Ahl Kaperen en Inou Sarawio

Sang Elder Patrick Kearon

Sang Pwihn en Wahnpoaron Ehk Riemeno

Mwekid oh patpenehn tohn peneinei kan mwohn sihlang en Sahm oh Nah kin wahdo popohl laud oh kopwuriamwei ohn palingeni oh kin audehkiniehda ngehn en kaping.

Ansou me Isrehl oh Elizabeth Haven Barlow kohkohsang Nauvoo, Illinois, kohkolahng Nan Wahu en Salt Lake nan 1848, ira kohkohsang neira kisin pwutak men me seridi nan wasahn sousou nan Nauvoo. Neira kisin pwutak James Nathaniel Barlow, me wia mesenih, mehla ansou mwotomwot mwurinte ah ipwidi nan 1841.

Sang ni ara seiloaklahngehr Nan Wahu en Salt Lake, ira sohte kasik me ira pahn pwurehng kioang sousoun neira kisin pwutako. Ahpw ansou me Israel alehdi ah pwukoahn wia misin nan England pahr ekei mwuri, e seiloakla sipele Nauvoo. Elizabeth pekihda reh, en uhdi oh rapahkihda sousoun neira serio oh kasaulahng dahme luhehdihn paliwere nan wasahn sousou laud me mih, palimesehn kahnihmwo.

Rahnehr ehu e raprapahki ahpw saik diar, Isrehl ahpw peki sawas rehn tohn doadoahk en wasahu. Mandahsang Rahno, irail diar sousouo, me mih limwahn ksin serepein men me James pahn rianiki iei Mary. Kansensuwed, pwe kohpwa ko ohla mwerpeseng. Israel intinglahng ah pwoud, kosoia, “eri i pwilikihdi oh koasoanehdier mei pahn kihdihte wasahu lau lel ehu ansou me kohkohdo.”

E saikte alu dohsang sousouo ah rongada ngihl ehu. E katamanla ansouo, ih ntingiedi, “Sohte ngile, ahpw sansalmwahuohng ahi madamadau me kahrehda ahi sohte kak soikala: ‘Pahpa, kedeh kihehdi wasah.’” Isrehl eri pwurala ni sousouo, oh koasoanehdi meh pahn wahsang nah kisin pwutako. “I kehnda ehusoangen pepehm en nsenamwahu oh meleilei nan ahi madamadau me i sohte kehn ni tapio. I pahn nda met: me saik kepwukoah ieu me i madamadau laudki me due met nan ei mour.”

Nan Septempe 2, 1853, Isrehl Barlow oh tohn doadoahko kamwakidla paliweren James ih Mary nan wasahn seridi laud en Nauvoo, kilelehkihdi wasahu “takai kei no moangera oh ni nehra kan.”

Isrehl ndahng Elizabeth me e mihmi werei ni wasahn seridio, “I ahneki pepehm en mweidehng pein ngehi oh ahi kehl unsek ohng nan limen Kauno, pweien kak wia emen me warohng pwehn iangih James rahn en Keieun Iasadahu.”

En Isrehl ah loaloapwoat ohng rongamwahu en Sises Krais, iangahki wauneki inou sarawi kan, kahrehiong Krais Ah wiahda mour soutuk—kisakis keieu laud—en mengei ohng ih, kadaudokeh kan, oh ah peneinei kan en mahsoko.

Met me mehlel duwehte ong kitail.

Kilel sang Jerry Garns, kak ale doadoahngki ohngete Mwomwohdisoht

Inou Sarawi kan

Samatail Nanleng oh Nah Ieroso, Sises Krais, poakohng kitail koaros laudsang soahng koaros me kitail kak medewehda. Sohte ehu wasa me, Sapwelmara limpoak kin sansal mwahu likin kapai inoudier kan me wia kisehn inou sarawi kan me kitail kin alehda ansou en pepdais oh nan tehnpas en Kauno.

Presiden Russell M. Nelson (1924–2025) padahngki, “Ehu kasalepe kesempwal en mwomwohdiso kopwurpwurdohu iei inou sarawi kesempwal kan.” “Ni koasoain aramas, inou sarawi kin pidada pwungpenehn nan pwungen aramas riemen de pwihn kei. Ahpw nan palien sarawi, wehwehn inou sarawi inenen kesempwalsang. E wia inou sarawi ohng Koht.”

Inou sarawi koaros me kitail kin wiahda oh kolokol kin kapai kitailda. Sahm Nanleng oh atail Soundoar Sises Krais kupwurki kitail en karanih Ira. Ira men sewese kitail en esehla oh kekeirda nan pwoson oh marain. Ira men kasarawihong kitail manaman en nanleng Ira mwahuki kitail en diar nsenamwahu oh meleilei nan sampah ieu me soangen kapai pwukat apwal en diar. Ira mwahuki kitail en kehn peren nan mour wet oh pil mwurin mour wet. Kisehn limpoak unsek wet, Ira kihong kitail ansou mwahu en pidelong nan inou sarawi ehu nan pwungehn kitail oh Ira. Kitail ahneki kapai en pwurehng kakapwa inou sarawi pwukat nan sarawihn kamadipw sarawi kan nan ehu ehu wihk.

Kitail kin tungoale kamadipw sarawi ni popohl pwehki kitail kolokol kapai kaperen en alehda mwaren Sises Krais, katkataman Ih oh Sapwelime limpoak ohng kitail me sansallehr sang ni kisakis en Tomwo—me E lokolokihier, inta kerasang, oh mehkilahr pwehki kitail. Kamadipw sarawi kapaikin kitailda ansou mwahu en kasalehda atail inengiong kapwaiada Sapwelime kosonned akan, kakapwa atail inou sarawi kan, oh wiahda ekei inou sarawi kapw (kilang Doctrine and Covenants 20:77, 79).

“Pak tohto, I kin rong me kitail kin ale kamadipw sarawi pwe en pwurehng kakapwa atail inou en papdais. Presiden Nelson kosoia, me mendahte ire wet ah mehlel, ahpw wehwehn kamadipw sarawi loalsang met.” “I wiadahr inou sarawi kapw ehu. Ke wiadahr inou sarawi kapw kei. [Kauno] uhd inoukihong kitail oh mahsanih me kitail pahn kolokol Sapwelime Ngehn Sarawi ansou koaros. Ia wen kapai laud!”

Ansou me kitail kin koluhla oh alehda kamadipw sarawi ki mohngiong mwakelekel, kitail kin alehdi Ngehn Sarawi oh kin “mwakelekelsang dihp duehte kitail pilehu pepdaisla, Iei met me wia koapwoaroapwoar oh mahk me Sises ketikiong emen emen kitail.

Ia uwen kaperen en koluhla oh ale mahkepen dihp pwehki Sapwelimen Krais limpoak en komour!

Kilel en Nauvoo Illinois Temple sang Jennifer Rose Maddy

Sapwelime Tehnpas en Popohl

Mwurin ah wiahla Presiden en Mwomwohdiso en Sises Krais en Souleng en Imwin Rahn Akan, Presiden Nelson kosoia duwen ahl en inou sarawio pak tohto, me wia tepin ah kalohk ohng weipokon nin duwen ah wia Presiden en Mwomwohdisoht. Kitail kin pideleng nan ahl wet sang ni “koluhla oh pepdaiski pihl” (2 Nipahi 31:17), mwuri e kosoia, oh “kitail kin kaunsekala nan tehnpas sarawi.”

Wiewia doadoahk ohng mehteikan nan tehnpas sarawi, duehte kamadipw sarawi ah kin katamankin kitail atail inou sarawi kan oh kapai kan me kin kohsang inou pwukat. Ansou me kitail kin pepdaiskihla me melahr akan, kitail kin tamanda inou sarawi kesempwal kan me kitail wiadahr oh kapai inou kan me kitail pahn alehdi.

Sang ni ahl en inouwo, kitail kakehr iang ale kapai kan me inoupe wiawihongehr Apram, Aisek, Seikop, oh kadaudokerail akan. Mendahte kapai inoudier pwukat, Apram, Aisek,oh Seikop sohte ahneki mour mengei, oh kitail pil pahn duwehte. Kitail duweirail, kitail kin sohpai kasongosong, kalokolok, oh pahtou ni atail kin “ale kasongosong nan soahng kan koaros” (Doctrine and Covenants 136:31; pil kilang 101:4–5). Ahpw pil duwehte irail soukohp oh souleng inen kan en mahsoko, kitail ese isime kitail pahn koapwoaroapwoarki (kilang 2 Nipahi 4:19).

Atail mour sampah wet me mwotomwot, ahpw ansou mwotomwot wet—me ekei pak kin apwal—inenen kesempwal. Ei, Samatail Nanleng kupwurki kitail en esehla oh kekeirda. Oh, ei, kekeirda wet kin ekei pak kansensuwed oh kalok. Ahpw E kupwurki atail mour and kaselel oh pweida. Pwehki met, oh pwehn sewese ataik seiloak pwuralahng reh en mengei, E ketin kaunopada Sounkomouro, me wia “soun kapwaiada” atail inou sarawi kan ohng Seme. Sang ni Tomw en Sises Krais, Sahmo kin kapwaiada inou kan me wiawihongehr Sapwelime seri kan nan tehnpas sarawi.

Sang ni Ah limpoak oh tomw, atail Soundoar powedier oh kamwahuialahr soahng koaros me kitail pahn lelohng nan atail mour. Oh pwehki Sapwelime tehnpas sarawi—Sapwelime tehnpas en popohl—soahng koaros pahn mwahu mendahte ma mie ueng. Kolokol inou sarawi kan kin kamwakelehsang pahtou, medek, eimwalu, oh nsensuwed. Kitail sohte anahne pwunod de masopwehk. Ahpw, kitail en perenda pwehki pweinen dipatail miehier (kilang 1 Korint 6:20) oh me ahl en inouwo ohng mour soutuk wiawidahr.

Ahl en inouwo ni mehlel wia ahl en limpoak oh komour. Ansou me kitail kin wauneki inou sarawi kan me kitail kin wiahda nan tehnpas sarawi, kitail kin alehdi manaman laud, limpoak laud, mahk laud, wehweh laud, oh koapwoaroapwoar laud. Kemwekid kaselel oh kopwuriamwei en katengtengpenehn nan tehnpas sarawi—ohng peneinei kan ahr kin wiahla ehu kohkohlahte—kin wahdo popohl oh kopwuriamwei mwuledek ohng pali ngeni oh kin audehkiniehda ngenen kaping.

“Ahnsou me mwekid lapala ieu wiawi nan ahmw mour, wasa me keieu mwahu me ken mihmi ie ni palingehn iei nan amwail kolokol inou sarawi en tehnpas sarawi! President Nelson kaweidki. I esehier mehlel en mahsen pwukat sang ni ansou kaperen oh pil ansou apwal akan mei lelohngehr nan ei mour.

James Nathaniel Barlow, me wia keieun nein Israel oh Elizabeth Barlow seri, mehla ansou mwotomwot mwurinte ah ipwidi nan Mei 1841. Pahr ekei mwuri, e katengtengehng ah pahpa nohno nan tehnpas sarawi en Logan Utah.

Kilel sang Allen Garns

Kihrailpene Ni Imwarail

Mwurin Isrehl Barlow ah kaimwsekala ah rahnmwahuih nah kisin pwutako, e ntinglahng ah pwoud kosoia, “Madamadaun ahi pahn dohsang, oh sohte pwurehng pwurala ni en [James] ah sousouo erein ahi mour, inenen kalok ohngie kahrehda pilen meseie ah keredi pohn ah sousouo.”

I medewehda me pilen mas tohto—ahpw met pilen mas en popohl— me keredi ni Tihsempe4,1889. Rahno, kisin pwutak James Nathaniel Barlow katengtengehngehr ah pahpa nohno nan tehnpas sarawi en Logan Utah. Ahpw ansouo, Isrehl melahr, oh ekei me weliandi ih oh James.

Ngehi Sister Kearon ahneki ehu pepehm tohrohr en kesempwaliki oh limpoak ohng Isrehl oh Elizabeth. Nait mesenih, kisin pwutak me adaniki Sean, mehla ansou me ah mohngiong koadoahk Irair wet wia kansensuwed laud ehu ohng kiht. Ansouo, se medmedewe ma se kakehng. Se sarepedi nan kisin sousou tikitik kis. Sounpar eisek limau mwuri, aht peneinei alehdi luhk ehi en kohkohsang imwat nan United Kingdom pwehn papah nan Mwomwohdisoht, oh se kohkohsangehr ah kisin sousouo.

Se sohte luhs sang nait serio nan seiloak ohng palimese, oh se sohte ahneki lokolok laud duwehte peneinei en Barlow, ahpw se ese ekis duwen dahme ira lelohng. Sousoun nait kisin pwutako doh, ahpw se duehte peneinein Barlow, me ahneki pwoson Iasadahn Sises Krais oh mour soutuk en aht peneinei sang ni inou sarawi en katengtengpene.

Kitail koaros mie atail peneinei en mahs oh kisehtail teikan me melahr me ndindahiong kitail, “Kedeh pwilie wasah.” Pwehki inou sarawi kan en tehnpas sarawi, sohte emente konehng manoknokla. Atail pwukoah iei en seweseirail, papah irail, oh sewese kapwureiraildo.

Samatail Nanleng poakohng kitail, kowe oh ngehi. E ketkihiong kitail tehnpas sarawi pwe “soahng koaros me kitail pahn katengepene sampah pahn katengtengpene nanleng” (Doctrine and Covenants 128:8; pil kilang Madiu 18:18). E ketkihdo Sapwelime Ieroso pwehn powehdi selin mehla, oh kaunopada ahhl ohng ehupene oh peneinei soutuk.

Ihme kahrehda mie tiahk sarawi. Ihme kahrehda mie inou sarawi. Ihme kahrehda kitail kin kawada tehnpas sarawi kan. Ihme kahrehda kitail kin kasarawihiong pein kitail ohng Sapwelimen Koht doadoahk oh lingan (kilang Moses 1:39). Ime kahrehdi kitail kin sengiseng ni popohl, pwehki kitail esehier me kitail pahn pilehu tuhwong atail peneinei kan rehn Sahmo oh Naho.

Kitail en diar popohl oh meleilei sang ni atail pahn kolokol atail inou sarawi kan oh patehng Kauno nan Sapwelime doadoahk lingan en komouro.

© 2026 by Intellectual Reserve, Inc.All rights reserved. Ntingda nan USA. Kamanamanla ong ni Lokaiahn wai: 6/19. Kamanamanohng kawehweh: 6/19. Kawehwepen Padahk en Liaohna ong ehu ehu Sounpwung , Pepuweri 2026Pohnpeian19609 885