“3 Nifae 23: Suesueina o Tusitusiga Paia ma le Filigā,” Tusi Lesona a le Faiaoga o le Tusi a Mamona (2024)

“3 Nifae 23,” Tusi Lesona a le Faiaoga o le Tusi a Mamona

3 Nifae 23

Suesueina o Tusitusiga Paia ma le Filigā

O Keriso ma tagata i le atu Amerika o loo vaavaai i papatusi auro

O a mai au suesuega patino o tusitusiga paia? O le a le eseesega e faia e lenei mea i lou olaga? I le 3 Nifae 23, o loo faamamafa mai ai e Iesu le taua o le faasaoina ma le suesueina o tusitusiga paia ma upu a perofeta. O lenei lesona ua faamoemoe e fesoasoani ia te oe e suesue ma le filigā atili i afioga a le Alii.

Fesoasoani i tagata aoga e atiina ae tomai i suesuega. Ina ia fesoasoani i tagata aoga ia sili atu ona faamanuiaina i a latou suesuega o tusitusiga paia, fesoasoani ia i latou i le atiina ae o tomai eseese o le suesueina o tusitusiga paia. O nei tomai e tatau ona taulai atu e fesoasoani i tagata aoga e valaaulia le Agaga ia latou suesuega, malamalama atili i tusitusiga paia, ma iloa ma faaaoga aoaoga faavae ma mataupu faavae o le talalelei.

Sauniuniga a le tagata aoga: Valaaulia tagata aoga e faaalu se taimi e suesue ai tusitusiga paia a o lei faia lenei lesona, ia gauai faapitoa atu i mea latou te faia e atili anoa ai a latou suesuega. Fautuaina i latou e iloilo le taua ma le tulaga lelei o a latou suesuega ma le aafiaga o loo faia pe e le o faia, i o latou olaga.

Gaoioiga e Mafai Ona Aoao Ai

O au suesuega faaletagata lava ia o tusitusiga paia

A o lei amataina le vasega, mafaufau e nanā ni mea faitino eseese i le potu atoa. Tusi le upu “saili” i luga o le laupapa. Tau atu i tagata aoga mea o loo latou sailia, ma valaaulia i latou ia maua le tele o mea e mafai [ona] maua.

O le a le uiga o le ia saili?
O le a le mea e manaia pe fiafia ai e uiga i le saili?
O le a se mea e mafai ona faigata pe faalotovaivaia e uiga i ai?

O le valaaulia a le Faaola

Faitau le 3 Nifae 23:1–5, ma vaavaai mo mea na poloaiina i tatou e le Faaola e saili ma pe aisea.

Valaaulia tagata aoga e faasoa mai mea na latou maua.

I mataupu na muamua atu, na sii mai ai e le Faaola le tele o [upu] a Isaia e fesoasoani ma faamanuia ai sa Nifaē. (Tagai i le 3 Nifae 16:18–20; 20:32, 34–45; 21:8; 22:1–17.)

O a mafuaaga na tuuina mai e le Alii mo i tatou e saili ai i upu a Isaia? (tagai 3 Nifae 23:1–3).

Atonu e te manao e faaalu se taimi i le vasega e talanoaina ai le taua o aoaoga a Isaia. Mo se faataitaiga, e mafai ona e fai i le vasega e faasoa mai o latou lagona e uiga i upu a Isaia. E mafai ona latou faitau ma manatunatu i fuaiupu mai le Isaia ma mafaufau loloto pe aisea e taua ai ona sailiili. O faataitaiga e mafai ona aofia ai le Isaia 7:14; 9:6–7; 41:10; 49:13–16; 53:1–5; 55:1–3; 61:1–3.
E tusa ai ma le 3 Nifae 23:5, aisea e tatau ai ona tatou faalogo i afioga a le Alii ma upu a perofeta?

Faalogo ma le toto’a i tali a tagata aoga ma mafaufau e tusi i luga o le laupapa.

O se tasi o mataupu faavae taua tatou te aoaoina i lenei lesona o le, ua poloaiina i tatou e le Faaola ia faalogo atu i Ana afioga ma suesue ma le filigā i upu a perofeta.

O le a sou manatu i le uiga o le suesue i tusitusiga paia ma le filigā?

Faaalu se minute e manatunatu ai i lau suesuega o tusitusiga paia. O lenei mea e mafai ona aofia ai suesuega faaletagata lava ia ma faaleaiga faapea foi ma suesuega i le lotu ma le seminare. E te lagona ea ua e suesue ma le filigā i tusitusiga paia? Aisea pe aisea foi e leai ai?

O a nisi o mafuaaga e ono faigata ai ona suesue ma le filigā i tusitusiga paia?

A o fetufaai tagata aoga, fuafua e tusi a latou tali i luga o le isi itu o le laupapa. Afai e talafeagai, e mafai ona e tagai i le gaoioiga sailiili i le amataga o le lesona. Ina ia mafaufau i faigata e ono i ai, e mafai e tagata aoga ona faatusatusa le suesueina o tusitusiga paia i le sailia o mea faitino o loo i le gaoioiga.

O se tasi o tali atonu e mafai ona faigata ona faaalu se taimi e suesue ai i tusitusiga paia pe a tatou le lagonaina o loo tatou maua ai se mea taua. Pe atonu foi e faigata ona malamalama i ai pe ua le fiafia foi i ai. O se tasi o auala sili ona lelei e faatoilalo ai le tele o nei faigata o le iloa lea pe faapefea ona maua malamalamaaga po o upumoni e mafai ona fesoasoani ia i tatou i o tatou olaga.
E ui lava i nei faigata, o a nisi o mea na e faia, pe e mafai ona e faia, ina ia maua ai se aafiaga anoa i le suesueina o tusitusiga paia?

A o tali mai tagata aoga, fai se lisi i le isi itu o le laupapa. Afai e aoga, faaopoopo i ai soo se faataitaiga nei.

O nisi nei o faataitaiga:

Tatalo a e te le’i suesue.
Faailoga upu ma fasifuaitau taua, aemaise lava upu e fesoasoani ia te oe e iloa atili ai le Faaola.
Sue upu po o fasifuaitau e faigata ona malamalama i ai.
Taofi ma aotele mea sa e faitauina.
Faaaoga mau fefaasinoai e malamalama lelei ai i se autu po o se aoaoga faavae.

O Keriso o loo fetalai atu ia Nifae e uiga i faamaumauga

Ina ia faataitai ni tomai se lua, faitau le 3 Nifae 23:6–14 ma fai mea nei:

Aotele i au lava upu mea na e faitauina.
Faailoga soo se upu po o fasifuaitau e fesoasoani e te malamalama atili ai i le Faaola.

Valaaulia tagata aoga e faasoa mai mea na latou maua. Ina ia faia lenei mea, e mafai ona latou galulue taitoalua, faatasi ai ma le tasi tagata aoga e aotele ia fuaiupu ae ta’u mai e le isi ia upu po o fasifuaitau e fesoasoani latou te malamalama ai i le Faaola.

Afai e faigata i tagata aoga ona aotele mea na latou faitauina, e mafai ona e faamalamalama atu na fetalai atu le Faaola e fia vaai i faamaumauga a Sa Nifae. Sa Ia faailoa atu e faapea, o le valoaga a Samuelu e uiga i le au paia toetutu ua faaali atu i le toatele (tagai Helamana 14:25) ua faataunuuina, ae o le faataunuuga sa lei i ai i faamaumauga. Na poloaiina e le Faaola sa Nifaē e tusifaamaumau lenei tala.
O a upu ua faamanino mai ai e popole le Faaola i mea o loo tusia i tusitusiga paia?
E mafai faapefea e le iloaina o lenei mea e uiga i le Faaola ona aafia ai le ala e te suesue ai i tusitusiga paia?

Faataitai le suesueina lelei o tusitusiga paia

Faaalu ni nai minute e faataitai ai ona sailiili ma le filigā i tusitusiga paia. Atonu e te filifili e suesue se mataupu pe suesue fuaiupu e uiga i se autu e te manao e iloa atili. Faaaoga ia le itiiti ifo ma le tasi se tomai faatusipaia sa e mafaufau i ai pe mauaina i le lisi o i luga.

Tuu atu se taimi ia lava mo tagata aoga e faitau ma manatunatu ai. Valaaulia tagata aoga e faasoa mai se mea na latou suesueina e taua ia i latou ma po o a tomai na latou faaaogaina. O fesili nei ua faamoemoe e fesoasoani i se talanoaga.

O le a le auala suesue na e faaaogaina? Aisea e ono fesoasoani ai lenei mea ia te oe e suesue atili ai ma le filigā?
O le a se mea na e aoaoina e uiga i le Faaola e te lei malamalama muamua i ai?
O fea o nei tomai e mafai ona e faaaogaina i au suesuega o tusitusiga paia i le lumanai? O le a faapefea ona e faia?

I le gasologa o le vaiaso a sau, manatunatu i mea ua e aoaoina i le asō. Filifili se auala se tasi e mafai ona e taumafai ai e suesue ma le filigā atili i tusitusiga paia. Mafaufau pe mafai faapefea ona fesoasoani lenei mea ia te oe i lou olaga?

Manatu ma Talaaga o Faamatalaga

O a nisi o faamanuiaga e mafai ona oo mai i le suesueina o tusitusiga paia?

Na aoao mai Elder Richard G. Scott (1928–2015) o le Korama a Aposetolo e Toasefululua:

16:8

O le mafaufau loloto i se savali mai se mau e mafai ona avea ma se ki e tatala ai faaaliga ma taitaiga ma musumusuga a le Agaga Paia. E mafai e se mau ona faatoafilemuina se agaga le fiafia, tuu atu le filemu, faamoemoe, ma se toefuataiga o le talitonuina o tomai o se tasi e faatoilalo ai luitau o le olaga. Ua i ai ia i latou se mana malosi e faamalolo ai luitau faalelagona pe afai o i ai le faatuatua i le Faaola. E mafai ona latou faatele’a’ia le faamalologa faaletino. (Richard G. Scott, “O le Mana o Tusitusiga Paia,” Liahona, Nov. 2011, 6)

E mafai faapefea e le faitauina o le Tusi a Mamona ona fesoasoani i lo’u aiga?

Sa aoao mai Peresitene Henry B. Eyring o le Au Peresitene Sili:

E ala i le Tusi a Mamona e mafai ai foi e le Alii ona aoao i tatou e uiga i le i ai faatasi ma auauna atu i tagata. O lenei tusi ua faaalia ai le finagalo o le Alii mo le olaga faaleaiga i se auala e le o maua i isi tusitusiga paia. Ou te talitonu o le tele lava ona o lona faatulagaga mataina. E faatatau i aiga; e faatatau i sootaga a tagata. E amata i aiga, e faaiu i aiga, ma e tatou te alolofa i nei aiga. (Henry B. Eyring, “O se Talanoaga i le Suesueina o Tusitusiga Paia,” Liahona, Iulai 2005, 22)

E mafai faapefea ona ou faaleleia a’u lava suesuega o tusitusiga paia?

Na aoao mai Elder David A. Bednar o le Korama o Aposetolo e Toasefululua:

O se tasi o auala sili e faalatalata atu ai ia te Ia ma aoao ai e uiga i ai ma avea atili e pei o le Alii o Iesu Keriso o le suesue pea lava pea i tusitusiga paia—ia “taumamafa fiafia i afioga a Keriso” i aso uma. (2 Ni. 32:3).

Faamolemole ia matau sa ou faaaogaina le upu suesue ae le o le upu faitau. O le suesue ma le taumamafa e fautua mai ai se taulaiga ma se malosi lea e oo atu i tua atu o faitauga faasamasamanoa po o le faavavevave. O le suesue ma le taumamafa, sosoo ai ma le tatalo faamaoni ma le faaaogaina mausali o upumoni ma mataupu faavae tatou te aoaoina, e tuuina atu ai le naunautaiga patino, tautinoga faaleagaga, ma le malamalama susulu o le molimau. O le suesue, aoaoina, tatalo, ma le faaaogaina ma le talafeagai o upumoni o le talalelei o elemene autu uma ia i le faagasologa o le o mai i le Faaola. (David A. Bednar, “Because We Have Them before Our Eyes,” New Era, Ape. 2006, 4)

Gaoioiga Faaopoopo e Aoao Ai

3 Nifae 23:1 “Ua silisili lava upu a Isaia”

O lenei gaoioiga e mafai ona uunaia ai tagata aoga e suesue i upu a Isaia. E mafai e tagata aoga ona faitau le 3 Nifae 20:11; 23:1, lea ua poloaiina ai i tatou e le Faaola e suesue i upu a Isaia. E mafai foi e tagata aoga ona faitau le 1 Nifae 19:23; 2 Nifae 6:5; 25:7–8, ma vaavaai mo mafuaaga faaopoopo e suesue ai le Isaia.

Ona valaaulia lea o tagata aoga e saili i aoaoga a Isaia mo ni malamalamaaga e taua ia i latou. O nisi o faataitaiga o le Isaia 1:18; 9:6; 26:3–4; 40:31; 41:10; 48:17; 53:3–5; 55:1, 8–9.

Faamamafaina o le seminare

A o talanoaina e tagata aoga pe faapefea ona suesue ma le filigā i tusitusiga paia, faamalo atu i lo latou auai i le seminare ma le suesueina o tusitusiga paia i le vasega. O se tasi o faamoemoega o le seminare o le fesoasoani lea i talavou laiti ia faalatalata atili atu i le Faaola e ala i tusitusiga paia. Mafaufau e fesili, “Na faapefea ona fesoasoani le seminare ia te oe e suesue atili ai ma le filigā ia tusitusiga paia?”

Faamaumau ni aafiaga faaleagaga.

Afai e aoga le taulai atu i le tusifaamaumauina o aafiaga faaleagaga, aumai se api talaaga, pe faaali ni ata po o vitio o manatuaga mai lou olaga. E mafai foi ona e fai i tagata aoga e aumai a latou lava api talaaga, ata, po o vitio i le vasega e faasoa mai. Fesili atu pe aisea e taua ai le tusifaamaumauina o aafiaga.

Valaaulia tagata aoga e faitau le 3 Nifae 23:6–13, ma vaavaai mo le aafiaga na lei faamaumauina e sa Nifae. Fesoasoani i tagata aoga e faailoa mai le upumoni faapea o le tusifaamaumauina o aafiaga faaleagaga e mafai ona fesoasoani e faamalosia ai o tatou faatuatua ma faatuatua o isi.

Mafaufau e faasoa atu le aafiaga o Peresitene Henry B. Eyring i le tusifaamaumauina o aafiaga faaleagaga na ia faasoa mai i lana saunoaga “Ia Manatua, Ia Manatua Lava” (Liahona, Nov. 2007, 66–69). Pe faasoa atu se faataitaiga mai le savali a Elder Neil L. Anderson’s “O Manatuaga Musuia Faaleagaga” (Liahona, Me 2020, 18–22) ma faitau parakalafa e lua mulimuli o le lauga.

Tuu atu i tagata aoga se taimi e faamaumau ai a latou aafiaga faaleagaga. Fesoasoani ia i latou ia iloa o aafiaga faaleagaga atonu e le o se mea e matua maoae pe ofoofogia, ae e fai si faigofie ma, i le taimi lava e tasi, e taua tele. Valaaulia tagata aoga e faasoa mai pe aisea e mafai ai e le tusifaamaumauina o aafiaga faaleagaga faaletagata lava ia ona faamalosia o tatou faatuatua ma faatuatua o isi.