“Mosaea 2:19–41: ‘Faamanuiaina i Mea Uma,’” Tusi Lesona a Tagata o le Vasega o le Tusi a Mamona (2024)

“Mosaea 2:19–41,” Tusi Lesona a Tagata o le Vasega o le Tusi a Mamona

Mosaea 2:19–41

“Faamanuiaina i Mea Uma”

O le a se mea e te naunau e fai e maua ai le fiafia e le uma? Na valaaulia e le Tupu o Peniamina lona nuu e saili atu i lenei fiafia e ala i le ola amiotonu ma le tuuto atu i le Atua. O lenei lesona e mafai ona fesoasoani ia oe e saili ai mo “le tulaga manuia ma le fiafia o i latou o e e tausi i poloaiga a le Atua” (Mosaea 2:41).

Faitau ou manuia

Usu pe faitau upu o le “Faitau Ou Manuia” (Viiga, nu. 151), pe matamata le vitio lenei. Mafaufau i upu ma pe faapefea ona fesootai i lou olaga.

4:60

Faaalu se minute se tasi pe lua e fai ai se lisi o faamanuiaga ua tuuina atu e le Atua ia te oe i lau api talaaga mo suesuega.

O le a se mea na e matauina pe aoaoina mai le lisiina o ou faamanuiaga?

Ina ua uma ona aoao atu e uiga i le auauna atu, sa valaaulia e le Tupu o Peniamina sa Nifae e mafaufau pe faapefea ona latou sailia ma maua faamanuiaga a le Tama Faalelagi. A o e suesue i le asō, mafaufau loloto pe ua faapefea ona faamanuiaina oe e le Alii a o e taumafai e tausi Ana poloaiga.

Faitau le Mosaea 2:19–25, vaavaai mo le tali i soo se fesili nei:

O a ni auala na faamanuia ai e le Atua sa Nifae? Mafaufau e faailoga soo se faamanuiaga e te tutusa ai ma i latou.
O le a le mea e fai e le Atua pe a tatou tausia Ana poloaiga? O le a le vave Na te faia ai?
O a ni mea ua aoao mai e nei fuaiupu ia te oe e uiga i le Atua?

Ina ua uma ona fesoasoani ia sa Nifae ia iloa o latou faamanuiaga, sa faasilasila atu e le Tupu o Peniamina o lona atalii o Mosaea o le a avea ma o latou tupu fou. Sa ia faamanatu atu ia i latou le tele o auala e mafai ai e tagata ona lē maua o latou faamanuiaga e ala i finauga, solitulafono, fouvale, ma le solia o poloaiga a le Atua. Sa ia aoao atu foi ia taunuuga e faavavau o na faatinoga ma tuuina atu se folafolaga ia i latou o e tausia poloaiga. (Tagai Mosaea 2:29–40.)

Faamanuiaina ma fiafia

Faitau le Mosaea 2:41, ma vaavaai mo se folafolaga na tuuina mai e le Tupu o Peniamina.

E mafai faapefea ona e aoteleina le fuaiupu 41 i se mataupu faavae o le upumoni?

O se tasi o folafolaga na faia i le Mosaea 2:41 o le afai tatou te tausia poloaiga a le Atua, o le a faamanuiaina i tatou e le Atua i le faaletino ma le faaleagaga. Peitai, e tele atu isi mea e mafai ona tatou aoao mai lenei fuaiupu e ala i le suesueina eseese o fuaitau taitasi.

O faamanuiaga faaletino e mafai ona aofia ai mea e pei o le soifua maloloina faaletino, tamaoaiga, po o isi faamanuiaga e faatatau i le olaga faitino. O faamanuiaga faaleagaga o mea ia e faavavau. E aofia ai la tatou molimau, la tatou sootaga ma le Atua ma o tatou aiga, faamagaloga o agasala, taitaiga e ala i le Agaga Paia, ma isi mea faapena.

Filifili se lua pe sili atu o gaoioiga nei mo le Mosaea 2:41, ma tali fesili e o faatasi ai.

O le Tulaga Manuia ma le Fiafia o i Latou o E e Tausi i Poloaiga

Tusi Lesona a le Faiaoga o le Tusi a Mamona (2024)—“Mosaea 2:19–41: ‘Faamanuiaina i Mea Uma’”

Gaoioiga A

“Mafaufau i le tulaga manuia ma le fiafia o i latou o e e tausi i poloaiga a le Atua. … E faamanuiaina i latou i mea uma, i le faaletino ma le faaleagaga.”

Vaai i le lisi o faamanuiaga na e fatuina i le amataga o lenei lesona. Faaopoopo soo se faamanuiaga faaopoopo atonu e oo mai i le mafaufau. Vase lalo o faamanuiaga e sili atu ona faaletino ma lio faamanuiaga e sili atu ona faaleagaga. Atonu e te iloaina e fetaui nisi i vaega uma e lua.

O le a se faamaoniga o e vaaia i lou olaga e moni ai lenei faamatalaga mai le Mosaea 2:41 ?
Faitau le Mataupu Faavae ma Feagaiga 130:20-21. O le a se mea ua e aoaoina e uiga i le sootaga i le va o le tausia o poloaiga ma le mauaina o faamanuiaga a le Atua? Atonu e te manao e fefaasinoai pe faafesootai fuaiupu nei i le Mosaea 2:41.
Aisea e te manatu ai e faamanuiaina i tatou e le Tama Faalelagi i faamanuiaga faaletino ma faaleagaga? O le a se mea o aoao atu e lenei mea e uiga ia te Ia?

Gaoioiga E

“Afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata.”

Tusi le faamatalaga lenei i le ogatotonu o se itulau avanoa i lau api talaaga mo suesuega, ma tuu le avanoa faataamilo e tusi ai ni faamatalaga. Lio upu po o fasifuaitau i le faamatalaga ia e taua ia te oe. Faapipii se lio e tusitusi ai i upu po o fasifuaitau taitasi ua lio, ma tusi se faauigaga, fuaitau o mau e fesootai i ai, po o soo se isi lava malamalamaaga atonu o ia te oe.

Mo se faataitaiga, afai na e lioina le fasifuaitau “talia i latou i le lagi,” o le lio tusitusi fesootai e ono aofia ai se mea e pei o le “O le taliaina o lo o ta’u mai ai o lo o i ai se tasi iina pe o lo o faatali mai ia oe. Na aoao mai Iesu o le a Ia saunia se nofoaga mo i tatou i le lagi ona talia lea o i tatou iina (tagai Ioane 14:2–3). O lo o i ai o’u matua faalelagi ma Iesu Keriso iina ma o le a talia a’u pe afai ou te tumau faamaoni.”

Faamae’a se lio tusitusi mo upu po o fasifuaitau taitasi sa e lioina. Gauai atu i fesili po o uunaiga e oo mai i lou mafaufau.

O a ni ou malamalamaaga na e maua a o faia lenei gaoioiga?
E mafai faapefea e nei malamalamaaga ona fesoasoani ia oe i lou olaga i le taimi nei?

Gaoioiga I

“Ia manatua, ia manatua lava ua moni nei mea; ona ua fetalai mai ai le Alii le Atua.”

O a nisi o mea e faigofie ona manatua? O a mea e sili ona faigata ona manatua?

Manatua mea ua e aoaoina e uiga i le Atua i lau suesuega o le Mosaea 2. Faitau le Mosaea 2:22, vaavaai mo upumoni faavavau e uiga i le Atua.

O le a se mea ua e iloa e uiga i le Atua e mafai ona fesoasoani ia te oe e faalagolago ai i Ana folafolaga ma tausi Ana poloaiga?
O le a se mea e mafai ona e faia e manatua ai lenei mea e uiga ia te Ia?

Mafaufau Loloto

A uma ona e faia gaoioiga e aoao ai, faaaalu ni nai minute e “manatunatu [ai] i [lou] tulaga manuia ma le fiafia.” Mafaufau loloto ma tusi i lau api talaaga mo suesuega e uiga i ou uiga faaalia i le Atua ma le usiusitai i Ana poloaiga. Ia aofia ai le auala e mafai ai ona faaauau pea ona e fausia ma faaaoga lou faatuatua e maua ai Ana faamanuiaga. Manatunatu pe o le a faapefea ona aafia lou olaga e ala i le tausia o poloaiga a le Atua.

Tuu i le faitalia: O e Manao e Aoao Atili?

Aisea e foliga mai ai e mafai e tagata ona solia poloaiga ae fiafia pea?

Na aoao mai Elder D. Todd Christoffferson o le Korama a Aposetolo e Toasefululua:

14:32

O loo tupu soo, o tagata latou te tetee i faatonuga faalelagi e pei o le tulafono o le ola mama, le tulaga faatonuina o le faamaoni, ma le paia o le Sapati, e foliga mai e manuia ma olioli i mea lelei o le olaga, o nisi taimi e sili atu i lo i latou o loo taumafai malosi e usiusitai. O nisi e amata ona tuufesilisili pe o taua ea taumafaiga ma osigataulaga. …

Ia faatali, sa fetalai ai le Alii, seia oo “i lena aso pe a ou faaputuputu a’u maa taua. … Ona outou … iloa [lea o] le eseesega o le amiotonu ma le amioleaga, i le va o le ua auauna i le Atua ma ia o le ua le auauna atu ia te ia” [Malaki 3:17–18]. Atonu o e amioleaga e “maua le olioli ia latou galuega mo se tau” [3 Nifae 27:11], ae e lē tumau lava. O le olioli o le Au Paia e tumau. …

Ou te le’i feiloai lava i se tasi na mauaina le talalelei i se taimi mulimuli ane i le olaga o lē e lei moomoo maimau pe ana ia vave maua. “Aue, o filifiliga leaga ma mea sese sa ono ou alofia,” latou te fai mai ai. O poloaiga a le Alii o lo tatou taiala lea i filifiliga lelei atu ma taunuuga fiafia atu. E matuā tatau ona tatou olioli ma faafetai atu ia te Ia mo le faaali mai ia i tatou o lenei ala sili atu ona lelei. (D. Todd Christofferson, “O Le Olioli o le Au Paia,” Liahona, Nov. 2019, 15–16)

E aoga moni ea le usiusitai faamaoni i le Atua?

Na aoao mai Peresitene Russell M. Nelson:

E lē mafai ona lē amanaiaina le upumoni faaleagaga—aemaise lava poloaiga paia. O le tausia o poloaiga paia e aumaia ai faamanuiaga, i taimi uma! O le solia o poloaiga paia e lē aumaia ai ni faamanuiaga, i taimi uma! (Russell M. Nelson, “Ia Faaali Atu Lou Faatuatua,” Liahona, Me 2014, 30)

Na aoao mai Elder Richard G. Scott (1928–2015) o le Korama a Aposetolo e Toasefululua:

O le fiafia moni tumau, faatasi ai ma le malosi, lototele, ma le gafatia e faatoilalo ai faigata aupito matautia, o le a oo mai pe a e faatotonugalemuina lou olaga ia Iesu Keriso. O le usiusitai i Ana aoaoga e maua ai le a’e agai i luga mautu i le malaga o le olaga. E manaomia ai se taumafaiga. E ui ina leai se faamaoniga o ni taunuuga vavave, ae e i ai le mautinoa, o le a oo mai tali, i le taimi o le Alii, o le a i ai le filemu, ma o le a avea foi le fiafia mo oe lava. (Richard G. Scott, “E Mafai e le Togiola Ona Faamautu Lou Filemu ma le Fiafia,” Liahona, Nov. 2006, 41)