“Helamana 3; 6: ‘Ua Faapea Ona Tatou Vaai Ai,’” Tusi Lesona a le Faiaoga o le Tusi a Mamona (2024)

“Helamana 3; 6,” Tusi Lesona a le Faiaoga o le Tusi a Mamona

Helamana 3; 6

“Ua Faapea Ona Tatou Vaai Ai”

O Mamona o loo mafaufau loloto a o tusitusi

Vaai faalemafaufau i le tusiaina o se tusi e fesoasoani ai i tagata ia o le a ola i le fiaselau tausaga i le lumanai. O le mea tonu lava lena na faia e le perofeta o Mamona. A o ia otootoina le talafaasolopito o sa Nifae ma togitogia i luga o papatusi auro, sa ia faailoa mai i nisi taimi ia upumoni taua e faaaoga ai faamatalaga e faapei o le “ua faapea ona tatou vaai ai.” O upumoni sa ia faamamafaina e mafai ona fesoasoani ia i tatou i luitau o loo tatou feagai ai i aso nei. O lenei lesona e mafai ona fesoasoani ia te oe e faailoa ai upumoni mai tusitusiga paia ma iloilo ai pe mafai faapefea e na upumoni ona aafia ai lou olaga.

Fesoasoani i tamaiti aoga e aoao mai upu ma fasifuaitau autu. O upu po o fasifuaitau faapitoa i mau e mafai ona maua ai ni faaataataga o le faatatauga mo le au faitau. Fesoasoani i tamaiti aoga ia iloa upu e faasino i aoaoga faavae ma mataupu faavae taua e talafeagai i aso nei.

Sauniuniga a le tamaitiiti aoga: Valaaulia tamaiti aoga e vaavaai mo se upumoni taua se tasi pe lua i le taimi o a latou suesuega o tusitusiga paia faaletagata lava ia pe faaleaiga . Fai atu ia i latou e sauni e faamatala mai pe faapefea ona latou mauaina upumoni anoa i mau.

Gaoioiga e Ono Mafai Ona Aoao Ai

O se tusi taiala mo le ola faasaoina

Amata le lesona i se gaoioiga lea e fesoasoani ai i tamaiti aoga e mafaufau ai pe faapefea ona aoga tusitusiga paia i o latou olaga. E mafai ona fesoasoani lenei mea ia i latou ia mananao atili ai e saili ma le filiga mo aoaoga faavae ma mataupu faavae i tusitusiga paia. O se tasi lenei o auala e faatino ai lenei mea.

Afai na talosagaina oe e tusi se taiala mo le ola faasaoina e aoga mo le au 12- ma le 13 tausaga le matutua, o le a se mea o le a e faaaofia ai?

Faitau le saunoaga a Peresitene Russell M. Nelson e uiga i se taiala mo le ola faasaoina mo lou olaga:

O perofeta [o le Tusi a Mamona], e pei ona musuia ai e le Alii, na vaai i o tatou aso ma filifilia le aoaoga faavae ma upumoni o le a fesoasoani sili ia i tatou. O le Tusi a Mamona o lo tatou taiala mo le ola faasaoina lea o aso e gata ai . (Russell M. Nelson, “Opogi le Lumanai i le Faatuatua,” Liahona, Nov. 2020, 75)

O faapefea ona fesoasoani aoaoga faavae ma upumoni o loo e mauaina i tusitusiga paia e faasaoina ai oe faaleagaga? E mafai ona e mafaufau i ni faataitaiga lata mai nei?

A o e suesue i le Helamana 3 ma le Helamana 6, o le a e maua le avanoa e faataitai ai le faailoaina o aoaoga faavae ma mataupu faavae mai tusitusiga paia. E mafai ona fesoasoani lenei mea ia te oe ia anoa atili ai le suesueina o tusitusiga paia ma faalatalata atili atu ai oe ma lou aiga ia Keriso.

“Ua faapea ona tatou vaai ai …”

I le lotolotoi o finauga uma o loo faamaumauina i le Helamana 1–6, sa i ai ni nai taimi o le filemu. I le Helamana 3, e faitau afe na papatisoina i le Ekalesia, ma sa sologa manuia le Ekalesia. I le Helamana 6, ina ua mavae le liua o le toatele o sa Lamana, sa ola sa Nifae ma sa Lamana i le lotogatasi a o liliu atu vaega uma e lua i le Alii. I mataupu uma nei e lua, na taofia ai [mo sina taimi] e Mamona lana faamatalaga o le talafaasolopito o sa Nifae ina ia faamamafa aoaoga faavae ma mataupu faavae taua o le upumoni. Sa ia faia lenei mea e ala i le faaaogaina o le faamatalaga “ua faapea ona tatou vaai ai.”

O le gaoioiga lenei ua faamoemoe e aoao ai tamaiti aoga e vaavaai mo upu po o fasifuaitau ia e fesoasoani ia i latou e faailoa mai ai aoaoga faavae po o mataupu faavae ma vaai pe mafai faapefea e na upumoni ona aafia ai o latou olaga.

Mafaufau e tuu tamaiti aoga i ni vaega toalaiti po o ni paga ma faaali atu faatonuga mo i latou e mulimuli ai.

Faitau le Helamana 3:27–30; 6:34–36 e faailoa mai ai o le “ua faapea ona tatou vaai ai” o faamatalaga o le upumoni. Mafaufau ia faailoga na upumoni i au tusitusiga paia ma tusifaamaumau i latou i au lava upu i lau api faamaumau mo suesuega.

E ui atonu e faaaoga e tamaiti aoga ni upu eseese, ae latou te ono faailoa maia mataupu faavae e pei o nei:

E alofa mutimutivale le Alii ia i latou uma o e valaau atu ia te Ia ma loto faamaoni (tagai Helamana 3:27).
O loo matala le faitotoa o le lagi ia i latou uma o e talitonu ia Iesu Keriso (tagai Helamana 3:28).
Soo se tasi o le ua manao iai e mafai ona suesue i le afioga a le Atua, lea o le a taitai atu ai i latou i le malo o le Atua (tagai Helamana 3:29–30).
O le sili atu ona lelei o lo tatou iloa o le Atua, o le tele foi lena o lo tatou ono tausia o Ana poloaiga (tagai Helamana 6:34).
Afai tatou te amioleaga ma faamaaa o tatou loto, ona aluese lea o le Agaga o le Alii mai ia i tatou (tagai Helamana 6:35).
Afai tatou te filifili e talitonu ma le naunautai i afioga a le Alii, ona Ia liligi mai lea o Lona Agaga i o tatou luga (tagai Helamana 6:36).

Afai o le a manuia tamaiti aoga mai le suesueina loloto o se tasi pe sili atu o nei mataupu faavae, tagai i vaega o le “Manatu ma Talaaga o Faamatalaga” ma le “Gaoioiga Faaopopo e Aoao ai” mo ni manatu o loo maua i le polokalama o le Potutusi o le Talalelei poo le Potutusi o le Talalelei i le Initoneti.

O se isi filifiliga o le tuu atu lea i tamaiti aoga o se taimi faaopoopo e faataitai ai le faailoaina o upumoni. Mafaufau e fai atu ia i latou e tusi isi fuaitau o le “ua faapea ona tatou vaai ai” mai se fuaiupu o le atamai i aoaoga faavae, o se mea sa latou suesueina talu ai nei i le aiga, po o se isi fuaiupu e sili ona fiafia i ai latou te filifilia.

E sosoo ai, filifili se tasi o upumoni na e mauaina, ma lisi nisi o mea matautia faaleagaga, luitau, po o osofaiga o le faatuatua lea e mafai ona fesoasoani lenei upumoni e faasaoina ai oe{. Mo se faataitaiga, afai na e faaaogaina le upumoni afai tatou te filifili e talitonu ma le naunautai i afioga a le Alii, ona Ia liligi mai lea o Lona Agaga i o tatou luga (tagai Helamana 6:36), atonu e te lisiina mea matautia e pei o le manaomiaina o se faamaoniga faasaienisi a o lei talitonu i tusitusiga paia, talitonuina o tagata atamamai faapitoa faalelalolagi e sili atu nai lo le talitonuina o perofeta, po o le faatuatuaina o manatu o tagata nai lo o uunaiga faaleagaga.

Manatua le saunoaga a Peresitene Nelson mai le amataga o lenei lesona e uiga i le Tusi a Mamona o lo tatou taiala mo le ola faasaoina i aso e gata ai.

Afai e maua, saunia ni penivali, penitala lanu, po o ni penimaka mo tamaiti aoga e fatu ai se itulau e tasi o le “taiala mo le ola faasaoina. E mafai ona latou faia mea nei taitoatasi pe i ni vaega.

I luga o se fasipepa tusi ai le “Auala e faasaoina ai …” ma faauma le faamatalaga i se tasi o tulaga matautia, luitau, po o osofaiga na e lisiina. Mo se faataitaiga, afai na e faaaogaina le upumoni na faailoaina muamua, e mafai ona e tusia, “O le auala e faasaoina ai mai le osofaiga o se uunaiga faaleagaga.” Faaaoga le upumoni na e filifilia e fatu ai se taiala e tasi le itulau mo le ola faasaoina. Faamatala i ata tusi po o upu le auala e mafai ai e lenei upumoni ona fesoasoani i se talavou ia faasaoina ai faaleagaga. Faaaofia ia le itiiti ifo ma le lua o ni manatu nei i totonu o lau taiala mo le ola faasaoina:

O pogai e mafai ai e lenei upumoni ona fesoasoani i se tasi ia faasaoina ai faaleagaga mai le tulaga faigata na e lisiina
O isi mau e fesootai i lenei upumoni pe fesoasoani i le tulaga faigata na e lisiina
O le auala e aumaia ai e lenei upumoni oe po o isi ia Iesu Keriso pe fesoasoani ai ia te oe ia maua Lona malosi
O le a se mea e mafai ona tupu i tagata pe afai e le o iloa pe le o mulimulitaia lenei upumoni
O le ala o le a suia ai le lalolagi pe afai na filifili tagata uma e ola i lenei upumoni

Valaaulia tamaiti aoga e faasoa atu a latou taiala mo le ola faasaoina i isi vaega po o le vasega atoa. A o latou faia, mafaufau e valaaulia i latou e faasoa atu ni aafiaga patino na latou maua e faatatau i upumoni sa latou faamamafaina. Mo se faataitaiga, afai e faaaoga e tamaiti aoga le upumoni afai tatou te filifili e talitonu ma le naunautai i afioga a le Alii, ona Ia liligi mai lea o Lona Agaga i o tatou luga (tagai Helamana 6:36), e mafai ona e fesili atu pe na faapefea ona latou lagonaina Lona Agaga a o suesueina ma faaaogaina Ana upu mai le Tusi a Mamona.

Uunaia tamaiti aoga e vaavaai mo aoaoga faavae ma upumoni taua a o latou suesue i tusitusiga paia. Molimau atu i le mana o le afioga a le Atua.

Manatu ma Talaaga o Faamatalaga

Helamana 3:27–28. Ou te tauivi ma le tele o mea. O matala moni mai ea le faitotoa o le lagi ia te au?

Na aoao mai Elder J Devn Cornish o le Fitugafulu:

E tele ina tatou faalogo i o tatou tagata o fesili, “O lava ea lo’u lelei o se tagata?” po o le “Pe o le a ou ausia moni ea le malo selesitila?” Ioe, e leai se mea faapea o le “lava o le tulaga lelei.” E leai ma se tasi o i tatou e mafai ona “galueaina” pe “agavaa” mo lo tatou faaolataga, ae o se mea masani lava le tomanatu pe faamata e taliaina i tatou i luma o le Alii, ona o le auala lea ou te malamalama ai i nei fesili. …

… O le Atua o le lagi e le o se laufalī le alofa o loo saili i soo se ‘alofaga e lafoai ese ai i tatou mai le taaloga. O Ia o lo tatou Tama e alofa atoatoa, ua naunau atili mai i lo se isi lava mea ia toe foi uma atu Lana fanau i le aiga ma mau faatasi ma Ia o ni aiga e faavavau. Na Ia foai moni mai lava Lona Alo e Toatasi na Fanaua ina ia le fano i tatou ae maua le ola e faavavau! [tagai Ioane 3:16]. Faamolemole ia talitonu, ma faamolemole ia faamoemoe ma faamafanafanaina, mai lenei upumoni e faavavau. Ua faamoemoe lo tatou Tama Faalelagi ia tatou ausia! O Lana galuega ma Lona mamalu lena [tagai Mose 1:39].

E leai ma se tasi o i tatou o le a “lava le lelei,” vagana ai e ala i le alofa ma le alofa mutimutivale o Iesu Keriso, [tagai 2 Nifae 2:6–8], ae ona e faaaloalogia e le Atua la tatou faitalia, e le mafai ai foi ona laveaiina i tatou e aunoa ma lo tatou taumafai. (J. Devn Cornish, “O Lava Ea Lo’u Lelei? Pe O Le A Ou Ausia Ea?,” Liahona, Nov. 2016, 32–33, 34)

Helamana 6:35–36. O le a le uiga e faapea na amata ona alu ese le Agaga o le Alii?

Sa aoao mai Elder David A. Bednar o le Korama a Aposetolo e Toasefululua e faapea, o a tatou filifiliga ma faatinoga e mafai ona mafua ai lo tatou o ese mai le Agaga Paia:

16:33

E patino lava talu ai o le faamanuiaga folafolaina [o le papatisoga ma le faamanatuga] o le ia tatou maua pea Lona Agaga e faatasi ma i tatou, e tatau ona tatou gauai atu ma aoao mai filifiliga ma aafiaga ia e vavaeese ai i tatou mai le Agaga Paia.

E manino lava le tulaga faatonuina. Afai o se mea tatou te mafaufau i ai, vaai i ai, faalogoina, pe faia foi e faataumamao ai i tatou mai le Agaga Paia, o lona uiga ua tatau loa lava ona taofia loa le mafaufau i ai, vaai i ai, faalogologo i ai, po o le faia o lena mea. Afai o lena mea o loo faamoemoe e faafiafia ai, e tavavae ese mai ai i tatou mai le Agaga Paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le Agaga ma mea faatufanua, o mea paaa, pe le tausaafia foi, o lona uiga e manino lava e le mo i tatou foi na mea. Auā tatou te tuleiesea le Agaga o le Alii pe a tatou auai i gaoioiga ua tatou iloa e tatau ona tatou lafoa’ia, o lona uiga e le mo i tatou na ituaiga o mea. (David A. Bednar, “Ina ia Tatou Maua Pea Lona Agaga e Faatasi ma i Tatou,” Liahona, Me 2006, 30)

Gaoioiga Faaopoopo e Aoao Ai

Helamana 3:27–28. “E alofa mutimutivale le Alii ia te i latou uma o e e …”

Mafaufau e faamamafa atu le alofa mutimutivale o le Alii i le taliaina o i “latou uma o e e valaau atu i lona suafa paia” pe “talitonu i le suafa o Iesu Keriso” (Helamana 3:27–28).

E mafai e tamaiti aoga ona faitau le Helamana 3:24–26, ma vaavaai pe na faapefea ona maua e le Ekalesia le salamo ma faamanuiaga na latou maua mai le Atua. Mafaufau e talanoaina pe aisea e finagalo ai le Atua ia avea tagata uma ma se vaega o Lana Ekalesia ma pe mafai faapefea ona tatou fesoasoani i tagata uma ia lagona le taliaina ma le alofaina.

Helamana 3:28. O loo matala le faitotoa o le lagi ia i latou uma o e e talitonu ia Iesu Keriso

Mafaufau e valaaulia tamaiti aoga e fefaasinoa’i le Helamana 3:28 ma le 2 Nifae 31:17–20. Talanoaina pe faapefea ona tatou tatalaina le faitotoa o le lagi e ala i sauniga o le papatisoga ma le faamauga. E mafai foi ona e talanoa e uiga i le “ala e tau atu i le ola e faavavau” (2 Nifae 31:18) ma le ala e mafai ona tatou mulimuli atu ai ma le faatuatua ia Iesu Keriso. E mafai e tamaiti aoga ona tusi ata o nisi o faailoga autu i nei fuaiupu ma faamatala atu mea o loo latou suitulaga ai.

Helamana 6:34. O le sili atu ona lelei o lo tatou iloa o le Atua, o le tele foi lena o lo tatou ono tausia o Ana poloaiga

E mafai ona e valaaulia tamaiti aoga e fefaasinoa’i le Helamana 6:34 ma le Mosaea 5:13; Ioane 14:15; po o le Ioane 15:13–15. Talanoaina mea e mafai ona tatou aoao mai le faataitaiga a sa Lamana ma nei fuaitau o mau.

Helamana 6:35–36. “Ua amata ona alu ese o le Agaga o le Alii”

Tusi le ata lenei i luga o le laupapa:

E mafai e tamaiti aoga ona faitau le Helamana 6:34–36, ma vaavaai mo faatinoga po o amioga ia e mafai ona taunuu atu i se faatelega po o le faaitiitia o faatosinaga a le Agaga Paia. E mafai ona latou tusia nei manatu i luga po o lalo ifo o le ata, e faalagolago i le auala e tosoina ai i tatou e na faatinoga po o amioga e faatatau i le Atua.

Mafaufau e faasino i le saunoaga a Elder David A. Bednar i le vaega o le “Manatu ma Talaaga o Faamatalaga”.

Valaaulia volenitia e faasoa atu pe na faapefea e faatinoga o loo i le afa pito i luga o le laupapa ona fesoasoani ia i latou e atiina ae ai le magafagafa sili atu i faatosinaga a le Agaga Paia. Talanoaina po o a isi mea e mafai ona tatou aoao mai i le faataitaiga a sa Nifae amiotonu ma sa Lamana i le Helamana 6:1–3, 34–36.