Tokanikain Ara Tia Kamaiu Ae Tangiraki

N weteakiu ae te Abotoro, I a tia ni mwamwananga n te tai ae mwaiti ao e reke au tai ni kaitibo ma ataei, kairake ao ikawai ni kabuta te aonaaba. Iai te tai ni kimwareirei ae korakora inanon maiura, ma teuana te bwai ae I a tia n nooria n oin matau ao n namakinna i kabin nanou bwa n reitaki ma te kukurei ao te kimwareirei, iai taai n uruaki n nano ao te korakai ae bon waakin te maiu.

I aki kona ni mwaninga ngke I tekateka ma aman ataei aika a uarereke ake a bua maiua aia karo iroun te tia ioawawa ae bon mena inanon mweegnaia ngke a tabe ni matu ataei, ke n kaitibo ma te ataeinnaine are e bwainikiraki iroun te utu ae onimakinaki, ke n tekateka irarikin ana kainiwene te ataeinnaine are e ikoaki kaburorona i mwiin bwakana man te bwatika ao iaon kawaina ni motirawa, ke n kakauongo tangin te aine are e bwainikirinaki iroun buuna ma ana berita ake e karaoi n te tembora n te aro ae bubuaka n ririki aika mwaiti.

I a tia n namakina marakiia taanga are natiia aki kakoauai ana koaua te euangkerio ao a ukoria ni kamamaara aia onimaki tabeman inanon te utu. I a tia ni kawariia ana karo ao raoraon te ataeinimwaane are e kaonaki n te kantaninga ma te konabwai ngke e bakaburea oin maiuna. I a tia n namakina rawawataia naake a karaoa te bure ao a tangiria n rairi nanoia ao te karawawata ake a taonaki iai naake a rootaki man te bure.

I a tia n noora uruakin te nano man aorakin te iango iroun temanna are e rootaki ao naake a karawawataki i bon iroua ngkai a mamataku ma karakon aia konabwai n ibuobuoki. I a tia n noora te bua ae moan te korakora are e riki man kabuanibwai aika karina, te ieka, angibuaka, te urarake, ao te mwaeiei. I a tia n noora te kamangaongao n aaba man angibuaka, buaka, ao urubwai, korakain te iango are e roko man butimwaean te bwai ae riki n akea te kauring nakoia ake a itiaki ao a ukora karaoan ae eti.

Healing Hands [Baai ni Kamaiu], iroun Kolby Larsen, e tabu katotongana

E Buokiira te Tia Kamaiu

N taekinan ana Mwakuri ni Kamaiu Iesu Kristo, e taku Beretitenti James E. Faust (1920-2007), te Kauoman ni Kauntira n te Moan Beretitentii: "Nake a ikoaki a na karaoa are a kona ni karaoia rinanon katakiia, ao e na "buokiia ana aomata te Tia Kamaiu ni kaineti ma aorakiia’ [Aramwa 7:12]. E na buokiira ni uoti rawawatara. Tabeua ikoaki a bon rangi ni kammaraki ao n nano are aki kona ni kamaoaki n akea te buoka ae mwaaka ae rietaata ao te kataninga n te motiraoi ae kororaoi ao kaokanbwai n te maiu e na toko. … E ataa marakira ao n nakonako ma ngaira riki n ara aoa aika a rootongitong."

I namakinna bwa e rikirake riki kaaniu nakon ana tangira te Tia Kamaiu ao ana berita aika akea tokina are e berita iai nakoira rinanon ana Mwakuri ni Kamaiu Iesu Kristo. E aki kamanoira man kangangaan taneiai inanon te maiu are e uota te maraki ae akea kabotauana, ma E kamanoira man te karawawataki ae akea tokina ao te kamaenakoaki mairoun Tamara are i Karawa ao e kariaira, rinanon karawawatakina are e otabwaniniaki iai, ni karekea te kimwareirei ae kororaoi ao te kukurei ae akea tokina i matan te Atua.

E kauringiira Beretitenti Dallin H. Oaks: "Man ana ibuobuoki te Atua ae korakora ni katauraoa te Tia Kamaiu, Iesu Kristo, are e na korakai ni kaboamwin ao ni karekea kabwaraan bure irouia ake a rairananoia man aia bure. Te Mwakuri ni Kamaiu ae nanoanga man mimitong e kamataata bukin te onimaki iroun te Uea ae Iesu Kristo bon moan tuan te euangkerio. Ana Mwakuri ni Kamaiu "e kakoroabukin te mangauti ibukiia maate’ (Aramwa 42:23, ao e ‘mate ibukin buren te aonaaba’ (Aramwa 34:8, ni kamaunai ni kabane ara bure ake ti rairi nanora mai iai ao n angan ara Tia Kamaiu te mwaaka ba e na buokiira inanon mamaaran rabwatara."

Rongorongo man Prayer at Gethsemane[Te Tataro i Ketetemwane], iroun Del Parson, e kona ni katotongaki ti ibukin kabonganana n te Ekaretia

Te Tai ae Kakawaki ae Akea Tokina

Ngkana I iangoa te korakai are I a tia n nooria n te aro, are bon te bwai ae rangi ni uarereke ni kabotauaki ma koraki ni kabane ake a tia ke a maeka n te aonaaba aei, I aki kona, ma te taeka ae I ataia, ni kabwarabwara au namakin inanou ibukin te bwai are e a tia n riki inanona ao n ana iango ao n rabwatana ao n tamnein te Tia Kamaiu n Ana tai ae tabu ibukin karawawatakina ae kakorakai ibukin aia bure ao marakiia botanaomata ni kabane.

Te tai ae kakawaki ibukin te maiu ae akea tokina e moanaki ngke e nako Iesu "nakon te tabo ae aranaki bwa Ketetemwane" Mataiao 26:36 n te Maunga are Oriweta, itinanikun oon Ierutarem. E taku nakoia Ana reirei, moan te rawawata tamneiu, ae ai aron ae N nangi mate iai" (Mataio 26:36).

E tataro, ni kangai, "Tamau ngkana tao e konaki, ao e na nako mai rou te mwangko aei: ma akea au taeka ma bon ane iroum" (Mataio 26:39). E oki nakoia Ana reirei, e kuneiia bwa a matu, e manga moan nako riki, ao n tataro te kauoua n tai. "O Tamau, ngkana e aki kona n nako aei, ngkana I aki moi iai ao ke e tauaki am taeka. … Ao [E] tataro te kateniua n tai, n atongi taeka naba akekei" (Mataio 26:42, 44).

E moi Iesu n te mwangko ae mao ao e korakai n ae riaon ara atatai n te maiu n rabwata n te onaroka ao i aon te kaibangaki. N akea ana bure, E katoka i aona ara bure ni kabane, bwa ngkana ti Nakoina ao n rairi nanora, a kabebeteaki rawawata mairoura (taraa 2 I Korinto 5:21).

Korakain, maten ao ana anga karea ni kamaiu Iesu e a kaman kantaningaaki. N taetae 700 te ririki i mwaain bungiakin te Tia Kamaiu, e taetae ni burabeti Itaia bwa "Iehova e katoka ara bure ni kabaneira i aona" (Itaia 53:6). E taekinna Iesu are e anga maiuna bwa "unoraia aomata" (Mataio 20:28 ; taraa naba 1 Timoteo 2:6) "ibukin kabwaraan buure" (Mataio 26:38) ibukiia ni kabane ake a kakoaua ao n rairiinanoia man aia bure. E kabwarabwara Betero bwa E kanga "ni maraki ibukin [ara] bure" (1 Betero 3:18), bwa rinanon oreana ti a kamaiuaki (taraa 1 Betero 2:24). E karaoa te bwai are akea temanna riki te aomata ae kona ni karaoia bwa ti aonga n oki nakon mweengan Tamara. E "ewaraki ibukin ara bure" (Itaia 53:5).

N rimwiin te karawawataki are e riki i Ketetemwane, E reitinako korakaina—kamwaneana iroun temanna are e nakonako mangaia, kakanikoana imataia taan tautaeka aika aki motiraoi, marakin rabwatana ngke e kataereaki, te bau ae kateketeke are kanimaki i atuuna irouia tautia aika a buakaka n aki nanoanga (taraa Ioane18:2–3, 12–14; Mareko 15:15–20), ao te kai te biti are e katokaaki i aon nuukana ngkai E mwaing nako Korokota (taraa Ioane 9:16–17).

I aon te kaibangaki, te karawawata ae moan te korakora are e rinanona i Ketetemwane e oki ma te kaeka ae tawe ae akea te aomata ae kona ni kaitaraa. Iesu Kristo, Natin te Atua, e kaota ana mwakuri ae tabu mairoun Tamana n anga Maiuna. Tautia ma taan tautaeka aki kona n anaia Mairouna (taraa Ioane 10:18). Inanon te karinerine ao te nanorinano, E kabaraaka atuuna Iesu ao e taku, "e a tia" (Ioane 19:30).

E a tabwanin kabanean ana tai ni Maiuna ae mamate. Akea riki te taeka ae e na kona ni kabwarabwara buburan Ana bwaintangira ae onoti. A na akea kainnanoan riki temanna. E korakai Iesu Kristo "ngke e anga rabwatana bwa te karea n ti teuana" (Ebera 10:10).

Ni koron bukin Ana mition ae e tabu, E riki ngkai bwa te moan n rongorongon te botanaomata ae e uti man te ruanimate nakon te maiu n rabwata (taraa1 I-Korinto 15:21-23).

Nakoia aine n te ruanimate, a taku anera:

"Kam aera ngkai kam ukoukora teuare e maiu i buakoia mate?

“E aki mena ikai, bwa E a uti” (Ruka 24:5–6).

Nakoia Ana Abotoro, E taku, "Kam na tarai baiu ma waeu, bwa boni Ngai" (Ruka 24:39. Imwiina, “e nooraki [irouia ae raka iaon] nimabubua tabun tari ni bon ti te norakina” (1 I-Korinto 15:6). A noora te Tia Kamaiu ae e a tia n uti taan kakoaua. E aki mate. E maiu.

E urui tiein ao taurekereke n te tautoronaki n te mate ae akea tokina Iesu ibukiia aomata nako ake a maeka ke ake a na maeka i aon te aba (taraa 1 Korinto 15:22). E tokanikai i aoia ara kairiribai ake a otabwaniniira, te kairiribai ibukin te mate e mauna n akea tokina.

E taku Beretitenti Russell M.Nelson (1924-2025): E katokaa Iesu Kristo i aona ami bure, ma marakimi, ma rawawatami, ao ai mamaramii. Ko na aki uota te rawawata n ti ngkoe! E na kabwarai am bure ngkana ko raira nanom. E na kakabwaiako ni baike ko kainanoi. E na kamarurunga tamneim ae ikoaki. Ngkana ko anga ngkoe Nakoina, a na kabebeteaki rawawatam. Ngkana ko karaoi ao ni kawakin berita aika tabu n iriira Iesu Kristo, ko na kunea bwa taai ake a rangi ni kammaraki inanon maium bon ti inanon te tai ae uarereke. Karawawatakim e na ‘ongaki ni kimwareirein Kristo’ [Aramwa 31:38"

Ngkai ngai temanna ana Abotoro are e a tia ni katabuaki, I a tia n rinanon te tai ae onoti n te maiu n tamnei are e uota nakoiu te koaua ae matoa bwa E bon maiu. N te Itita aei, ke a tiku taeka aikai n ara iango ao i nanora: "N na bon aki mwaninga, O te Tia Kamaiu, Ko kawawaea raraam ao ni mate ibukiu," ngkai ti kimwareirei n anenea: