Sepiteba
Ena Vunautaki ki Vuravura Taucoko na Kosipeli
“Ia ena vunautaki yani na itukutuku vinaka oqo ki na veimatanitu, veimataqali, duivosavosa, kei ira na tamata” (V&V 133:37).
Kuria ki na veivakasama oqo na nomu o sa vakarautaka. Tuvanaka na sala me kilai kina na vunau baleti ira na gone ka vukei ira me ra kila vakavinaka kina ka bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”
iMatai ni macawa: E vakavuvulitaka na ivolanikalou ni na vunautaki yani na kosipeli ki vuravura taucoko.
Vakatakila na ivunau: Sureta e dua na gone e qase cake me wilika i cake na Vunau kei na Veiyalayalati 133:37. Tukuna vei ira na gone ni ra sa vunautaka tiko na daukaulotu na kosipeli ki na veivanua e vuqa e vuravura, ena vuqa na veimataqali vosa. Me ra tokaruataka vata na gone na ivolanikalou.
Veivakauqeti me kilai: Vakaraitaka vei ira na gone e dua na mape ni vuravura se droinitaka ga e dua na mape rawarawa ena papa. Kerei ira me ra wasea na veivanua eso era sa veiqaravi kina eso na tamata era kila.Vakatakilakilataka na veivanua oqo ena mape. Sureti ira na gone me ra wasea na vanua era na vinakata me ra veiqaravi kina ka solia me ra vakatakilakilataka na vanua oqori ena mape. Vakamacalataka ni kaci ki na kaulotu e vakayacora na Turaga mai vua na parofita ka ra dau veiqaravi na daukaulotu ena vanua cava ga e kacivi ira kina na Turaga. Vukea na nodra vakatovotovo na gone ena nodra cavuta na yaca ni Lotu ena vica na vosa duidui. Veitalanoataka vata kei ira na gone ni tu eso na vanua e se bera ni vakatarai me ra veituberi kina na daukaulotu. Vakamacalataka ni sa kerei keda o Peresitedi Thomas S. Monson me da “dau masulaka me dolavi na veivanua oqori, me rawa ni da wasea vata kei ira [na tamata kecega] na reki a kauta mai na kosipeli” (ena Conference Report, Okoto. 2008, 4; se Ensign, Nove. 2008, 6).
Veivakauqeti me bulataki: Sureti ira na gone me ra vola e dua na ivola vua e dua na daukaulotu mai na nomu tabanalevu se vei ira na daukaulotu era veiqaravi tiko ena vanua o tiko kina. Solia na ivola vua na iliuliu ni daukaulotu ni tabanalevu me vakauta vei ira na daukaulotu.
Ena itaviqaravi oqo ena vica walega na gone era na lako mai ki liu. Me rawa ni ra vakaitavi kece na gone, sureti ira me ra vakasolokakanataka vei koya e toka volekati ira na vanua era vinakata me ra na veiqaravi kina.
Sa tu na mape ena sharingtime.lds.org
iKarua ni macawa: E vakalougatataka na tamata kecega na kaulotu.
Veivakauqeti me kilai: Sureta e dua e se qai lesu mai ena kaulotu me lako mai ki na Lalai ka tukuna vei ira na gone me baleta eso na veivakalougatataki ka a ciqoma ena nona qarava na cakacaka ni kaulotu. Sureti ira tale eso (o ira era se qai saumaki vou mai, o ira na gone, se na matavuvale) me ra wasea e dua na ka me baleta na cakacaka ni kaulotu era sa sotava ka sa vakalougatataka na nodra bula. Sureti ira na gone me ra lagata na “We’ll Bring the World His Truth” (NVL, 172–73) vei ira na vulagi.
iKatolu ni macawa: Au sa rawa ni vakarautaki au oqo meu daukaulotu.
Veivakauqeti me kilai: Vakaraitaka e dua na iyaloyalo kei Amoni ka tukuna vei ira na gone ni dua o koya na daukaulotu cecere ka a vakavuvulitaka na kosipeli vei ira na Leimani. Vakamacalataka ni a vakarautaki koya me dua na daukaulotu ni se bera ni lako yani. Wilika o iko (se kerea e dua na gone qase cake me wilika) i cake na Alama 17:2–3. Kerei ira na vo ni gone me ra vakarorogo ka laveta na ligadra ni ra rogoca na sala a vakarautaki koya kina o Amoni me dua na daukaulotu. Kerea e dua na gone me vola na nodra isaunitaro ena papa. Tukuna vei ira na gone ni rawa ni ra vakayacora na veika vata oqo ena nodra vakavakarau me ra daukaulotu. Me lagati “I Hope They Call Me on a Mission” (NVL, 169). Ni ra lagasere tiko, sureti ira na gone me ra matanataka toka ena so na imoimoi rawarawa e rawa ni ra dau vakayacora na daukaulotu, me vaka na tukituki e katuba, wili ivolanikalou, se vodo basikeli
Veivakauqeti me bulataki: Tukuna vei ira na gone ni tu eso na ka e rawa ni ra cakava ena gauna oqo me ra vakavakarau kina me ra daukaulotu, me vaka na wili ivolanikalou, rawata e dua na ivakadinadina, rokova na ivunau, saumi ikatini, ka maroroi ilavo. Solia vei ira yadua na gone e dua na tikidua ni ikatini, ka vakaraitaka vei ira na kena vakaleweni. Vukei ira na gone me ra vakarautaka e dua na vanua e rawa ni ra biuta kina na nodra ikatini kei na ilavo era sa maroroya tiko me baleta na nodra kaulotu. E rawa ni dua na kisi, dua na tavaya se kava, se dua na waqanivola ka tu na tikina me biu kina na ikatini kei na ilavo maroroi.
Ni o sureta e dua na gone me mai volavola ena papa ena vakila kina o koya na nona tamata nuitaki. Ena veivuke talega me dreta toka na nodra vakarorogo na vo ni gone.
iKava ni macawa: E rawa niu daukaulotu ena gauna oqo.
Veivakauqeti me kilai: Vola na veiyatuvosa oqo ena papa: “E rawa meu daukaulotu ena gauna oqo ena noqu .” Sureti ira na gone me ra vakasamataka na veika eso e rawa ni cakava me ra daukaulotu kina ena gauna oqo. Me ra wasea na nodra vakasama kei na dua e dabe volekati ira tiko. Sureti ira e vica na gone me ra vola na nodra isau ni taro ena papa.
Veivakauqeti me kilai: Sureta e dua na gone qase cake me wasea na italanoa ni iMatai ni Raivotu, ka sureta e dua tale na gone me wasea na nona nanuma me baleta na iVola i Momani. (Kerei ira rawa na gone me rawa ni levu kina na nodra gauna ni vakavakarau.) Vakauqeti ira kece na gone me ra wasea na italanoa ni iMatai ni Raivotu se na nodra nanuma me baleta na iVola i Momani kei ira na nodra matavuvale.
Veivakauqeti me bulataki: Kerei ira na gone me ra vakasamataka e dua na imoimoi ka rawa ni vakaraitaki kina na sala e rawa ni da daukaulotu kina ka bulataka na kosipeli ena gauna oqo. Digia e dua na gone me lako mai ki liu ka wasea na nona imoimoi vei ira na vo ni Lalai. Sureti ira na gone me ra cakava na imoimoi ni ra lagata tiko na “Do As I’m Doing” (NVL, 276). Me ra cakava yadudua na gone ke levu na gauna.