”Iakopo 4: ‘E Le Maluelue ai lo Matou Faatuatua,’” Tusi Lesona a le Faiaoga o le Tusi a Mamona (2024)

“Iakopo 4”, Tusi Lesona a le Faiaoga o le Tusi a Mamona

Iakopo 4

“E Le Maluelue ai lo Matou Faatuatua”

O le vaneina o upu i papatusi apamemea sa le o se galuega faigofie (tagai Iakopo 4:1). Aiseā la o le a taumafai ai Iakopo e fai? Sa ia lagonaina le olioli i le iloaina sa finagalo le Faaola e fesoasoani ia i tatou ia o mai foi i le Faaola. O lenei lesona e mafai ona fesoasoani ia te oe e faamalosia lou faatuatua ia Iesu Keriso e ala i le faailoaina, faamaumauina, ma le mafaufau loloto i mataupu faavae ma upumoni na aoao mai e Iakopo.

Faailoaina o mataupu faavae ma aoaoga faavae i tusitusiga paia. Fesoasoani i tagata aoga e aoao e faailoa mai aoaoga faavae ma mataupu faavae i tusitusiga paia e ala i taumafaiga magafagafa ma faataitaiga. O nisi taimi e ta’ua manino ai nei mea, ae o isi taimi e faamauina i se tala faatusipaia. A o faaleleia atili e tagata aoga lenei tomai, o le a sili atu ona latou liliu atu i tusitusiga paia mo le taitaiga ma tali i fesili.

Sauniuniga a le tagata aoga: Mafaufau e valaaulia tagata aoga e faitau le Iakopo 4:7–14 ma saunia e faasoa mai se mataupu faavae po o se upumoni latou te maua latou te lagona e faapitoa ona manaomia i le lalolagi i aso nei.

Gaoioiga e Ono Mafai Ona Aoao Ai

O le a se mea o le a e faasoa atu?

Mo le gaoioiga tusitusi lenei, mafaufau e valaaulia tagata aoga e faitau le faamatalaga a Iakopo o le faigata o le tusitusi i luga o papatusi i le Iakopo 4:1–3. Ona valaaulia lea o tagata aoga e faaaoga soo se mea faitino malō e ese mai se peni po o se penitala e osiosi pe “togitogi” ai se parakalafa puupuu i luga o se fasi pepa alumini po o se pepa. E mafai ona fesoasoani lenei mea ia i latou e talisapaia atili ai le galuega na faia e Iakopo e tusifaamaumau ai ana upu mo i tatou.

Na faataunuuina e Iakopo se poloaiga e tusi i luga o papatusi laiti “ni mea itiiti ua [ia] manatu ua sili ona pele” (Iakopo 1:2) mo tupulaga i le lumanai e faitau (tagai Iakopo 4:1–3). Vaai faalemafaufau ua faapena foi ona talosagaina oe e tusi se savali puupuu mo tagata i le lumanai.

Tusi se parakalafa se tasi o loo i ai mea e sili ona taua ua e iloa pe na e oo i ai mo lau fanau ma fanau a fanau i le lumanai e faitau i ai.

Valaaulia tagata aoga o ē lagona le to’a e faasoa mai i le vasega se vaega o mea sa latou tusia.

O le savali a Iakopo ia i tatou

A o e suesue i le savali na musuia Iakopo e togitogia i le Iakopo 4 mo tagata i o tatou aso e faitau ai, o le a e maua se avanoa e faataitai ai le faaaogaina o tomai aogā mo le suesueina o tusitusiga paia. O nei tomai ua aofia ai le:

Faailoaina ma le faamaumauina o mataupu faavae ma upumoni
O le mafaufau loloto ma le faia o fesili e fesoasoani ia te oe e te malamalama atili ai i upumoni ma mataupu faavae

O le faaaogaina o nei tomai e mafai ona fesoasoani ia te oe e aoao ma lagona atili ai mai le Agaga Paia a o e suesue i tusitusiga paia.

O le vaega lenei o le lesona ua faamoemoe e tuu atu ai i tagata aoga se faataitaiga o le auala e faaaoga ai nei tomai suesue.

1. Faailoaina ma le faamaumauina o mataupu faavae ma upumoni

E aoga le taofi pe a e faitau i tusitusiga paia ma tusifaamaumau mea e te aoaoina o ni faamatalaga faigofie o le upumoni. E mafai ona e faaaogaina au lava upu pe faaaoga sao lava upu ma fasifuaitau mai tusitusiga paia.

Faataitai le faailoaina o mataupu faavae ma upumoni e ala i le:

Faitauina o le Iakopo 4:1, 4–6, ma vaavaai mo mea na musuia ai Iakopo e tusifaamaumau e uiga i le Faaola.
Faailogaina o upu ma fasifuaitau e anoa ia te oe.
Faamaumauina i lau api talaaga mo suesuega po o au tusitusiga paia mea e te lagona o savali aupito sili ona taua i nei fuaiupu.

Valaaulia tagata aoga e faasoa mai faamatalaga o mataupu faavae po o upumoni na latou mauaina. Afai e manaomia e tagata aoga se faataitaiga, mafaufau e faasoa atu le mataupu faavae faamatamatatetele i le parakalafa lenei.

O se faataitaiga o se mataupu faavae e mafai ona e faailoa mai le fuaiupu 6 o le suesueina ma le faamaoni i upu a perofeta o le a faamalosia ai lo’u faatuatua ia Iesu Keriso. Mafaufau e faamaumau lenei mataupu faavae i lau api talaaga mo suesuega po o au tusitusiga paia i tafatafa o le fuaiupu 6.

2. Mafaufau loloto ma fai ni fesili

O le mafaufau loloto e mafai ona fesoasoani ia te oe e malamalama ai ma faaaoga mataupu faavae ma upumoni e te faailoaina. E mafai ona e mafaufau loloto i fesili e pei o nei:

Mafaufau e faaali atu pe saunia se kopi o fesili nei. E mafai ona fesoasoani lenei mea i tagata aoga ia malamalama atili ai i le auala e faaaoga ai lenei tomai suesue. O le a mafai ai foi ona latou faasino atu i ai a o latou faataitai le faaaogaina o lenei tomai e i latou lava i se taimi o mulimuli mai o le lesona.

Aisea ou te manatu ai e manaomia e tagata i o tatou aso ona iloa lenei upumoni?
E faapefea ona faatatau i lo’u olaga?
O le a se mea e finagalo le Alii ou te faia ona o mea sa ou aoaoina?

A mae’a se taimi e mafaufau loloto ai, valaaulia tagata aoga e faasoa mai mea na latou aoaoina a o latou mafaufau loloto i le mataupu faavae po o le upumoni na latou mauaina i lenei fuaitau. Mafaufau e faasoa atu se aafiaga patino o le ala ua faamanuiaina ai lou olaga e se upumoni o loo maua i lenei fuaitau.

O le vaega lenei ua faamoemoe e fesoasoani i tagata aoga e faataitai ai tomai o le faailoaina, faamaumauina, ma le mafaufau loloto i mea ua latou aoaoina mai tusitusiga paia. Mafaufau e valaaulia tagata aoga e filifili pe latou te mananao e galulue ma se paga pe na o i latou taitoatasi e faamaea lenei gaoioiga.

Faataitai le faaaogaina o tomai mo le suesueina o tusitusiga paia

Faataitai tomai o le faailoaina, faamaumauina, ma le mafaufau loloto i mataupu faavae ma upumoni e ala i le:

Suesueina o le Iakopo 4:7–14, saili mo aoaoga taua na filifili Iakopo e faamaumau e uiga i le Faaola.
Faamaumau i lau api talaaga mo suesuega po o au tusitusiga paia se mataupu faavae se tasi po o se upumoni e te lagona e taua mo tagata i le lalolagi i aso nei ia malamalama i ai.

Mafaufau e taofi a o lei faasoaina atu le isi laasaga e valaaulia ai volenitia e tusi i luga o le laupapa se mataupu faavae po o se upumoni na latou faailoaina mai. O lenei mea o le a faaalia ai faataitaiga o mataupu faavae ma upumoni i tagata aoga o e e itiiti le poto masani i le faailoaina o ia mea.
Mafaufau loloto i le taua o mea na e mauaina. Fai fesili e mafai ona fesoasoani ia te oe e malamalama atili ai ma faaaoga i lou olaga. (O faataitaiga o fesili e mafai ona e mafaufau loloto i ai o loo maua i le vaega o le “Mafaufau loloto ma fai fesili” i le amataga o le lesona.)

Faailoa atu i tagata aoga o le a i ai ni nai minute latou te sauniuni ai e faasoa atu le mataupu faavae po o le upumoni sa latou filifilia, o a fuaiupu na latou mauaina ai, ma pe aisea latou te manatu ai e taua. E mafai ona latou saunia e tau lava o le ta’u atu i isi tagata aoga o mea sa latou aoaoina. Pe e mafai foi ona latou saunia e faasoa atu i isi auala, e pei o le fatuina o se ata malie, tusiina o se ata, po o le saunia o se tusiga e mafai ona faasoa atu i luga o ala o faasalalauga faaagafesootai. O faamatalaga ua faamatamatateteleina e mafai ona faaali atu e fesoasoani ai i tagata aoga a o latou sauniuni.

Vaavaai mo tagata aoga o e atonu e manaomia le fesoasoani, ma tuuina atu le fesoasoani. Mafaufau e faasoa atu faamatalaga talafeagai mai le vaega o “Manatu ma Talaaga o Faamatalaga” ma “Gaoioiga Faaopoopo e Aoao Ai”.

O le auala e mafai ai ona fesoasoani le mataupu faavae po o le upumoni i se talavou e faamalosia ai lo latou faatuatua ia Iesu Keriso
O isi fuaitau o mau po o faamatalaga mai taitai o le Ekalesia e fesoasoani e te malamalama atili ai i lenei mataupu faavae po o le upumoni
O mea e mafai ona e mafaufau loloto i ai ma fesili e mafai ona e fai atu e fesoasoani e te malamalama atili ai i lenei mataupu faavae po o le upumoni
O auala e mafai ona e faaaogaina ai mea ua e aoaoina e faamalosia ai lou faatuatua ia Iesu Keriso
O aafiaga pe a faamanuiaina oe po o i latou e te iloa e ala i le faaaogaina o mea na aoao mai e Iakopo

Valaaulia tagata aoga e feoai solo i le potu, sue se isi tagata aoga, ma feauauai e faasoa mai mea sa latou saunia mo le tusa ma le lua minute a le tagata. Pe a lava le taimi, ona mafai lea e tagata aoga ona fesuiai paga ma feauauai e faasoa mai mea sa latou toe saunia.

A uma ona latou faasoa mai, valaaulia tagata aoga e faamaumau ia latou api talaaga mo suesuega soo se mea na latou aoaoina latou te mananao e faaaoga i o latou olaga. Valaaulia i latou e faaaoga tomai sa latou faataitaia i le vasega i le asō i a latou suesuega faaletagata lava ia o tusitusiga paia.

Manatu ma Talaaga o Faamatalaga

Iakopo 4:10. E mafai faapefea e tagata lelei ona pauu atu i le mailei o le le taliaina o fautuaga mai le Atua?

Na aoao mai Peresitene Marion G. Romney (1897–1988) o le Au Peresitene Sili:

Ou te le manatu e toatele tagata o le Ekalesia e [mulimuli] i faatauanau a tagata po o a latou lava fautuaga nai lo le gauai atu i le finagalo o le Alii. Ae peitai, pe a tatou te le fautuaina i tatou lava po o le a le finagalo o le Alii, o le a tatou mafuli atu i le suitulaga a tatou lava fautuaga mo Lana. O le mea moni, e leai lava se isi mea e mafai ona tatou faia, ae ia mulimuli i a tatou lava fautuaga pe a tatou le iloa le finagalo o le Alii. (Marion G. Romney, “Seek Not to Counsel the Lord,” Ensign, Aok. 1985, 5)

Iakopo 4:14. O a nisi o auala e vaavaai ai tagata “i tala atu o le faailoga” i aso nei?

Na aoao mai Elder Quentin L. Cook o le Korama a Aposetolo e Toasefululua:

O nisi tagata o le ekalesia ua faasili atu ni mafuaaga, o le tele lava o ni mea lelei, i se tulaga e sili atu i lo aoaoga faavae autu o le talalelei. Ua latou suitulaga lo latou tuuto atu i le galuega e fai ma a latou faamuamua ae tuualalo lo latou tuuto atu i le Faaola ma Ana aoaoga i se tulaga lona lua. Afai tatou te faamuamua soo se mea i luga atu o lo tatou tuuto i le Faaola, afai o a tatou amioga ua iloa ai ua na o Ia o se isi faiaoga ae le o le Alo paia o le Atua, o lona uiga ua tatou vaai i tala atu o le faailoga. O Iesu Keriso o le faailoga! (Quentin L. Cook, “Totoa i le Molimau ia Iesu,” Liahona, Nov. 2016, 43)

Gaoioiga Faaopoopo e Aoao Ai

Iakopo 4:6–7. “E ui i lea, ua faailoa mai ia te i matou e le Alii le Atua o matou vaivaiga”

Valaaulia tagata aoga e faailoga le upu “e ui i lea” i le Iakopo 4:7. Ona valaaulia lea o i latou e vaavaai mo manatu na aoaoina muamua i le fuaiupu 6 ma pe a tuanai le upu i le fuaiupu 7. E mafai ona e faaaogaina le Eteru 12:27 e talanoaina ai pe aisea ua tuuina mai ai e le Alii ia i tatou vaivaiga ma le matafaioi o Lona alofa tunoa i o tatou olaga.

Iakopo 4:11. Faaleleia ma le Atua

Valaaulia tagata aoga e faamaumau se uiga se tasi o le upu faalelei i tafatafa o le Iakopo 4:11. (O le faalelei e mafai ona faauigaina o le aumaia i le lotogatasi.)

Mafaufau e ta ni nota e ogatasi i se laau faimusika po o le taina o se pese e fetaui lelei. Ona ta lea o ni nota o se pese e le o ogatasi. I le faaaogaina o le faauigaga o loo i luga o le upu faalelei, valaaulia tagata aoga e faatusatusa pe mafai faapefea ona fesoasoani lenei mea ia i tatou e malamalama ai i le uiga o le Iakopo 4:11. O le a se mea e ono mafua ai ona le toe ogatasi le olaga ma le Atua? E faapefea e le Togiola a Iesu Keriso ona mafai ai e se olaga faapena ona toe faalelei pe toe aumaia ia ogatasi ma le Atua?

Iakopo 4:10. Mauaina o fautuaga mai le Alii

E mafai e tagata aoga ona talanoaina po o ai latou te o i ai mo se fautuaga ma pe aisea. Faitau le Iakopo 4:10 ma vaavaai pe aisea e mafai ai ona tatou faalagolago i le fautuaga a le Atua. E mafai foi e tagata aoga ona faitau le Mosaea 4:9 ma le Isaia 55:8–9 e iloa ai mafuaaga e tatau ai ona tatou saili ma mulimuli i fautuaga a le Atua. Talanoa mafuaaga eseese e ono saili pe le mafai ai foi e tagata ona saili ma mulimuli i fautuaga mai le Alii. O le saunoaga a Peresitene Romney i le “Manatu ma Talaaga o Faamatalaga” e mafai ona fesoasoani i le talanoaga.

Iakopo 4:13. “E tautala mai le Agaga i le upumoni”

Mafaufau e faitau le Mataupu Faavae ma Feagaiga 93:24–25 e o faatasi ma le Iakopo 4:13, ma vaavaai pe faapefea ona faauigaina e le Atua le upumoni. Talanoa pe mafai faapefea ona tatou maua le upumoni.

Iakopo 4:14. “Vaavaai i tala atu o le faailoga”

Valaaulia tagata aoga e faitau le Iakopo 4:14, ma vaavaai mo le fasifuaitau “tala atu o le faailoga.” Faaali atu le saunoaga a Elder Cook i le vaega o le “Manatu ma Talaaga o Faamatalaga” ma valaaulia tagata aoga e faamaumau i a latou tusitusiga paia i tafatafa o le fuaiupu lenei “O Iesu Keriso o le faailoga.”

Valaaulia tagata aoga e talanoaina po o le a le mafuaaga e oo lava i se tagata o le Ekalesia toefuataiina a Iesu Keriso ona vaavaai “i tala atu o le faailoga” i o latou olaga.