“iKalawa 2: Vakanuinui” Parokaramu ni Veivagalalataki mai na Veivakatotogani: E dua na iDusidusi ki na Veivagalalataki mai na Veivakatotogani kei na Veivakabulai (2005), 7-12

“iKalawa 2,” Parokaramu ni Veivagalalataki mai na Veivakatotogani, 7-12

iKalawa 2

Vakanuinui

iVakavuvuli Bibi: Lako mai ka vakabauta ni kaukauwa ni Kalou e rawa ni vakalesui iko mai me taucoko kina na nomu bulabula vakayalo.

Ni keimami a vakila na neimami malumalumu mai na neimami vakatotogani, e vuqa vei keimami a yali sara ga na nodra vakanuinui. O ira veikeimami era a tubu cake nira sega ni kila edua na ka me baleta na Kalou, era a vakadeitaka ni sa oti kece sara na neimami ivurevure ni veivuke. Ia, kivei keimami na sa vakabauta na Kalou keimami vakadeitaka ni sa rui rarawataki keimami sara vakalevu me vukei keimami mai. E na yasa ruarua ni rai, nai ka 2 ni kalawa a solia vei keimami edua nai sau ni taro keimami a sega ni vakasamataka se biuta laivi sara—oya me vuki vua na Kalou ka kunea na inuinui ena Veisorovaki i Jisu Karisito.

Ni keimami sa qai vakayalomalumalumutaki, keimami sa qai kerea na veivuke. Ni oti na neimami vakila edua na rarama lailai ni inuinui, keimami sa tekivu me tiko ena soqoni ni veivagalalataki. Ni keimami a tiko ena soqoni taumada, keimami a vuabale ena vakatitiqa kei na rere. Keimami a rere ka vakatitiqa, ia keimami a lako ga mai. Keimami a qai rogoci ira na tagane kei na yalewa nira vakamacalataka vakadodonu na veika a yaco e nodra bula, na cava a yaco me veisautaki ira, ka vakacava tu na bula mai na veivakatotogani. Keimami kunea ni vuqa vei ira na tamata keimami sotavi ira ena veisoqoni, era a vakila talega na bula ka sega kina na inunui me vakataki keimami. Ia oqo era sa veidredrevaki, veivosaki, matadredredre, lakova na veisoqoni, masu, wili ivolanikalou, ka volavola ena nodra ivolaniveisiga ni veivagalalataki.

Vakamalua sara, sa tekivu me cakacaka vei keimami na ivakavuvuli era wasea ka cakava. Ni keimami lesu tikoga yani, keimami sa tekivu vakila edua na ka keimami a se bera ni bau vakila ena vica vata na yabaki—keimami a vakila na inuinui. Kevaka e a tiko na inuinui vei ira na tani ka a lako tani mai na bati ni veivakarusai, e rairai a tiko talega na vakanuinui vei keimami! Keimami a vakavinavinaka vakalevu me rogoca ni kevaka keimami gole vua na Turaga, sa na “sega ni tiko nai tovo ca, sega na veivakatotogani, sega na vakabebe, sega na ivalavala ca, sega ni vakuwai e dua na caka cala mai na veivosoti e taucoko” (Boyd K. Packer, ena Ripote ni Koniferedi, Okot. 1995, 22; se Ensign, Nov. 1995, 19).

Ena draki ni bula oqo ni vakabauta kei na ivakadinadina, keimami a kunea na inuinui ka a tekivu me vakayadrati keimami ki na loloma veivueti kei na kaukauwa ni Kalou. Sa tekivu me keimami vakabauta ni o Koya e rawa ni sereki keimami mai na ivesu ni veivakatotogani. Keimami a vakamuria na nodra ivakaraitaki na neimami itokani kara sa vagalalataki tiko mai. Keimami a tiko ena soqoni, masu, vakavoutaka na neimami vakaitavi ena Lotu, ka vakasamataka vakatitobu ka bulataka na ivolanikalou, ka sa qai tekivu me yaco mai na neimami cakacaka mana. Keimami a vakalougatataki ena loloma soli wale i Jisu Karisito me maroroya tiko na neimami vakuwai keimami tiko mai na veivakatotogani, ena dua nai kalawa dua na siga. Ni keimami a taura nai ka 2 ni kalawa, keimami a lomasoli me vakaisosomitaka na nuitaki keimami ga vata kei na neimami veivakatotogani ena vakabauta na loloma kei na kaukauwa i Jisu Karisito. Keimami a taura na ikalawa oqo ena neimami vakasama kei na yaloi keimami, ka keimami kila kina na dina oqo, ni yavu ni neimami vagalalataki e sa ka vakayalo.

Ni o taura nai kalawa eso ka vakaturi tiko ena idusidusi oqo, o na vakila na dina vata ga oya. E sa sasaga yaga sara. Na parokaramu oqo e vakayalo, ka sa dua na parokaramu ni cakacaka. Kevaka o na vakamuria na vei ivakavuvuli oqo ka vakatara me cakacaka ena nomu bula, ko na raici iko ni ko vakalesui mai kina bulabula vakayalo ena nomu veiwekani vou kei na Turaga. Na Yalona ena vukei iko mo tekivu raica na nomu digidigi ena lomadina ka vakamatata; ka ko na tauca na nomu vakatulewa me salavata kei na ivakavuvuli ni kosipeli.

Vei ira eso vei keimami na cakamana oqo e voleka ni yacovata ga; vei ira eso tale na vagalalataki, e a yaco mai vakamalua. Se yaco mai vakacava vei iko, o na qai rawa ni kaya vata keimami ni o “ “tudei vei Karisito,” ko sa vakabulai mai na itovo veivakatotogani ka marautaka na “taucoko ni nomudou vakanuinui ” (2 Nifai 31: 20).

E vakavulica o Elder David A. Bednar ena Kuoramu ni iApositolo Le Tinikarua na kaukauwa ni Turaga me vukei iko:

“Meda kakua ni raibaleta se vakawaletaka na kaukauwa ni yalo loloma ni Turaga. Na kena rawarawa, na kena kamikamica, kei na tudei ni yalo loloma ni Turaga ena vakayacora e vuqa na ka me viribaiti ka taqomaki keda kina ena veigauna ni leqa, ka da sotava tiko ena gauna oqo kei na kena e muri mai. Ena gauna eda sega ni biuta rawa kina vakavosa na veivakacegui eda gadreva se vakaraitaka na reki eda vakila, ena gauna e tawayaga walega kina na sasaga me vakamacalataki na ka e sega ni vakamacalataki rawa, ni sa sega ni rawa kivua na vakasama me solia mai na kilamatata me baleta na veika tawadodonu kei na veivakaduiduitaki ni bula, ni sa sega ni rawa kina veika e sotavi ena bula vakayago kei na veivakadeuci me vakavurea mai edua na ka e gadrevi, ka ena gauna e irairai vaka nida sa tu taudua ga, ia sa dina sara nida sa vakalougatataki ena yaloloma ni Turaga, me vakayacora meda qaqa ka rawata kina na kaukauwa ni veisereki. (raica na 1 Nifai 1:20).

“Eso na tamata kara rogoca se wilika cala nai tukutuku oqo era na rawa ni sega ni kauwaitaka se ra kauta tani mai na nodra bula yadua na kena rawati na yalololoma ni Turaga. … Eda na rairai nanuma cala ni yalololoma kei nai solisoli vakaoqori sa vakarautaki vei ira tale eso kara rairai yalododonu se ra veiqaravi tiko ena veikacivi laurai ena Lotu. Au vakadinadinataka ni sa vakarautaki tu kivei keda kece sara na yalo loloma ni Turaga ka sa nanamaki tu na Dauveivueti nei Isireli me tauca vei keda na veisolisoli oqori “(ena Ripote ni Koniferedi, Epe. 2005, 106–7; se Ensign, Me 2005, 100–101).

Ko na raica na yalololoma ni Turaga ena nomu bula ni o vulica mo vakasaqara kei na nomu sa mai yaco mo vakabauta ni kaukauwa ni Kalou ena rawa dina ni vukei iko mo vagalalataki.

iTuvatuva ni Cakacaka

Masu; wilika ka vakasamataka vakatitobu na ivolanikalou

Ni o sereka tani na dokadoka ka tekivu mo vakasamataka mo kauta lesu tale mai na Kalou ki na nomu bula, ko na tekivu vakasama vakalevu cake ena yalomasumasu. E muri ko na qai kunei iko ni ko sa vakarau tu mo tekiduru ka masu vakadomoilevu. Ko na kunea na kena logaloga vinaka na nomu vakaraitaka nai tovo ni yalomu kei na gagadre vua na Kalou. Ko na vakila ni o sa dolava tale e dua na veivosaki vata kei na dua ka na dau sauma mai, sega ni veigauna kece ena dua na io ia ena gauna kecega ena loloma. E muri, ko na tekivu vakila na vinaka ni veivakabulai ena nomu drotani mai na nomu sogolati iko tu vakai iko.

Na gagadre mo veitaratara kei na Kalou ena muataki iko mo vulica na nodra vosa na parofita makawa kei na gauna oqo. Ni o rogoci ira tale eso ka ra kunea na isau ni nodra taro ena ivolanikalou, na nomu vakanuinui ena tubu ni o rawa ni kunea talega na isau ni taro. Ni o vola na nomu vakanananu, o na ciqoma eso tale na veivakauqeti mai vua na Yalo. Vuli ena masumasu, ka na qai solia vei iko na Turaga na isau ni nomu vakatataro kei na gagadre.

Na vanua vinaka me tekivu kina na nomu vuli, sai koya ena qaqana ka tiko ena mua ni iwase yadua ena idusidusi oqo. A digitaki na veitiki ni ivolanikalou oqori me salavata kei na veivagalalataki, ka tarogi na vei taro yadua ena vakanuinui ni na vukei iko mo bulataka na tikina oqo ena nomu bula. Taura e vica na miniti e veisiga mo vakasaqara na veika e gadreva na Turaga me tukuna vei iko.

Vakabauta na Kalou na Tamada Tawamudu kei na Luvena, ko Jisu Karisito, kei na Yalo Tabu.

E vuqa vei keimami e a tubu cake mai vata kei na so na kilaka me baleta na Kalou, ka me vaka ni keimami lewe ni Lotu a tiko eso na kila-ka lalai me baleta na Tamada Vakalomalagi, ko Jisu Karisito, kei na Yalo Tabu. A rairai tiko beka na vakabauta rawarawa sara me baleti Ratou, ia edau vakavuqa keimami sega ni dau semata rawa na neimami dredre yadua kei na neimami gadreva na kaukauwa ni Kalou ki na neimami bula.

Na cakacaka e gadrevi e nai ka 2 ni kalawa, sai koya me tu vakarau me vakatovotovotaka na vakabauta na loloma kei na loloma veivueti nei Tamada Vakalomalagi kei Jisu Karisito kei na rawati ni veivakalougatataki ni Yalo Tabu. E sa neimami ivakadinadina ni rawa ni o mai kila na loloma umanivata ni Lewetolu Vakalou, ena kena saravi na ivakadinadina ni Nodratou loloma kei na kaukauwa ki na nomu bula kei na nodra bula na tani.

Vuli kei na Kilamatata

Na veitiki ni ivolanikalou oqo e rawa me vukei iko e nai ka 2 ni kalawa. Keimami vakatura mo vakayagataka na ivolanikalou oqo kei na taro ena veivosaki, vuli, kei na volavola. Nanuma mo dau yalodina ka matata na nomu volavola.

Vakabauta na Kalou

“Mo ni vakabauta na Kalou; mo ni vakabauta ni sa tiko o koya, ka a bulia na ka kecega, mai lomalagi kei vuravura; mo ni vakabauta ni sa nona kece na yalomatua, kei na kaukauwa kece, mai lomalagi kei vuravura; mo ni vakabauta ni na sega ni kila taucoko na tamata na veika kece sa kila na Turaga” (Mosaia 4:9).

E lewevuqa na veika era tu mai lomalagi kei vuravura era vakadinadinataka ni bula tiko na Kalou. Na ivakadinadina cava soti me baleta na Kalou kei na Nona loloma o sa vakila?

Vakabauti Jisu Karisito

“Vunautaka vei ira me ra veivutuni ka vakabauta na Turaga ko Jisu Karisito; vakavulici ira me ra vakayalomalumalumutaki ira ka yalomalua; io me ra vorata na veitemaki kecega ni tevoro ka vakabauta na Turaga ko Jisu Karisito” (Alma 37:33).

E vuqa vei keimami a tovolea me lako tani mai na neimami vakatotogani ena kaukauwa saraga ni lewa e loma se na nodra vakabauti na itokani se dua e kenadau ena veivakasalataki. E muri keimami kunea ni neimami vakabauti keimami vakai keimami, se o ira na tani a sega ni rawata me keimami ra-wa vakataucoko kina na neimami vakatotogani. Vola na nomu nanuma nikua ena nomu yalomalumalumu kei na lomasoli mo gole vei Karisito kei na Nona kosipeli ka biuta tani na vei ivurevure tale eso ni veivuke ena nomu sasaga mo vagalalataki.

Na Nona Yalololoma na iVakabula

“Sa qai tabalaka vakasauri na domona na tama ni gone, ka kaya, ia ka vakawai na matana, Kemuni na Turaga, au sa vakabauta; vukea na noqu tawa-vakabauta” (Marika 9:24).

Na tamata oqo a vakasaqara na veivuke mai vua na iVakabula ka a mani rawata. O Jisu a sega ni vunauci koya ena vuku ni nona vakatitiqa. Vola na veika me baleta na yalololoma kei na nona dauvosota na iVakabula.
Na cava o vakila me baleta na kena wasei na itovo ni yalomu vua na Turaga?

Na isolisoli ni loloma vakalou

“Tou … toro doudou kina ki na itikotiko vakaturaga loloma, meda vinakati kina, meda lomani talega ka vukei ena gauna e yaga kina” (Iperiu 4:16).

E vakamacalataki ena Bible Dictionary, na loloma soli wale me “ veivuke se igu ka vu maivua na Kalou” soli yani ena “nona loloma uasivi kei na loloma i Jisu Karisito” (“Grace,” 697). Na isolisoli ni kaukauwa vakalou oqo e rawa kina vei iko mo cakava vakalevu cake kina na ka, mai na kena o rawa ni cakava ena nomu igu ga vakataki iko. Na i Vakabula ena vakayacora vei iko na veika ko sega ni cakava rawa kivei iko vakai iko. Na nona loloma soli wale sai koya na sala o na rawa ni veivutuni ka veisau kina. Ena sala cava soti o sa vakila kina na isolisoli ni loloma soli wale ena nomu bula?
Ena rawa vakacava me vukei iko na isolisoli ni kaukauwa vakalou me maroroya na tomani tiko ni nomu vagalalataki?

Veivakabulai

“Ko sa vakabauta li na kaukauwa i Karisito sa yaco kina na veivakabulai? … Kevaka ko sa vakabauta na veisereki i Karisito ko na rawa ni vakabulai” (Alama 15:6, 8).

Ni da vakasamataka na vakabulai, eda dau vakasamataka na yagoda. Na cava tale me baleti iko, ena gadrevi kina na kaukauwa ni veivakabulai nei Jisu Karisito?
Vola me baleta na nomu gagadre mo tadolava yani na kaukauwa veivueti (veisereki, veivakavoui) i Karisito.

Veivakayadrati

“Ia raica, kevaka mo ni yadra mada ka vakayadrata na yagomuni, mo ni vakatovotovotaka kina na noqu vosa, ka vakatovolea vakalailai na vakabauta, io, kevaka mada ga ko ni gadreva mo ni vakabauta, mo ni laiva na gagadre oqo me kadre e lomamuni, me yacova ni ko ni sa vakabauta ena kena ivakarau ka rawa mo ni vakabauta kina e dua na tiki lailai ni noqu vosa” (Alama 32:27).

Mo vakila mai—se yadra ka vakayadrata na nomu vakasama—e dua na tiki bibi ni kena cakacakataki na vulici ni vakabauta. Ena veisala cava soti o sa kila vinaka kina nikua, na kaukauwa i Jisu Karisito ena nomu bula mai na kena ena macawa sa oti? vula sa oti? se yabaki sa oti?

Sereki mai na veivakabobulataki

“Era a vesuki tu, a qai vueti ira tale mai na veivakabobulataki na Turaga ena kaukauwa ni nona vosa” (Alama 5:5).

Na vosa ni Kalou e kaukauwa me sereki iko mai na veivakabobulataki. O na rawa mo raica na vosa ni Kalou ena ivolanikalou kei na vosa o rogoca ena koniferedi, ka wilika ena mekasini ni Lotu. O rawa talega ni ciqoma na vosa ni Kalou vakadodonu sara ga mai vua na Yalo Tabu. Vola eso na ka o rawa ni cakava nikua mo ciqoma kina na Nona vosa vei iko.