Kapakapaiada Koaros Peneinei kan en Sampah

Elder Bruce C. Hafen, me mahs wia emen tohn Isiakan ko, ehu ansouo alehdier delepwohn sang edidor en ehu wasahn nuhs me kahdaniki national news magazine. Edidoro men koasoaia pwuhk ieu me apwete ntingda me koasoaia poadepen dahme aramas kamehlele kan duwen nanleng me kohsang soangesoangen palien lamalam kei.

“Soun nting pwuhk ko diaradahr me wehi pokon ahniki pepehm en duhpek ong nanleng—oh peneinei kan nanleng,” Elder hafen ntihngihdier. Ahpw ni pali tohtohn aramas ahr kamehlelehte me mie mour mwurin mehla, limpoak poatoapoat, oh pwurpenehn peneinei nanleng, “pali tohtohn mwomwohdiso kan sawaski pasapeng tikitik me pid duhpek en mas loale wet”—ihte me ieu: Mwomwohdiso en Sises Krais en Souleng en Imwin-rahn akan.

Nan sapwellimen Sounkomouro Mwomwohdiso kopwurpwurdoh, kitail ahniki tehnpas sarawi kei. Kitail ahniki pwopwoud soutik, me iangahki mweimwei en katengteng me kin kapaiada daulihala mehlahn paliwar. Kitail ahniki inou en mour soutik ong me kitail poakohng kan rehn Sahmo oh sapwellime Iehros o. Ni atail ahniki mepwukat koaros, sounnting kan kaimwsengkihla me en Souleng en Imwin rahn akan madamadau en nanleng iei me keiou unsek—oh, I men kapatahiong, keioun kaperen.

Ia wen kaselel en dahme dierekda wet!” Elder Hafen kasawiadahr. “Tohto aramas rahnwet mentenoh ahniki peneinei soutik, oh [mwomwohdiso kopwurpwurdo en Sises Krais] kin apwalihala anahno mwahusang soangen madamadau teikan [de palien lamalam teikan] I mentehnoh sampah pwon kak rong [neitail] serihkan ahr kokouliki rohng kapereno: ‘Families can be together forever.’”

Peneinei kan sohte wiahte koasoandi en kousoan ehu me konehng. Irail wia mwohmw soutik en nanleng. Irail wia “poahsoan en en Sounkepikipiko pilahn ong mour soutik en Sapwelline serihkan.” Me Preseden Russell M. Nelson (1924–1925) padahngkihong kitailehr: “[Kauno] kapikadahr sampah [pwe] kitail en kak alehdi paliwar oh wiahda peneinei kan. E kauwadahr Sapwellime Mwomwohdisoh pwe en kasapwilada peneinei kan. E ketkidahr tehnpas sarawi kan pwe peneinei kan en kak mihmipene kohkohlahte.”

Ahpw atail pereniki peneinei kehlail kan kaidehnte pid mour soutik. Peneinei pil wia pwukoah kesempwal nan atail peren en mourwet. Samatail Nanleng, me ketin mwahngih ni unsek dahme kin wahdo peren met oh kohkohlahte, kadaredo Sapwellime serihkan ong peneinei kan—soh unsek me irail kak wia—oh kin lukei kitail en wiahda oh apwalihada peneinei kehlail kan. Ei, “soumwahula, mehla, de irair teikan kak kahrehieng aramas emen eh anahne wekidala ah mour.” Ahpw sohte me kak weliandi pwukoah kesempwal, sarawi me kosoandier ong ohl pwopwoud men oh eh pwoud, pahpa oh nohno.

Ropirop ong “peneinei kan me emen ipwidiong loale, me ehupene, me sang pahpa-nohno” kin doulahte kasalehda me peneineio inenen kesempwal ong kolokolete “ehupene laud en limpoak oh kesempwalki.” E wia “sawasepe keiou ong emen emen en ahniki soanamwahu, koahiek, oh kesempwaliki dahme mehteikan kahpwal akan.”

Ei, e sohte anahne kopwuriamwei ih kitail me mehkot me nohn kesempwal ong sapwellimen Koht koasoandi pahn sohpai kahpwal. Sehdan sohte pak ehu kin ehuong peneinei, oh ah doadoahk kan wie lalaudlahte “pwehki e ese me eh ahnsou mwotomwotlahr” (Kaudiahl 12:12). As President M. Russell Ballard (1928–2023), Acting President of the Quorum of the Twelve Apostles, said, “Satan knows that the surest and most effective way to disrupt the Lord’s work is to diminish the effectiveness of the family and the sanctity of the home.”

Ni atail ese dahme kitail ese duwen sapwellimen Koht peneinei soutik, Sapwellime koasoandi ong Sapwellime serihkan, oh kesempwalpe soutik en ehupenehn peneinei kan, kitail anahne wia sounpoadoandoar keiou ngoang ong peneinei.

Ia mwomwen atail kak wia met?

Preseden Dallin H. Oaks sawasakihda kaweid wet: Kalohk ong peneineio … iei sapwellimen Kauno mehn ketemen ong mehlel akan en rongamwahu wet me kitail anahne me pahn utung kitail nan kahpwal akan en rahn pwukat ong peneinei.”

Nan pein atail mour kan, kitail kak wia “soahng kan me tikitik oh mengei” (Alma 37:6) me kak kakehlaka ehupene kan en peneinei. Met iangahki ideidawehn padahk kan en peneinei oh pwopwoud pweida kan me sansalehr nan kalohk ong peneineio: “pwoson, kapakap, koluhla, mahk, waun, limpoak, tetehk mehteikan, doadoahk, oh kemwekid en kemweit mwahu kan.” Mendahte irair en atail peneinei kan met, kitail kak kasalehda sang ni atail wiewia kanme ehupenehn peneinei kan inenen kesempwal ong kitail.

Ni atail wia “towe mwahu kei en wehi” nan atail kousoan kan, kitail kak “utung irair pwuko me koasoandi en kolokol oh kakehlailih peneinei.”

Kitail wia sapwellimen Kauno aramas en inou sarawi en imwin-rahn akan. Kitail wia sounsohsohki inou kan me wiawiongehr Eipraam, Aisek, oh Seikop—inou kan me pid soahng koaros ong peneinei kan. Inou pwuko kohdo iangahki pwukoah sarawi en kapaiada “peneinei koaros en sampah.” Oh ehu mwohmw kesempwal me kitail kin wia met iei sang momouriki, doandoare, oh ehuki mehlel soutiko me “peneinei kasarawilahr sang Koht” oh metiahk sarawi kan oh inou sarawi kan me mie nan tehnpas sarawi kan elehda aramas en kak pwurala rehn Koht oh peneinei kan en kak patpene kohkohlahte.“

Ni ansou me ngehi oh Sister Uchtdorf kilang tohn aht peneinei kan wiahda inou sarawi kan ong Samatail Nanleng, aht mohngiong kan audaudiki popohl oh kaping. Se pereniki kaidehnte nait serihkan oh neirail serihkan ahpw pil aht pahpa nohno kan oh arail pahpa nohno kan. Kitail kin ahniki madamadau lauden limpoak ia mwomwen inou sarawi kan en rongamwahu kin kihkitail pene nan dihkan. E wia ekspihriens ieu me sohte weksang kilikilang “kehndake ieu me uhdahsang sampah, … oh [leldahla] nanleng: a tohnleng en Koht kei kin doudou kohda oh kin doudou kohdi powe” (Senesis 28:12).

Kapai kan me Kauno ketin inoukihongehr Seikop nan ah ouramano pil kolahng koaros Sapwellime seri en inou kan—me iangahki kowe oh ngehi. Me duwehte dahme Kauno wiahngehr Seikop, E pahn ketin sapeng kitail “nan ei apwal” (Senesis 35:3) ma kitail pilada Ih.

“Tamataman,” Kauno mahsanih, “I pahn ieiang uhk oh sinsileiuk wasa koaros me ke pahn kohla ie, … I sohte pahn keseiukala” (Senesis 28:15).

Duwehte Seikop, kitail koaros mie atail nanwel me kitail anahne kote. Ekei pak kapai inoudier kan kak mwomwen dohla. Ni ansou me kahpwal laud akan de kasongsong kan kohdo, kitail kak peidengki sapwellimen Kauno limpoak. Kitail pil kak ahniki pepehm me Koht ketin keseikitailahr. Mendahte atail doadoahk laud akan en wiahla sapwellime tohnpadahk, kitail kak pehm me kitail sohte alialehdi kapai kan me kitail kasikasik.

Riei ohl oh lih akan, kemoakepahi kan, elen inouo iei elen popohl ehu, menda ekei ansou e kak saminkihla pilenmas akan. Ma ke pehm me soangen pali kei en koasoandi en pereno sohte pweida nan ahmw mour met, menlau likih me Kauno ese iuk oh pahn kapai iukada nan pein sapwellime ansou, me doke pein sapwellime eripit.

Pwoson Sises Krais oh Sapwellime inou kan kak kamarainih kitail en kilengla mwowe, kaidehn mwuri. Pwehki Ih, atail rahn kohkohdo kan sohte anahne kolkolkihdi mehkot ieu me wiawiher mahso de me wie perepere mwohn masatail kat ansou wet, Ei, kitail koaros wia, de pahn wia, ohla ni soangen mwohmw ieu de ehu tohrohr. Ahpw kitail kamehlele Sounkamwahuihala Lapalapo. Kitail likih Ih—inenen laud, ni mehlel, me kitail alehkihda Sapwellime inou kan, ni unsek “kilang oh perenkihda,” mendahte arail “sang wasa doh” (Ipru 11:13).

“Be we all reminded that, in the Lord’s own way and time, no blessings will be withheld from His faithful Saints,” said President Nelson. “Kauno pahn ketin kopwungih oh katingih emenemen sang ni ineng en mohngiong oh pil wiewia.”

I inouki me ni atail pahn idawehn oh ehuki sapwellimen Samatail Naleng koasoandi ong peneinei kan, E pahn ketin ieiang kitail, kakehlaka kitail, oh patehng kitail nan atail seiloak. E sohte pahn kohkohsang kitail, ni mehlel ansou kasongosong kan pahn lel kitail de kempoakepahtail kan. E pahn ketin wai kitail, pwok kitailda, oh waikitaillahng sapwen inou direki popohl Reh, iangahki Sapwellime Iehros o, Sises Krais, oh pil rehn atail peneinei kan—kohkohlahte.