Pweidahn Atail Sounkomour Kempoakehu

Nan ahi pwukoahn Wahnparon men, seiloak tohto I wiahier oh tuhongehr seri tohto, me pwulopwul, oh me laud kan sang wasa tohto nan sampah. Ansou tohto mie popohl laud nan mour wet, ahpw ehu mehkot me i kilangkihier pein meseikat oh kehnehr nan ahi mohngiong iei me en kapatapatehng peren oh popohl, mour wet pil kin mie ansoun kansensuwed oh lokolok.

I sohte pahn manokehla ni ahi mwomwohdehng kisin seri pahmen me arail pahpa nohno kamala nan imwarail sang aramas tiahksuwed men nan pein imwarail ansou me irail wie memeir, de ni ahi tuhong lih emen me ni ah kisin serepein emen kisehn ah peneinei epwelsuwedih, de mwomwohd limwahn en kisin serepein men peht me pwupwsang pohn pwaisikel oh nan moange ohla oh pahn momourkihte ansou kis, de rongorong lih emen me wie sengisengki ah pwoud ah kauwehdi oh kauwehla ah inou sarawi kan ni soangen ahl sakanakan ehu erein pahr tohto kei.

I pil kehnehr medek me pwopwoud ehu ahniki ansou me neira seri laudehr emen sohla kamehlele padahk kan en rongamwahuo oh kin songosong en kaluwetehla pwoson en ekei tohn arail peneineio. I pil pwarekehr pahpa nohno oh kempoakepahn kisin pwutak emen me konehng en pweida nan ah mour ahpw kemehla pein ih. I pil kenehr pahtou laud pwehki irail akan me wiahda dihp oh inangih koluhla mehlel oh pil pahtou laud en irail akau me epweliki dihpo.

I pil kilangehr kansensuwed en soumwahu en nan mwahliel ong me ahniki soumwahuo oh pil iangahki irail akan me kin ahneki pahtou ni arail kin kilkilang ahpw sohte me re kak sewesehki. I pil kilangehr kahpwal lauden en aramas ohlahn dipwisou oh wasa kan sang kahpwal en sahpw oh sehd, loalada, melimel, kisiniei, oh rerer en sahpw akan. I pil kilangehr pingiping kan nan sahpw akan sang ni koasoandi sapahrek kan, mahwen, oh ohla kan, oh lokolok me kin pwarada sang ni mwokid sohte kesikpe kan me kin kohieng irail me sohte diparail akan oh kin nanatihong pwehn wia dahme pwung.

Healing Hands, sang Kolby Larsen, sohte kak alasang

Sounkomouro Kin Sewese Kitail

Nan ah padahngki duwen Tomwpen Sises Krais, President James E. Faust (1920–2007), me wia Sounsawas Keriemen nan Presedensi Keieu, kosoia: “Me ohla kan anahne wia dahme re kak pwehn apwalih arail kahpwal kan, oh Sounkomouro pahn ‘ketin sewese sapwellime aramas akan ni duwen arail luwet akan’ [Alma 7:12]. E pahn ketin sewese kitail en wahda atail katoutou akan. Ekei ohla kan me kamedek oh loal mehlel me kahrehda arail sohte kak mwahula ma sohte sawas sang manaman en powe oh koapwoaroapwoar me mie kopwungpe oh kakehlail nan mour mwurin mour wet. … E ketin wehwehki atail medek oh pahn ketin iang kitail pil lel ansou keieu apwal akan.”

E ahniki pepehm lauden karanih limpoak en Sounkomouro oh kapai soh-imwi kan me inoupe miehier ong kitail kan pwehki sang ni Tomwpen Sises Krais. E sohte perehsang kitail kahpwal kan me kin wahdo medek laud, ahpw E ketin perehsang kitail lokolok soutuk oh kopwung sang Sahm Nanleng oh mweidohng kitail, sang ni Sapwellime lokolok laudo, en kak ahneki ansou mwahu en diar popohl unsek oh peren soutuk mwohn sihlang en Koht.

President Dallin H. Oaks katamankin kitail: “Leledohr ansouet, Sapwellimen Koht sounsawas en sampah me keieu laud iei Sapwellime kisakis en Sounkomouro, Sises Krais, me pahn lokolok pwehn pwainda oh kaunopada mahk ohng me koluhla kan. Kalahngan oh kilohri en Tomwpen Dihpo kasaledahr me pwoson Kaun Sises Krais wia keieun padahk nan rongamwahu wet. Sapwellime Tomwo ‘kapwaiadahr iasada en me melahr akan’ (Alma 42:23), oh tomwkilah[r] dipen sampah kan’ (Alma 34:8), kasohrelahr dipatail me kitail koluhkilahr akan oh kihong atail Sounkomouro manaman en sewese kitail nan atail kahpwal kan en paliwar.”

Pisetikpe sang Prayer at Gethsemane, sang Del Parson, kak ale oh doadoahngki ohngete Mwomwohdiso

Kemwekid Kesempwal Soutuk

Ansou mei kin medewe lokolok kan me pein ngehi kilangehr, me inenen tikitik rasehng irail akan me momour oh pil pahn iang mour pohn sampah ansou kohkohdo, I sohte kak, kawehwehda ni soangen ahl ehu mei ese, duwen pepehm kan en ahi mohngiong ong duwen dahme mihmi nan mohngiong oh madamadau oh paliwar oh ngehn en Sounkomouro nan Sapwellime ansou sarawi en lokolok keieu laud pwehki dihp oh weirek koaros en aramas akan.

Kemwekid kesempwal wet tepida ansou me Sises ketla nan “wasa ieu me kahdaniki Kedsemeni” (Madiu 26:36) nan Nahna en Olihp maslikin kahnihmw en Serusalem. E ketin mahsanihong Sapwellime wahnparon ko, “Palingeni inenen pahtoula, lau lel mehla” (Madiu 26:38).

E ketin kapakap, oh mahsanih, “Maing semei, ma iei kupwuromwi, komw ketkisangie kep wet: ahpw soh kaidehn pein ahi, ahpw kupwuromwi en pweida” (Madiu 26:39). E ketin pwurala rehn Sapwellime wahnparon ko, oh diarada me re meirlahr, ahpw pwurala, oh pilehu kapakap keriapak. “Ipa, ma dahl en lokolok wet sohte kak douluhlweisangie, I en dehr nim, kupwuromwi en pweida. … E ahpw [pil] kapakap kesilipak, oh kosoia mahsenkoahte” (Madiu 26:42, 44).

Sises aledahr dahl katiko oh ahnikiher lokolok ehu me laudsang dahme sampah ese nan mwetuelo iangahki pohn lohpwuo. Ni sohte dipe, E ketin alehda ong pein Ih dihp koaros, pwe ma kitail pahn kohdo Reh oh koluhla, dipatail oh atail katoutou kan pohn sohrasang pohtail (kilang 2 Korint 5:21).

Sapwellimen Sises lokolok, pwoula, oh meiroangen tomwpen dihpo kokohpdahr mahso. Kosokosoi sounpar 700 mwohn ipwidien Sises, Aiseia kohpadahr me ”Kauno aledahr ohng pein ih atail sapwung koaros” (Aiseia 53:6). Sises mahsanih me E pwilikihdi ah mour nin duwen “nein aramas” (Madiu 20:28; pil kilang 1 Timothy 2:6) “ohng mahkepen dihp” (Madiu 26:28) ohng koaros me pahn kamehlele Ih oh koluhkihla diparail akan. Piter kawehwehda mwomwen Ah pahn “lokoloki [dipatail] akan” (1 Piter 3:18), me sang Sapwellime ohla kan kitail pahn kamwahula (kilang 1 Piter 2:24). E ketin wiahier dahme sohte emen kak iang wia pwe kitail en kak pwurala rehn Sematailo. E ketin “ohkihla dipatail kan” (Aiseia 53:5).

Mwurin Ah lokolok nan Kedsemeni, Sapwellime weirek doudoulahte—pwehki emen me kin ieiangih kahmahmkilahr, kepit E alehdi mwohn sounkopwung likamw akan, weirek en ohlahn Paliwere kan, elin tek ehu me idaidieng pohn tapwi sang irail sounpei lemei kan (kilang Sohn 18:2–3, 12–14; Mark 15:15–20), oh tuhke toutou pohn tinsowe ni Eh mwekmwekid kolahng Kolkoda (kilang Sohn 19:16–17).

Pohn lohpwuo, medek laud me E kehnehr nan Kedsemeni pwuredo iangahki weirek ieu me sohte emente aramas kak powehdi. Sises Krais, Sapwellimen Koht Iehros, kelehpw aledahr kupwuren Seme pwehn pwilikihdi Ah mour. Sounpei ko oh kaun ko sohte kak kihsang Ah mour (kilang Sohn 10:18). Ni meleilei oh karakarahk, Sises poaridi oh mahsanih, “E imwseklahr” (Sohn 19:30).

Keimwselahn ansou nan Ah mour pohn sampah nekier. Sohte ehu soangen lepin lokaia me kak kawehwehda uwen laud en Sapwellimen Sises Krais kisakis kesempwalo. E pahn sohte pilehu mie anahnepe erein. Sises Krais ketin lokolok “pak ehu ohng koaros” (Ipru 10:10).

Pwehki pweidahn Sapwellime doadoahk kesempwalo, met E wiahier keieun aramas nan poadoapoad me iasada sang mehla ohng mour soutuk (kilang 1 Korint 15:21–23).

Ohng lih me mihmi ni sousouo, tohnlengko mahsanihong:

“Dahme ke raparapahkihki me momour rehn me melahr akan?

“E sohte ketket met, ahpw E ketin iasadahr” (Luk 24:5–6).

Ohng Sapwellime wahnparon ako, E ketin mahsanih, “Kilang elieliwei kat oh limei ka, pwe iei ngehi met” (Luk 24:39). Mwuhr, “E ketket rehn aramas [tohtohsang] meh limepwiki … ansou kis” (1 Korint 15:6). Sounkadehde kan kilangedier Sounkomour iasadahro. E sohte mehla. E ketin ieias.

Sises Krais lapwadahr sahlen mehla soutuk ohng aramas koaros me melahr oh pil me pahn momour pohn sampah (kilang 1 Korint 15:22). E ketin kalowehdier atail imwintihti keieu laud; atail imwintihti me iei mehla kasohralahr erein.

Preseden Russell M. Nelson (1924–2025) padahngki: “Sises Krais ketin alehda pohn pein Ih amwail dihp kan, amwail medek kan, amwail mohngiong ohla kan, oh amwail luwet akan. Ke sohte anahne kelehpwki ahmw katoutou kan! E pahn ketin mahkehng uhk ni ahmw pahn koluhla. E pahn ketin kapaiahkinuhkda dahme ke anahne kan. E pahn ketin kamwahuihala palingenomw me ohla. Ni ahmw pahn iang Ih wisik toutou, ahmw katoutou kan pahn marahrahda. Ma ka pahn wiahda oh kolokol inou kan en idawehn Sises Krais, ke pahn diarada me ansoun pahtou kan nan ahmw mour pahn lepin ansou. Ahmw kahpwal kan pahn “mihla pahn popohl en Krais’ [Alma 31:38]”

Nin duwen ahi wia emen Sapwellime Wahnparon, pak tohto nan ansou kan I kin lelohng mehkot me kin kamehlelehiongie me mehlel E ketin ieias. Nan ansoun Ihster wet, kumwail koledi nan amwail mohngiong oh madamadau kan iren mahsen pwukat: “I sohte pahn manokehla, oh Sounkomour, Re ketin lokolok oh mehla pwehki ngehi,” ni atail pahn koul en kaping: