Efeiochu Meinisin ekkewe Faminien ewe Fonufan

Elter Bruce C. Hafen, emon akkom chon ewe Fik, fan eu a angei eu kokko won fon seni ewe chon apungu magazine ren porousen muu. Ewe chon apungu magazine a mochen porous usun eu minafon puk minne a kapas usun ewe uruon nuku usun nang me nein chommong sokopaten namanam.

“Ekkewe chon makkei ewe puk ra kuna pwe aramas ra mefi eu chewnon mochenin nang—me famini non nang,” Elter Hafen a makkei. Nge nupwen napengeni aramas ir mi chiwen nuku non manau mwirin mano, tong esemuch, me ekkewe ochufengenin famini non nang “napengeni an chon nuku Kraist fan ra awora ekis chok ponuwen ei mochen:—ren chok tiwenon: Ewe Mwichefenin Jises Kraist ren Aramas mi Pin non Fansoun Soponon.

Non an ewe Chon Amanau Mwichefen mi niwinsefan, mi wor ach tempel mi pin. Mi wor ach apupunu esemuch, ren mumutan riri fengen mi efeiochu nap seni manon inis. Mi wor rech ewe pwonen eu fansoun mwach esemuch ren atongeach kewe me mwen ewe Sam me ewe Nau. Ren ekkei meinisin, ekkewe chon makkei ewe puk ra asopwano pwe ewe an Aramas mi Pin non Fansoun Soponon nuku usun nang ina ewe mi kon unusoch—me, upwe apachata, ewe mi kon apwapwa.

”Met ren ei Mettoch mi Pwa!“ Elter Hafen a nenengeni. “Napengeni aramas ikenai ra aneanei famini esemuch, me ewe [kapas allimen Jises Kraist mi niwinsefan] a apwonueta ochu ena anean nap seni ekkoch ekiek mi fateno [ika nuku an namanam]. Ua aneanei ewe unusen fonufan epwe tongeni ausening [nouch] kewe semirit ar konu ewe porousoch: ‘Families can be together forever.’”

Famini esap chok ir eu mettoch mi fichi ngeni ototten mwicheich. Ir ewe tettenin nang esemuch. Ir ekkewe “ionapen an ewe Chon Fori kokkot fan iten fetanin manauen Noun kewe semirit.” Usun Preseten Russell M. Nelson (1924–2025) a aiti kich: “[Ewe Samon] a forata ewe fonufan [pwe] sipwe tongeni angei aionen inis me forata famini. I a forata An Mwichefen pwe epwe etekiata manauen famini. A awora tempel pwe famini repwe tongeni nom fengen feinfeino.”

Nge ach pwapwaiti non pochokunen famini esap chok ren usun fetanin manau esemuch. Ewe famini mi wor wisan mi auchea me non pwan ach pwapwa won fonufan. Samach non Nang, ewe mi unusen sinei met a wato pwapwa iei me fansoun esemuch, a tinato Noun kewe semirit ngeni famini—menin resap unusoch—me a tingorei kich sipwe forata me tumunata famini mi pochokun. Ennetin, “terin inis, mano, are pwan ekkoch mettoch mi tongeni ekkesiwini ekkei wis.” Nge ese wor och mettoch a tongeni siwini ekkewe, auchean, wis mi kefinita seni nang an mwan me fefin pupunu, sam me in.

Ewe kaeo usun “famini mi wor ochufengenin nefinen ruemon ren sam me in” mi soposopono ne pwarano pwe ewe famini mi fokkun auchea non tumunun “anonnonen nefinen tong me chen.” Iei “ewe akkaewin anen amari aramas repwe nukuchar, tufichin siwin, me fatafatoch.

Ewer, esap amairu kich pwe och mettoch mi kon auchea ngeni an Kot kokkot epwe kuna apponu. Setan a soun atatai famini fansoun meinisin, me an achocho a chok watteno weiweitan “pokiten i mi sinei pwe an fansoun a chok mwochomwoch” (Pwarata 12:12). Usun Preseten M. Russell Ballard (1928–2023), Nikinikitiw Presetenin ewe Mwichen Ekkewe Engon me Ruemon Aposel, a apasa, “Setan mi sinei pwe ewe ennetin me wesen fetanochun anen an epwe atano an ewe Samon angang ina an epwe ekisano fetanochun ewe famini me ewe pinin ewe imw.”

Ach sinei met kich mi sinei usun an Kot famini esemuch, An kokkot fan iten Noun kewe semirit, me ewe auchea esemuch ren nefinen famini, sipwe nom nein noun fonufan kewe mi wesen achocho chon eppeti ewe famini.

Ifa usun sipwe fori ei?

Preseten Dallin H. Oaks a awora ei aurour: “Ewe esinesinen famini … ina an ewe Samon apochokunen ekkewe ennetin kapas allim a namot ngeni kich an epwe apochokuna kich seni ekkewe weires iei ngeni ewe famini.”

Non pwisin manauach, sia tongeni fori ekkewe “mettoch mi kukkun me mecheres” (Alma 37:6) minne ra apochokuna nefinen famini. Ei mi pachenong ach tapweno mwirin ekkewe nongonongen fisiochutan famini me pupunu mi makketiw non ewe esinesinen famini: “nuku, iotek, aier, omusomus, sufon, tong, kirekiroch, angang, me mokutukutun angangen apochokunen inis.” Ese nifinifin me nonnomun ach famini iei, sia tongeni pwarano ren ach foffor pwe nefinen famini ir mi auchea esemuch ngeni kich.

Usun “aramasen muu” non ach kewe neni, sia tongeni “apochokuna ekkena mokutukut ra foruta ar repwe anapano me apochokuna ewe famini.”

Kich noun ewe Samon aramas mi pin non fansoun soponon. Kich chon angei ekkewe pwon ra for ngeni Abraham, Isaac, me Jacob—pwon mi wewe ngeni famini. Ekkena pwon ra pachengeni ekkewe kokko mi pin ne efeiochu “meinisin ekkewe faminien ewe fonufan.” Me eu auchean anen sipwe fori ena epwe seni ach manaueni, eppeti, me aporousa ewe ennet esemuch pwe “ewe famini mi kefinita me ren Kot” me “angangepin me pwon mi pin mi kawor non tempel mi pin ra otufichi emon me emon an epwe niwin ngeni fan mesen Kot me ren famini ar repwe chufengen feinfeino.”

Nupwen Sister Uchtdorf me ngang aua katon chochon am famini ra fori pwon mi pin ren Samach won Nang mi uren tong esemuch, netipem a ureno ren pwapwa me kinisou. Aua pwapwa esap chon non noum kewe semirit me nour kewe semirit nge pwan non semem me inem kewe me semer me iner kewe. Aua ekipwichi ren watten tong ifa usun pwonen kapas allim ra ochufengeni kem ren tappin kinikinin aramas. Ina eu mettoch esap usun ach kuna “efoch nato mi feita seni fonufan, … asan we a [tikeri] nang: me nengeni ekkewe chon nangin Kot ra feita me feitiw me won” (Genesis 28:12).

Ekkewe feioch ewe Samon a pwonei ngeni Jacob non an we tan ra pwan tikeri meinisin Noun semirit pwon—mi pachenong en me ngang. Usun ewe Samon a fori fan iten Jacob, I epwe ponuweni kich “non fansoun [ach] riaffou” (Genesis 35:3) ika sipwe fini I.

“Nengeni,” ewe Samon a apasa, “Ngang mi nonnom reom, me upwe tumunuk ekis meinisin ka feinno ie, … pun usap nikitukeno”(Genesis 28:15).

Usun Jacob, kich meinisin mi wor ach fonu pon sipwe feinno epekin. Fan ekkoch ekkewe pwonen feioch usun ir mi towaweno. Nupwen ennetin osukosuk ika weires ra fis, meni sipwe tipemwaramwerei an ewe Samon tong. Meni sipwe fen mefi pwe Kot a fen monnukicheno. Me nukun ach unusen achocho ren wisach chon kuno, meni sipwe mefi pwe sise angei ekkewe feioch sia aneanei.

Pwi me fefinei, achengicheng chiechiei, ewe anen pwon mi pin ina eu aan mi apwapwa, inamo ika fan ekkoch epwe enetipengaw. Ika en mi mefi pwe ekkoch kinikinin ewe kokkoten pwapwa rese pwonueta non manauom iei, kose mochen epinukunuk pwe ewe Samon mi ureni an ekiekuk me epwe efeiochuk non An fansoun, anongonong won An mirit.

Nuku non Jises Kraist me An kewe pwon ra pesei kich ach sipwe neneno mwach, esap nenesekur. Pokiten I, ach fansoun mwach ese namot epwe mwoch ren och mettoch a fen fis me nom ika mi eppeti ach nenengen iei. Ewer, kich meinisin mi, are sipwe, feiengaw non eu napanap ika pwan och. Nge sia nuku non ewe chon Echikara mi Napanap. Sia epinukunuku I—fokkun watte, ewer, ina minne sia etiwa An kewe pwon, unusen “echimw me rer,” ina mwo ika ir mi chiwen “towaweno” (Hebrew 11:13).

“Kich meinisin sipwe chechemeni pwe, non an ewe Samon aan me fansoun, ese wor feioch epwe kouk seni Noun kewe Souneng mi nikitu,” anon Preseten Nelson. “Ewe Samon epwe opungu me niffang ngeni emon me emon aramas anongonong ngeni anononun ar mochen ussun chok pwan ar angang.”

Ua pwonei pwe nupwen sia tapweno mwirin me aporousa an Samach won Nang kokkot fan iten famini, I epwe nonnom rech, apochokuna kich, me fiti kich non ach sai. I esap toengeni nikitakicheno, akkaewin nupwen sossot a tori kich ika ngeni atongeach kewe. I epwe mwarei kich, chunakicheta, me uwei kich ngeni ewe fonuen pwon ren eu mi uren pwapwa ren I, fiti Noun we, Jises Kraist, me ren ach kewe famini—feinfeino.