Viktri blong Sevya blong Yumi We Yumi Lavem Tumas

Long koling blong mi olsem wan Aposol, mi bin travel plante mo gat spesel janis ia blong mitim ol pikinini, ol yut, mo ol adalt truaot long plante ples long wol. I gat ol taem blong bigfala glad long laef, be wan samting we mi luk wetem ae blong miwan mo filim dip insaed long hat blong mi i we, antap long glad mo hapines, laef i gat ol taem blong harem nogud mo safaring.

Bae mi neva fogetem taem we mi sidaon wetem fofala yang pikinini we, wan man i bin kam insaed long haos blong olgeta long naet mo i kilim ded ol paren blong olgeta taem oli stap silip, o mit wetem wan woman we wan famli memba blong hem we hem i trastem i abiusum hem, o sidaon long saed blong bed blong wan yang gel we i bin gotru long wan operesen blong bren afta we i bin foldaon long baskel mo bae hem i ded i no longtaem, o lisin long ol krae blong wan woman we man blong hem i bin brokem tras blong hem mo i brokem ol tempol kavenan blong hem long wan rabis wei blong plante yia.

Mi filim harem nogud blong wan kapol we adalt pikinini blong tufala i nomo bilivim ol trutok blong gospel mo i traem blong daonem fet blong ol narawan insaed long famli. Mi bin visitim ol paren we oli harem nogud mo ol fren blong wan yang man we i fulap long promes mo i tekemaot laef blong hemwan. Mi filim harem nogud blong olgeta we oli mekem sin mo oli wantem blong sakem sin wetem tru hat, mo harem nogud blong olgeta we oli bin fesem ol risal blong sin ia.

Mi bin luk harem nogud blong sik long saed blong tingting long olgeta we oli safa from sik ia mo olgeta we oli safa taem oli luk hemia i hapen mo oli nogat paoa blong help. Mi luk ol ded we i hapen from ol natural disasta, wota we i fulumap ples, strong win, faea, mo graon we i seksek. Mi witnesem ol bigfala jenis long ol kaontri from raorao blong politik, wo, mo ol bilding we oli foldaon, mo bigfala harem nogud we i kam taem olgeta we oli no responsibol long ol samting ia, mo oli traehad blong mekem wanem we i stret, oli sek long ol samting ia.

Ol Han blong Hiling, i kam long Kolby Larsen, maet bae yu no save mekem kopi

Sevya i Helpem Yumi long taem blong Harem Nogud

Taem hem i stap tokbaot Atonmen blong Jisas Kraes, President James E. Faust (1920–2007), Seken Kansela long Fas Presidensi i talem : "Olgeta we i kasem kil oli mas mekem wanem we oli save mekem blong gotru ol had taem blong olgeta, mo Sevya bae i ‘helpem ’ ol pipol blong hem folem ol had taem blong olgeta" [Alma 7:12]. Bae Hem i helpem yumi blong karem ol harem nogud blong yumi. Sam soa long saed blong bodi i bigwan tumas i mekem se i save kasem hiling nomo tru long wan paoa we i hae mo hop from jastis we i stret evriwan mo fasin blong kasem wan bodi we i stret evriwan long nekis laef … Hem i andastanem harem nogud blong yumi mo bae i wokbaot wetem yumi tu long ol bigfala hadtaem blong yumi.”

Mi kam moa kolosap long lav blong Sevya mo ol blesing we i no save fins we Hem i promesem long yumi tru long Atonmen blong Jisas Kraes. Hem i no protektem yumi long ol had eksperiens blong laef we i givim bigfala harem nogud, be Hem i protektem yumi long safaring we i no save finis mo i mekem yumi i kam kolosap long papa long Heven mo i letem yumi, tru long harem nogud blong Hem we i kavremap evrisamting, blong gat hapines mo glad we i stret evriwan blong taem we i no save finis wetem God.

Presiden Dallin H. Oaks i rimaenem yumi se: “Long taem bifo kasem naoia, bigfala help blong God long wol ia hemi taem Hem i givim wan Sevya, Jisas Kraes, we bae i safa blong pem praes ia mo fogivim olgeta we oli sakem sin. Atonmen ia we i fulap wetem sore mo glori i eksplenem from wanem fet long Lod Jisas Kraes hemi fas prinsipol blong gospel. Atomen blong Hem i ‘mekem laef bakegen long ded blong ol dedman i hapen ’ (Alma 42:23), mo i ‘pem praes blong ol sin blong wol’ (Alma 34:8), I karemaot evri sin taem yumi sakem sin mo i givim paoa long Sevya blong yumi blong i helpem yumi long ol harem nogud blong yumi long wol ia”

Ditel blong Prea long Getsemane, i kam long Del Parson, yu save mekem kopi blong yusum long Jos nomo

Wan Impoten Taem blong Taem we i no save Finis

Taem mi tingbaot ol safaring we miwan mi luk, we i smol blong komperem wetem evrwan oli bin wokbaot o bae oli wokbaot long wol ia, mi no save, wetem eni toktok we mi save, diskraebem ol filing long hat blong mi long wanem we i bin hapen long hat mo maen mo bodi mo sol blong Sevya long ol tabu taem ia blong Hem we safaring blong hem i kavaremamp ol sin mo harem nogud blong evri man.

Impoten taem ia blong taem we i no save finis i stat taem Jisas i go long “ples ia we oli singaotem Getsemane” (Maiu 26:36) long Hil blong ol tri blong olif aotsaed long ol wol blong taon ia Jerusalem. Hem i talem long ol disaepol blong Hem, “Tingting blong mi i hevi tumas, we kolosap mi mi ded from” (Matiu 26:38).

