō

Atonu e te manatua ina ua taunuu Sa Iaretō i le laueleele na folafolaina, sa latou tofia se tupu e pule ia i latou e ui lava i lapataiga a le uso o Iareto o le faia o lena mea o le a taitai atu ai i le faatagataotauaina (tagai Eteru 6:22–23). I augatupulaga na sosoo ai, o tupu amioleaga na afua ai fevaevaeaiga ma puapuaga i tagata.

E mafai ona e valaaulia ni nai tamaiti aoga naunautai e feauauai i le faitauina leotele o fuaiupu nei i le vasega a o mulimuli ai le vasega atoa i a latou tusitusiga paia.

Faitau le Eteru 8:1–10, ma vaavaai mo le mea na tupu ina ua avea se tagata e igoa ia Omera ma tupu.

Sa ioe Iareto i le fuafuaga amioleaga a lona afafine. Ina ua talosagaina e Akiso le afafine o Iareto e faaipoipo i ai, sa ulu atu Akiso, Iareto, lona afafine, ma isi tagata o le aiga i se faapotopotoga faalilolilo e fasiotia Omera (tagai Eteru 8:11–15).

Matautia o faapotopotoga faalilolilo

O se pulega faalilolilo o se “faalapotopotoga a tagata ua fusia faatasi i ni tautoga e faataunuuina ni faamoemoega leaga a le faalapotopotoga” (“Pulega Faalilolilo,” Taiala i Tusitusiga Paiga, scriptures.ChurchofJesusChrist.org). O Satani o le uluai pule o faapotopotoga faalilolilo (tagai i le Helamana 6:25–30).

I le avea ai ma faamatalaupu o lenei tala, sa faasoa mai ai e le perofeta o Moronae ni aoaoga taua ma lapataiga e uiga i faapotopotoga faalilolilo. Faitau le Eteru 8:18–25, ma vaavaai pe o a lagona o le Alii e uiga i faapotopotoga faalilolilo.

Valaaulia tamaiti aoga e faasoa mai mea sa latou aoaoina mai nei fuaiupu. E faaopoopo atu i fesili nei, atonu foi e te mafaufau e fesili, “O a lapataiga na tuuina mai e Moronae ia i latou o e auai i faapotopotoga faalilolilo?”

O a ni mea na e aoaoina e uiga i faapotopotoga faalilolilo mai nei fuaiupu?

O se upumoni e tasi e mafai ona tatou aoao mai nei fuaiupu o le, o faapotopotoga faalilolilo e inosia i le silafaga a le Atua (Eteru 8:18).

Ina ia fesoasoani ia e malamalama atili pe aisea e inosia ai faapotopotoga faalilolilo i le Alii, faitau mau nei, ma vaavaai mo mea ua e aoaoina e uiga ia Iesu Keriso:

Valaaulia tamaiti aoga e faasoa mai mea sa latou aoaoina mai nei fuaiupu. E mafai ona faaaoga ia fesili nei.

O le a se mea na e aoaoina mai nei fuaiupu atonu sa ono mafai ona fesoasoani i tagata sa e suesueina i le Eteru 8?
O le a se mea ua aoaoina ai oe e nei fuaiupu e uiga i le Alii?
E mafai faapefea e nei aoaoga ona fesoasoani i tupulaga talavou i aso nei?

Na faaiuina e Moronae ana aoaoga e uiga i faapotopotoga faalilolilo e ala i le faamatalaina pe aisea na ia faaaofia ai nei lapataiga. Faitau le Eteru 8:26, ma vaavaai mo mea na manao Moronae ia tatou iloa.

O le a se mea na e aoaoina e uiga i le mafuaaga na faaaofia ai e Moronae nei aoaoga i le Tusi a Mamona?
O le a se mea ua e aoaoina i le asō e mafai ona faatauanauina ai oe e mulimuli atoatoa ia Iesu Keriso?

Mafaufau e faasoa atu lau molimau e uiga i le ala e faaosofia ai oe e upumoni na aoaoina i lenei lesona e faalagolago ma mulimuli ai ia Iesu Keriso.

Manatu ma Talaaga o Faamatalaga

O a ni auala tatou te vaai ai i faapotopotoga faalilolilo i aso nei?

Na saunoa mai Peresitene M. Russell Ballard o le Korama a Aposetolo e Toasefululua:

O loo aoao mai le Tusi a Mamona e faapea o faapotopotoga faalilolilo e faia soligatulafono ua tuuina mai ai se luitau ogaoga, e le gata i tagata taitoatasi ma aiga ae i le lalolagi atoa o tagata. Ua aofia ai i faapotopotoga faalilolilo o aso nei ia kegi, au faipisini o fualaau faasaina, ma aiga solitulafono ua faatulagaina. O faapotopotoga faalilolilo i o tatou vaitaimi, e faagaoioia e pei lava o le au faomea a Katianetona i le taimi o le Tusi a Mamona. E i ai a latou faailoga faalilolilo ma upu faalilolilo. Latou te auai i sauniga faalilolilo ma sauniga amata. O o latou faamoemoega e aofia ai le “fasioti tagata, o le vete, ma le gaoi, ma le faitaaga, ma fai amioleaga eseese uma ua le tusa ai ma tulafono a lo latou atunuu, atoa ma tulafono a lo latou Atua” (Helamana 6:23).

Afai tatou te le faaeteete, o faapotopotoga faalilolilo o ona po nei, e mafai ona vave mauaina le mana ma le faatosinaga e pei lava o le vave ma le mae’ae’a na latou faia i le taimi o le Tusi a Mamona. (M. Russell Ballard, ‟Standing for Truth and Right,” Ensign, Nov. 1997, 38)

Aisea e manaomia ai ona tatou faamaoni ia i tatou lava ma faatasi ma le Alii e uiga ia tatou agasala?

Na faasoa mai Elder Neil L. Andersen o le Korama a Aposetolo e Toasefululua:

I lo tatou manao e salamo, o le faamaoni e avea ma mea taua tele. Muamua ma le sili, e tatau ona tatou faamaoni i lo tatou Tama Faalelagi ma i tatou lava. O le lē faamaoni ma le taufaasese o loo i le faavae ma le pogai o le toetoe lava o agasala uma. O nisi taimi pe a amata ona salamo se tasi, e amata o ia i le faailoa atu na o se vaega o se faafitauli e tele atu. O nisi taimi tatou te faavalea ai i tatou lava i le mafaufau e le manaomia ona faailoa atu le ata atoa, pe o lena vaega o le mea na tupu o se mea sese lea a se isi tagata. E mafai e tagata lelei ona faasese i latou lava ma faaseseina. Soo se taufaasese e faatuai ai le faagasologa o le salamo. (Neil L. Andersen, The Divine Gift of Forgiveness [2019], 194)

I le vitiō lenei, “Being Honest in Our Repentance” (4:05), o loo talanoaina ai e Elder Neil L. Andersen o le Korama a Aposetolo e Toasefululua mafaufauga e faatatau i lana tusi The Divine Gift of Forgiveness (2019). Ua ia faasoa mai e uiga i ni tagata se toalua e tutusa le agasala na la taulimaina: o le tasi ma le faamaoni ma le isi ma le lē faamaoni.

4:5

Gaoioiga Faaopoopo e Aoao Ai

Se isi amataga

Na aoao mai e Peresitene Ezra Taft Benson (1899–1994) e faapea o le Tusi a Mamona ‟sa tusia mo o tatou aso” (“The Book of Mormon—The Keystone of Our Religion,” Ensign, Nov. 1986, 6).

E mafai ona e valaaulia tamaiti aoga e talanoaina nisi o sāvali po o lapataiga mai le Tusi a Mamona e mafai ona fesoasoani i tagata i o tatou aso.

A uma ona faasoa mai e tamaiti aoga a latou tali, faamalamalama atu o se tasi o lapataiga na faasoa mai e perofeta o le Tusi a Mamona i le aufaitau o aso e gata ai sa faatatau i le matautia o faapotopotoga faalilolilo. Fautuaina tamaiti aoga e gauai atu a o latou suesue i mea e finagalo le Alii latou te iloa e uiga i faapotopotoga faalilolilo ma pe mafai faapefea ona latou aloese mai ai.

O le vaega o totoe o le tala

Atonu e te manao e otooto le Eteru 9:1–13 e ala i le faamalamalama atu e faapea ona o se taunuuga o lo latou faapotopotoga faalilolilo, na mafai ai e Akiso ma ana uo ona pulea le malo a Omera. Peitai, na lapatai atu le Atua ia Omera ia sosola ese ma lona aiga, o lea na faasaoina ai o latou ola. O le atalii amioleaga a Omera, o Iareto, na avea ma tupu ma tuuina atu lona afafine i a Akiso e ala i le faaipoipoga. Na faaauau pea e Akiso ma ana uo a latou fuafuaga faatiapolo, i le fasiotia o Iareto e oo lava i le atalii o Akiso. O nei amioga na taitai atu ai i se taua i le va o Akiso ma ona atalii lea na iu ai ina toeitiiti lava faatamaia uma ai Sa Iaretō ma toefuatai ai Omera i le nofoalii.

Faapotopotoga faalilolilo i le Tusi a Mamona

Atonu e te manao e tagai i le Taiala i Tusitusiga Paia, “Pulega Faalilolilo,” scriptures.ChurchofJesusChrist.org, mo isi faataitaiga i le Tusi a Mamona o loo faaalia ai lapataiga faaopoopo ma le matautia o faapotopotoga faalilolilo.