Ahkinsewowoye Nuhkwewa Sucu fin Facluh

Elder Bruce C. Hafen, mempucr se ke U luhn Itngucul meet, tuh eis pahng se yurin mwet orekma ke national nus mackuhsin. Mwet orekma se kac inge ke sramsram ke puk sasuc se tuhfahna oreklac in sirapei ke sramsram mahtuh ke luhlahlfongi ke kuhsrao nuh ke kain in alu kuh luhlahlfongi.

“Mwet suhmuhslah puk sac sokwack tuh mwet facluh uh puhla masrihnsracl na upac se ke kuhsrao—ac sucu inkuhsrao,” Elder Hafen el suhmuhslah. Tuhsruhk inkaiyen mwet uh srackna luhlahlfongi moul se tukun misac, luhngse ma pahtpaht, ac toeni luhlahp inkuhsrao luhn sucu, “puhs mwet Christian ke alu oraclah top na srihsrihk ke masrihnsracl luhn nguhna se inge”—sahyacn u se fanna: Alu luhn Jisus Kraist luhn Mwet Luhlahlfongi ke Lwen-sahflah.

Ke Alu fohlohkyak luhn Mwet Lahngo, oasr yohrohsr tempuhl muhtahl. Oasr yohrohsr macruht ne tok, oasr kuh in sil ma ahkinsewowoye tukun misac luhn mahno. Oasr yohrohsr olwelah ke mwet kuht luhngse nuh tok in muhta weluhl Pahpah ac Wen. Utuckuh ma inge nuhkwewa, mwet se ma suhmuhslah puk sac ahksahfyelah lah moul inkuhsrao luhn Mwet Luhlahlfongi ke Lwen-sahflah inge pa wo emet uh—ac, nga ke tahfwelah, pa engan emet uh.

“Fuhkah Wolacnaiyen ma uh! ” Elder Hafen el tuni. “Inkaiyen mwet misenge finsraki sucu ma pahtpaht, ac [wosasuc fohlohkihnyuckyak luhn Jisus Kraist] ahkfalyelah kena se ingacn liki na kain in nuhnak [kuh kain in luhlahlfongi]. Nga finsrak facluh nohfohn in kuh in lohng tuhlihk [nahtuhsr] onkihn pweng engan: ‘Families can be together forever[Sucu kuh in tuhkweni ne tok ma pahtpaht].’”

Sucu uh tiac ma akwucki in eis ma wo muhkwena. Eltahl pactuhn ma pahtpaht se inkuhsrao. Eltahl “yohk srihpac nuh ke plwacn luhn El suc orwaclah moul nwe tok luhn tuhlihk Nahtuhl uh.” Oacna ke Prestuhn Russell M. Nelson (1924–2025) el luti kuht kac: “[Leum] El oraclah facluh [tuh] kuht in kuh in eis mahno luhn ikoac ac oraclah sucu. El akiyac Alu Lal in tahpuhk sucu. El ahkolah tempuhl tuh sucu uh in kuh in tuhkweni ne tok ma pahtpaht.”

Tuhsruhk kena lasr ke sucu fokoko se tiac in sun sahflahiyacn finsrak lasr muhkwena. Sucu uh oruh kunohkohn yohk srihpac se nuh ke engan pac lasr facluh uh. Pahpah tuhmasr Inkuhsrao, suc etuh kwewa ma use engan nuh ingena ac nuh tok ma pahtpaht, suhpacma tuhlihk Nahtuhl nuh ke sucu—suhfas oacna ke luhmahltahl—ac suli kuht in muhsahi ac tuhfahlah sucu fokoko. Ahok, “suhkahspahs, misac, kuh kuhtwena ohiyac kuh in oraclah eklac ke ma kunacn kais sie nuh ke karihngihnyacn sucu.” Tushruhk wacngihn ma kuh in ahollah kunohkohn yohk srihpac, akwucki muhtahl se luhn mukul tuhma ac muhtwacn kiac, pahpah ac ninac.

Ma sukokyak ke tuhfweyucklac luhn sucu “isuslac nuh kac, nuhtiyucklac, tuhf luo sin pahpah ninac ” tahfwelah in ahkkahlwemye lah sucu uh yohk srihpac in karihngihn “asruoki ac akohnohki fokoko ke luhngse.” Pa inge “ohiyac se fanna ma ahkfokokoye, ahkwoye, ac luti mwet se.”

Pwacyena, tiac mwe lut se nuh sesr lah e oasr ma na yohk srihpac se ke plwacn luhn God ma ac oasr lainyac. Satan el tiac luhngse sucu, ac srihke lal elyah yak “mweyen el etu lah fototo pal lula lal” (Fwackyuk 12:12). Oacna ke Prestuhn M. Russell Ballard (1928–2023), Aholyen Prestuhn luhn U luhn Mwet Sap Singucul Luo fahk, “Satan el etuh lah inkacnek se ma wo emet ac kuh in kunaus orekma luhn God pa in ahkmuhnahsye fokoko luhn sucu ac muhtahliyacn lohm selos.”

Kahlwem ke ma kuht etuh ke sucu ma pahtpaht luhn God, plwacn Lal nuh sin tuhlihk Nahtuhl, ac ma yohk srihpac ke inmahsrlon sucu ma pahtpaht, kuht enenuh in wi inmahsrlon mwet fin facluh ma karihngihn sucu uh.

Kuh kuht ac oruh fuhkah ma se inge?

Prestuhn Dallin H. Oaks el use kahs in kahsruh inge: “Mwe fahkwack luhn sucu … ahkuhtweyac wowo ke ma pwacye ke wosasuc luhn Leum kuht enenuh in ahkkweye kuht, ke ma upac in pacl inge ke sucu uh.”

Ke moul lasr sifacna, kuht kuh in oruh “ma srihsrihk ac fihsrwacsr” (Alma 37:6) ma ahkkweye kuhpahsr luhn sucu. Ma inge ukwoe mwe luti ke sucu oraclah wo ac macruht ma sruhmuhnyuck ke mwe fahkwack luhn sucu: “luhlahlfongi, pruhe, auliyak, nuhnak muhnahs, ahkfuhtwactye, luhngse, pahkomuhta, orekma, ac kain in mukwikwi sahyac pac.” Tiac elyah lah meac sikyak ingena ke sucu lasr uh, kuht kuh in fahkwack ke mukwikwi lasr lah kuhpahsr in sucu yohk na pwacye srihpac nuh sesr ne tok.

Ekihn “mwet wowo” ke acn sesr, kuht kuht in “kwacfe in orekmakihn ma inge in sang karihngihn ac ahkkweye sucu.”

Kuht pa mwet in wuhlweacng luhn Leum ke Lwen-sahflah. Kuht pa eis usru ke olwelah oreklac nuh sel Abraham, Isaac, ac Jacob—olwelah ma oracni ma nuhkewa ke sucu. Olwelah ingacn tuhkuh wi pahng muhtahl se in ahkinsewowoye “sucu nuhkwewa fin facluh.” Ac sie inkacnek yohk srihpac ma kuht oruh pa in moulkihn, karihngihn, ac akacsruhi ke ma pwacye ma pahtpaht lah “sucu uh ahkkweyeyucklac sin God” ac lah “akwuck muhtahl ac wuhlweacng orek lun tempuhl muhtahl oruh mwet se in kuh in fohlohk nuh yurin God ac nuh sin sucu in tuhkweni ne tok.”

Ke nga ac Tahmtahel Uchtdorf liye mwet ke sucu lasr oraclah wuhlweacng muhtahl yurin Pahpah Inkuhsrao ne tok lasr, insiacsr sesseslah ke engan ac kuloh. Kuht tiac engan muhkwena ke tuhlihk nahtuhsr ac tuhlihk nahtuhlos tuhsruhk ke pac pahpah tuhmasr ninac kiacsr ac pahpah tuhmwacn pahpah tuhmacsr ninac kiacn ninac kiacsr. Kuht motko ke luhngse pwacye se ke wuhlweacng luhn wosasuc suc kuhpahsri kuhtyang nuhke fihl sahyac. Sie ma sikyak ma tiac liyeyuck oacna “nien fan se tuyak facluh, … yak [sun] acn inkuhsrao: ac lipufacn uh fani ac fanyak fac” (Genesis 28:12).

Mwe insewowo Leum El olwelah nuh sel Jacob ke mwemwe lal som nuh sin tuhlihk wuhlweacng nuhkwewa Nahtuhl—wi komyang ac nga. Oacna ke Leum El oruh nuh sel Jacob ah, El ac topuk kuht “ke pacl in ongaiyac [lasr]” (Genesis 35:3) kuht fin Sulacllah.

“Esam,” Leum El fahk, “nga ac fah wi kom ac langoekom yen nukewa kom som nuh we, … Nga ac tiana fahsr liki kom” (Genesis 28:15).

Oacna Jacob, kuht nuhkwewa oasr acn mwesis se in ahluhkwelah. Kuhtuh pacl uh mwe insewowo ma olwelah uh loessuhlah. Ke elyah kuh ma upac uh tuhkuh, kuht e kihsensiyuck ke luhngse luhn Leum. Sahp kuht e nuhnkuh pac muh God El muhlkihn kuhtlac. Finne kuht srihke kuhiyacsr in ukwoe Kraist , kuht e kuh in puhla muh kuht tiac eis mwe insewowo ma kuht finsrak nuhkac uh.

Tamuhlwel ac tahmtahel, mwet kawuck sacohk, inkacnek in wuhlweacng el inkacnek engan se, finne kuhtuh pacl uh tuhnlac ke sronin muhta. Kom fin puhla muh plwacn in engan tiac fohnlah ke moul lom an ingena, nuhnak muhnahs luhlahlfongi lah Leum El nuhnke kom ac fah ahkinsewowoye kom ke pacl Lal, fal nuh ke lahlmwetmwet Lal.

Luhlahlfongi ke Jisus Kraist ac olwelah Lal moklwe kuht in nget nuh met, tiac nuh tok. Ke Srihpacl, finsrak lasr nuh tok tiac enenuh in sruhuh ke oacna sie ma sikyak tari kuh in kosraclah ngetnget lasr ingena uh. Ahok, kuht nuhkwewa, kuh ac fah, kweok ke ohiyac se kuh ohiyac se sahyac. Tuhsruhk kuht luhlahlfongi ke Mwet in Unwelah Kuhlwacna sac. Kuht luhlahlfongi in El—yohklacna, pwacyena, kuht sruokyac olwelah Lal, orekmakihn “insewowo kac,” fine elos oan yen “loessula” (Hebrews 11:13).

“Lwelah in mwe acsmak nuh sesr nuhkewa lah, ke inkacnek ac pacl luhn Leum, wacngihn mwe insewowo e fah sruokyucki nuh sin Mwet Luhlahlfongi wolacna Lal,” Prestuhn Nelson el fahk. “Leum El fah nuhnuhnkuh ac ahkinsewowoye kais sie mwet in fal nuh ke kena luhn insiacl ac oacyacpac ke orekma lal.”

Nga olwelah lah ke kuht ukwoe ac akacsruhi ke plwacn in sucu luhn Pahpah tuhmasr Inkuhsrao, El ac fah wi kuht, ahkkweye kuht, ac wi kuht fahsr ke fuhfahsryucsr se lasr uh. El ac fah tiac fihlikuhti in muhkuh, yohk na ke pacl ma upac tuhkuh nuh sesr kuh nuh sin mwet kuht luhngse. El ac fah us kuht, sruhk kuhtyak nuh lucng, ac pwen kuhtlac nuh ke acn in olwelah sesesslah ke engan Yohrohl, wi Wen Nahtuhl, Jisus Kraist, ac wi sucu lasr—ma pahtpaht.