Anjo̧ eo an Rilo̧mo̧o̧r Ejitōnbōro

Ilo kūr in aō āinwōt juon Rijilōk, elukkuun ļap aō ito itak jān laļ n̄an laļ im wōr aō iien n̄an ioon ajri jiddik ro, jodikdik, im rūtto ro ilo eiten aolepān laļ in. Elōn̄ iien ko rekam̧ōņōņō ilo mour in, ak juon men ikar loe kōn meja im en̄jake kōn tum̧ūlaļin buruō ej bwe n̄an kōļapļo̧k m̧ōņōņō im lan̄lōn̄, ilo mour in jej ioon rub bōro im en̄taan.

Ijamin meļo̧kļo̧k aō jijet ippān 4 ajri jiddik ro me jineer im jemeer rekar mej ilo an juon rinana kar deļon̄e m̧weo m̧ōer im m̧an er ke ajri rein rekar kiki wōt, ak ioon juon kōrā eo me rekar kakkure ke ej leddik jān ippān juon nukun eo me ekar lōke, ak jijet turin peet an juon leddik jidikdik eo me ejorreen komelij eo an itok jān an kar wōtļo̧k jān bajikōļ eo waan im tokālik ekar mej, ak ron̄jake an juon kōrā eo me ļeo pāleen ejjab m̧ool n̄an e im kallim̧ur ko aerro ilo tampeļ ilo wāween eo ekabwiļo̧kļo̧k ium̧win elōn̄ iiō ko.

Ikar en̄jake metak kōn an ruo ripālele ro me ajri eo nejier erūtto ejako an tōmak m̧ool ko an gospel in im ekar kappukot n̄an kōmōjņoikļo̧k tōmak ko an ro jet ilo baam̧le eo. Ikar bar loļo̧k jet pāāren ro me rekar lukkuun burom̧ōj kōn likao eo nejierro me ekar bwijin an kōttōpar ak ekar make bōk mour eo an. Ikar en̄jake ajļo̧k an ro me rekar kōm̧m̧an jerawiwi ko reļļap im rekar kōņaan bar ukwelo̧k im burom̧ōj an ro me ekar bar jelet er.

Ikar bar naan in nan̄inmej in kōļmenļo̧kjeņ kaburom̧ōj jim̧or eo ej en̄taan jāne im ro me rej bar en̄taan ilo aer lale im ejjeļo̧k aer maron̄ n̄an jipan̄. Ikar bar loe an bwijin mour rekar jako itok wōt jān joreen in mejatoto, ibwijleplep, ļan̄ ko, kijeek, im makūtkūt in laļ. Ikar kam̧oole poktak ko ilo laļ ko itok jān tarpok ko ilo kien, tariņae, im kakkure, im metak ilo en̄jake itok jān jorreen ko rej waļo̧k ilo am̧ jab jeļā kake n̄an ro me ejjeļo̧k ruōer im rej kappukot n̄an kōm̧m̧ani men ko rejim̧we.

Healing Hands, jān Kolby Larsen, maron̄ jab kapeiki

Rilo̧mo̧o̧r ej Jipan̄ Kōj

Ilo an kōnono kōn Pinmuur eo an Jisōs Kraist, Būreejtōn James E. Faust (1920–2007), Rikakpilōklōk eo Kein Karuo ilo Būreejtōnji eo Kein Kajuon, ekar ba: “Ro rejorrāān ren kōm̧m̧ane men ko remaron̄e n̄an jerbale aolepān apan̄ ko aer, im Rilo̧mo̧o̧r enaaj ‘jipan̄ armej ro An ekkar n̄an m̧ōjņo̧ ko aer’ [Alma 7:12]. E enaaj jipan̄ kōj ineek eddo ko ad. Jon̄an emetak im m̧wilaļ in jorrāān ko jet ke rejjab maron̄ mour n̄e ejjeļo̧k jipan̄ jān kajoor eo eutiejļo̧k im kōjatdikdik kōn jim̧we eo eweppān im kōkm̧anm̧an ilo mour eo tokālik. … E ejeļā ad metak im naaj etetal ippād men̄e jenaaj ioon apan̄.”

Ij en̄jake aō epaakeļo̧k iakwe im kōjeraam̧m̧an ko rejjab bōjrak an Rilo̧mo̧o̧r me kar kallim̧ur kōj kaki kōn Pinmuur eo an Jisōs Kraist. E ejjab pinej kōj jān apan̄ ko reppen jej jelm̧ae ilo mour me ej bōktok metak ko rej wōnm̧aanļo̧k wōt, ak E ekar kōjparok kōj jān en̄taan eo ejjeļo̧k jem̧ļo̧kin im jepel jān Jemedwōj Ilan̄ im kōtļo̧k kōj, jān An en̄taan eo ekūtbuuji aolep, bwe jen maron̄ en̄jake lan̄lōn̄ eo ewāppen im m̧ōņōņō n̄an indeeo im̧aan mejān Anij.

Būreejtōn Dallin H. Oaks ekar kakeememej kōj: "Ilo m̧ool, jipan̄ eo an Anij ilo mour in ekajoor tata ej kōpooj juon Rilo̧mo̧o̧r, Jisōs Kraist, eo enaaj kar en̄taan n̄an kōļļāik wōņāān im letok jeorļo̧k bōd in jerawiwi ko n̄an ukweļo̧k jāni. Kōn tūriam̧o im Pinmuur eo eaiboojoj ej kōmeļeļeik etke tōmak ilo Irooj Jisōs Kraist ej pedped in katak eo m̧oktata ilo gospel in. Pinmuur eo An ej ‘kakūrm̧ool jerkakpeje eo an ro remej’ (Alma 42:23) , im an ‘pinmuur [ko] kōn jero̧wiwi ko an laļ’ (Alma 34:8), ej jeerļo̧k aolep jerawiwi ko ad jej ukweļo̧k jāni im letok kajoor eo an ad Rilo̧mo̧o̧r n̄an rie kōj ilo m̧ōjņo̧ ko ad ilo mour in."

Tipdikin meļeļe jān Prayer at Gethsemane, jān Del Parson, maron̄ kapeiki n̄an jerbal ko wot an Kabun̄ in.

M̧akūtkūt eo eaorōktata n̄an mour indeeo.

N̄e ij ļōmņak kōn jekjek in en̄taan ko me em̧ōj aō loe, relukkuun dik keidi n̄an ro me raar mour ilo laļ in im ro me renaaj mour ilo laļ in, ijjab maron̄, ilo jabdewōt naan ijelā, kōmeļeļeik en̄jake ko ilo būruwō kōn ta eo ekar waļo̧k ilo būruōn im ļōmņak im ānbwinin im jetōb eo an Rilo̧mo̧o̧r ilo iien in ekwojarjar ke ekar en̄taan kōn jerawiwi im metak ko an aolep armej.

M̧akūtkūt eo eaorōktata n̄an mour indeeo ekar jino ke Jisōs ekar etal “n̄an jikin eo etan Getsemane” (Matu 26:36) ilo Toļ Olive ko itulikin wall ko an jikin kweilo̧k eo ilo Jerusalem. Ekar ba n̄an rikaļoor ro An, “Aō e kanooj būroṃōj āinwōt ñan mej” (Matu 26:38).

Ekar jar, im ba, “O Jema, eḷaññe e maroñe en ilọk kab in jān Eō; a en jab ankil Aō, a ankil Aṃ” (Matu 26:39). Im Ej itok ñan ippān ro rikaḷoran, im lo aer kiki, ekar bar etal, im jar kein karuo alen. “O Jema eḷaññe kab in e ban ilọk jān Eō eḷaññe I jab idaak ie, en ankil Aṃ … im [Ekar] jar alen kein ka jilu im bar ba naan ko āinwōt ṃokta.” (Matu 26:42, 44).

Jisōs ekar daak jān kab eo emeo̧ im en̄taan ilo wāween jejjab maron̄ meļeļe kaki jim̧or ilo jikin kallib im ilo debwāāl. Eo eaar jab jeḷā jerọwiwi, ekar bōk ioon E make aolep jerawiwi ko ad , bwe jej itok n̄an E im ukweļo̧k, Enaaj kameraik jero̧wiwi ko ad im eddo ko ad (lale 2 Korint 5:21).

En̄taan, mej, im katok in pinmuur eo an Jisōs rekar lukkuun kōtmene. Ilo an kōnono 700 iiō m̧okta jān lotak eo an Jisōs, Aiseia ekar kanaan bwe “Jeova ear likūt ioon, jerọwiwi ko ad otemjej” (Aiseia 53:6). Jisōs ekar kōnono kōn An ajeļo̧k mour eo āinwōt “wōņāān” (Matu 20:28; bar lale 1 Timote 2:6) “ñan juurḷọk jerọwiwi ko” (Matu 26:28) an aolep ro renaaj tōmak ilo E im ukweļo̧k kōn jerọwiwi ko aer. Piter ekar kōmeļeļeik ewi jon̄an “eñtaan kōn [ad] jerọwiwi” (1 Piter 3:18), bwe kōn kinej ko kōnjan eaar kemour koṃ. (lale1 Piter 2:24). Ekar kōm̧m̧ane men eo ejjeļo̧k remaron̄ kōm̧m̧ane n̄an kōtļo̧k kōj n̄an ro̧o̧l n̄an im̧aan mejān Jemād. Ekar “kakinejnej E kōn bōd ko ad” (Isaiah 53:5).

Following the suffering in Gethsemane, His agony continued—the betrayal by one who walked with Him, the ridicule before unjust rulers, the pain of His body being scourged, the crown of thorns pressed into His head by the cruel and unmerciful soldiers (see John 18:2–3, 12–14; Mark 15:15–20), and the heavy beam thrust upon the torn flesh of His back as He moved toward Golgotha Ekar ineeke debwāāl eo eddo ioon ālikin men̄e ekar lukkuun poktak im toorļo̧k kōn bōtōktōk (lale Jon 19:16–17).

Ioon dōbwāāl eo, Ekar bar en̄jake en̄taan eo kar ilo Getsemane im jon̄an an ļapļo̧k ke ejjeļo̧k armej remaron̄ kijenmej kake. Jisōs Kraist, Nejin Anij, E make ekar en̄taan im kōm̧m̧an ankil Anij in ajeļo̧k m̧our eo An. Ritariņae ro im ritōl ro raar jab bōke jān E (lale Jon 10:18). Ilo kautiej im ettā, Jisōs ekar jirļo̧k, im ba, “Eṃōj” (Jon 19:30).

Iien eo āliktata an m̧our eo an ekar dedeļo̧k. Ejjeļo̧k naan emaron̄ kōmeļeļeik jon̄an an ļap An mennin letok eo eaiboojoj. Ejjeļo̧k juon ej aikuj bar kōm̧m̧ane menin. Jisōs kraist ekar en̄taan “alen wōt juon” (Hibru 10:10).

Ke mijen eo An ekwojarjar eaar tōprak, E eo enaaj kein kajuon ilo bwebwenato in laļ in n̄an jerkakpeje jān lōb n̄an mour ejjeļo̧k jem̧ļo̧kin (lale 1 Korint 15:21–23).

N̄an kōrā eo ilo lōb eo, enjeļ eo ekar ba

“Etke koṃij pukot eo E mour, ippān ro re mej?

“E jab pād ijin, a em̧ōj An jerkapeje”Luk 24:5–6).

N̄an Rijilōk ro An, Ekar ba, “Koṃwin lale peiū im neō, bwe Ña make” (Luk 24:39). Tokālik, “ear weaaktok [n̄an elōn̄ļo̧k jān] limabukwi … ilo juon wōt iien” (1 Korint 15:6). Rikam̧ool ro raar lo Rilo̧mo̧o̧r eo em̧ōj an jerkakpeje. Ejjab mej. Ej m̧our.

Jisōs Kraist ekar jaļōt to ko an mej indeeo n̄an aolep armej ro rekar mour im renaaj mour ioon laļ in.(lale 1 Korint 15:22). E ekar anjo̧ ioon rikōjrat eo ad; rikōjrat eo an mej eo ejjeļo̧k an kajoor iood.

Jisōs Kraist ekar bōk Ioon Make jerawiwiko am̧, metak ko am̧, būrom̧ōj ko am̧, im m̧ōjņo̧ ko am̧. Kwojjab aikuj make eddodo kaki! E enaaj jeorļo̧k am̧ bōd ilo am̧ ukweļo̧k. E enaaj kōjeraam̧m̧an eok kōn ta eo kwoj aikuji. E naaj kemour am̧. Ilo am̧ leļo̧k eok make n̄an E, eddodo ko am̧ renaaj meraļo̧k. Eļan̄n̄e kwonaaj kōm̧m̧ani im kōjparok bujen ko n̄an ļoor Jisōs Kraist, kwonaaj lo bwe metak ko am̧ ilo mour eo am̧ rej men bajjōk. Am̧ en̄taan enaaj “jakoļo̧k ilo lan̄lōn̄ an Kraist.”[Alma 31:38]”

Āinwōt juon iaan kar ekkapit n̄an Rijilōk, em̧ōj an ewōr ao en̄jake ilo jetōb im ilo mour in me rekar kam̧ool n̄an n̄a ke ilo m̧ool Ej mour. Ilo iien in Ijtō, emaron̄ naan kein rej pād wōt ilo kōļmenļo̧kjeņ ko ad im ilo būruwōd: Kōtļo̧k bwe in jab meļo̧kļo̧k, O Rilo̧mo̧or, Eaar toorļo̧k bōtōktōkūm̧ im kwar mej kōn eō,” ilo ad m̧ōņōņō kake im al: