Tawa’ath nag Gubin e Tabinaew udakean e Fayleng

Elder Bruce C. Hafen, ni’i mang rebe Medlip i Ragag, ni thapeg ba kol niyib korebe editor ko national news magazine. Facha’ ni editor eba’adag ninge weliy mornga’agen bake babiyor ni mornga’agen etin ni kakrom e mich ni mornga’agen e tharmiy nge rogon nima sap e tiliw ngay nib thilthil.

“Gidii’ ni yoloey fapi babiyor e ke pir’eg ni bo’or e gidii’ ni ba’adag ni nge nang mornga’agen e tharmiy—nge tabinaew u tharmiy,” nike yoloey Elder Hafen. Machane aram rogon ni bo’or e gidii’ nib michuwan’ ko yafos u tomuren nikan n’im, adag ni dariy bi’id manemus, nge tabinaew nrasul biyay nga ta’abang, machane “bo’or e galasia nib Kristian ni dani fulweg tabab mornga’agene biney ”—machane karimus nibay tareb ni weliy mornga’agen: Fare Galasia ku Yesus Kristus ni fan ko gidii’en Got ko Tin Tomur e Rran.

Ulan fare Galasia ko fare Tathapeg nikan fulweg yarmen, e bay e temple riy nirib thothup nifan ngodad. Bay e mabgol ni dariy bi’id manemus, nibay mat’won ko m’ag riy nima yibliyey nifan ko tomuren e yam’. Bay e michmicheg rodad ko yafos nga m’on ndariy bi’id manemus nib mu’un e tabinaew rodad ngay kogin nibay e Chitamangiy riy nge fare Fak. Bochane gubine pin’ey nibay riy, me uneg fapi gidii’ ni yadbe yoloey fare babiyor ni fare Gidii’en Got ko Tin Tomur e Rran nge rogon niyadbe nangfan e tharmiy e bin th’abi polo’ e llowean’ nibay—ma, baykug uneg ngay, ni ireray e bin th’abi faflalaen’ nibay.

“Biney nikan Pir’eg erib Mangil!” Mesap me yaliy Elder Hafen rogon. “Bo’or e gidii’ e doba’ nibe nameg e tabinaew ndariy bi’id manemus, ma fare [gospel ku Yesus Kristus nikan fulweg yarmen] ebe rin’ e biney ma dariy bang [fa rebe galasia nibe rin’ ni arogon]. Ri gube athapeg ni ga’angin e fayleng erayog ni nge rung’ag laman fapi bitir [rodad] niyad be yin’ fare tang ni: ‘Tabinaew erayog ninge paru ta’abang nib manechubog.’”

Tabinaew e gathi kemus nikan ayliy rogon makemus rogon aray. Ya yade rogone tabinaew nibayu tharmiy. Ya yadbayu “lukngun ko tanam rok e Tasunmiy ni fan ko yafas nib manemus rok e bitir Rok.” Woed rogon ni machib nag President Russell M. Nelson (1924–2025): “[Somoel] e sunmiy e fayleng ni [ngayog] ni ngad thapeged e dogur min sunmiy e tabinaew riy. Ke sunmiy e Galasia rok ni ngayog ni n’uf nag ngalang e tabinaew. Ke pi’ e temple ni ngayog nipar e tabinaew ma dariy bi’id manemus.”

Machane nameg rodadko tabinaew ninge par nibgel e gathi kemus rogon aray nib manechubog. Tabinaew e rib ga’fan ko falfalaen’ rodad u fayleng. Chitamangdad nu Tharmiy, ni’ir e manang nib polo’ etin nima pi’ e falfalaen’ e chiney nge tin ni manechubog, e pi’ e bitir ngalane tabinaew—nibay niboch e dani polo’—machane me piningdad ni ngad fal’aged magdad chugliye tabinaew ningegel. Riyul’ ya, “m’ar ko dogur, yam’, nge kuboch rogon ema yib nibochane fan ngodad ni ngad gayed rogon ningad gelgad.” Machane dariy ban’en nrayag ninge yin’ loen etin nib ga’fan, nikan mu’ i duugliy nib thothup ni muruwel rok e matam nge mitin, chitamangiy nge chitiningiy.

Research ko mornga’agen e “tha’ uthilin e galabthir” abe ul’ul’ nibedag ni tabinaew ebe ayuaweg e “tha’ ko t’ufeg nirib gel gelngin.” Ire ray egin “nima tabab etin nib mangil riy, ko urngin rok facha’ riy ni ga’angin.”

Ma riyul’, ya susun ni dabi gin owchendad ngay ni ban’en nirib ga’fan ko wo’en Got e bay e togopluw riy. Mo’oniyan’ e dairy bi’id ni’ir ebe’ nibgol ko tabinaew, mabe papaynag e muruwel rok “ya manang ni dakriy napon ma bayi taw ngay” (Revelation 12:12). Woed rogon niyog President M. Russell Ballard (1928–2023), ni’ir e fare President ko fare Ulung ko fare Ragag nge L’agruwi Apostle “Mo’oniyan’ e manang ni bin kanawo’ nirib fel’ ningan gathay nag e muruwel rok Somoel era yibu lane tabinaew nge gidii’ riy.”

Bachane gadad manang mornga’agen tabinaew ku Got nib manechubog, tonom rok nifan ngak pifak, nge fan fani rib ga’fane tha’ ko tabinew, e susun ninge pi’ e athamgil ngodad ningad yul’yul’gad magadad ayuweg e tabinaew ndariy ban’en ninge buch riy.

Urogon ningad rrin’ed pin’ney?

President Dallin H. Oaks e mulwolnag: “Fare Boggi thin nifan ko tabinaew … e ireram Somoel nibe sulu dakean etin niribga’fan mab riyul’ ko gospel nib t’uf ningad nanged mornga’agen nrayog ninge ayuwegdad kotin nib momaw’ nibe yib ko tabinaew.”

Ulane yafos rodad, ma rayog ni ngad rin’ed “e tin baʼachig mab moem banʼen” (Alma 37:6) nima pi’ gelngin e tha’ ko tabinaew. Bineye be un fapi yalen ngay ko rogon mara fel’ e tabinaew me mon’og niwod rogon nikan yoloy ulan fare boggi thin nifan e tabinaew: “mich, meybil, kalngan’, n’agfan, tayfan, adag, tu’ufeg, murwel, nge ku boech e ngongol nib mangil.” Demuturug rogon en’en nibe buch ko tabinaw rodad e chiney, rayog ni ngad daged ni tha’ ko tabinaew rodad erib ga’fan ngodad.

Ku wod rogon nibaye muruwel rodad ni gadade “gidii’ ko nam rodad”, erayog ni ngad “daged rogon mrayog me par e tabinaew nibgel.”

Gadad e Gidii’en Got ko tin tomur e rran. Gadade kad thapeged epi michmicheg ney nikan ngongliy ngak Abraham, Isaak, nge Jacob—bogi michmicheg ni gubin riy ebay rogon ko tabinaew. Pi michmicheg ney ebay e muruwel riy nib thothup ninge tawa’ath nag “gubin e tabinaew udakean e fayleng.” Reb rogon marayog ningad rin’ed e biney e ngan fol, min ayuweg, min weliy mornga’agen etin nib riyul’ mab manechubog ni mornga’agen ni “tabinaew e Got eke yibliy rogon” ma “fapi m’ag nge gam’ing nib thothup e bay ulan fapi temple nib thothup nrayag ni nge ayuweg facha’ ni nge sul ko gin bay Got riy nge tabinaew ni nge sul nga ta’abang ni manechubog.”

Napon ni gamow be yaliy Sister Uchtdor ya’an e tabinaew romow niyad be ngongliy fapi michmicheg nib thothup ngak, e Chitamangiy nu Tharmiy nib manechubog, marug thamiyew e falfalaen’ nirib gel. Gathi kemus ninge falfalaen’dad ngak pifakdad nge pifak pifakdad machane falfalaen’gad ngak e galabthir rodad nge galibthir rorad. Ma kagdadma tafneynag ufithik e adag ko rogon nima ta’arebnagdad fapi m’ag ko gospel ko gubin mit e mfen. Wod ban’en ni gathi wod ni yibe guy ba “tawo’ ni yan u but’ nge mada’ nga lanelang: ma be yan e pi engel rok Got riy ngalang ma yad be yib riy nga but’” (Genesis 28:12).

Fapi tawa’ath ni michmicheg Somoel ngak Jacob niyib ko lik’ay rok e kube ul’ul’ ngodad ko gubin pifak nibay utan fare m’ag—nigur nge gag e gadow mu’un ngay. Wod rogon ni rin’ Somoel ngak Jacob, era “ayuweg [dad] u nap’an ni yib e gafgow” (Genesis 35:3) ni fa’an gadadra mel’eg.

“Dab mu pag talin, ni “bay ug un ngom, ngu’ug yoror rom ko yungi n’en ni ga be yan riy, … ma dab gu pagem” (Genesis 28:15).

Ku wod Jacob, gadad babay bangi wuru’ e binaw nib t’uf ninge yanu dakean. Ma bochingiyal’ ma gowa rib paloge pi tawa’ath ney nikan michmicheg. Ma napone bayi yibe kireb fa gafgow, ma gadad de’riy et’ufeg rok Somoel. Ma ku bay ni bay thamiyed nike pagtalin dad Got. Ma demuturug rogon fani gadad be fol riy, ma bay ni bay thamiyed ni daryib fapi tawa’ath ni gadad be athapeg.

Pi walageg, nge pi tafagar rog, fare kanawo’en e m’ag e ir kanawo’en e falfalaen’, demuturug rogon ni fa’anra mop e lu’ u owchey riy. Fa’anra gabe thamiy ni giney kore wo’en e falfalaen’ ney e daryib ngom e chiney, wenig pagaen’um ngak Somoel ya manngem mara tawa’ath nigem ko ngiyal’ niba’adag, nibe yanko rogone gonop rok.

Mich ngak Yesus Kristus nge fapi michmicheg rok era pi’ e athamgil ngodad ni ngad sapgad nga m’on, ma gathi ngatomur. Ire bachoni, dani t’uf ni nga ud pired mabe m’agfandad kotin nike thumur ban’an fa tin nibe rurunguy e sap rodad. Arogon, gadad gubin, fa ra buch, nra bagdad ba bay rogon etirok e a’mith nib thilthil. Machane michu wun’udad ngak Facha’ nima Gol nigey. Be pagaen’dad Ngak— nirib gel, niwod rogon, nibe michuwun’dad ngak ko fapi michmicheg nike tay ma be “daged ko ngongol rorad,” ni aram rogon ni “ra changargad ngam’on nib orel” (Hebrews 11:13).

“Paru wun’dad ni gubin, ni Somoel e bayi dugliy rogon nge ngiyal’ riy, ya dabi siyeg fapi tawa’ath ngak fapi gidii’ Rok nib yul’yul’, cha’ ni ga’ ko rebe liw,” nike yoeg President Russell M. Nelso “Ya Somoel e bayi pufthin nag me pii’ wa’athan e gidii’ ni be yaen u rogon gum’ircha’enraed nge pi ngongol roraed.”

Gube micheg ni fa’an gadadra leak magadad yoeg mornga’agen fare wo’en e tabinaew nike dugliy e Chitamangiy nu Tharmiy, mara yib ngodad, mara pi’ gelingdad, mara un ngodad ko milekag rodad. Ma dariy bi’id marapagdad, ndemuturug gelngine lumel ni bayiyib ngodad fa yibko gidii’ nib t’uf rodad. Ra fekdad, mara pi’dad ngalang, mara fekdad iyib ko fare nam nikan michmicheg nib sug e falfalaen’ nib polo’ rodad ngak, nibay Fak riy, ni Yesus Kristus, nge tabinaew rodad—ni dairy bi’id manemus.