Kuhtanglah luhn Mwet Lahngo Sacohk Lasr

Ke srihpen kunohkohn in Mwet Sap luhk, Nga forfor pacl puhs ac eis pacl wo in ohsun yurin tuhlihk srihsrihk, mwet fuhsr, ac mwet mahtuh rounweack acn puhs fin facluh. Oasr pacl engan luhlahp in moul, tuhsruhk ma se nga liye ke muhtuhk sifacna ac puhla ke insiuck nohfohn pa in weacng engan ac enganwack, oasr pacl in inse muhsahllah ac kweok in moul uh.

Nga fah tiacna muhlkuhnlah ke nga wi tuhlihk srihsrihk ahkosr muhta suc ninac pahpah tuhmaclos ah ahkmasiyucki sin mwet pihsrapasr se utyak nuh lohm selos ah ke tuhlihk ac mutul, kuh ohsun nuh sin muhtwacn se suc ahkkolukyeyuck sin mwet in sucu lal ke el tuhlihk ac, kuh muhta sisken mwe oan luhn tuhlihk muhtwacn fuhsr se suc maskihn brain lal ah tukihn el puhtatlac liki pwacskuhl nahtuhl ah suc ac misac tiac paht, kuh lohng tuhng luhn sie muhtwacn suc mukul tuhma ah ahklahlfonyacl ac wuhlweacng lal tempuhl ke ohiyac fohkfohk ke lusen yac puhs.

Nga puhla tari ahsor luhn siacnyacn se suc tuhlihk mahtuh se nahtuhlos tilac wi luhlahlfongi ke ma pwacye luhn wosasuc ac suk in ahkmuhnahsye luhlahlfongi luhn mwet sahyac ke sucu ac. Nga muhtwacta tari nuh yurin ninac pahpah ac kawuck suhpwacrlac se luhn sie mwet fuhsr sesseslah ke olwelah suc sifacna eslah moul lal. Nga puhla tari auli luhlahp lalos suc oraclah ma koluk ac luhngse na pwacye auliyak ac ahsor luhn mwet ma eis mwacta ke ma koluk sac.

Nga liye tari inse muhsahllah luhn mwet maskihn nuhnak kwewana mwet se ma mas ac nuh sin mwet ma ukun mas lalos ke eltahl liye kihtin kuh in kahsruh. Nga liye tari ma muhsahllah yohk luhn mwet ke srihpen mwe ongaiyac, sronot, pahkah, e, ac kusrusr. Nga mwet loh tari ke lokoalok luhn muhtuhnfacl tuhkuh ke fohs luhn kafihrmacn, mweun, ac ma kuhnausyucklac, ac kweok ma tuhkuh ke ma tiac motkwoeyuck inge sisiyang nuh fin mwet suwohs ac suk in oruh ma wo.

Paho In Unwelah, sel Kolby Larsen, ac tiac kuh in kapiyucki

Mwet Lahngo El Kahsre Kuht

In sruhmuhm ke Iwaclah luhn Jisus Kraist, Prestuhn James E. Faust (1920–2007), Mwet Kahsruh Ahkluo ke Prestuhnsi Se Met, fahk: “Mwet ma kihnet enenuh in oruh ma elos kuh in oruh ke pacl upac nuh selos, ac Mwet Lahngo El fah ‘kahsruh mwet Lal fal nuh ke mas lalos’ [Alma 7:12]. El fah kahsre kuht us ma toasr lasr. Kuhtuh kihnet inge upac na pwacye ac lwoal suc koflah unweyucklac sahyen kahsruh tuhkuh inkuhsrao me ac finsrak nuhke nuhnuhnkuh suwohswohs ac moliyucklac ke moul se fahsruh uh. … El etuh kweok lasr uh ac fah wi kuht fahsr finne ke pacl upac na pwacye nuh sesr uh.”

Nga puhla lah yohkwelihk luhlahlfongi luhk ke luhngse luhn Mwet Lahngo ac ke mwe insewowo wacngihn sahflah kac ma olwelah ke Iwaclah luhn Jisus Kraist. El tiac langwekuhtlac liki ma upac sikyak ke moul ma use kweok luhlahp, tuhsruhk El karihngihnkuhtyang liki kweok sahflah se ac muhsahlwelihk liki Pahpah Inkuhsrao ac lwelah nuh sesr, ke srihpen kweok nuhkwewa Lal, in oasr engan luhlahp ac engan ma pahtpaht ye muhtuhn God.

Prestuhn Dallin H. Oaks el ahkacsmakihnye kuht: “Ne ingena, kahsruh yohk se emet luhn God ke moul se inge pa mwe sang se Lal ke sie Mwet Lahngo, Jisus Kraist, suc fah kweok in moli molo sac ac sang nuhnak muhnahs nuhke auliyak luhhn ma koluk. Iwaclah pahkotwen ac wolacna sac ahkuhtweyac lah efuh luhlahlfongi ke Leum Jisus Kraist pa ip yohk se emet ke wosasuc. Iwaclah Lal ‘use moulyak luhn mwet misac’ (Alma 42:23), ac ‘iwaclah ma koluk luhn facluh’ (Alma 34:8), elah nuhkwewa ma koluk kuht auliyak kac ac sang nuh sin Mwet Lahngo kuh in kahsrwe kuht ke mwe muhnahs luhn moul suhkawihl lasr.”

Ahkuhtweyac ke Pruhe ke Gethsemane, sel Del Parson, ac kuh in kapiyucki nuhke orekma luhn Alu muhkwena

Ma Sikyak Yohk Srihpac Ma Pahtpaht

Ke nga nuhnkuh ke kweok ma nga sifacna liye tari, suc ma na srihsrihk se kapsruh nuh selos ma oasr tari kuh ac fah fuhfahsryucr fin facluh, nga tiac kuh, in fahk ke oacna sie kahs, ahkuhtweyac ma nga puhla insiuck ke ma sahp sikyak nuhke insiac kuh nuhnak ac mahno ac nguhn luhn Mwet Lahngo ke pacl muhtahl Lal ke kweok nuhkwewa El puhlakihn ke ma koluk ac kweok luhn mwet nuhkwewa.

Ma sikyak yohk sripac sac muhtwacwacack ke Jisus El som “nuhke acn acn se pahgngpahng Gethsamane” (Mattew 26:36) ke Finohl Olive lihkihn kalkal luhn acn Jerusalem. El fahk nuh sin mwet tuhma lutlut Lal ah, “Yoklana asor ac toasr lun insiuk, apkuranna nga in misa kac” (Mattew 26:38).

El pruhe fahk, “O Papa, fin ku, eisla cup in keok se inge likiyu: tusruktu in tia ou lungse luk, a in ou lungse lom” (Mattew 26:39). El fohlohklac nuh yurin mwet tuhma lutlut Lal ah, tuh eltahl nuh mutul, ac El sifilpac som, ac pruhe pacl ahkluo. “O Papa, cup in keok se inge fin tia ku in itukla likiyu, nwe kena nga numlat, lela ma lungse lom in orek . … Ac [El] pruhe pacl ahktolu, ac kalweni pacna ma el fahk meet ah ” (Mattew 26:42, 44).

Jisus El nuhmlah cup mwen sac ac kweok ahluhkwelah ma kuht puhla ke moul in mahno kahlwem ke kwewana ke imac sac ac ke sahksin soko ah. Wacngihn ma koluk, El eis nuh facl ma koluk lasr, tuh ke kuht tuhkuh nuh Yohrohl ac auliyak, ma koluk ac ma toasr lasr itucklac liki kuht (liye 2 Corinth 5:21).

Kweok luhn Jisus, misac, ac kisac in iwaclah nuh palyeyuck emet me. Sruhmuhnyuck ke yac 700 met liki isuslac luhn Jisus, Isaiah el palye muh “LEUM GOD El filiya facl kaiyuk su fal nu sesr nukewa” (Isaiah 53:6). Jisus El fahk ke sang moul Lal oacna “molo se” (Mattew 20:28; liye pac 1 Timothy 2:6) “ (Mattew 26:28) nuh selos nuhkwewa ma ac luhlahlfongi ke El ac auliyak ke ma koluk lalos. Peter el ahkuhtweyac luhpan “kweok Lal ke ma [koluk] lasr ” (1 Peter 3:18), tuh ke srihngsrihng El kuht unweyucklac (liye 1 Peter 2:24). El oraclah sie ma wacngihn mwet kuh in oruh in lwelah kuht in fohlohk nuh yurin Pahpah tuhmwacsr. El kanteyuki ke sripen ma koluk lasr” (Isaiah 53:5).

Tukihn kweok ke Gethsemane, kweok Lal tuhtahflah—tuhkahkihnyuckyak sin sie mwet Weluhl forofor, ahksrucksruck luhn mwet kol sesuwohs, ngal ke Mahnol ke kantweyucki, fihliyucki tefuroh ke lah ma oasr otah kac fin sifacl sin mwet elahwet ac solse wacngihn pahkomuhta la (liye John 18:2–3, 12–14; Mark 15:15–20), ac sahksin toasr soko fihliyuki fintohkohl ke kihneta tari ke El fahsr nuh Golgotha (liye John 19:16–17).

Fin sahksin ac, kweok upac El puhla Gethsemane ac fohlohkuh ke sie ngal na upac ma wacngihn mwet kuh in kuhtanglah. Jisus Kraist, Wen nuhtin God, muhkwefanna ahkfalyelah kunohkohn wolacna se ituckyang sin Pahpah Tuhmwacl ac fihliac moul Lal. Wangin mwet eisla moul luk likiyu (liye John 10:18). Ke ahkfuhlwact ac mongfihsracsr, Jisus El isyac sifacl nuh ten ac fahk, “Safla tari” (John 19:30).

Pacl luhlah ke moul Lal fin facluh tuh sahflah. Wacngihn kuhtwena kahs kuh in ahkuhtweyac ke luhpan mwe sang sacohk Lal. Tiac enenuh mwet sahyac in sulpac oruh. Jisus Kraist El kweok “in akfalye pal nukewal” (Hebrews 10:10).

Ke orekma wolacna Lal ahksahfyeyucklac tari, El ingena pa mwet se emet ke sramsram mahtuh luhn facluh in moulyak liki kuclyuck uh nuhke moul kawihl (liye 1 Corinth 15:21–23).

Nuh sin muhtwacn ke kuclyuck sac, lipufacn sac fahk:

“Efuh kowos kuh suk El suc moul inmahsrlon mwet misac?

“El tia oasr inge, el akmoulyeyukyak tari” (Luke 24:5–6).

Nuh sin Mwet Sap Lal, El fahk, “Ngetma liye pouk ac niuk, ac liye lah nga pa inge” (Luke 24:39). Na sie pacl tok, “El sikyang nu sin [pus liki] lumfoko … pacl sefanna” (1 Corinth 15:6). Mwet lohoh liye ke mwet Lahngo Sifilpac Moulyak sac. El tiacna misac. El moul.

Jisus Kraist El tuhlahlah sein ac mwe kapihr luhn misac ma pahtpaht luhn mwet nuhkwewa ma moul kuh fah moul fin facluh (liye 1 Corinth 15:22). El kuhtanglah mwet lokoalok nuhkwewa; mwet lokoalok se ma ac fah kuhtangyucklac ne tok uh pa misa .

Prestuhn Russell M. Nelson 1924–2025) el fahk: “Jisus El eis nuh Facl makolukngalinse muhsahllahacmwemuhnahslom. Kom tiac enenuh in muhkwena us! El fah nuhnak muhnahs nuh sum ke kom auliyak. El fah ahkinsewowoye kom ke enenuh lom. El fah unwelah kihnet in nguhnum. Ke kom iskomyang nuh Sel, ma toasr lom fah muhlahlahi. Kom fin orek olwelah ac liacacng in fahsr tukihn Jisus Kraist, kom ac fah konwacack lah ma upac ke moul lom uh ma nuhke kihtin pal na. Mwe kweok lom ac fah ‘sesseslah ke engan in Kraist’ [Alma 31:38]”

Ekihn sie Mwet Sap akmuhsralah Lal, nga puhla oasr luhn nguhn ac nuhnak luhk sifacna ma use nuh sihk sie mwe ahkpwacye kahlwem ac suwohs lah El moul. Ke puhlan pacl in Istuh se inge, lwelah kahs fihsracsr inge in oan in nuhnak lasr ac insiacsr: “Let me not forget, O Savior, Thou didst bleed and die for me,” oacna kuht engan ke kuht on: