“3 Nephi 17: ‘Ako Adunay Kaluoy diha Kaninyo,’” Manwal sa Magtutudlo sa Basahon ni Mormon (2024)

“3 Nephi 17,” Manwal sa Magtutudlo sa Basahon ni Mormon

3 Nephi 17

“Ako Adunay Kaluoy diha Kaninyo”

Kini usa ka taas nga adlaw alang sa mga pundok sa mga katawhan sa mga Nephite sa diha nga ang Manluluwas mipahibalo nga panahon na alang Kaniya sa pagbiya. Bisan pa niana, ang mga luha ug tinguha sa pundok sa mga katawhan nga Siya magpabilin og diyutay pang panahon mitandog sa Iyang kasingkasing. Sa usa ka katingalahang pagpakita og kaluoy, giayo Niya sila, nag-ampo uban kanila, ug gipanalanginan ang ilang mga anak sa tagsa-tagsa. Kini nga leksiyon makatabang kanimo nga mobati sa kaluoy ni Jesukristo alang kanimo.

Ang panglantaw sa Manluluwas

Handurawa nga bag-o ka lang migahin og usa ka adlaw uban sa Manluluwas ug Siya mipahibalo nga panahon na nga Siya mobiya.

Ikonsiderar ang pagtan-aw sa “Si Jesukristo ug ang mga Anghel Nangalagad uban sa Kaluoy” gikan sa time code 0:12 hangtod sa 1:30, anaa sa ChurchofJesusChrist.org.

11:58

Unsa kaha ang imong bation niini nga sitwasyon?

Sa miaging duha ka semana, imong gitun-an ang mga lihok ug mga pagtulun-an sa Manluluwas taliwala sa mga Nephite sa dihang Siya unang mipakita ngadto kanila diha sa 3 Nephi 11–16. Hunahunaa kon unsay gihimo ni Jesukristo taliwala sa mga Nephite aron sa pagpakita sa Iyang gugma. Ang pagribyo sa unsay imong gisulat diha sa imong journal sa pagtuon ubos sa “Pagkat-on mahitungod ni Jesukristo diha sa 3 Nephi” mahimong makatabang kanimo sa paghinumdom.

Sa unsang paagi ang mga lihok sa Manluluwas mipakita sa Iyang gugma alang sa mga Nephite?

Karon imong mabasa og dugang kon giunsa pagpakita sa Manluluwas ang Iyang mahigugmaong kaluoy taliwala sa mga Nephite. Samtang magtuon ka, hunahunaa kon unsay gitudlo sa Iyang mga lihok bahin sa Iyang kinaiya. Hatagi og pagtagad ang imong gibati mahitungod Kaniya.

Mahimong makatabang ang pagkahibalo nga ang tanan nga mga hitabo nga natala diha sa 3 Nephi 11–17 nahitabo sa usa ka adlaw.

Basaha ang 3 Nephi 17:1–6, mangita kon unsay imong makat-onan mahitungod ni Jesukristo gikan sa Iyang mga pulong ug mga buhat.

Unsa ang imong nakit-an dinhi niini nga mga bersikulo?

Tingali nakakita ka og kamatuoran nga susama sa mosunod: Si Jesukristo puno sa kaluoy kanako. Ikonsiderar ang pagrekord niini nga kamatuoran duol sa bersikulo 6.

Si Elder Ulisses Soares sa Korum sa Napulog Duha ka Apostoles mitudlo:

Makahuluganon nga obserbahan nga ang mga buhat sa pagkamanggiluluy-on ni Jesus dili ra panagsa o gibuhat dili tungod kay gisugo, nga gibase sa lista sa mga buluhaton nga kompletohon, apan kada adlaw kini nga mga pagpahayag sa Iyang putli nga gugma alang sa Dios ug sa Iyang mga anak ug sa Iyang malungtaron nga tinguha sa pagtabang kanila. (Ulisses Soares, “Ang Malungtarong Kaluoy sa Manluluwas,” Liahona, Nob. 2021, 14)

Sa imong kaugalingong mga pulong, unsa ang gitudlo ni Elder Soares mahitungod sa kaluoy sa Manluluwas?

Ang kaluoy sa Manluluwas

Ang nahibilin sa 3 Nephi 17 nagpakita sa maluluy-on nga kinaiya sa Manluluwas. Hinumdomi nga ang unsay gibuhat ni Jesukristo diha sa 3 Nephi 17 nahitabo tungod kay Siya nakasabot sa matarong nga mga tinguha sa mga Nephite ug Siya sa pagkatinuod gusto nga makauban ug makapanalangin kanila.

3 Nephi 17:7–10:Pag-ayo sa ilang mga masakiton ug may mga balatian
3 Nephi 17:13–20: Pag-ampo uban ug alang kanila
3 Nephi 17:11–12, 21–25: Pagpanalangin sa mga bata

Aron matabangan ang mga estudyante nga mahanduraw ug mobati sa Espiritu Santo nga mopamatuod sa ilang nakat-onan sa 3 Nephi 17, ikonsiderar ang pagpasalida sa bidyo nga “Si Jesukristo ug ang mga Anghel Nangalagad uban sa Kaluoy” gikan sa time code 1:30 hangtod sa 11:45.

Aron matabangan ka nga mahanduraw ang imong nakat-onan sa 3 Nephi 17, mahimo nimong tan-awon ang “Si Jesukristo ug ang mga Anghel Nangalagad uban sa Kaluoy” gikan sa time code 1:30 hangtod sa 11:45.

11:58

Tubaga ang labing menos duha sa mosunod nga mga pangutana:
- Kon anaa ka didto, sa unsang paagi kini nga kasinatian makaapekto sa imong relasyon ngadto sa imong Manluluwas nga si Jesukristo?
- Sa unsang paagi sa imong hunahuna si Jesukristo nagpakita og kaluoy kanato karon?
- Unsa ang imong gibati nga nadasig nga buhaton aron sa pagpakita sa imong gugma alang ni Jesukristo?

Opsiyonal: Gustong Makakat-on Pa og Dugang?

Gikan sa unsa nga mga matang sa mga sakit sa mga tawo ang giayo sa Manluluwas?

Si Presidente Dallin H. Oaks sa Unang Kapangulohan mitudlo:

15:29

Niadto nga ang Manluluwas mipakita ngadto sa mga matarong sa Bag-ong Kalibotan, Siya nanawag og mga tawo sa pagpaduol kinsa mga bakol o buta o may laing pisikal nga mga balatian. Siya usab miabiabi og sama nga pagdapit niadtong “gitakboyan sa tanan nga mga matang sa sakit” (3 Nephi 17:7). “Dad-a sila ngari,” Siya miingon, “ug Ako moayo kanila” (b. 7). Ang Basahon ni Mormon nag-istorya kon giunsa sa pundok sa katawhan pagpaduol sa “tanan kanila nga gitakboyan sa tanan nga matang sa sakit” (b. 9). Kini naglakip gayod sa mga tawo nga may tanang matang sa balatian sa pisikal o emosyonal o sa panghunahuna, ug ang balaang kasulatan nagpamatuod nga si Jesus “miayo kanila matag usa kanila” (b. 9). (Dallin H. Oaks, “Iyang Papahulayon ang Nag-antos,” Liahona, Nob. 2006, 6)

Si Sister Bonnie H. Cordon, Kinatibuk-ang Presidente sa Young Women, mitudlo usab sa mosunod nga bidyo mahitungod sa abilidad ug kaandam sa Manluluwas sa pag-ayo.

10:19

Unsaon nako pagtubo diha sa Kristohanong kaluoy?

Si Elder Ulisses Soares sa Korum sa Napulog Duha ka Apostoles mipakigbahin:

13:13

Ang maluluy-on nga kinaiya ni Jesus nakagamot sa gugma nga putli, diha sa Iyang tiunay ug hingpit nga gugma, nga mao ang mahinungdanong bahin sa Iyang maulaon nga sakripisyo. Ang kamanggiloloy-on usa ka sukaranang kinaiya niadtong nanlimbasog alang sa pagkabalaan ug kini nga balaanong kinaiya naglambigit sa uban pang Kristohanon nga mga kinaiya sama sa pagbangotan uban niadto nga nagbangotan ug pagbaton og pagsabot, kaluoy, ug pagkamabination. Ang pagpahayag og kamanggiloloy-on alang sa uban mao, sa tinuod, ang mahinungdanon nga bahin sa ebanghelyo ni Jesukristo ug ang klaro nga ebidensiya sa atong espirituwal ug emosyonal nga kasuod ngadto sa Manluluwas. Dugang pa, gipakita niini ang lebel sa impluwensiya nga anaa Siya sa atong pamaagi sa kinabuhi ug gipakita ang potensiyal sa atong mga espiritu. (Ulisses Soares, “Ang Malungtarong Kaluoy sa Manluluwas,” Liahona, Nob. 2021, 14)