Fare Falfalan’ kanawo’en ea M’ag

Ke yib ku Elder Patrick Kearon

Ko fare Ulung ko fare Ragag nge L’agruwi Apostle

Tin nib fel’ mab mangil u gothon ea tabinaew nikan m’ag ngata’bang u poqowchen fare Chitamngiy nge fare Fak ebe yibnag ea falfalan’ ko ya’al roeg mabe suguyyeg ko fare kan ko maqoeg ea magar.

Elder Patrick Kearon nge Jennifer ni, bpin roek

Napon ni chuw Israel nge Elizabeth Haven Barlow u Nauvoo, Illinois, ning ranow kofare Valley u Salt Lake ko 1848, miyow pag ngatomur batir nib pagal nifak row nikan ki’eyag u langgin fachi taliw niba achig u Nauvoo. Little James Nathaniel Barlow, ea bin somm’on fakrow, ea yim’ u tomuren nni gargeleg ko May 1841.

Rogon ea bitbit ko yaen nga Salt Lake Valley, Israel nge Elizabeth ea sana ralem nigew nidab kurgiyew fare malang ko fare pagal nifak row biyay. Machene napon nni pining Israel ko mission roek nga England, me yaen nga Nauvoo meyaen ko ngek. I yoeg Elizabeth ngak, ngetal nge guy fare malang kofare pagal nifak row nge fek nge yaen ni tay kofare taliw nib ga’, nibay ko ngek.

Yaen rib ea rran nga Tomuren madawri pateg, me yaen Israel nge yaen i ning ea ayuw ngak be’ nima murwel kore taliw nem. Me yaen ni reb ea rran, miyow pir’eg fare malang, nibay u ta’ben Mary ni cousin ku James. Karitagan, ya fapi kahol ea kari mungunguy ke puth ngabut. U langgin bangi babiyor ni yoeloey Israel ko bpin roek, ea ga’ar, “Guchel nga urel nikug dugliy ninggu pagrad u roem nge mada’ ngabingyal’ ngam’on.”

Ma dawri palog nga urel kofare malang me rung’ag laman be’. Lemnag ea n’en nike buch, me ga’ar, “gathi laman be’ nib ga’, machene riyib i pare ngan’ug ni dabiyog nidabgu motoyil ngay: ‘Papa’, dab mu pageg u roey.’” Mesul Israel ko fare malang, ngefek fachi pagal nifak. “Gu thamiy ba gapas u lanin’ug nidawor guthamiy biyay. … Chuquw ney ea baygoeg: ni dariy ban’en nikug muruwliy u lane yafos rog ni rib tomilang u wun’ug.”

Ko September 2, 1853, mefek Israel Barlow nge facha’ nima murwel kore taliw nem ea dogur ku James nge Mary nga Nauvoo ko fare taliw nib ga’.”

i yoeg Israel ku Elizabeth ni napon ni kabay u ta’ben fare malang ni ga’ar, “Gu thamiy nugba adag ninggu yibleyeg nge gubin ban’en nibay goeg ni fanag ngalan pa’ Samoel, ni sana nge yog ningan pageg ngug un ku [James] nggub ni kakadbul kobin Somm’on ea fos ko yam.’”

Fane rib yul’yul’ Israel ko fare gospel rok Yesus Kristus, nge fapi m’ag nibe tayfan, ea yog ninge ngongliy Kristus ea yafos nib manemus—ni tha’abi ga’ u gubin fapi tawa’ath—ngeyog ngak, nge girdii’ roek nikafram nge pifak.

Ka ta’reb rogon ngodad.

Sasing nike yib roek Jerry Garns, rayog ni ngan fek yaq\’an nikemus nu Galasia ea ngan fanay riy

Michmich nib Thothup

Chitmangdad nu Tharmiy nge Yesus Kristus, Ni Fak, ea yow ba adag daed ni dabiyog i lemnag. Dariy bang ni kari m’ug ea adag rorow riy ngu daken fapi tawa’ath nike micheg nibay fapi tha’ riy nikan pi’ ngodad u napon wea tawfe u lane na’un ku Samoel.

“Reb nib ga’fan ko taliw nikan dag ea fare m’ag nib thothup,” President Russell M. Nelson (1924–2025) ea machib nag. “Ko thin nib riyul’, m’ag ea bathin u thilin l’agrow fa boech ea girdii’. Machene u lane taliw, m’ag ea rib ga’fan. Ba michmich ngak Got nib thothup.”

Gubin ea michmich nigdad be ngongliy magdad folriy ere tawa’ath nag dad. Chitmangdad nu Tharmiy nge fare Tathpeg rodad ni Yesus Kristus ea yow ba adag ningar chugur nigew dad Ngorow. Yow ba adag ningar ayweggew dad mngad mon’og gad u fithik ea mich nge manangfan. Yow ba adag ningar pi’ew ngodad gelngindad. Yow ba adag ningad pateged ea yafos nge gapas u lane fayleng nipi tawa’ath ea ba mo’maw’ i pateg. Yow ba adag ningad nanged ea falfalan’ u langgin ere yafos ney nge langgin fabnem ea yafos nibay yib. Nibe yib kore adag ney nirib mangil, Kar pi’ew ngodad rogon ningad ngongliyed ba m’ag Ngorow. Gadad batawa’ath nigadad be be’ech nag epi m’agnem ko gubin ea week u napon ea mu’ulung ko sakrament.

Gadad befek ea sakrament ni gadad be qoeg ea magar nibchan ea gadad be falfalan’ ni gadad befek ngadaken dad fidngan Yesus Kristus, min lemnag Ir nge adag Rok ngodad nibe m’ug kofare tawa’ath ko fare Bayul Roek—Ni gafgow, me yib ea rracha’ u doewngin, me yim’ nifan ngodad. Fare sakrament ea kube tawa’ath nagdad ko gubin ea wiik ningad daged nigadad ba adag ningad folgad kopi motochiyal Rok, magdad be’ech nag fapi m’ag rodad, magdad ngongliy boech ea m’ag nib be’ech (muguy ko Doctrine and Covenants 20:77, 79).

Bo’or yaey, nugbe rung’ag nigdad befek ea sakrament yangad be’ech niged fapi m’ag nikad ngongliyed u napon ea tawfe. Aram rogon nib riyul’, machene ku bo’or boech rogon ko binem,” niyoeg President Nelson. Kug fal’eg reb ea m’ag nib be’ech. Kam fal’eg reb ea m’ag nib be’ech … Chiney ni ngan fulweg rogon ni [Samoel] ea yoeg nirayog nibayi paer ea Kan Thothup Roek rodad ni gubin ngiyal’. Ba tawa’ath nirib fel’!”

Napon nigadad re kalangan’ magadad kay fare sakrament nib be’ech gum’irchaqdad, magadad thapeg fare Kan Thothup makad “be’ech gad ko denen niwoed rogon nikan tawfe biyay. Ireray fare athap nge murunguy ni pi’ Yesus ngodaed.”

Ba falfalan’ nib ga’ ningan kalngan’ nge m’ayfan ea denen u daken fare murguy ku Kristus!

Sasing ni ya’an ea Nauvoo Illinois Temple ni keyib roek Jennifer Rose Maddy

Na’un roek ni tafen ea Falfalan’

Tomuren nimang reb ea tiyoga’ ko Fare Galasia Ku Yesus Kristus ni Fan ko Gidii’en Got ko Tin Tomur e Rran, President Nelson ea weliy ni boqoryay marnge’gen fare kanawo’en ea m’ag, ni tabob kobin somm’on ea mulwol rok ni ir ea tiyogang’ ko Galasia. Kadaroed kore kanawo’ nem u daken “ea kalngan’ nge tawfe ko rran“ (2 Nephi 31:17), ni yoeg, ma “aram magdad tay nib piloeq nga langgin ea temple.”

Ni woed niyma fek fare sakrament ninge pugquran ngodad fapi m’ag rodad nge tawa’ath nibe yib riy, ea kuta’reb rogon ko murwel niybetay u langgin ea temple. U napon ni gadad be muruwliy fapi gam’ing nifen ea piqen ni karm’ad, magdad lemnag fapi michmich nib thothup nikad michegged nge fapi tawa’ath nikan micheg nirayib ngodad.

u Daken kanawo’en fare m’ag, ea kad fanayed boech fapi tawa’ath nnimcheg ku Abraham, Isaac, Jacob, nge pifakrad. Kopi tawa’ath nem nikan micheg, Abraham, Isaac, nge Jacob ea dani moem rogon ea yafos rorad, ma ku’er rogdad. Niwoeg rad, gadad be madqeg ea gafgow, miybe puwan’ ngodad, magdad be waer u napon niybe “guydad u gubin ban’en (Doctrine and Covenants 136:31; mukum guy ko 101:4–5). Machene niwoed fapi profet nge pi Girdii’en Got ni kakrom, gadad manang ko mini’ ere pagan’ dad ngak (muguy ko 2 Nephi 4:19).

yafos Rodad nide manechebog ea den’uw napon rodad, machene re ngiyal’ nem—ni boech ea ngiyal’ ea rib mo’maw’—ea baga’fan kotin nib manemus. Arrogon, Chitmangdad nu Tharmiy ea ba adag ningad filed magdad mon’og. Ma, ku er ragon, re mon’ognem ea bingyal’ ea bay ea kirban’ nge gafgow riy. Machene Ba adag ea yafos rodad ninge fel’ ya’an min athpeg. Aram rogon, mange moemnag kanawo’en dad i sul Ngak, ere kepi’ ba Tathpeg, niqir “fare tabayul“ kofapi m’ag rodad ngak ea Chitamngin. Daken fare bayul ku Yesus Kristus, fare Chitamngiy eke rin’ fapi michmich ni pi’ ku pifak u langgin ea temple.

Ere adag nge miligaech Rok, fare Tathpeg rodad eke muruwliy ke golnag gubin ban’en nibay damadaq niged u lane yafos. Ma bachan fare na’un Roek nib thothup—na’un Roek ni tafen ea falfalan’—gubin ma bayi fel’ rogon ni dariy fan epi gafgow. Fare gapgep ko matayfan ea m’ag ea be wolgiy nga urel ea kirban’, amith, nge tagtagan’uy. Bat’uf ni dabid lem niged nib gel fad tamdag gad. Fa, rayog ningad falfalan’ gad ya’an pi’ pulwon fare wo’en ea bayul rodad (muguy ko 1 Korinth 6:20) nge fare kanawo’en ea m’ag ko yafos nib manemus ea kanpi’ pulwon.

Fare kanawo’en ea m’ag ea rib riyul’ ni kanawo’en ea adag nib fos. Napon nigdad ra tayfan fapi m’ag nikad ngongliyed u temple, magadad fek boech ea tawa’ath nibay gelngin nib gel, adag nib gel, murnguy nib gel, nangfan nib gel, nge athpeg nib gel. Fapi m’ag niyma tay u temple—ko choenggin ea tabinaew ningan m’agrad ngata’bang u fithik ea adag nib manemus—ea be yibnag ea falfalan’ ko ya’al roeg mabe suguyyeg ko fare kan ko maqoeg ea magar.

“Ere napon nira buch bugi ban’en ulan e yafos rom, gin th’abi fel’ ni ngam paer riy nib thothup ea ngam paer u langgin fapi m’ag ko temple rom!” keyoeg President Nelson. Kugnang fane riyul’ ea pi thinnem u rogon ea tin nikug rin’ kore yafos ney.

James Nathaniel Barlow, fare bitir ni somm’on nifak Israel nge Elizabeth Barlow, ni yim’ u tomuren ni gargeleg ko May 1841. In ea duw ngatomuren, min tawfe nag ni proxy ko labthir roek u langgin ea Logan Utah Temple.

Niyoeloey Allen Garns

Kunuy Rad nga Tabinaew

Tomuren nike fingichiy Israel Barlow fachi pagal nifak, me yoel ko bpin roek ni ga’ar, “u wun’ug ninggu palog nigeg nga urel, ni sana dabki yog ninggub biyay kore malang ku James ney, ea kari uduy fabin tomur yael’ fare teret ko adag rog ke math’ nib maqun ea luk ngay nge map’ nga daken ea malang rok.”

Gube finey ya’an nipi luknem ni bo’or—ea ngiyal’ ea luk ko falfalan’—ni map’ ko December 4, 1889. Rofennem, fachi James Nathaniel Barlow en m’ag ko labthir roek u langgin ea Logan Utah Temple. Ngiyal’ nem, ea ke yim’ Israel, ere boech ea girdii’ er muruwliyed ea pi gam’ing nem nifan ku Isreal nge James.

Sister Kearon nge Gag eke kirban’ mow maki falfalan’mow ku Israel nge Elizabeth. Bin somm’on ea bitir Romow, eb pagal ni Sean fidngan, ea yim’ u napon ea surgery ko gum’irchaqen u napon ni dalip ea duw roek. Ren’ey nibuch ea rikirban’ mow ngay. Kore ngiyal’ nem, ea dagningew rogon ningug pirew. Mug keyaggew ngabuchi loew niba’chig u England. Ragag nge Lal ea duw ngatomuren, minoeg ko tabinaew romow ningug chuwgad ko tabinaew romad u United Kingdom ningug pigpig gad u langgin ea Galasia, ma aram mug chuwgad mug paged fachi malang ngatomur.

Deyim’ ea bitir Romow u napon ea milekag i yaen ko ngal, ma dan gu nangew ea gafgow niwoed nitay Barlows, machene kug nangew boech rogon ea n’en ni buch rorow. Malang ko fachi pagal nifak mow ea rib palog nga urel, machene niwoed Barlows, rib mich u wun’mow fare Fos ko yam’ ku Yesus Kristus nge rogon ea Chitmangmow nib manemus u daken fare m’ag nib thothup.

Gadad gubin mabay ea girdii’ rodad ni kakrom nikar m’ad niyad yoeg ngodad, ”Dam mu pageg u roey.” Nibchan fapi m’ag ko temple, dariy be’ nigan pag ngatomur. Murwel Rodad ea ngad adagged yaed, pigpig ngorad, min pi’ ea ayuw i kunuy rad nga tabinaew.

Chitmangdad nu Tharmiy ea ba adagdad, gur nge gag. Ke pi’ ea temple ngodad ye nge yog ni “Demutrug komang ea [gadad] re m’ag u fayleng mabay ni m’ag u tharmiy” (Doctrine and Covenants 128:8; mukum guy ko Matthew 18:18). Ke pi’ Fak ninge th’ab m’agen ea yam’, me ngongliy kanawo’en fare thaq nib manemus nge mukun ko tabinaew nib manemus.

Aramfan nibay fapi thaq. Aramfan nigdad ma ngongliy fapi m’ag. Aramfan nigdad be toey fapi temple. Aramfan nikarid tayed gadad ko murwel ku Got nge fel’ngin (muguy ko Moses 1:39). Ma aramfan nibe map’ luqen ea falafalan’ rodad, ya gadad manang nibay bamukun nib manemus nibesoen nagdad nge girdii’ rodad nikarm’ad u poqowchen ea Chitamngiy nge Fak.

Fa’an gadad rafol kofapi m’ag rodad magdad un ngak Samoel kofare murwel Roek nifan ea ayuw magadad ra pateg ea falfalan’ nge gapas.

© 2026 ko Intellectual Reserve, Inc. Gubin nibay mat’won. Kan Yoeloey u USA. Mat’won ko thin nu Ngalis: 6/19. Mat’won ningan pilyeg: 6/19. Pilyeg e thin ni gubi ea Pul ko Mulwol ko Liahona, February 2026. Yapese. 19933 905