Doktrinal nga Kahanas: Moroni 7:45–48

Ikonsiderar ang mosunod nga senaryo aron sa pagtabang kanimo sa pagpraktis sa pagpasabot sa balaanong hiyas sa gugma nga putli.

Handurawa nga atol sa usa ka Dali, Sunod Kanako nga diskusyon uban sa imong pamilya, samtang naghisgot bahin sa kahulogan sa gugma nga putli, ang imong manghod nga lalaki misulti sama sa, “Dili ba ang gugma nga putli naghimo lang og maayo nga mga butang alang sa mga tawo?” Imong gisultihan ang imong igsoon nga lalaki nga ang pagkamabination usa ka bahin sa gugma nga putli apan mas makakat-on ka bahin niini sa seminary.

• Unsa pa nga mga detalye bahin sa gugma nga putli ang imong isulti sa imong igsoong lalaki?

1. Sa duha o tulo ka kapahayag, ipasabot ang kahulogan sa gugma nga putli gamit ang imong kaugalingong mga pulong ug ang mga pagtulun-an nga makita sa Moroni 7:45–48.

Gamita ang mosunod nga ideya aron sa pagtabang kanimo sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan. O pagpili og laing paagi nga labing makatabang kanimo sa pagsag-ulo.

Pagdrowing og dako nga kasingkasing diha sa imong journal sa pagtuon. Tan-awa ang mosunod nga hulagway, ug sulod sa imong gidrowing nga kasingkasing, isulat ang pakisayran sa kasulatan ug ang mahinungdanon nga hugpong sa mga pulong sa kasulatan sa saktong pagkahan-ay.

Isaysay ang pakisayran sa kasulatan ug ang mahinungdanon nga hugpong sa mga pulong sa kasulatan og pipila ka higayon hangtod nga masag-ulo nimo kini. Ikonsiderar ang paggunting sa drowing ug ibutang kini diin makita nimo kini kanunay.

Aron matabangan ka sa pagrebyo sa mga baroganan sa pag-angkon og espirituhanong kahibalo, korhei ang mosunod nga tulo ka mga hugpong sa mga pulong ug ipasabot kon unsa ang gipasabot niini. Kon nagkinahanglan ka og tabang, tun-i ang mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).

1. Susihon inubanan sa hugot nga pagtuo.

2. Tinguhaa ang dugang nga panabot pinaagi sa balaanong gitudlo nga panglantaw.

3. Lihukon ang mga konsepto ug mga pangutana inubanan sa mahangtorong tinubdan.

Basaha ang mosunod nga mga senaryo:

• Si Oskar dali nga masuko sa iyang mga manghod. Kanunay silang maghangyo kang Oskar nga makigdula kanila o tabangan sila sa ilang buluhaton sa balay [homework]. Gusto lang ni Oskar nga pasagdan siya sa iyang mga igsoon aron mahimo niya ang iyang gusto.

• Nasayran ni Jessa nga ang laing babaye sa iyang klase sa Young Women ang nagpakaylap og mga hungihong mahitungod kaniya. Naglibog si Jessa ug nasakitan niini ug dili segurado kon unsaon pagtubag.

• Gusto ni Danny nga mahimong sikat sa eskwelahan ug magpakita nga walay kahadlok atubangan sa iyang mga higala. Kanunay niyang tamayon ang ubang mga klasmeyt ug kuhaon ang ilang mga butang nga walay pananghid.