Ewe Win an Ach Achengicheng Chon Amanau

Non wisei usun emon Aposel, ua fen sai fetan me a fen wor ai tufichin churi semirit, serafo, me ekkewe mi mwukono non unusen ewe fonufan. A wor fansoun watten pwapwa non manau, nge eu mettoch ua fen kuna ren pwisin mesei me mefi non anonnonen netipei pwe ren kapachetan pwapwa me mwanek, manau a awora fansoun metekin netip me riaffou.

Usap tongeni monnuki ai mommot ren fomon kukkun semirit ekkewe manauen semer me iner kewe ra muchungaweno me ren emon chon sona non pwisin imwer we nupwen ekkewe semirit mi mour, ika ai churi emon fefin a fen feiengaw nupwen an emon kukkun nengin me ren emon aramasan mi epinuknuku, ika ai mommot nepekin ewe pet an emon fopun ewe a fen tori feiengawen tupu mwirin an turutiw seni efoch pasiken me epwe mano mwirin, ika ai ausening ngeni kechiwen emon fefin punuwan we a kirikiringaw ngeni me an pwon mi pin non tempel non eu napanap mi wesen ngaw ren chommong ier.

Ua fen mefi ewe metek an eu pea pupunu ekkewe emon nour a mwukono ese chiwen nuku ekkewe ennetin ewe kapas allim me kutta an epwe apwangapwangano ewe nuku an ekkoch non ewe famini. Ua fen chu ngeni ekkewe nichipungun sam me in me chiechien emon anuon mi watte tufichin a angeiano pwisin manauan. Ua fen mefi ewe anonnonen netipechou an ekkewe ra fen fori tipis me ennetin mochen aier me ewe netipechou an ekkewe ra fen feiengaw ren ewe tipis.

Ua fen kuna ewe metekin netip ren semwenin ekiek ren ir me ruemon ekkewe ra riaffou me ekkewe ra fanafaneno ne riaffou nupwen ra katon ren kukkunun ar tufichin aninis. Ua fen kuna watten an emon me emon turuno a fis me ren pwukuan osukosuk, noter, monumon, ekkei, me chechin fonu. Ua fen kuna ewe osukosuk non fonu seni osukosuken muu, maun, me tatakis, me ewe ametek a fis nupwen weiweitan mettoch a fis ngeni ekkewe ir mi manauoch me kuttaa ne fori met mi pung.

Healing Hands, seni Kolby Larsen, ese tongeni epwe kapi

Ewe Chon Amanau a Anisi Kich

Non an kapas usun ewe Achasefan an Jises Kraist, Preseten James E. Faust (1920–2007), Aruemonun Chon Aninis non ewe Aewin Presetensi, a apasa: “Ekkewe mi feiengaw repwe fori met ra tongeni ne anganga ne tou seni ar sossot, me ewe Chon Amanau epwe ‘anisi noun aramas anongonong won ar apwangapwang’ [Alma 7:12]. I epwe anisi kich ne mwarei ach chou. Ekkoch feiengaw ra kon ametek me anonnon minne rese tongeni chikar me nukun aninis seni eu tekian manaman me epinukunukun unusochung pungoch me niwinsefanin mettoch me non ewe manau mwirin. … I mi weweiti ach metek me epwe fetan rech pwan mwo non ach fansoun rochopwak.”

Ua mefi napenon mettoch a ofieno ngeni an ewe Chon Amanau tong me ekkewe feioch rese much mi pwon ngeni kich me ren ewe Achasefan an Jises Kraist. I ese eppeti kich seni ekkewe weiresin mettochun manau minne ra wato watten metek, nge I a eppeti kich seni riaffou esemuch me keimuno seni Samach non Nang me mut ngeni kich, seni An unusen riaffou, an epwe wor rech ewe tufichin unusochun mwanek me pwapwa esemuch me mwen Kot.

Preseten Dallin H. Oaks a achema ngeni kich: "Watten, pochokunen An Kot aninis non ei manau ina An awora emon Chon Amanau, Jises Kraist, ewe epwe riaffou ne moni niwinin me awora omusomusen tipis. Ena chenin me ningen Achasefan a awewei pwata nuku non ewe Samon Jises Krasit ina ewe aewin nongonongen ewe kapas allim. An Achasefan ‘epwe efisi ewe manausefanin ekkewe mi mano’ (Alma 42:23), me a ‘achasefani tipisin ewe fonufan’ (Alma 34:8), a tonano meinisin ach tipis me ngeni ach Chon Amanau manaman ne anisi kich non ach apwangapwang.”

Tichikin seni Prayer at Gethsemane, seni Del Parson, mi tongen pwe kapi fan iten chok nounoun Mwichefen

An Esemuch Auchean Mettoch mi Fis

Nupwen ua ekieki usun ewe riaffou ua pwisin kuna, minne mi fokkun kukkun anonno ngeni meinisin ra fen ika repwe fetanei ewe fonufan, use tongeni, ren ekkoch kapas ngang mi sinei, ai upwe anapanapa memmefin netipei ren met ita mi fis non netipen me ekiekin me inisin me ngunun ewe Chon Amanau non An kewe fansoun mi pin ren unusen riaffou fan iten tipisin me metekin aramas meinisin.

Ewe auchean mettoch mi fis non unusen esemuch a poputa nupwen Jises a feino “non ew neeni itan Gethsemane” (Matthew 26:36) non ewe Chukun Olives nukun titin ewe teninimwen Jerusalem. A apasa ngeni Noun kewe chon kuno, “Nenukei a fakkun riaffou arap ngeni chok upwe ne mano ren” (Matthew 26:38).

A iotek, a apasa, “Semei, ika pwe mi tufich, kopwe angei seniei ei kapen riaffou! Nge esap ai mochen, nge minne ka mochen” (Matthew 26:39). A niwin ngeni Noun kewe chon kuno, a kuner pwe ra mour, a feino sefan, me iotek ren aruwen fansoun. “Semei, ika pwe kosap angei seniei ei kapen riaffou ai upwe un, iwe netipom epwe pwonueta. … Aunungatin an feino senir, iwe a pwan iotek, a chok pwan apasa ekkewe kapas” (Matthew 26:42, 44).

Jises a un seni ewe kap mi kipwin me riaffou nap seni inisich repwe tongeni weweiti non ir me ru non ewe tanipi me won ewe irapenges. Ese wor tipisin, I a wata won Pwisin ach tipis meinisin, pwe nupwen sia feito ren I me aier, ach tipis me chou ra suseni kich (nengeni 2 Corinth 5:21).

An Jises riaffou, mano, me asoren achasefan ir mi fen akokkotono non fansoun nangatam. An kapas 700 ier me mwen uputiwen Jises, Isaiah a osini pwe “ewe Samon a fori pwe ewe riaffou epwe feitiw won i, ewe riaffou kich meinisin ita sipwe angei” (Isaiah 53:6). Jises a kapas usun an fangeno Manauan pwe eu niiwin (Matthew 20:28; nengeni pwan 1 Timothy 2:6) “ren omusomusen tipis” (Matthew 26:28) fan iten meinisin ekkewe repwe nuku non I me aier seni ar tipis. Peter a anapanapa ifa usun I “a [riaffou] fanasengesin [ach] tipis” (1 Peter 3:18), pwe seni Kinasan kewe sia chikar (nengeni 1 Peter 2:24). I a fori met ese wor emon a tongeni fori an epwe mut ngeni kich sipwe niwin ngeni me mwen mesen Samach we. “Pokiten ach kewe tipis i a kinas” (Isaiah 53:5).

Mwirin ewe riaffou non Gethsemane, An riaffou a soposopono—ewe amam me ren emon mi fetan ren I, ewe turunufas me mwen souemwen rese pung, ewe metekin Inisin a wichiwich, ewe mwarin ira mi fonufon a fiefienong ne Mokuran me ren ekkewe sounfiu mi eriaffou me rese umoumoch (nengeni John 18:2–3, 12–14; Mark 15:15–20, me ewe choun ira a achouetiw tatakisin futuken Nukunupan nupwen A mwokut ngeni Golgotha (nengeni John 19:16–17).

Won ewe irapenges, ewe watten riaffou non Gethsemane a niwinsefan ren pochokunan ese wor aramas a tongeni engino ngeni. Jises Kraist, ewe Noun Kot, a anamon ne engino ngeni ewe echipwerun angang seni Saman we an epwe fangeno Manauan. Ekkewe sounfiu me chon nemenem rese tongeni angeiano seni I (nengeni John 10:18). Non sufon me tipetekison, Jises a chappetiw me apasa, “A wes” (John 19:30).

Ewe amuchunon fansoun Manauan won fonufan a wesino. Ese wor kapas ra tongeni anapanapa ewe amwararen watten an Jises Kraist we auchean niffang. April 2026 Jises Kraist a riaffou “fan ew chok” (Hebrews 10:10).

Ren An echipwerun angang a wesino, iei I epwene ewe aewin me non uruon unusen aramas an epwe manaueta seni ewe peias ngeni manau fochofoch (nengeni 1 Corinth 15:21–23).

Ngeni ewe fefin ren ewe peias, ekkewe chon nang ra apasa:

“Pwata oua kukkutta ewe emon mi manau nein ekkewe mi mano?

“Ese nom ikei pwe a fen manaueta” (Luke 24:5–6).

Ngeni Noun kewe Aposel, A apasa, “Oupwe nengeni pei kei me pechei kei o oupwe nengeni ei pwe pwisin ngang ei” (Luke 24:39). Mwirin, “atewe a pwa ngeni nap seni nimepuku … non ew chok fansoun” (1 Corinth 15:6). Chon pwarata ra kuna ewe Chon Amanau mi manausefan. I ese mano. I a manau.

Jises Kraist muti ekkewe sein me mechan ewe fotekin mano esemuch fan iten emon me emon aramas a fen manau ika epwe manau won fonufan. (nengeni 1 Corinth 15:22). I a akkufu ewe chon koum ngeni kich meiisin; ewe choun koumen mano a morono feinfeino.

Preseten Russell M. Nelson (1924–2025) a apasa: “Jises Kraist a wata won Piwisn ami tipis, ami metek, ami metekin netip, meami apwangapwang. Ese namot sipwe anamon ne mwarer. I epwe omusokono nupwen ka aier. I epwe efeiochuk ren met a namot ngonuk. I epwe echikara feiengawen ngunum. Nupwen ka apacha inisum ngeni I, om kewe chou repwene paneno. Ika kopwe fori me apwonueta pwon mi pin ne tapweno mwirin Jises Kraist, kopwe kuna pwe ekkewe fansoun mi ametek non manauom ir mi chok mwochomwoch. Om riaffou repwene ‘nemenemeno non ewe pwapwan Kraist’ [Alma 31:38]”

Usun emon me nein Noun kewe Aposel mi seikita, ua fen mefi ekkewe fansoun epwe pekin ngun me pwisin ai fansoun ra fen wato rei eu ennetin me wesewesen pwarata pwe I mi manau. Atun ei fansoun Easter, amwo ekkei kapas repwe nonnom non ach ekiek me netipach: “Usap monukano, O Chon Amanau, Ka riaffou me mano fan itei,” nupwen sia pwapwa non kon: