Panangbendision iti Amin a Pamilia iti Daga

Naminsan, nakaawat ni Elder Bruce C. Hafen, maysa nga emeritus a miembro ti Pitupulo, iti tawag iti telepono manipud iti editor ti maysa a nasional a magasin ti damdamag. Kayat ti editor a pagsaritaan ti maipapan iti nabiit pay a libro a nangsukisok iti pakasaritaan dagiti patpatien maipapan iti langit iti ballasiw ti nadumaduma a relihion.

“Natakuatan dagiti autor a marikna ti publiko ti nasaknap a panagbisin para iti langit—ken dagiti pamilia idiay langit,” insurat ni Elder Hafen. Ngem idinto a mamati pay laeng ti kaaduan a tattao iti biag kalpasan ti ipapatay, agnanayon nga ayat, ken nailangitan a panagtitipon manen ti pamilia, “kaaduan a simbaan a Kristiano ti mangidiaya iti bassit a sungbat iti daytoy makin-uneg a panagbisin”—malaksid iti maysa: Ti Simbaan ni Jesucristo dagiti Santo iti Ud-udina nga Aldaw.

Iti naisubli a Simbaan ti Mangisalakan, addaantayo kadagiti sagrado a templo. Addaantayo iti agnanayon a kallaysa, nga addaan iti turay a mangilantip a mangbendision iti labes ti pisikal nga ipapatay. Addaantayo iti kari nga agnanayon a masakbayan a kaduatayo dagiti ay-ayatentayo iti imatang ti Ama ken ti Anak. Gapu amin dagitoy, inggibus dagiti autor a ti konsepto dagiti Santo iti Ud-udina nga Aldaw maipapan iti langit ti kakompletuan—ken, inayonko, ti kararagsakan.

Anian a pannakatakuat!” Napaliiw ni Elder Hafen. “Kaaduan a tattao ita ti agtarigagay kadagiti agnanayon a pamilia, ket ti [naisubli nga ebanghelio ni Jesucristo] ipatungpalna dayta a tartarigagayan a nasaysayaat ngem iti aniaman a sabali pay a pagaammo a ragup dagiti kapanunotan [wenno kredo ti relihion]. Kayatko koma a mangngeg ti intero a lubong dagiti annak[tayo] a mangkankanta iti naragsak a damag: ‘Makapagdedenna dagiti pamilia iti agnanayon.’”

Saan laeng a kombeniente nga urnos ti kagimongan dagiti pamilia. Isuda ti agnanayon a pagtuladan ti langit. Isuda ti “sentro iti plano ti Namarsua para iti agnanayon a gasat dagiti annakna.” Kas insuro kadatayo ni Presidente Russell M. Nelson (1924–2025): “Pinarsua [ti Apo] ti daga [tapno] makagun-odtayo kadagiti pisikal a bagi ken mangbukel kadagiti pamilia. Impatakderna ti Simbaanna a mangitan-ok kadagiti pamilia. Mangipaay kadagiti templo tapno makapagdedenna dagiti pamilia iti agnanayon.”

Ngem ti interestayo kadagiti natibker a pamilia ket saan laeng a maipapan kadagiti agnanayon a pagtungpalan. Napateg pay ti akem ti pamilia iti mortal a pagragsakantayo. Ti Nailangitan nga Amatayo, nga ammona a naan-anay no ania ti mangyeg iti ragsak ita ken iti agnanayon, ibaonna dagiti annakna kadagiti pamilia—mabalin a saanda man a perpekto—ket awisennatayo a mangbangon ken mangtaraken kadagiti natibker a pamilia. Siempre, ti “pannakabaldado, pannakatay, wenno dadduma pay a kasasaad ket mabalin nga agkasapulan iti indibidual a pannakaibagay.” Ngem awan ti makasukat kadagiti napateg, nadiosan a naituding a pagrebbengan ti asawa a lalaki, ama ken ina.

Agtultuloy nga ipakita ti panagsukisok maipapan kadagiti “biolohikal, begkes, dua ti nagannak a pamilia” a nasken unay ti pamilia iti panangtaginayon kadagiti “nauneg a begkes ti ayat ken pammateg.” Daytoy ti “kangrunaan nga incubator para kadagiti natalinaay, nasayaat ti pannakaibagayda, ken sipapanunot iti kagimongan nga indibidual.”

Siempre, ditayo koma masdaaw a ti maysa a banag a napateg unay iti plano ti Dios ket maipasango iti oposision. Saan a pulos a mannakigayyem ni Satanas iti pamilia, ket ad-adda laeng a naganat dagiti panagreggetna “agsipud ta ammona nga ababa laeng ti panawenna” (Apocalipsis 12:12). Ni Presidente M. Russell Ballard (1928–2023),ti agdama a Presidente ti Korum dagiti Sangapulo-ket-dua nga Apostol, kinunana, “Ammo ni Satanas a ti sigurado ken kasamayan a wagas a mangsinga iti trabaho ti Apo ket ti panangkissay iti kinasamay ti pamilia ken ti kinasanto ti pagtaengan.”

Gapu ta ammotayo maipapan iti agnanayon a pamilia ti Dios, ti planona para kadagiti annakna, ken ti agnanayon a kaipapanan dagiti relasion ti pamilia, nasken a maibilangtayo kadagiti napasnek a mangsalsaluad iti pamilia iti lubong.

Kasano nga aramidentayo daytoy?

Indiaya ni Presidente Dallin H. Oaks daytoy a balakad: “Ti waragawag ti kaamaan … ket ti panangipaganetget manen ti Apo kadagiti kinapudno ti ebanghelio a kasapulantayo a mangsuporta kadatayo babaen kadagiti agdama a karit iti pamilia.”

Iti personal a biagtayo, maaramidtayo dagiti “babassit ken gagangay a banag” (Alma 37:6) a mangpapigsa kadagiti relasion ti pamilia. Iraman daytoy ti panangsurot kadagiti prinsipio dagiti naballigian a pamilia ken panagasawa a naibalabala iti waragawag ti kaamaan: “pammati, kararag, panagbabawi, pammakawan, panagraem, ayat, pannakipagrikna, trabaho, ken dagiti aktibidad ti makapasalun-at a paglinglingayan.” Aniaman ti agdama a kasasaad ti pamiliatayo, maipakitatayo babaen kadagiti aramidtayo nga agnanayon a napateg kadatayo dagiti relasion ti pamilia.

Kas “mapagtalkan nga umili” iti komunidadtayo, “maitandudotayo dagiti pagrukodan a naisangrat a mangpatalinaed ken mangpapigsa iti kaamaan.”

Datayo dagiti natulagan a tattao ti Apo iti ud-udina nga aldaw. Agtawidtayo kadagiti kari a naited kada Abraham, Isaac, ken Jacob—kari nga adda pakainaiganna amin kadagiti pamilia. Umay dagita a kari nga addaan iti sagrado nga awag a mangbendision iti “amin a pamilia ditoy daga.” Ket ti maysa a napateg a wagas nga aramidentayo dayta ket babaen ti panagbiag, panangidepensa, ken panangibinglay iti agnanayon a kinapudno a “ti pamilia ket inordenan ti Dios” ken “dagiti ordinansa ken katulagan a magun-od kadagiti nasantuan a templo ti mamagbalin a posible para kadagiti indibidual nga agsubli iti sanguanan ti Dios ken tapno agkaykaysa dagiti pamilia iti agnanayon.”

No buybuyaenmi ken ni Sister Uchtdorf dagiti miembro ti pamiliami nga agaramid kadagiti sagrado a katulagan iti naayat, agnanayon a Nailangitan nga Amatayo, mapno dagiti pusomi iti rag-o ken panagyaman. Saan laeng a kadagiti annaktayo ken dagiti annakda ti maragsakan no di pay ketdi kadagiti nagannaktayo ken dagiti nagannakda. Utobentayo nga addaan iti nauneg nga ayat no kasano a pagkaykaysaennatayo dagiti katulagan ti ebanghelio iti ballasiw dagiti kaputotan. Dayta ti maysa a padas a saan a naiduma iti pannakakita iti “agdan a naipasdek iti daga, … ti tuktokna [a dumanon] idiay langit: ket kitaenyo dagiti anghel ti Dios nga umul-uli ken bumabbaba iti dayta” (Genesis 28:12).

Dagiti bendision nga inkari ti Apo ken ni Jacob iti tagtagainepna ket dumanon kadagiti amin nga annakna iti katulagan—agraman kadakayo ken siak. Kas iti inaramid ti Apo para ken Jacob, sungbatannatayo “iti aldaw ti rigat[tayo]” (Genesis 35:3) no pilientayo Isuna.

“Adtoy,” kinuna ti Apo, “Addaak kenka, ket salimetmetanka iti amin a lugar a papanam, … ta saankanto a baybay-an” (Genesis 28:15).

Kas ken Jacob, addaantayo amin iti let-ang a ballasiwentayo. No dadduma, kasla adayo dagiti naikari a bendision. No dumteng dagiti nadagsen a parikut wenno karit, mabalin a pagduaduaantayo ti ayat ti Apo. Mabalin a mariknatayo pay ketdi a binaybay-annatayo ti Dios. Iti laksid ti amin a panagreggettayo nga agbalin a disipulo, mabalin a mariknatayo a saantayo nga umaw-awat kadagiti bendision a ninamnamatayo.

Kakabsat, patpatgek a gagayyem, ti dana ti katulagan ket maysa a naragsak a dana, nupay no dadduma mabalin a mamulitan iti lua. No mariknam a saan a maipatungpal dagiti paset ti plano ti ragsak iti biagmo ita, agtalekka a sipapanunot kenka ti Apo ken bendisionannaka iti naikeddeng a panawenna, segun iti siribna.

Ti pammati ken ni Jesucristo ken kadagiti karina ti mangparegta kadatayo a mangkita iti masakbayan, saan nga agsanud. Gapu Kenkuana, saan a kasapulan a kautibo ti masakbayantayo iti aniaman a napasamak iti napalabas wenno manglapped iti panagkitatayo ita. Wen, masugatantayo amin, wenno masugatantayto, iti maysa a wagas wenno sabali. Ngem mamatitayo iti Naindaklan a Mangngagas. Agtalektayo Kenkuana—kasta unay, kinapudnona, nga arakupentayo dagiti karina, a naan-anay a “naguyugoy kadakuada,” uray no “adayo” pay laeng dagitoy” (Hebreo 11:13).

“Mapalagipantayo amin nga, iti bukod a wagas ken oras ti Apo, awanto ti maibabawi a bendision kadagiti napudno a Santona,” kinuna ni Presidente Nelson. “Ukomen ken gunggonaanto ti Apo ti tunggal tao a mayannurot iti naimpusuan a tarigagay ken kasta met iti aramid.”

Ikarik a bayat ti panangsurot ken panangibinglaytayo iti plano ti Nailangitan nga Amatayo para kadagiti pamilia, mangkaduanto kadatayo, mangsuportanto kadatayo, ken makikaduanto kadatayo iti panagdaliasattayo. Saannatayo a pulos baybay-an nga agmaymaysa, nangruna no dumteng dagiti pannubok kadatayo wenno kadagiti ay-ayatentayo. Ibaklaynatayo, itag-aynatayo, ken yegnatayo iti naikari a daga ti naan-anay a rag-o a kadua Isuna, kadua ti Anakna, ni Jesucristo, ken kadagiti pamiliatayo—iti agnanayon.