Ti Balligi ti Patpatgentayo a Mangisalakan

Iti pagrebbengak wenno callingko kas maysa nga Apostol, nakapagbiaheak iti namin-adu ken naaddaanak iti pribilehio a makaam-ammo kadagiti ubbing, agtutubo, ken nataengan iti intero a kaaduan ti sangalubongan. Adda dagiti kanito ti aglaplapusanan a rag-o iti biag, ngem maysa a banag a nakitak iti mismo a matak ken nariknak iti kaunggan ti pusok ket kas nayon iti ragsak ken rag-o, iggem ti biag dagiti kanito ti panagliday ken panagsagaba.

Diakto kaano man malipatan ti panagtugawko iti abay dagiti uppat a babassit nga ubbing a dagiti nagannakda ket pinatay ti maysa a rimmaut iti bukodda a pagtaengan idi matmaturog dagiti ubbing, wenno pannakipagkita iti maysa a babai nga inabuso idi ubing pay ti maysa a mapagtalkan a kabagianna, wenno panagtugaw iti abay ti katre ti maysa a balasitang a nadangran ti utekna kalpasan ti pannakatnagna iti bisikleta ken dumanin matay, wenno idedengngeg iti saning-i ti maysa a babai a liniputan ti lakayna iti nakalkaldaang a wagas iti uneg ti adu a tawen.

Nariknak ti saem ti maysa nga agassawa a ti nataengan nga anakda ket saanen a mamati kadagiti kinapudno ti ebanghelio ken nagtarigagay a mangpakapuy iti pammati dagiti dadduma pay a miembro ti pamilia. Sinarungkarak dagiti mariribukan a nagannak ken gagayyem ti maysa a barito a napnuan iti kari a nanggudas iti bukodna a biag. Nariknak ti nadiosan a panagladingit dagiti nagbasol ken sipupudno a nagtarigagay nga agbabawi ken ti pannakadadael dagiti inapektuan ti basol.

Nakitak ti panagrigat gapu iti sakit iti panunot ti maysa nga agsagsaba ken dagiti siuulimek nga agsagsaba bayat ti panangkitada nga addaan iti bassit a kabaelan a tumulong. Nakitak ti dakkel a personal a pannakapukaw a gapu kadagiti natural a kalamidad, layus, ken bagyo, uram, ken dagiti ginggin-ed. Nasaksiak ti riribuk dagiti pagilian manipud kadagiti pisikal a bagyo, gubat, ken pannakadadael, ken ti panagtutuok nga umay no dumarup ti saan a namnamaen kadagiti inosente ken agkalkalikagum nga agaramid no ania ti umisu.

Dagiti Mangag-agas nga Ima, ni Kolby Larsen, saan a mabail a kopiaen

Tulongannatayo ti Mangisalakan

Iti panangsaritana maipapan iti Pannubbot ti Jesucristo, kinuna ni Presidente James E. Faust (1920–2007), Maikadua a Mamagbaga iti Umuna a Panguluen: “Nasken nga aramiden dagiti nasugatan no ania ti kabaelanda a makatulong kadagiti pannubokda, ken ti Mangisalakan, "tulongannanto dagiti taona a segun kadagiti pagkapuyanda’ [Alma 7:12]. Tulongannatayto a mangibaklay kadagiti dagensentayo. Nasakit ken nauneg unay ti sumagmamano a sugat a saanda a malaingan no awan ti tulong manipud iti maysa a nangatngato a bileg ken namnama para iti naan-anay a hustisia ken pannakaisubli iti sumaruno a biag. … Maawatanna ti saemtayo ket makipagnanto kadatayo uray kadagiti kalideman nga orastayo.”

Mariknak nga ad-adda a mapasingedak iti ayat ti Mangisalakan ken kadagiti awan patinggana a bendision a naikari kadatayo babaen ti Pannubbot ni Jesucristo. Saannatayo a sinaluadan manipud kadagiti narikut a padas ti biag a mangisangbay iti saan a matukod a saem, ngem sinaluadannatayo manipud iti agnanayon a panagsagaba ken pannakayadayo iti Nailangitan nga Ama ken pinalugodannatayo, babaen ti mangsakup iti amin a panagsagaba, tapno maaddaan iti posibilidad a naan-anay a rag-o ken agnanayon a ragsak iti imatang ti Dios.

Ni Presidente Dallin H. Oaks impalagipna kadatayo: “Nalawag a, ti kapigsaan a mortal a tulong ti Dios ket ti panangipaayna iti maysa a Mangisalakan, ni Jesucristo, nga agsagaba tapno mabayadan ti gatad ken mangipaay iti pannakapakawan dagiti naibabawi a basol. Ilawlawag dayta naasi ken nadayag a Pannubbot no apay a ti pammati ken ni Apo Jesucristo ti umuna a pagbatayan ti ebanghelio. Ti Pannubbotna ti ‘mangyeg iti panagungar dagiti natay (Alma 42:23), ‘mangsubbot kadagiti basol ti lubong’ (Alma 34:8), mangpugpugas iti amin a naibabawi a basol ken mangmangted iti bileg ti Mangisalakan a mangtulong kadatayo kadagiti mortal a pagkapuyantayo.”

Detalye manipud iti Kararag iti Getsemani, ni Del Parson, mabalin a kopiaen para iti pangusaran ti Simbaan laeng

Napateg a Pasamak iti Kinaagnanayon

No panunotek ti panagsagaba a mismo a nakitakon, nga awan patinggana ti kabassitna no idilig iti amin a nagnan wenno magnanto iti daga, diak kabaelan, iti ania man a balikas nga ammok, nga iladawan dagiti rikna iti pusok iti ania koma a napasamak iti pusok ken panunotko ken iti bagi ken kararua ti Mangisalakan kadagiti sagrado a kanitona iti masakupan iti amin a panangsagaba para iti basbasol ken saem ti amin a sangkataw-an.

Nangrugi ti napateg a pasamak ti amin a kinaagnanayon bayat ti ipapan ni Jesus “iti maysa a lugar a maawagan iti Getsemani” (Mateo 26:36) iti Bantay dagiti Olibo iti ruar dagiti pader ti siudad ti Jerusalem. Kinunana kadagiti disipulona, “Nalaus ti panangladingit ti kararuak, uray pay iti patay” (Mateo 26:38).

Inkararagna, a kunkunana, “O Amak, no mabalin, palabsem koma daytoy a kopa kaniak: nupay kasta saan a pagayatak, no di pagayatam” (Mateo 26:39). Nagsubli kadagiti disipulona, nasarakanna ida a matmaturog, pimmanaw manen, ket nagkararag iti maikadua a gundaway. "O, Amak, no saan a lumabas daytoy a kopa kaniak, malaksid no inumek daytoy, maaramidto ti pagayatam. … Ket [Isu] nagkararag iti maikatlo a gundaway, a mangisasao iti isu met la a balikas" (Mateo 26:42, 44 ).

Ininum ni Jesus ti napait a kopa ket nagsagaba iti labes ti mortal a pannakaawattayo iti agpada a minuyongan ken iti krus. Awanan iti basol, Inawatna iti Bagina ti amin a basbasoltayo, a no umaytayo Kenkuana ken agbabawi, maikkat dagiti basol ken dagensentayo manipud kadatayo (kitaen iti 2 Taga Corinto 5:21).

Nabayagen a pinaspasungadan ti panagsagaba, ipapatay, ken panangsubbot a sakripisio ni Jesus. No maipanggep iti 700 a tawen sakbay ti pannakayanak ni Jesus, impadto ni Isaias a “ngem impabaklay ti Apo kenkuana ti dusa a maipatay koma kadatayo” (Isaias 53:6). Nagsao niJesus maipapan iti panangtedna iti bagina kas “maysa a pangsubbot” (Mateo 20:28; kitaen met iti 1 Timoteo 2:6) “para iti pannakapakawan ti basbasol” (Mateo 26:28) para iti amin a mamati Kenkuana ken agbabawi iti basbasolda. Inladawan ni Pedro no kasano a “nagsagaba para iti basbasol[tayo]” (1 Pedro 3:18), a babaen kadagiti saplitna maagasantayo (kitaen iti 1 Pedro 2:24). Inaramidna ti saan a maaramid ti dadduma tapno mapalugodantayo nga agsubli iti imatang ti Amatayo. Isu ket “nasugatan gapu kadagiti basoltayo” (Isaias 53:5).

Kalpasan ti panangsagaba iti Getsamani, nagtultuloy ti panagrigrigatna—ti panangliput ti maysa a nakipagna Kenkuana, ti panangumsi iti sanguanan dagiti di nalinteg nga agturay, ti saem ti bagina a nasaplit, ti balangat a siit nga intalmeg iti ulona dagiti naulpit ken awan asina a soldado (kitaen iti Juan 18:2–3, 12–14; Marcos 15:15–20), ken ti nadagsen a kayo a naibaklay iti napirgis a lasag ti likudanna bayat ti pannagturongna iti Golgota (kitaen iti Juan 19:16–17).

Iti krus, ti napalaus a panagtutuok a narikna iti Getsemani ket naisubli a nakarkaro nga awan tao a makaibtur. Ni Jesucristo, ti Anak ti Dios, agmaymaysa a nagibaklay iti nadiosan nga komision ti Amana a mangipaay iti biagna. Saan a maala dagiti soldado ken agturay daytoy manipud Kenkuana (kitaen iti Juan 10:18). Babaen ti panagraem ken kinapakumbaba, indumog ni Jesus ti ulona ket kinunana, “Nalpasen” (Juan 19:30).

Nalpasen ti maudi a kanito ti mortal a biagna. Awan dagiti balikas a mangiladawan iti kinadakkel ti napateg a sagutna. Saanto iti kaano man a mangidawat iti kasapulan ti sabali. Nagsagaba niJesucristo “iti naminsa ken para iti amin” (Hebreo 10:10).

Babaen ti nadiosan a mision a naipatungpal, Isu itan ti umuna iti amin a pakasaritaan ti sangkataw-an a nagungar manipud iti tanem iti imortalidad (kitaen iti 1 Taga Corinto 15:21–23).

Kadagiti babbai iti tanem, kinuna dagiti anghel:

“Apay a sapsapulenyo ti sibibiag kadagiti natay?

“Awan ditoy, ngem nagungaren” (Lucas 24:5–6).

Kadagiti Apostolna, kinunana, “Kitaenyo dagiti imak ken sakak, a siak daytoy” (Lucas 24:39). Idi agangay, “nakita isuna [ti nasurok a] limagasut… iti naminsan” (1 Taga Corinto 15:6). Nakita dagiti saksi ti nagungar a Mangisalakan. Saan a natay. Sibibiag.

Winarwar ni Jesucristo dagiti kadena ken kawar ti agnanayon a begkes ti patay para iti tunggal tao a nagbiag wen no agbiagto iti daga (kitaen iti 1 Taga Corinto 15:22). Pinarmekna ti amin a masakupan ti amin a kabusortayo, ti kabusor ti patay ket agnanayon a mapagballigian.

Kinuna ni Presidente Russell M. Nelson (1924–2025): “Inawat ni Jesucristo iti Bagina dagiti basolyo, dagiti saemyo, dagiti ladingityo, ken dagiti pagkapuyanyo. Saanyo a kasapulan nga ibturan dagitoy nga agmaymaysa! Pakawanennakayto no agbabawikayo. Bendisionannakayo iti kasapulanyo. Paimbagenna ti nasugatan a kararuayo. Bayat ti panangisangolyo iti bagiyo Kenkuana, mariknayo a nalaglag-an dagiti dadagsenyo. No agaramid ken tungpalenyo dagiti katulagan a mangsurot ken ni Jesucristo, maammuanyonto a di agbayag dagiti nasaem a kanito ti biagyo. Dagiti panagsagabayo ket ‘alimonento ti rag-o ni Cristo’[Alma 31:38"

Kas maysa a naordenan nga Apostolna, napadasak ti naespirituan ken personal a kanito a nangisangbay kaniak iti sigurado ken masinunuo a saksi a Sibibiag Isuna. Iti daytoy a panawen ti Paskua ti Panagungar, siaalumamay koma nga agtalinaed dagitoy a balikas iti panunot ken puspusotayo: “Diak koma liplipatan, ti Mangisalakan, Nagdara ken natayka para kaniak,” bayat ti panagrag-otayo a mangikankanta: