Mlo Mesisiich a Betik er a Rengud Losebeled

Ngera okodongek el Apostol, e ak mla belboteb a beluu el ngarngii a techelek el mesterir a rengalk, rengeasek, me a re meklou el chad er a beluulechad el rokir. Ngarngii a ikel kuk temel a meklou el deureng ra klengar, ngdi imol tekoi el bla kisang er a medak e omelchesiu ersel remel ra renguk a sel kmo a ongingil a diul a reng me a deureng, ea klengar a urekodel ra temel a etiteuokel el reng me a ongarem.

Ngdiak el sebechek el lobes el dengchokl lobengterir a re teuang el mekekerei el ngalk el klengar ra rechad er a blirir a mlad er a mekngit el kodall ra chad el tiluu ra blirir ra le chachiuaiu tirkal ngalk, malechub a kisang a redil el miltemall ra le kekerei el ngalk er a chad lulmerang er ngii, malechub e kdengchokl er bita ra bet ra ngeasek e redil el telmall a btelu ra rebet er a raat e di kmedung eng mad, malechub e kurenges er a lengelel a redil el bechil a mla tngeklii me a telbilel ra templo el kmal emolt el mlo melai a rak.

Ak mla omelchesiu a ikel ringel ra rubekel el klou ngelekir a mla mo diak el loumerang a ikel klemerang er a ebangkelio e osiik e mengitechut a klaumerang ra re bebil ra elsel a telungalk. Ak mla oldingel er a roungalk me a re sechelil a ngeasek el chad el mle mui ra techall el di mle ngii el nguu a klengar er ngii. Ak mla melchesuar ra meringel el klengit el reng el kirir tirkel rirelii a delngerengel e meral sorir mo uchel a rengrir me tirkel miltemall el kirel seikid el klengit.

Ak mla mesa sel etiteuokel reng el kirel ngkel smecher a btelul el cheuarem me a kirir tirkel dilmuk el cheuarem eldi olengeng el diak a kmal klisichir el molengeseu. Ak mla mesang a klou el chelbuul el dilubech el lokiu ra kuk ngarngii kerior lokiu ra ileb, yolt, ngau, me a desiu. Ak mla sioning er a uldikel ra beluu lokiu ra eltel a tekoi buai, mekemad, telemall, me a ongarem el morngii sel sekum ea diak el meues a bol loltekau er ngii tirkel klikiid e losiik elmo meruul er a lemalt.

Omekungil Chim, mlara Kolby Larsen, locha diak el sebechel mo iuude

A Osobel a Sobecheklid

Ng melekoi el kirel sel Tngakireng ra Jesus Kristo, a President James E. Faust (1920–2007), Ongerung el Counselor ra Kot el Presidency, a dilul kmo: “A re telmall a kirir mora ikel sebecherir el louedikel lokiu a ikel ringel el ngarngii, ea Osobel a mo ‘ngosuterir a rechedal loltirakl a ikel cheletecheterir’ [Alma 7:12]. Ngii a mo olengeseu er kid el loltekau a chelengeled. Bebil ra telemall a kmal meringel e metacherbesul e dial el mukar el dil merkmo le ngai a mesisiich el klisiich el ngar bab me a urunguled el kirel a klebechel kerekeriil me omengkad el blals ersel merael mei el klengar. … Ngii a medengei a ringel el de ngarngii meng mo merael lobengked elmo lmuut er a ikel etiteuokel el taem.”

A kumelchesiu el mla mengai elmo kmeed el mora beltikelreng er a Osobel ma ikel diak a ulebengelel klengeltengat el telbiil el me rekid el lokiu ersel Tngakireng er a Jesus Kristo. Ngii a dimlak el bol lorers er kid ra ikel meringel el blekeradel ra klengar el meskid a diak ke dotekau el ringel, ngdi Ngii a sobecheklid er a diak a ulebengelel longarem meng diak kede bode meakl er a Demad ra Babeluades e meskid a techall, el lokiu ersel Ngii a mlo cheuarem el kirel rokui el tekoi, me bol ngarngii a techall el kirel klebechel el deureng me a diak a ulebengelel diul a reng er a medal a Dios.

A President Dallin H. Oaks a ulemeklatk er kid: “Meng uaisei, sel kot el mesisiich el ngeseu ra klechad el Dios a uldersii sel Ngii a kiltmeklii a Osobel, Jesus Kristo, el ngii a mo cheuarem elmo mengkad el kirel a ngkedel e odars a klausubes el kirir a re mo ouchel a kengterir. Seikid el klubechub me a klebkelel a Tngakireng a smodii el kmo ngera uchul ma klaumerang el ngara Jesus Kristo ea kot el losisechakl er a ebangkelio. A Tngakireng er Ngii ‘a uchul a okiis er a kodall er a re mla mad’ (Alma 42:23), e ngii a mo ‘kokad a kngetil a beluulechad’ (Alma 34:8), el smuld a rokui el kngtid el bla douchel e msa Osebeled a klisiich el ngosukid er a ikal chelitechetud er tial klechad.”

Komakai el ngarsel Prayer at Gethsemane, mlara Del Parson, sebechel moiuud eldi kirel usbechelel a Ikelesia

Diak a Ulebengelel Lorechudel Lomeruul

Sel kulebedebek er a ikal longarem el blak ues ra medak, el ngii a kmal limis el kekerei se domekesiu er ngii er tirkel mla malechub e te mla merael er tial beluulechad, eng diak el sebechek, ra ngidil tekoi el kudengei, el smodii sel kulchesuar er ngii ra renguk er a dilubech er a elsel a rengul me a uldesuel me a bedengel me a delbengel a Osobel ersel chedaol taem el Ngii a mlo cheuarem ra rokui el tekoi el kirel a klengit me a ringel el kirel a rokui el chad.

Sel lorechudel lomeruul er a rokui el tekoi el diak a ulebengelel a ulemuchel er a Jesus ra le bol “siseb ra basio lomekedong er ngii el Gethsemane” (Mateus 26:36) el ngara Rois ra Olives er a ikrel a beluu ra Jerusalem. Ngii a melekoi el mora re mesiungel, “A kngtil a renguk, a soal mekodkak” (Matues 26:38).

Ng miluluuch, el melekoi, “O e Edam, a bol le sebechel, e mnguu tial kob el choridii er ngak: engdi diak el sel soakl, di le borsel soam” (Mateus 26:39). Ngii a ulebult el mora re mesiungel, milsterir a chachiuaiu, liluut el merael, e miluluuch er a ongerung el taem. “O e Edam, alsekum tial kob er a ringel a kirel kulim er ngii meng diak el sebechel mo cheroid er ngak, e bol ltaut a soam. … E [Ngii] a miluluuch ra ongedei el taem, lomelekl a osisiu el tekoi” (Mateus 26:42, 44).

A Jesus a milim er a mecheuached el kob e mlo cheuraem ersel diak el sebeched el metebengar ra le ngara sers me a le ngara kerus. Ng dimlak a kngtil, Ngii a mlo chelungel a rokui el kngtid, esel de bo re Ngii e louchel, ea kngtid me a chelengeled a le ngai el cheroid er kid (mesa 2 Korinth 5:21).

A ongarem el le blo rengii a Jesus, kodelel, me a tngakireng el blo lolenget er ngii a meketeket er a longelchiil er ngii. Milekoi ra euid el dart el rak ruchei ra cherelel a Jesus, ea Isaiah a ulemlaoch el kmo “a Rubak a ngiluu a blals el loia er ngii el kmal di kired el rokui” (Isaia 53:6). Jesus a milekoi el lodersii a klengar er Ngii el ua “lolsobel” (Mateus 20:28; mesa el dirrek 1 Timothy 2:6) “el kirel melubet a klengit” (Mateus 26:28) el mora rokui el chad elmo oumerang er Ngii e ouchel el kirel a kngterir. Petrus ouchais el milkerang el Ngii ra le “charem el kirel a kngtid” (1 Petrus 3:18), meng ngoeak a telemelel a bedengel e kid a mlamo ungil (mesa 1 Petrus 2:24). Ngii a kiltmeklii a tekoi el diak a ngodech el rolel e deluut el mora medal a Demad. Ngii a “mlechetechat el kngtid a uchul” (Isaia 53:5).

Nguriul ra le ngara ongarem ra Gethsemane, Ngii a milemolm el ngara ringel—sel mloterau ra chad el lulbengkel el merael, e mlotuub ra mederir a re meredel, a ringel er a bedengel el chelebed, a ulekungel ra techodulik el lulsarech el mora elsel a btelul ra re mekngit e diak el chubechub el soldau (mesa Johanes 18:2–3, 12–14; Markus 15:15–20), mesel loberaod el kerus el ngar bebul a selodel el techel a bedengel el ngara ulekel e Ngii lorael el bedul a Golgotha (mesa Johanes 19:16–17).

Ng deleel ra kerus, ea ringel el diak el motekau a lomelchesiu er ngii ra Gethsemane a luetang el lmuut el kmal merenglang el diak a chad el sebechel lotekur. Jesus Kristo, el Ngelekel a Dios, el dital sebechel el nguu a chedaol el ngerachel el mlara Demad a nguu a klengar er Ngii elmo sersii. Tirkel soldau me a re meredel a dimlak el sebechir el nguu a klengar er Ngii (mesa Johanes 10:18). Ngokiu ra omengull me a kle ngariou el reng, ea Jesus a childir a btelul e kmul kmo, “Ng mla mecherungel a rokui el tekoi” (Johanes 19:30).

Sel mlong meng ngorokiolel a klengar er Ngii er tial beluulechad a milcherungel. Ngdiak a tekoi el smodii sel klisichel a kesiokel el sengk er Ngii. Ngdiak a ngodech el mo metechir. Jesus Kristo a chilarem “eldi mle tal lodersii e merkong” (Hebru 10:10).

Ngokiu ra chedaol lomesiungel el Ngii a kiltmeklii, Ngii er chelechang ea kot ra rokui el chad er a reksii el mekiis ra kodall el diak el llut el mad (mesa 1 Korinth 15:21–23).

El mo er ngkel redil el mlara olekuul, a re anghel a melekoi:

“Ngera me kom osiik er ngikel di ngar er a delongelir a rulkeuad?

“Ngii a diak el ngar tiang, ng mla mekiis er a kodall” (Lukas 24:5–6).

Mora re Apostol er Ngii, Ng milekoi, “Mues a chimak me a ochik, me bo modengei el kmo ng kmal ngak” (Lukas 24:39). Nguriul, “ng mleues [er a re betok er a re ] eim el dart … eldi mle tang” (1 Korinth 15:6). A re sioning a milsang a mla mekiis ra kodall el Osobel. Ngii a diak el lulekeuad. Ngii mle ngar.

Jesus Kristo a ngilubet a bembatel me a lechetel sel diak a ulebengelel sibil ra kodall el kirel a re bekl el chad el mla ngar malechub eng mo kiei er a beluulechad (mesa 1 Korinth 15:22). Ngii a mlo mesisiich er ngkel cherareu ra rokui el tekoi; ngkel cherareu er a kodall a di mirekong el remiid.

A President Russell M. Nelson (1924–2025) a dilul kmo: “Jesus Christ Ngii a ngilai a ikel kngtim, a ikel ringel, a ikel oberaod a rengum, me a ikel secherem. Kau a diak el dil kau el loltekau! Ngii a mousubes er kau sel mouchel. Ngii a mo omekngeltengat er kau er a ikel mousbech. Ngii a mo mekungil a telmall el rengum. Esel bom keed er Ngii, ea chelengelem a mo kebekakl. Alsekum meke kutmokl e mengeluoleu a telbilem el loltirakl ra Jesus Kristo, e kemo medengei el kmo a ikel taem el molchesiu a ringel ra klengar er kau a di telkib eng mo diak. Ongarem el ngar kau a mo ‘mengai el ngara deureng er a Kristo’ [Alma 31:38]”

Mak tara miltutk el Apostol er Ngii, e ak mla mes ra taem el reng me a kuk di tekingel a bedengek el mla ngoikak elmo ungil medengei e sioning el kmo Ngii a ngar. Me tial temel a Pasqua, bol sebechel a ikal tekoi el sebechel medechel ra elsel a uldesued me a rengud: “Lak kubes, E Osobel, Kau el mlo merserasech e mlad el kirek,” sel deu a rengud el mengitakl: