ເຮົາຈະອວຍພອນຊົນຊາດທັງປວງ

ໂດຍ ແອວເດີ ດີເດີ ແອັຟ ອຸກດອບ

ແຫ່ງກຸ່ມອັກຄະສາວົກສິບສອງ

ຖ້າເຮົາເຮັດຕາມ ແລະ ແບ່ງປັນແຜນຂອງພຣະບິດາເທິງສະຫວັນສຳລັບຄອບຄົວແລ້ວ, ພຣະອົງຈະຢູ່ກັບເຮົາ, ສະໜັບສະໜູນເຮົາ, ແລະ ຮ່ວມກັບເຮົາໃນການເດີນທາງກັບຄືນໄປຫາພຣະອົງ.

ເມື່ອບໍ່ດົນມານີ້, ຊິດສະເຕີ ອຸກດອບ ແລະ ຂ້າພະເຈົ້າໄດ້ໄປຮ່ວມພິທີບັບຕິສະມາຂອງຫລານທວດຄົນໜຶ່ງຂອງພວກເຮົາ. ຂະນະທີ່ພວກເຮົາໄດ້ເຫັນຫລາຍລຸ້ນຄົນກຳລັງສະເຫລີມສະຫລອງເຫດການນີ້ຢ່າງເບີກບານມ່ວນຊື່ນ, ພວກເຮົາຮູ້ສຶກກະຕັນຍູຢ່າງເລິກເຊິ່ງຕໍ່ພຣະບິດາເທິງສະຫວັນຂອງເຮົາສຳລັບແຜນແຫ່ງຄວາມລອດຂອງພຣະອົງທີ່ມີໃຫ້ສຳລັບລູກໆຂອງພຣະອົງ. ເຮົາສຳຜັດໄດ້ວ່າຄອບຄົວ ແລະ ພັນທະສັນຍາອັນສັກສິດນັ້ນມິຄວາມສຳຄັນຫລາຍຕໍ່ພຣະອົງນັບຕັ້ງແຕ່ການເລີ່ມຕົ້ນ.

ຄວາມສຳຄັນນັ້ນສາມາດເຫັນໄດ້ໃນເລື່ອງລາວພຣະຄຳພີເດີມກ່ຽວກັບຢາໂຄບທີ່ຊື່ສັດ, ຜູ້ທີ່ໄດ້ເດີນທາງອັນຍາວໄກ ແລະ ຍາກລຳບາກເພື່ອຊອກຫາພັນລະຍາ, ແຕ່ງງານໃນພັນທະສັນຍາ, ແລະ ສ້າງຄອບຄົວ. ຄືນໜຶ່ງ, ຢາໂຄບໄດ້ຢຸດພັກຜ່ອນເພື່ອນອນຄ້າງຄືນ ແຕ່ວ່າມີພຽງແຕ່ກ້ອນຫີນເທົ່ານັ້ນທີ່ໃຊ້ເປັນໝອນສຳລັບເພິ່ນ. ເພິ່ນຕ້ອງເມື່ອຍຫລາຍເພາະວ່າເພິ່ນຍັງນອນຫລັບໄດ້—ແລະ ຍັງຝັນອີກດ້ວຍ.

ດ້ວຍເປົ້າໝາຍຂອງການມີຄ່າຄວນໃນການແຕ່ງານແລະ ມີຄອບຄົວໃນພັນທະສັນຍາທີ່ມີຢູ່ໃນໃຈຂອງເພິ່ນຢ່າງແນ່ນອນ, ຢາໂຄບໄດ້ເຫັນ “ຂັ້ນໄດແຕ່ດິນຈົນຈຸສະຫວັນ ແລະ ມີບັນດາເຫລົ່າທູດສະຫວັນຂອງພຣະເຈົ້າກຳລັງຍ່າງຂຶ້ນຍ່າງລົງຕາມຂັ້ນໄດນັ້ນ.

“ແລະຢູ່ທີ່ນັ້ນ ພຣະເຈົ້າຢາເວກຳລັງຢືນຢູ່ຂ້າງລາວ, ພຣະອົງກ່າວວ່າ, ເຮົາແມ່ນພຣະເຈົ້າຢາເວ ພຣະເຈົ້າຂອງອັບຣາຮາມປູ່ຂອງເຈົ້າ, ແລະພຣະເຈົ້າຂອງອີຊາກ” (ປະຖົມມະການ 28:12–13).

ຈາກນັ້ນພຣະຜູ້ເປັນເຈົ້າໄດ້ເຮັດພັນທະສັນຍາແຫ່ງຄຳສັນຍາທີ່ສຳຄັນບາງປະການກັບຢາໂຄບ—ຊຶ່ງເປັນຄຳສັນຍາທີ່ພຣະອົງໄດ້ເຮັດໄວ້ກັບບັນພະບຸລຸດຂອງຢາໂຄບ, ອີຊາກ, ແລະ ປູ່ຂອງເພິ່ນ, ອັບຣາຮາມນຳອີກ, ລວມທັງ:

ຄຳສັນຍາທີ່ວ່າຢາໂຄບຈະກາຍເປັນບັນພະບຸລຸດຂອງ “ລູກຫລານຢ່າງຫລວງຫລາຍ” (ປະຖົມມະການ 28:3; ເບິ່ງ ຂໍ້ທີ 14ນຳອີກ).
ຄຳສັນຍາເລື່ອງແຜ່ນດິນສຳລັບລູກຫລານຂອງຢາໂຄບ (ເບິ່ງ ປະຖົມມະການ 28:4, 13).
ຄຳສັນຍາທີ່ວ່າ ຜ່ານທາງຢາໂຄບ ແລະ “ເຊື້ອສາຍຂອງເພິ່ນ ຄອບຄົວທັງໝົດຂອງແຜ່ນດິນໂລກຈະໄດ້ຮັບພອນ” (ປະຖົມມະການ 28:14; ເນັ້ນຄຳເນີ້ງ).

ປະສົບການຂອງຢາໂຄບນັ້ນສັກສິດຫລາຍຈົນເພິ່ນໄດ້ປະກາດວ່າ: “ພຣະຜູ້ເປັນເຈົ້າສະຖິດຢູ່ບ່ອນນີ້ແທ້ໆ. … ຄົງເປັນວິຫານຂອງພຣະເຈົ້າ, ແລະຄົງເປັນປະຕູທີ່ໄຂໄປສູ່ສະຫວັນ” (ປະຖົມມະການ 28:16–17). ແລະດັ່ງນັ້ນ, ຢາໂຄບຈຶ່ງເອີ້ນເຂດນີ້ວ່າ ເບັດເອນ, ຊຶ່ງມີຄວາມໝາຍວ່າ “ບ້ານຂອງພຣະເຈົ້າ” (ປະຖົມມະການ 28:19, ໝາຍເຫດຢູ່ດ້ານລຸ່ມ ກ).

ພອນທີ່ສັນຍາໄວ້ໄດ້ມອບໃຫ້ໃນຄວາມຝັນຂອງຢາໂຄບຮຽກຮ້ອງໃຫ້ຢາໂຄບຕ້ອງຜ່ານຜ່າອຸປະສັກໃນຊີວິດຕົວຈິງ. ໃນຖານະໄພ່ພົນຍຸກສຸດທ້າຍ, ມັນບໍ່ແມ່ນເລື່ອງຍາກທີ່ຈະເຫັນການເຊື່ອມຕໍ່ລະຫວ່າງຄວາມຝັນຂອງຢາໂຄບ, ກັບພັນທະສັນຍາຂອງພຣະຜູ້ເປັນເຈົ້າ, ແລະ ບ້ານຂອງພຣະຜູ້ເປັນເຈົ້າ. ພຣະວິຫານກໍຄ້າຍຄືກັນກັບຂັ້ນໄດທີ່ຢາໂຄບໄດ້ເຫັນ. ຄຳສອນ, ພິທີການ, ແລະ ພັນທະສັນຍາຂອງບ້ານຂອງພຣະຜູ້ເປັນເຈົ້າ ເຊື່ອມຕໍ່ສະຫວັນ ແລະ ແຜ່ນດິນໂລກ. ພັນທະສັນຍາຕ່າງໆກໍປຽບເໝືອນດັ່ງລູກຂັ້ນໄດ ທີ່ດຶງດູດເຮົາໃຫ້ເຂົ້າໃກ້ຊິດກັບພຣະຜູ້ເປັນເຈົ້າ. ແລະ, ຜ່ານການຮັບໃຊ້ອັນສັກສິດທີ່ເຮົາຖວາຍໃນພຣະວິຫານອັນສັກສິດ, ເຮົາຈະອວຍພອນ“ຊົນຊາດທັງປວງ”—ທັງໃນອະດີດ, ປະຈຸບັນ, ແລະ ອະນາຄົດ.

“ຊ່າງເປັນການຄົ້ນພົບທີ່ປະເສີດແທ້ໆ!”

ແອວເດີ ບລູສ໌ ຊີ ເຮເຟັນ, ອະດີດສາວົກເຈັດສິບ, ຄັ້ງໜຶ່ງໄດ້ຮັບໂທລະສັບຈາກບັນນາທິການສຳນັກງານຂ່າວວາລະສານແຫ່ງຊາດ. ບັນນາທິການຄົນນັ້ນຢາກເວົ້າກ່ຽວກັບໜັງສືເຫລັ້ມລ່າສຸດທີ່ສຳຫລວດກ່ຽວກັບປະຫວັດຄວາມເປັນມາຂອງຄວາມເຊື່ອກ່ຽວກັບສະຫວັນໃນສາດສະໜາທີ່ຫລາກຫລາຍ.

“ບັນດາຜູ້ຂຽນທັງຫລາຍໄດ້ພົບວ່າໃນສາທາລະນະສ່ວນຫລາຍແມ່ນຮູ້ສຶກມີຄວາມປາດຖະໜາອັນແຮງກ້າທີ່ຈະໄປສະຫວັນ—ແລະມີຄອບຄົວໃນສະຫວັນ” ແອວເດີ ເຮເຟັນໄດ້ຂຽນໄວ້. ແຕ່ໃນຂະນະທີ່ຜູ້ຄົນຍັງເຊື່ອໃນຊີວິດຫລັງຄວາມຕາຍ, ຄວາມຮັກນິລັນດອນ, ແລະ ການລວມຕົວກັນຂອງຄອບຄົວໃນສະຫວັນ, “ສາດສະໜາຄຣິດສະຕຽນສ່ວນຫລາຍແມ່ນໃຫ້ການຕອບສະໜອງໜ້ອຍຕໍ່ຄວາມປາດຖະໜາອັນແຮງກ້ານີ້”—ຍົກເວັ້ນແຫ່ງດຽວຄື: ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.

ໃນສາດສະໜາຈັກທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດ, ເຮົາມີພຣະວິຫານສັກສິດ. ເຮົາມີການແຕ່ງງານນິລັນດອນ, ດ້ວຍສິດອຳນາດຂອງການຜະນຶກທີ່ໃຫ້ພອນເໜືອຄວາມຕາຍທາງຮ່າງກາຍ. ເຮົາມີຄຳສັນຍາເຖິງອະນາຄົດນິລັນດອນກັບຄົນທີ່ເຮົາຮັກໃນທີ່ປະທັບຂອງພຣະບິດາ ແລະ ພຣະບຸດ. ຈາກຂໍ້ມູນທັງໝົດນີ້, ບັນດາຜູ້ຂຽນທັງຫລາຍໄດ້ສະຫລຸບວ່າ ແນວຄິດກ່ຽວກັບສະຫວັນຂອງໄພ່ພົນຍຸກສຸດທ້າຍແມ່ນສົມບູນທີ່ສຸດ—ແລະ, ຂ້າພະເຈົ້າຂໍເພີ່ມ, ຄຳວ່າມີຄວາມສຸກທີ່ສຸດອີກດ້ວຍ.

“ຊ່າງເປັນການຄົ້ນພົບທີ່ປະເສີດແທ້ໆ!” ແອວເດີ ເຮເຟັນໄດ້ສັງເກດ. “ຄົນສ່ວນຫລາຍໃນປະຈຸບັນຫວັງທີ່ຈະມີຄອບຄົວນິລັນດອນ, ແລະ [ພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ] ຕອບສະໜອງຄວາມຫວັງນັ້ນໄດ້ດີກວ່າແນວຄິດ[ຫລື ຄວາມເຊື່ອທາງສາດສະໜາ]ອື່ນໆທີ່ເປັນທີ່ຮູ້ຈັກ. ຂ້າພະເຈົ້າປາດຖະໜາໃຫ້ທົ່ວໂລກໄດ້ຍິນລູກໆ [ຂອງພວກເຮົາ] ຮ້ອງເພງກ່ຽວກັບຂ່າວດີທີ່ວ່າ: ‘ຄອບຄົວສາມາດຢູ່ດ້ວຍກັນຊົ່ວນິລັນ.’”

ຄອບຄົວບໍ່ໄດ້ເປັນພຽງແຕ່ການຈັດລະບຽບເພື່ອຄວາມສະດວກທາງສັງຄົມເທົ່ານັ້ນ. ພວກມັນຄືແບບແຜນນິລັນດອນຂອງສະຫວັນ. ພວກມັນຄື “ຈຸດໃຫຍ່ໃຈກາງຂອງແຜນຂອງພຣະຜູ້ສ້າງ ສຳລັບວິຖີຊີວິດອັນນິລັນດອນຂອງລູກໆຂອງພຣະອົງ.” ດັ່ງທີ່ ປະທານຣະໂຊ ເອັມ ແນວສັນ (1924–2025) ໄດ້ສິດສອນເຮົາວ່າ: “[ພຣະຜູ້ເປັນເຈົ້າ] ໄດ້ສ້າງໂລກນີ້ຂຶ້ນມາ [ເພື່ອ] ວ່າເຮົາຈະໄດ້ຮັບຮ່າງກາຍ ແລະ ສ້າງຄອບຄົວ. ພຣະອົງໄດ້ສະຖາປະນາສາດສະໜາຈັກຂອງພຣະອົງຂຶ້ນມາເພື່ອເຮັດໃຫ້ຄອບຄົວສູງສົ່ງ. ພຣະອົງສ້າງພຣະວິຫານໄວ້ເພື່ອໃຫ້ຄອບຄົວສາມາດຢູ່ດ້ວຍກັນຊົ່ວນິລັນດອນ.”

ແຕ່ຄວາມສົນໃຈຂອງເຮົາໃນຄອບຄົວທີ່ເຂັ້ມແຂງນັ້ນບໍ່ໄດ້ແມ່ນແຕ່ກ່ຽວກັບຈຸດໝາຍປາຍທາງນິລັນດອນເທົ່ານັ້ນ. ຄອບຄົວມີບົດບາດສຳຄັນຕໍ່ຄວາມສຸກໃນຊີວິດມະຕະຂອງເຮົາເຊັ່ນກັນ. ພຣະບິດາເທິງສະຫວັນຂອງເຮົາ, ຜູ້ຮູ້ຢ່າງທ່ຽງແທ້ວ່າສິ່ງໃດທີ່ຈະນຳຄວາມສຸກມາໃຫ້ເຮົາໃນປະຈຸບັນ ແລະ ນິລັນດອນ, ຈຶ່ງສົ່ງລູກໆຂອງພຣະອົງມາສູ່ຄອບຄົວ—ເຖິງແມ່ນວ່າຄອບຄົວນັ້ນຈະບໍ່ສົມບູນແບບກໍຕາມ—ແລະ ເຊື້ອເຊີນເຮົາໃຫ້ສ້າງ ແລະ ບຳລຸງລ້ຽງຄອບຄົວໃຫ້ເຂັ້ມແຂງ. ແນ່ນອນ, “ການເປັນພິການ, ການຕາຍ, ຫລື ໃນກໍລະນີອື່ນໆ ອາດເຮັດໃຫ້ໜ້າທີ່ຂອງພໍ່ ຫລື ແມ່ປ່ຽນໄປ.” ແຕ່ບໍ່ມີສິ່ງໃດທີ່ສາມາດທົດແທນໜ້າຮັບຜິດຊອບທີ່ສຳຄັນ, ໄດ້ຮັບການແຕ່ງຕັ້ງຈາກສະຫວັນຂອງສາມີ ແລະ ພັນລະຍາ, ພໍ່ ແລະ ແມ່ໄດ້.

ການຄົ້ນຄວ້າກ່ຽວກັບ “ຄອບຄົວທາງຊີວະພາບ, ທີ່ມີຄວາມຜູກພັນກັນ, ປະກອບດ້ວຍພໍ່ແມ່ທັງສອງຄົນ” ຍັງສະແດງໃຫ້ເຫັນຕໍ່ໄປອີກວ່າຄອບຄົວມີຄວາມຈຳເປັນຕໍ່ການຮັກສາ “ຄວາມຜູກພັນອັນເລິກເຊິງໃນຄວາມຮັກ ແລະ ຄວາມໃກ້ຊິດ.” ມັນຄື “ບ່ອນເພາະບົ່ມຫລັກສຳລັບບຸກຄົນທີ່ມີຄວາມໝັ້ນຄົງ, ປັບຕົວໄດ້ດີ, ແລະ ມີຈິດສຳນຶກທາງສັງຄົມ.”

ຜູ້ປົກປ້ອງຄອບຄົວຢ່າງພາກພຽນ

ແນ່ນອນວ່າ, ມັນບໍ່ແມ່ນເລື່ອງທີ່ເຮັດໃຫ້ເຮົາປະຫລາດໃຈສຳລັບບາງສິ່ງບາງຢ່າງທີ່ສຳຄັນໃນແຜນຂອງພຣະເຈົ້າຍ່ອມຈະຕ້ອງປະເຊີນກັບການຕໍ່ຕ້ານ. ຊາຕານບໍ່ເຄີຍເປັນມິດກັບຄອບຄົວເລີຍ, ແລະ ຄວາມພະຍາຍາມຂອງມັນກໍຍິ່ງຮີບດ່ວນຂຶ້ນເລື່ອຍໆ “ເພາະມັນຮູ້ວ່າເວລາຂອງມັນມີໜ້ອຍ” (ພຣະນິມິດ 12:12). ດັ່ງທີ່ປະທານ ເອັມ ຣະໂຊ ບາເລີດ (1928–2023), ປະທານກຸ່ມອັກຄະສາວົກສິບສອງແທນຊົ່ວຄາວ, ໄດ້ກ່າວວ່າ, “ຊາຕານຮູ້ຈັກວິທີທີ່ແນ່ນອນ ແລະ ມີປະສິດທິພາບທີ່ສຸດໃນການຂັດຂວາງວຽກງານຂອງພຣະຜູ້ເປັນເຈົ້າ ນັ້ນກໍຄື ການຫລຸດປະສິດທິພາບຂອງຄອບຄົວ ແລະ ຄວາມສັກສິດຂອງບ້ານ.”

ໂດຍການຮູ້ຈັກສິ່ງທີ່ເຮົາຮູ້ກ່ຽວກັບແຜນຄອບຄົວນິລັນດອນຂອງພຣະເຈົ້າ, ແຜນຂອງພຣະອົງສຳລັບລູກໆຂອງພຣະອົງ, ແລະ ຄວາມສຳຄັນນິລັນດອນຂອງຄວາມສຳພັນຂອງຄອບຄົວ, ເຮົາຈຶ່ງຄວນເປັນໜຶ່ງໃນຜູ້ປົກປ້ອງຄອບຄົວທີ່ພາກພຽນທີ່ສຸດໃນໂລກ.

ເຮົາຈະເຮັດສິ່ງນີ້ໄດ້ແນວໃດ?

ປະທານດາລິນ ເອັຈ ໂອກສ໌ ໄດ້ສະເໜີຄຳແນະນຳນີ້ວ່າ: “ໃບປະກາດກ່ຽວກັບຄອບຄົວ … ເປັນສິ່ງທີ່ພຣະຜູ້ເປັນເຈົ້າໄດ້ເນັ້ນຄືນອີກ ເຖິງຄວາມຈິງຂອງພຣະກິດຕິຄຸນ ທີ່ເຮົາຕ້ອງການ ເພື່ອຄ້ຳຈູນເຮົາ ຕ້ານກັບການທ້າທາຍໃນປະຈຸບັນກ່ຽວກັບຄອບຄົວ.”

ໃນຊີວິດສ່ວນຕົວຂອງເຮົາ, ເຮົາສາມາເຮັດ “ເລື່ອງເລັກນ້ອຍ ແລະ ງ່າຍໆ” (ແອວມາ 37:6) ທີ່ເສີມສ້າງຄວາມສຳພັນໃນຄອບຄົວ. ນີ້ລວມທັງການປະຕິບັດຕາມຫລັກທຳຂອງຄອບຄົວ ແລະ ການແຕ່ງງານທີ່ປະສົບຄວາມສຳເລັດຕາມທີ່ໄດ້ລະບຸໄວ້ໃນການປະກາດກ່ຽວກັບຄອບຄົວ: “ສັດທາ, ການອະທິຖານ, ການກັບໃຈ, ການໃຫ້ອະໄພ, ການນັບຖື, ຄວາມຮັກ, ຄວາມເມດຕາ, ວຽກງານ, ແລະ ກິດຈະກຳທີ່ໃຫ້ການພັກຜ່ອນຢ່ອນອາລົມທີ່ເປັນປະໂຫຍດຕ່າງໆ.” ບໍ່ວ່າສະຖານະການຂອງຄອບຄົວເຮົາຈະເປັນຢ່າງໃດໃນປະຈຸບັນ, ເຮົາກໍສາມາດສະແດງອອກໃຫ້ເຫັນໄດ້ດ້ວຍການກະທຳທີ່ວ່າຄວາມສຳພັນຂອງຄອບຄົວແມ່ນສິ່ງທີ່ສຳຄັນທີ່ສຸດຊົ່ວນິລັນດອນສຳລັບເຮົາ.

ໃນຖານະທີ່ເປັນ “ພົນລະເມືອງ” ໃນຊຸມຊົນຂອງເຮົາ, ເຮົາສາມາດ “ຊ່ວຍກັນຊຸກຍູ້ຜູ້ຄົນໃຫ້ເຮັດຕາມນີ້ ເພື່ອຈະໄດ້ຮັກສາ ແລະ ເສີມຄວາມເຂັ້ມແຂງໃຫ້ແກ່ຄອບຄົວ ໃນຖານະໜ່ວຍທີ່ສຳຄັນຍິ່ງຂອງສັງຄົມ.”

ເຮົາຄືໄພ່ພົນຍຸກສຸດທ້າຍໃນພັນທະສັນຍາຂອງພຣະຜູ້ເປັນເຈົ້າ. ເຮົາຄືຜູ້ສືບທອດຄຳສັນຍາທີ່ໄດ້ເຮັດໄວ້ກັບອັບຣາຮາມ, ອີຊາກ, ແລະ ຢາໂຄບ—ຄຳສັນຍາທຸກຢ່າງທີ່ກ່ຽວຂ້ອງກັບຄອບຄົວໂດຍກົງ. ຄຳສັນຍາເຫລົ່ານີ້ມາພ້ອມກັບຄຳຮຽກຮ້ອງອັນສັກສິດເພື່ອອວຍພອນ “ບັນດາຊົນຊາດທັງປວງ.” ແລະ ວິທີໜຶ່ງທີ່ສຳຄັນໃນການເຮັດເຊັ່ນນັ້ນກໍຄືການດຳລົງຊີວິດ, ການປົກປ້ອງ, ແລະ ການແບ່ງປັນຄວາມຈິງນິລັນດອນທີ່ວ່າ “ຄອບຄົວເປັນຈຸດໃຫຍ່ໃຈກາງຕໍ່ແຜນຂອງພຣະຜູ້ສ້າງ” ແລະດ້ວຍວ່າ “ພິທີການ ແລະ ພັນທະສັນຍາສັກສິດຕ່າງໆທີ່ມີໄວ້ໃນພຣະວິຫານສັກສິດ ເຮັດໃຫ້ເປັນໄປໄດ້ສຳລັບຜູ້ຄົນທີ່ຈະກັບໄປຫາທີ່ປະທັບຂອງພຣະເຈົ້າ ແລະ ໃຫ້ຄອບຄົວຢູ່ນຳກັນຊົ່ວນິລັນດອນໄດ້.”

“ເຮົາຈະຢູ່ນຳເຈົ້າ”

ເມື່ອຊິດສະເຕີ ອຸກດອບ ແລະ ຂ້າພະເຈົ້າແນມເບິ່ງສະມາຊິກໃນຄອບຄົວຂອງພວກເຮົາເຮັດພັນທະສັນຍາອັນສັກສິດກັບພຣະບິດາເທິງສະຫວັນນິລັນດອນ, ຜູ້ຊົງຮັກຂອງເຮົາ, ຫົວໃຈຂອງພວກເຮົາກໍເຕີມເຕັມດ້ວຍຄວາມຊື່ນຊົມ ແລະ ກະຕັນຍູ. ພວກເຮົາບໍ່ພຽງແຕ່ປິຕິຍິນດີໃນລູກໆຂອງພວກເຮົາ ແລະ ໃນລູກໆຂອງພວກເຂົາເທົ່ານັ້ນ, ແຕ່ຍັງປິຕິຍິນດີໃນພໍ່ແມ່ຂອງພວກເຮົາ ແລະ ພໍ່ແມ່ຂອງພວກເພິ່ນນຳອີກ. ພວກເຮົາໄຕ່ຕອງດ້ວຍຄວາມຮັກທີ່ເລິກເຊິ່ງກ່ຽວກັບວິທີທີ່ພັນທະສັນຍາແຫ່ງພຣະກິດຕິຄຸນເຮັດໃຫ້ພວກເຮົາເປັນອັນໜຶ່ງອັນດຽວກັນໃນຫລາຍລຸ້ນຄົນ. ມັນເປັນປະສົບການທີ່ບໍ່ແຕກຕ່າງຫຍັງໄປຈາກການໄດ້ເຫັນ “ຂັ້ນໄດແຕ່ດິນຈົນຈຸສະຫວັນ, … ມີບັນດາເຫລົ່າທູດສະຫວັນຂອງພຣະເຈົ້າກຳລັງຍ່າງຂຶ້ນຍ່າງລົງຕາມຂັ້ນໄດນັ້ນ” (ປະຖົມມະການ 28:12).

ພອນທີ່ພຣະຜູ້ເປັນເຈົ້າໄດ້ສັນຍາໄວ້ກັບຢາໂຄບໃນຄວາມຝັນຂອງເພິ່ນຂະຫຍາຍໄປສູ່ລູກຫລານແຫ່ງພັນທະສັນຍາຂອງພຣະອົງທຸກຄົນ—ລວມທັງທ່ານ ແລະ ຂ້າພະເຈົ້າ. ດັ່ງທີ່ພຣະຜູ້ເປັນເຈົ້າໄດ້ເຮັດໄວ້ກັບຢາໂຄບ, ພຣະອົງຈະຊ່ວຍເຫລືອເຮົາ “ໃນຍາມ[ເຮົາ]ເດືອດຮ້ອນ” (ປະຖົມມະການ 35:3) ຖ້າເຮົາເລືອກພຣະອົງ.

“ຈົ່ງຈົດຈຳຢູ່ສະເໝີ,” ພຣະຜູ້ເປັນເຈົ້າໄດ້ກ່າວ, “ເຮົາຈະຢູ່ນຳເຈົ້າແລະປົກປັກຮັກສາເຈົ້າ ທຸກທີ່ທຸກບ່ອນທີ່ເຈົ້າໄປ, … ເຮົາຈະບໍ່ໜີໄປຈາກເຈົ້າ” (ປະຖົມມະການ 28:15).

ເຊັ່ນດຽວກັບຢາໂຄບ, ເຮົາທຸກຄົນກໍມີຖິ່ນແຫ້ງແລ້ງກັນດານທີ່ຕ້ອງຂ້າມຜ່ານ. ບາງຄັ້ງພອນທີ່ສັນຍາໄວ້ກໍເບິ່ງຄືກັນກັບວ່າຢູ່ໄກອອກໄປ. ເມື່ອມີບັນຫາ ຫລື ຄວາມທ້າທາຍຮ້າຍແຮງເຂົ້າມາ, ເຮົາອາດຈະສົງໄສໃນຄວາມຮັກຂອງພຣະຜູ້ເປັນເຈົ້າ. ເຮົາອາດຮູ້ສຶກແມ່ນແຕ່ວ່າ ພຣະເຈົ້າໄດ້ປະຖິ້ມເຮົາໄປແລ້ວ. ເຖິງແມ່ນໄດ້ໃຊ້ຄວາມພະຍາຍາມໃຫ້ດີທີ່ສຸດໃນການເປັນສານຸສິດແລ້ວກໍຕາມ, ແຕ່ເຮົາອາດຮູ້ສຶກວ່າເຮົາບໍ່ໄດ້ຮັບພອນທີ່ເຮົາຫວັງໄວ້.

ອ້າຍເອື້ອຍນ້ອງ, ແລະ ໝູ່ເພື່ອນທີ່ຮັກແພງທັງຫລາຍ, ເສັ້ນທາງແຫ່ງພັນທະສັນຍາຄືເສັ້ນທາງແຫ່ງຄວາມສຸກ, ເຖິງແມ່ນວ່າບາງຄັ້ງມັນກໍອາດຈະເປື້ອນດ້ວຍນ້ຳຕາ. ຖ້າຫາກທ່ານຮູ້ສຶກວ່າບາງສ່ວນຂອງແຜນແຫ່ງຄວາມສຸກບໍ່ໄດ້ເຕີມເຕັມຊີວິດຂອງທ່ານໃນຕອນນີ້, ຈົ່ງໄວ້ວາງໃຈວ່າພຣະຜູ້ເປັນເຈົ້າລະນຶກເຖິງທ່ານ ແລະ ຈະອວຍພອນທ່ານໃນເວລາທີ່ເໝາະສົມ, ຕາມພຣະປັນຍາຂອງພຣະອົງ.

ສັດທາໃນພຣະເຢຊູຄຣິດ ແລະ ຄຳສັນຍາຂອງພຣະອົງດົນໃຈເຮົາໃຫ້ເບິ່ງໄປຂ້າງໜ້າ, ບໍ່ແມ່ນຖອຍຫລັງ. ຍ້ອນພຣະອົງ, ອະນາຄົດຂອງເຮົາຈຶ່ງບໍ່ຈຳເປັນຕ້ອງຖືກກັກຂັງໂດຍສິ່ງໃດກໍ່ຕາມທີ່ເກີດຂຶ້ນໃນອະດີດ ຫລື ກີດຂວາງວິໄສທັດຂອງເຮົາໃນຕອນນີ້. ແມ່ນແລ້ວ, ທຸກຄົນອາດເປັນ, ຫລື ຈະເປັນແນວນັ້ນ, ຄືໄດ້ຮັບບາດເຈັບ ໃນທາງໃດ ຫລື ທາງໜຶ່ງ. ແຕ່ເຮົາເຊື່ອໃນພຣະຜູ້ປິ່ນປົວທີ່ຍິ່ງໃຫຍ່. ເຮົາໄວ້ວາງໃຈພຣະອົງ—ຢ່າງເຕັມທີ່, ແທ້ຈິງແລ້ວ, ຍອມຮັບໃນຄຳສັນຍາຂອງພຣະອົງຈົນເຮົາ “ກໍໄດ້ເຫັນ” ເຊື່ອໝັ້ນ, ເຖິງແມ່ນວ່າຄຳສັນຍານັ້ນຈະຍັງ “ຢູ່ໄກ” ກໍຕາມ (ເຮັບເຣີ 11:13).

“ຂໍໃຫ້ເຮົາຈື່ຈຳໄວ້ວ່າ, ໃນວິທີ ແລະ ເວລາຂອງພຣະຜູ້ເປັນເຈົ້າ, ບໍ່ມີພອນໃດທີ່ຈະຖືກກີດກັນຈາກໄພ່ພົນທີ່ຊື່ສັດຂອງພຣະອົງ,” ປະທານແນວສັນໄດ້ກ່າວໄວ້. “ພຣະຜູ້ເປັນເຈົ້າຈະພິພາກສາ ແລະ ໃຫ້ລາງວັນແຕ່ລະຄົນຕາມຄວາມປາດຖະໜາຂອງໃຈເຂົາ ຕະຫລອດທັງການກະທຳຂອງເຂົາ.”

ຂ້າພະເຈົ້າສັນຍາວ່າເມື່ອເຮົາເຮັດຕາມ ແລະ ແບ່ງປັນແຜນຂອງພຣະບິດາເທິງສະຫວັນສຳລັບຄອບຄົວແລ້ວ, ພຣະອົງຈະຢູ່ກັບເຮົາ, ສະໜັບສະໜູນເຮົາ, ແລະ ຮ່ວມກັບເຮົາໃນການເດີນທາງຂອງເຮົາ. ພຣະອົງຈະບໍ່ມີວັນປະຖິ້ມເຮົາໄວ້ໂດດດຽວ, ໂດຍສະເພາະເມື່ອມີການທົດລອງມາສູ່ເຮົາ ຫລື ຄົນທີ່ເຮົາຮັກ. ພຣະອົງຈະຊ່ວຍເຮົາ, ຍົກເຮົາຂຶ້ນ, ແລະ ນຳເຮົາໄປສູ່ແຜ່ນດິນແຫ່ງຄຳສັນຍາທີ່ມີຄວາມສຸກຫລາຍແທ້ໆກັບພຣະອົງ, ກັບພຣະບຸດຂອງພຣະອົງ, ພຣະເຢຊູຄຣິດ, ແລະ ກັບຄອບຄົວຂອງເຮົາ—ຊົ່ວນິລັນດອນ.

© 2026 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, March 2026. Laotian. 19937 331