Hem i prea mo talem, “Papa, sapos yu save mekem, plis yu tekemaot ol samting we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem” (Matiu 26:39) Hem i gobak long ol disaepol blong Hem, i luk se oli silip, i gowe long olgeta bakegen, mo i prea nambatu taem. “Papa, sapos mi harem nogud gogo kasem en blong hem, we yu no save tekemaot samting ia long mi fastaem, plis yu mekem olsem we yu yu wantem. … Mo [Hem] i prea nambtri taem, i talem ol semfala toktok ia ” (Matiu 26:42, 44).

Jisas i dring long konkon kap ia mo safa bitim we yumi save andastanem, long garen blong Getsemane mo long kros. Hem i no mekem sin, be Hem i tekem evri sin blong yumi long Hemwan, blong mekem se taem yumi kam long Hem mo sakem sin, Hem i karemaot ol sin mo harem nogud blong yumi (luk long 2 Korin 5:21).

Safaring blong Jisas, ded, mo sakrifaes blong atomen blong Hem i bin stap long plan finis. Wetem profesi blong hem 700 yia bifo Jisas i bon, Aesea i bin profesae se "hae God i putum ol sin blong yumi evriwan i go long man ia nomo” (Aesea 53:6). Jisas i tokbaot blong givim laef blong Hem blong "pem rod blong plante man i go fri" (Matiu 20:28; luk tu long 1 Timoti 2:6) “blong tekemaot sin blong plante man" (Matiu 26:28) blong evriwan we oli biliv long Hem mo sakem sin. Pita i diskraebem hao hem i "bin safa from ol sin blong [yumi]” (1 Pita 3:18), blong mekem se tru long ol mak blong rop we i mekem Hem i safa, yumi kasem hiling (luk long 1 Pita .2:24). Hem i mekem wanem we i nogat eni naraman i save mekem blong letem yumi gobak stap wetem Papa blong yumi. Ol man oli stap "wipim Hem from ol fasin nogud ia blong yumi” (Aesea 53:5).

Folem safaring blong Getsemane, harem nogud blong Hem i gohed—wan we i wokbaot wetem Hem i tanem baksaed long Hem, ol lida we oli no stret ol jajem Hem mo mekem Hem i luk nogud, harem nogud blong ol soa long bodi blong Hem, ol rabis soldia oli putum hat blong king we oli mekem long ropnil mo oli putum strong antap long hed blong Hem (luk long Jon 18:2–3, 12–14; Mak 15:15–20), mo hevi kros ia we oli putum antap long bak blong Hem we i gat soa taem Hem i stap wokbaot i go long Golgota (luk long Jon 19:16–17).

Long kros, bigfala harem nogud ia long Getsemane i kambak wetem wan soa long saed blong bodi mo tingting we i no gat wan man i save gotru long hem. Jisas Kraes, Pikinini blong God, i karem tabu raet ia Hemwan long Papa blong Hem blong givim laef blong Hem. Ol soldia mo ol lida oli no save tekemaot hemia long Hem (luk long Jon 10:18). Wetem respek mo tingting we i stap daon, Jisas i benem hed mo talem, “Olgeta samting i finis nao” (Jon 19:30).

Ol las taem blong laef blong Hem long wol ia i finis. I nogat toktok blong tokbaot paoa blong gudfala presen ia blong Hem. Bae Hem i no save askem wan nara man blong mekem. Jisas Kraes i safa "wan taem blong evriwan" (Hibru 10:10).

Wetem tabu misin ia blong Hem we Hem i finisim, naoia bae hem i faswan long histri blong man blong girap long ded mo kasem laef we i no save finis (luk long 1 Korin 15:21–23).

Ol enjel oli talem long ol woman ia long ston gref:

"?From wanem yufala i stap lukaot man we i laef long ples blong ol dedman?"

“Hem i no stap long ples ia. hem i laef bakegen” (Luk 24:5–6).

Long ol Aposol blong Hem, "Yufala i luk han blong mi mo leg blong mi. Mi nomo ia" (Luk 24:39). Mo afta, “[moa long] faef handred man oli luk Hem … wantaem tugeta” (1 Korin 15:6). Ol man oli luk Sevya we i girap bakegen long ded wetem ae blong olgeta. Hem i no ded. Hem i laef.

Jisas Kraes i brokem ol rop blong ded we i no save finis blong evriwan we oli laef long wol ia mo olgeta we bae oli laef long wol ia (luk long 1 Korin 15:22). Hem i winim enemi we i kavremap yumi; enemi ia we i ded i lus blong ol taem we i no save finis.

Presiden Russell M. Nelson (1924–2025) i talem: “Jisas i tekem long Hemwan olsin blong yumi, ol harem nogud blong yumi, ol hat we i so mo ol ol hadtaem. !Yu no nid blong fesem ol hadtaem ia yuwan! Bae Hem i fogivim yu sapos yu sakem sin. Hem bae i blesem yu wetem wanem yu nidim. Hem bae i hilim soa long sol blong yu. Taem yu joen wetem Hem, bae ol harem nogud blong yu blong yu bae oli kam moa laet. Sapos yu mekem mo kipim ol kavenan blong folem Sevya, bae yu luk se ol hadtaem blong yu oli stap blong sot taem nomo. Ol harem nogud blong yu bae oli ‘lus long glad blong Kraes’ [Alma 31:38]”

Olsem wan Aposol blong Hem we oli odenem, mi bin kasem ol eksperiens blong miwan long saed blong spirit we i mekem mi sua mo gat witnes se Hem i laef. Long Ista sisen ia, letem ol toktok ia i stap wetem yumi insaed long maen mo hat blong yumi: "Letem mi no fogetem, O, Sevya, blong mi we blad blong yu i bin ron mo ded from mi," taem yumi glad blong singsing: