Ukunqoba KukaMsindisi Wethu Othandekayo

Obizweni lwami njengoMphostoli, ngike ngahamba kakhulu futhi ngaba nenhlanhla yokuhlangana nezingane, intsha, kanye nabantu abadala kuwo wonke umhlaba. Kunezikhathi zenjabulo enkulu empilweni, kodwa into eyodwa engiyibone ngawami amehlo futhi ngayizwa ekujuleni kwenhliziyo yami ukuthi ngaphezu kwentokozo nenjabulo, impilo inezikhathi zokudumala nokuzwa ubuhlungu.

Angisoze ngakhohlwa ukuhlala nezingane ezine ezincane abazali bazo ababulawa ngesihluku yisigebengu ekhaya labo ngenkathi izingane zilele, noma ukuhlangana nowesifazane owayehlukunyezwe eseyintombazane yisihlobo esithembekile, noma ukuhlala eceleni kombhede wentombazane encane eyayilimele ebuchosheni ngemuva kokuwa ebhayisikilini futhi eyayizofa maduze, noma ukulalela ukukhala kowesifazane owayenomyeni wakhe owayemkhaphele kakhulu yena nezivumelwano zakhe zasethempelini iminyaka eminingi.

Ngibuzwile ubuhlungu bezithandani ezinengane endala engasawakholwa amaqiniso evangeli futhi nefuna ukuqeda ukholo lwabanye emndenini. Ngike ngavakashela abazali nabangane abakhathazekile bensizwa ebinekusasa eliqhakazile eyazibulala. Ngike ngezwa usizi olufana noluka Nkulunkulu lwalabo abenze isono futhi abafuna ngempela ukuphenduka kanye nokuzwa ubuhlungu kwalabo abathintekile yileso sono.

Ngike ngabona ukuzwa ubuhlungu kogula ngengqondo kwalowo ozwa ubuhlungu nakulabo abezwa ubuhlungu buthule njengoba bebuka bengenalutho abangalwenza. Ngike ngabona ukulahlekelwa okukhulu komuntu siqu okubangelwa izinhlekelele zemvelo, izikhukhula, iziphepho, umlilo, nokuzamazama komhlaba. Ngike ngabona isiphithiphithi emazweni ngenxa yeziphepho zezombusazwe, izimpi, kanye nokubhujiswa, kanye nobunzima obufika lapho okungalindelekile kuthweswa labo abangenacala futhi abafuna ukwenza okulungile.

Healing Hands(Izandla Ezelaphayo), ufanekiso owenziwe nguKolby Larsen, mawungakopishwa

Umsindisi Uyasisiza

Ekhuluma ngeNhlawulo kaJesu Kristu, uMongameli James E. Faust (1920–2007), uMeluleki Wesibili kubuMongameli bokuQala, wathi: “Abalimele kufanele benze konke okusemandleni abo ukuze babhekane nokuvivinywa kwabo, futhi uMsindisi ‘uzosiza abantu bakhe ngokobuthakathaka babo’ [Alima 7:12]. Uzosisiza sithwale imithwalo yethu. Amanye amanxeba abuhlungu futhi ajulile kangangokuthi awakwazi ukupholiswa ngaphandle kosizo oluvela emandleni aphezulu kanye nethemba lobulungiswa obuphelele kanye nokubuyiselwa empilweni elandelayo. … Uyabuqonda ubuhlungu bethu futhi uzohamba nathi ngisho nasezikhathini zethu zobumnyama obukhulu.”

Ngizizwa ngidonseleka kakhulu othandweni loMsindisi kanye nezibusiso ezingapheli esizithenjisiwe ngeNhlawulo kaJesu Kristu. Akazange asivikele kwizehlakalo zempilo eziletha ubuhlungu obungenakulinganiswa, kodwa wasivikela ekuhluphekeni okuphakade kanye nokuhlukaniswa noBaba oseZulwini futhi wasivumela, ngokuhlupheka Kwakhe okubanzi, ukuba nethuba lenjabulo ephelele kanye nenjabulo yaphakade phambi kukaNkulunkulu.

UMongameli Dallin H. Oaks wasikhumbuza: “Ngokwedlulele, usizo lukaNkulunkulu olunamandla kakhulu kwaba ukulungiselelwa Kwakhe nuMsindisi, uJesu Kristu, owayezohlupheka ukuze akhokhe inani futhi anikeze intethelelo yezono eziphendukelwe. Leyo Nhlawulo enomusa futhi ekhazimulayo ichaza ukuthi kungani ukholo eNkosini uJesu Kristu kungumgomo wokuqala wevangeli. Inhlawulo Yakhe “ifeza ukuvuka kwabafileyo” (Alima 42:23), futhi “[iyoku]hlawulela izono zomhlaba” (Alima 34:8), izosula zonke izono zethu esiphenduke kuzo futhi inike uMsindisi wethu amandla okuba asisize ebuthakathakeni kwethu kwenyama.

Imininingwane evela kumfanekiso Prayer at Gethsemane[Mthandazo eGetsemane], owenziwe nguDel Parson, ingakopishwa ukuze isetshenziswe yiBandla kuphela

Isenzakalo Esibalulekile Saphakade

Uma ngicabanga ngokuhlupheka engikubonile mathupha, okuncane kakhulu uma kuqhathaniswa nabo bonke abake baphila emhlabeni noma abazophila kuwo, angikwazi, ngamazwi engiwaziyo, ukuchaza imizwa esenhliziyweni yami ngalokho okumele ukuthi kwenzeke enhliziyweni nasengqondweni nasemzimbeni nasemphefumulweni woMsindisi ezikhathini Zakhe ezingcwele zokuhlupheka okugcwele ngenxa yezono nobuhlungu babo bonke abantu.

Isenzakalo esibalulekile saphakade saqala njengoba uJesu eya “endaweni ebizwa ngokuthi iGetsemane” (NgokukaMathewu 26:36) eNtabeni Yeminqumo ngaphandle kwezindonga zomuzi waseJerusalema. Wathi kubafundi bakhe, “Umphefumulo wami udabukile kakhulu, kuze kube sekufeni” (NgokukaMathewu 26:38).

Wathandaza, wathi, “Baba, uma kungenzeka, akudlule kimi lesi sitsha; nokho kungabi njengokuba ngithanda mina, kodwa njengokuba uthanda wena” (NgokukaMathewu 26:39) Wabuyela kubafundi bakhe, wabathola belele, wahamba futhi, wathandaza okwesibili. “Baba, uma lesi sitsha singedlule kimi, ngingasiphuzanga, mayenziwe intando yakho. … [Wa]thandaza okwesithathu, esho lawo mazwi” (NgokukaMathewu 26:42, 44).

UJesu waphuza isitsha esibabayo futhi wahlupheka ngaphezu kokuqonda kwethu kokufa kokubili ensimini nasesiphambanweni. Ngaphandle kwesono, wathatha zonke izono zethu, ukuze njengoba siza kuYe futhi siphenduka, izono zethu nemithwalo yethu kususwe kithi (bheka2 KwabaseKorinte 5:21).

Ukuhlupheka kukaJesu, ukufa, kanye nomhlatshelo wokuhlawulela kwase kulindelwe isikhathi eside. Ekhuluma eminyakeni engama-700 ngaphambi kokuzalwa kukaJesu, u-Isaya waprofetha ukuthi “iNkosi ibeke phezu kwayo ububi bethu sonke” (Isaya 53:6). UJesu wakhuluma ngokunikela ngempilo Yakhe “njengesihlengo” (NgokukaMathewu 20:28; bheka futhi1 Thimothewu 2:6) “ukuze kuthethelelwe izono” (NgokukaMathewu 26:28) kubo bonke abazokholwa kuYe futhi baphenduke ezonweni zabo. UPetru uchaze indlela “ahlupheka ngayo ngenxa yezono [zethu]” (1 Petru 3:18), ukuthi ngemivimbo Yakhe siyaphiliswa (bheka1 Petru 2:24). Wenza lokho okungekho omunye owayengakwenza ukuze asivumele sibuyele ebukhoneni bukaBaba wethu. “Walinyazwa ngenxa yeziphambeko zethu” (Isaya 53:5).

Ngemva kokuhlupheka eGetsemane, ubuhlungu Bakhe baqhubeka—ukukhashelwa yilowo owayehamba Naye, ukugconwa phambi kwababusi abangalungile, ubuhlungu bokushaywa komzimba Wakhe, umqhele wameva ucindezelwe ekhanda Lakhe ngamasosha anonya nangenasihawu (bheka NgokukaJohane 18:2–3, 12–14; NgokukaMarku 15:15–20), kanye nogongolo olusindayo oluphonswe enyameni edabukile yomhlane Wakhe njengoba Eya eGolgotha (bheka NgokukaJohane 19:16–17).

Esiphambanweni, ubuhlungu obukhulu abuzwa eGetsemane babuya ngobunzima okungekho muntu owayengabubekezelela. UJesu Kristu, iNdodana kaNkulunkulu, wathwala yedwa umsebenzi waphezulu kaYise wokunikela ngokuphila kwakhe. Amasosha nababusi babengenakukuthatha lokho kuYe (bheka NgokukaJohane 10:18). Ngenhlonipho nokuthobeka, uJesu wagoba ikhanda lakhe wathi, “Kufeziwe” (NgokukaJohane 19:30).

Umzuzu wokugcina wokuphila Kwakhe wawuphelele. Awekho amagama okuchaza ubukhulu besipho Sakhe esiyigugu. Ngeke sidingeke komunye umuntu. UJesu Kristu wahlupheka “kanye kuphela” (KumaHebheru 10:10).

Njengoba umsebenzi Wakhe ongcwele usufeziwe, manje wayezoba ngowokuqala emlandweni wesintu ukuvuka ethuneni aye ekungafini (bheka 1 KwabaseKorinte 15:21–23).

Kwabesifazane ababesethuneni, izingelosi zathi:

“Nimfunelani ophilayo kwabafileyo na?

Akakho lapha, kepha uvukile” (Luka 24:5–6).

KubaPhostoli Bakhe, wathi, “Bhekani izandla zami nezinyawo zami, ukuthi yimina uqobo” (Luka 24:39). Emva kwalokho “wabonwa ngasikhathi sinye ngabazalwane abadlula amakhulu ayisihlanu” (1 KwabaseKorinte 15:6). Ofakazi bokuzibonela babona uMsindisi ovusiwe. Wayengafile. Wayephila.

UJesu Kristu waphula izibopho namaketango okuboshwa okuphakade kokufa kwawo wonke umuntu oke waphila noma ozophila emhlabeni (bheka 1 KwabaseKorinte 15:22). Wanqoba isitha sethu esizungezile; isitha sokufa sanqotshwa phakade.

UJesu Kristu wathwala phezu Kwakhe izono zakho, izinhlungu zakho, ubuhlungu benhliziyo bakho, nobuthakathaka bakho. Awudingi ukuba uthwale konke lokhu uwedwa! Uzokuthethelela lapho uphenduka. Uzokubusisa ngalokho okudingayo. Uzophilisa umphefumulo wakho olimeleyo. Njengoba uzifaka ejokeni Naye, imithwalo yakho izobalula. Uma uzokwenza futhi ugcine izivumelwano zokulandela uJesu Kristu, uzothola ukuthi izikhathi ezibuhlungu zempilo yakho ezesikhashana. Izinhlupheko zakho ziyaku ‘gwinywa enjabulweni kaKristu’ [Alima 31:38]”

Njengomunye wabaPhostoli Bakhe abagcotshiwe, ngibone izikhathi ezingokomoya nezomuntu siqu ezingilethele ubufakazi obuqinisekile bokuthi Uyaphila. Kulesi sikhathi sePhasika, kwangathi lamazwi angahlala ezingqondweni nasezinhliziyweni zethu: “Mangingakhohlwa, O Msindisi, Wena wangophela,” njengoba sijabula ngokuhlabelela: