“iKalawa 12: Ni da sa vakayadrati vakayalo mai na Veisorovaki i Jisu Karisito, eda wasea na itukutuku oqo vei ira tale eso,” Veivakabulai mai vua na iVakabula: Na Parokaramu ni Veivueti mai na Veivakatotogani iDusidusi 12 na iKalawa ni Veivueti (2023)

”iKalawa 12,” Na Parokaramu ni Veivueti mai na Veivakatotogani iDusidusi 12 na iKalawa ni Veivueti

iKalawa 12: Ni da sa vakayadrati vakayalo mai na Veisorovaki i Jisu Karisito ena vuku ni noda taura na veikalawa oqo, eda wasea na itukutuku oqo vei ira tale eso ka bulataka na ivakavuvuli oqo ena veika kece eda cakava.

3:35

iVakavuvuli Bibi: Veiqaravi

Ni da sa volekata yani na ika 12 ni ikalawa, eda vakadinadinataka ni sega ni itinitini ni noda ilakolako oqo. Ena vuku ni noda cakava na veikalawa oqo, eda marautaka kina na bula ni veivakabulai mai na loloma soli wale kei na loloma veivueti ni Kalou. Eda vakadinadinataka ni sega ni rauta na cakacaka ena veikalawa ena dua ga na gauna. Eda raica ni sa ka bibi sara me da tomana tiko na cakacakataki ni veikalawa oqo, vakatovotovotaka na ivakavuvuli oqo ena veivanua kece sara ni bula, ka kauta yani na itukutuku ni inuinui vei ira tale eso.

E tiko vei keda e dua na itukutuku ni inuinui me baleti ira na tani era sotava tiko na veivakatotogani kei ira kece na tamata era sotava tiko na bolebole ni bula oqo: Na Kalou e Kalou ni cakamana, me vaka e dau vaka tu ga kina o Koya (raica na Momani 9:11, 16–19). E vakadinadinataka oqori na noda bula. Eda sa vakavoui yadua ena Veisorovaki i Jisu Karisito. E rawa ni da wasea vakavinaka duadua na itukutuku oqo ena noda qaravi ira na tamata. Na noda wasea na noda ivakadinadina me baleta na Nona loloma cecere kei na Nona loloma soli wale, sa dua na cakaitavi bibi duadua eda rawa ni solia. E kaya o Peresitedi Spencer W. Kimball, “E dua na ka bibi duadua eda rawa ni cakava o ya meda vakaraitaka na noda ivakadinadina ena veiqaravi, ka na qai yaco kina na tubu vakayalo, yalayala cecere cake, kei na kaukauwa levu cake ni muria na ivakaro“ (Nodra iVakavuvuli na Peresitedi ni Lotu: Spencer W. Kimball [2006],87).

Na noda colata na nodra icolacola na tamata ena cakacaka ni yalovinaka kei na veiqaravi sega ni nanumi koya ga, e sa tiki ni noda bula vou me vaka e dua na tisaipeli i Karisito (raica na Mosaia 18:8 Na gagadre mo vukei ira na tani esa dua na vua ni veivakayadrati vakayalo. Me vaka ga na nodra gadreva na luvei Mosaia tagane me ra wasea na kosipeli vei ira na Leimanaiti ni oti na nodra saumaki mai, eda na gadreva talega me da wasea na inuinui kei na veivakabulai eda sa sotava ena Veisorovaki i Karisito (raica na Mosaia 28:1–4). Eda na gadreva beka meda vakalougatataka, veivuke, ka laveti ira cake era tu wavoliti keda. Eda qai kila na dina a vakavulica o Penijamini na Tui ena nona kaya, “Ni ko ni sa qaravi Koya tiko na nomuni Kalou, e na gauna ko ni qaravi ira tiko kina na wekamuni” (Mosaia 2:17

Na sala ni veiqaravi vakatamata oya meda dua na dauveiqaravi se dauveituberi vei ira tale eso era se qai cakacaka vou ena iwalewale ni veivueti. (Yalovinaka railesuva na itukutuku ni “Digitaka e dua na Dauveiqaravi“ mo kila eso tale na ka.) Keitou tukuna vei ira tale eso na vakaitavi mai na ilawalawa ni veivueti eda tiko kina se o ira na noda iliuliu ni Lotu ni da vinakata me da veivuke vaka-dauveiqaravi se dauveituberi. Nida kila e dua e vorata tiko na veivakatotogani, eda wasea na itukutuku me baleta na Parokaramu ni Veivakatotogani. Eda tukuna vei ira na inuinui ni veivakabulai mai vua na iVakabula o Jisu Karisito, ka da sureti ira me ra tiko vata kei keda ena dua na soqoni.

Me ikuri ni noda vukei ira era sotava na dredre ni veivakatotogani, eda qaravi ira talega na lewe ni nodra matavuvale kei ira na wekadra lomani. E vakavuqa ni dau veitauriliga na tamata kei koya e tauvi koya tiko na veivakatotogani qai vakaweleweletaka mera qaravi ira na wekadra lomani. Eda rawa ni vakadeitaka ka vakadinadinataka na dredre era sotava. E rawa ni da wasea na inuinui ni rawa ni ra gole vua na iVakabula ka kunea na vakacegu kei na veivakabulai, veitalia se na digitaka se sega na nodra daulomani na veivakabulai. E rawa ni da wasea na iDusidusi ni Veitokoni: Veivukei vei Ira na Watidra kei na Matavuvale o Ira Era sa Vueti Mai ka sureti ira me ra tiko ena dua na bose ni ilawalawa ni watidra kei na matavuvale.

Nida qaravi ira na tani ena noda tokoni ira nira sa bula vinaka tiko, e dodonu meda qarauna meda kua ni vakatara mera vakararavi vakalevu vei keda na tani. Sa noda itavi mo vakayaloqaqataki ira na tamata era sasaga bula tiko mera gole vua na Tamada Vakalomalagi kei na iVakabula ena vuku ni veidusimaki kei na kaukauwa. Me kena ikuri, e dodonu meda vakayaloqaqataki ira mera vakasaqara na veitokoni mai vei ira na tani. Na veivakalougatataki cecere e lako mai vua na Turaga mai vei ira na iliuliu ni Lotu, dauveiqaravi, lewe ni matavuvale, itokani, kei na so tale. E rawa ni da wasea vata kei ira na itukutuku ni “Veitokoni ena Veivueti“ ka kunei ena ikuri ni idusidusi oqo.

Nida saga meda vukei ira na tani, era na sega beka ni vakarau tu mera taura na veikalawa oqo. Ni da wasea na itukutuku ni veivueti kei na inuinui mai vua na iVakabula, e dodonu meda vosota ka yalomalua. E sega ni tiko ena noda bula vou e dua na tikina vua na dokadoka se na vakasama ni o sa uasivi cake mai vei ira. Ena veivuke sara meda nanuma tiko na noda tiko vakavesu kei na sala sa vueti keda kina o Jisu Karisito ena Nona loloma veivueti kei na loloma soliwale (raica na Mosaia 29:20).

Ena noda taleitaka meda vukei ira na tani, eda saga me veiraurau tikoga ena noda wasea na itukutuku kei na noda tomana tikoga ka bulataka na veikalawa oqo ena noda bula. Na noda vakanamata taumada e dodonu me da tomana tikoga na noda bulataka vei keda na ivakavuvuli ni veivakabulai oqo. Nomu sasaga mo wasea na veivakasama oqo vata kei ira tale eso, ena yaga ga ni o maroroya tiko na nomu sa vagalalataki tiko.

Kevaka eda sa tuvakarau, ko na kunea e vuqa na madigi mo wasea na ivakavuvuli vakayalo o sa vulica. Ni da vakalougatataka na nodra bula na tani, ena vakalougatataki na noda bula. Eda sa raica na ivakavuvuli nei Peresitedi Ezra Taft Benson: “Ira na tagane kei na yalewa ka ra solia na nodra bula vua na Kalou, era na kunea ni o Koya ena rawa ni cakava e levu sara na ka ki na nodra bula, mai na nodra sasaga ga o ira vakai ira. O Koya ena vakatitobutaka na nodra reki, vakarabailevutaka na nodra rai, vakamakaretaka na nodra vakasama, vaqaqacotaka na nodra viciko, vueta cake na yalodra, vakalevutaka na nodra kalougata, vakavuqataka na nodra madigi, vakacegui ira, kauta mai eso na nodra itokani, ka sovaraka vei ira na vakacegu. O koya yadua ena vakayalia na nona bula ena veiqaravi vua na Kalou ena kunea na bula tawamudu“ (Nodra iVakavuvuli na Peresitedi ni Lotu: Ezra Taft Benson [2014], 42–43).

Cakacakataki ni iKalawa

Oqo na parokaramu ni cakacaka Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “cakacakataki ni ikalawa.“ Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vakabulai.

Qaravi ira tale e so

Na gagadre ni veiqaravi sa ikoya e dua na isau ni noda iwalewale ni veivakabulai mai vua na Turaga. Mai na noda vakabulai, eda sa sotava kina e dua na veisau levu ni yalo vei keda kei ira tale eso (raica na Alama 5:14). E vakatavulica o Peresitedi Russell M. Nelson: “[Eda] sa segata vakaidina meda bulataka na imatai kei na ikarua ni ivunau levu. Ni da lomana na Kalou ena yaloda taucoko, sa vagolea na yaloda ki na nodra tiko vinaka na tamata eso tale ena dua na viko totoka ka dodonu” (“The Second Great Commandment,” Liaona, Nov. 2019, 97).

Ia, e sega ni dau rawarawa na veiqaravi. Dina ga nida vinakata, ia eda na sega ni rawa ni qaravi ira kece era vakaleqai tu. Eda na tomana tikoga na noda gadreva na veidusimaki kei na kaukauwa mai vua na Turaga me da qaravi ira kina na tani. E rawa ni da masuta na veivuke me da raica na sala e vinakata o Koya me da veiqaravi kina. E rawa ni da tarogi ira era tu wavoliti keda me baleta na madigi kei na gagadre. Eda na kurabuitaka beka na levu ni madigi eda rawa ni rawata. Na qaravi ira na tani e rawa ni rawarawa me vaka na matadredre, se rawa ni vakaitavi vakalevu cake me vaka e dua na cakacaka levu. E dodonu meda vakatulewa vakavuku ena noda veiqaravi meda kakua kina ni sivia na noda kaukauwa se na noda rawa-ka.

E dua na sala vinaka duadua eda rawa ni veiqaravi kina o ya meda wasea na noda italanoa ni veivakabulai. E rawa ni da tomana tikoga na tiko ena soqoni ni veivakabulai ka vakadinadinataka na loloma soliwale kei na kaukauwa ni veivakabulai i Jisu Karisito. Ni keimami se qai yaco mai, keimami a ciqoma na inuinui mai vei ira era a cakacakataka na veikalawa ka kunea na veivakabulai e matada. Sa noda na madigi oqo me da wasea na itukutuku ni veivakabulai ena noda tukuna na noda italanoa. Eda wasea talega na noda ivakadinadina me baleta na kaukauwa ni iVakabula ni da tiko ena lotu kei na noda matavuvale kei na itokani.

Vakaitavi ena cakacaka ni valetabu kei na tuvakawa.

E dua na sala vakaibalebale ka kaukauwa eda rawa ni veiqaravi kina o ya ena cakacaka ni valetabu kei na tuvakawa. Na veiqaravi oqo e sega walega ni vakalougatataki ira era sa mate, ia e vakalougatataki keda talega. Me vaka a kaya o Peresitedi Russell M. Nelson: “E dina ni tu ena cakacaka ni valetabu kei na tuvakawa na kaukauwa me vakalougatataki ira era tiko ena taudaku ni ilati, sa tiko vakakina na kaukauwa me vakalougatataki ira era bula tiko. E tiko na veivakasavasavataki vei ira era vakaitavi kina“ (“Generations Linked in Love,“ Liaona, Me 2010, 93). Vei keda e vuqa, na cakacaka ni valetabu kei na tuvakawa sa tiki bibi ni noda vakabulai.

Eso vei keda eda na sega beka ni vakarau tu me da veiqaravi ena valetabu. Eda na sega beka ni vakauqeti se kila na vanua meda tekivu kina ena cakacaka ni tuvakawa. Ia e rawa ni da vakatulewataka meda tekivu. E rawa ni da sikovi ira na noda bisopi se peresitedi ni tabana me baleta na noda gagadre me da veiqaravi. Na noda gagadre me da cakava na loma ni Turaga ka tomana tikoga na noda bula ena rawa ni vakauqeti keda. Eda na gadreva beka me da cakava eso na veisau ena noda bula me da curuma kina na valetabu. Eda na sega beka ni kila na sala me da cakava kina na cakacaka ni tuvakawa, ia e rawa ni da kerea na veivuke. E rawa ni ra vukei keda na peresitedi ni kuoramu ni iSoqosoqo ni Veivukei kei na italatala qase me da kila na vanua me da tekivu kina. Era tu talega na ivurevure ena initaneti me vukei keda ena FamilySearch.org kei na ChurchofJesusChrist.org.

Na cakacaka ni valetabu kei na tuvakawa e vakarautaka na kaukauwa kei na kaukauwa me da bula kina. “O na sega walega ni kunea na veitaqomaki mai na veitemaki kei na veika ca ni vuravura, ia o na kunea talega na kaukauwa yadua—kaukauwa mo veisau, kaukauwa ni veivutuni, kaukauwa ni vuli, kaukauwa me vakatabui, kei na kaukauwa me vagolea na yalodra na lewe ni nomu matavuvale vei ira vakai ira ka vakabula na veika e gadrevi me veivakabulai“ (Dale G. Renlund, “Tuva Kawa kei na Veivakalougatataki ni Valetabu,“ Liaona, Fepe. 2017, 39). Na ivakavuvuli ena idusidusi oqo ena muataki keda meda muria na iVakabula ka marautaka na veivakalougatataki kece sara e tu Vua me baleti keda, vakabibi o ira era kunei ena valetabu.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vuetaki. Eda rawa ni vakayagataka ena vakasama vakatitobu, vuli, kei na volavola. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Na saumaki kei na veivueti.

“Na saumaki dina e levu cake sara mai na kena kilai walega na ivakavuvuli ni kosipeli ka levu cake na kena ibalebale mai na dua ga ni noda ivakadinadina ni veivakavuvuli oqori. Na saumaki dina e kena ibalebale ni da cakacakataka tiko na veika eda vakabauta ka vakatara me vakavuna ‘e dua na veisau levu vei keimami, se ki na lomai keimami.’ [Mosaia 5:2]. … Na [Saumaki mai] e taura na gauna, sasaga, kei na cakacaka” (Bonnie L. Oscarson, “Mo Dou Saumaki Mai,” Liaona, Nove. 2013, 76–77).

Ni sa veisautaka na Yaloda na Turaga ena saumaki mai kei na veivakabulai, eda sa yaco me ivurevure ni kaukauwa vei ira tale eso era se qai tekivutaka tiko na sala oqo. E vakavulici Pita na iVakabula, “Ni ko sa saumaki tale, mo vakataudeitaki ira na wekamu” (Luke 22:32

E yaga vakacava na ivakamacala nei Sisita Oscarson me baleta na saumaki mai ki na veika au sotava niu sa vuetaki tiko?
Na cava o vakila me baleta na vakataudeitaki ira na tani ni ra sa vagalalataki tiko mai na itovo eso ni veivakatotogani?

Na tubu cecere mai na veikalawa lalai

“Ia dou kakua ni oca ena cakacaka vinaka, raica dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere” (Vunau kei na Veiyalayalati 64:33

Na cava au vakila niu vakasamataka meu bulataka na ivakavuvuli oqo ena ituvaki kece sara ni noqu bula?
E veivuke vakacava me kilai ni veicakacaka cecere era vakayacori ena veikalawa lalai?

Wasea na noda ivakadinadina ka vakacegui ira na tani

“Io oqo na noqu lagilagi de na rawa meu iyaya ni cakacaka ena liga ni Kalou meu kauta mai eso na yalo ki na veivutuni; ka sai koya oqo na noqu marau.

Ia raica, sa vakasinaiti na yaloqu ena marau, ni’u sa raica ni ra sa veivutuni vakaidina e vuqa na wekaqu, ka ra lako mai ki vua na Turaga na nodra Kalou; ia ka’u nanuma na ka sa kitaka vei au na Turaga, io, ni sa rogoca ko koya na noqu masu; io, au a qai nanuma ni sa dodoka tu mai vei au ko koya na ligana dauloloma” (Alama 29:9–10).

Eda sa vulica ni sa bibi sara kina noda vuetaki na noda tu vakarau me da wasea na noda vakadinata na veivakavuvuli oqo.

Ena vukei au vakacava na noqu wasea na veika au sa sotava meu na kaukauwa tikoga ena noqu vuetaki?

“Io, [ka dou] sa lomasoli mo dou rarawa vata kei ira sa rarawa; io, ka vakacegui ira era sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega dou sa tiko kina, ka me yacova na mate, io me rawa ni sereki kemudou na Kalou, ka mo dou okati vata kei ira ena imatai ni tucake tale, mo dou rawata kina na bula tawamudu—

“Oqo au sa kaya vei kemudou, ke sa vakaoqo na gagadre ni lomamudou, ia na cava sa tarovi kemudou mo dou papitaisotaki ena yaca ni Turaga, mo dou nona ivakadinadina ni dou sa ia oqo na veiyalayalati kei koya, mo dou na qaravi Koya ka muria na nona ivunau, me na qai sovaraka mai kina vakalevu sara vei kemudou na Yalona?” (Mosaia 18:9–10).

Na veika o sa sotava mai ena nomu vakatotogani ena vukei iko mo vakila talega na dredre era sotava tiko na vakatotogani; na veika o sotava ena nomu vagalalataki ena vukei iko mo vakacegui ira.

Sa tubu vakacava na noqu gagadre meu ivakadinadina ni Kalou me tekivu mai na gauna au muria kina na ikalawa ni veivueti?

Veiqaravi dina ga ni sega ni uasivi

“Vakavo ga vei koya na Luvena tawacala e duabauga ka Vakatubura, sai ira ga na tamata malumalumu ena cakacaka kina na Kalou mai na ivakatekivu ni gauna” (Jeffrey R. Holland, “Kemuni na Turaga, Au sa Vakabauta,“ Liaona, Me 2013, 94).

“E sega ni dua vei keda e uasivi sara na nona bula se matavuvale uasivi sara; Au sega dina ni cakava. Nida saga meda dau kauaitaki ira tale eso era sotava tale ga na bolebole kei na nodra malumalumu, ena rawa ni vukei ira me vakila nira sega ni tiko duadua ena nodra dredre. Na tamata kece e gadrevi me vakila ni ra sa itaukei ka ra sa vinakati ena yago i Karisito” (J. Anette Dennis, “His Yoke Is Easy and His Burden Is Light,” Liaona, Nove. 2022, 81).

Ena so na gauna eda dau vakataroga se eda sa vakarau tu beka meda wasea na veivagalalataki vei ira na tamata, baleta ni se sega ni taucoko na vakatovotovotaki tiko ni vei ivakavuvuli oqo.

E vukei au vakacava na noqu kila ni cakacaka ni iVakabula vei ira na tamata malumalumu ena vukei au meu tu vakarau ka wasea vakalevu cake na veika au sa sotava ena noqu vakabulai?

Na kaukauwa ni Kalou me veivakabulai

“Niu sa sega ni maduataka na itukutuku vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta” (Roma 1:16).

Na cava na noqu vakasama kei na veika au vakila niu raica lesu na noqu veisau vakayalo ena gauna taucoko ni veivakabulai?
Au sa lomalomarua beka meu wasea na veika au sotava niu sa vuetaki tiko? Ke vakakina, na ivakatakilakila cava?

“Mo lako yani ki na vanua ka’u sa talai iko kina, ia ena vakatakila vei iko na Dauveivakacegui na vanua mo lako kina kei na veika mo laki kitaka.

“Mo daumasu tiko ga mo kakua ni rawai ena veitemaki, ka vakayalia na kemu isau.

“Mo yalodina tiko ga me yacova na ivakataotioti, raica au sa tiko vata kei iko. Na vosa oqo e sega ni nona yalayala e dua na tamata, se nodra yalayala na tamata, raica oqo na ka au sa yalataka koi au ko Jisu Karisito na nomu Dauveivueti, me vaka na lewa i Tamaqu” (Vunau kei na Veiyalayalati 31:11–13).

Na ivolanikalou era sinai tu kina na veituberi ena vukudra o ira era gadreva me ra tiko ga ena dua na sala vakayalo ni bula ka na kauti ira lesu vua na Kalou.

Na veidusimaki digitaki cava au sa kunea ena veitikina oqo?