Iaļ In Bujen Eo Ekam̧ōņōņō

Pija jān Jerry Garns, maron̄ kapeik n̄an jerbal wōt ilo Kabun̄ in

Kallim̧ur ko Rekwojarjar

Jemādwōj Ilan̄ im Nejin, Jisōs Kraist, rej iakwe kōj aolep eļapļo̧k jān ad maron̄ pijaikļo̧k. Ejjeļo̧k jikin Aer iakwe eļapļo̧k an waļo̧k jān kōjeraam̧m̧an ko kar kallim̧ur kaki rej koba ippā bujen ko kar litok n̄an kōj ilo peptaij im ilo m̧weo im̧ōn Irooj.

“Juon iaan katak ko raorōk tata kar kabun̄ eo kar kwaļo̧ke ej kōn juon bujen kwojarjar,” Būreejtōn Russell M. Nelson (1924–2025) ekar katakin. Ilo kajin kien, juon bujen ekkā an kwaļo̧k juon koņ ikōtaan ruo ak elōn̄ļo̧k armej ro. Bōtaab ilo juon jekjek an kabun̄, juon bujen eļapļo̧k an aorōk. Ej juon kallim̧ur ekwojarjar ippān Anij.”

Aolep kallim̧ur ko rekwojarjar jej kōm̧m̧ani im kōjparoki rej kōjeraam̧m̧an kōj. Jemādwōj Ilan̄ im ad Rilo̧mo̧o̧r Jisōs Kraist rekōņaan bwe jen epaakeļo̧k Er. Rej kōņaan jipan̄ kōj katak im eddkōkļo̧k ilo tōmak im meļeļe. Rej kōņaan kakwōjarjar kōj kōn kajoor in lan̄. Rej kōņaan bwe jen lo kōmour im aenōm̧m̧an ilo juon laļ eo ijo kain kōjeraam̧man kein rej epen būki. Rej kōņan bwe jen en̄jake m̧ōņōņō ilo mour in im ilo mour eo ej itok. Jiōbtok jān iakwe in eweeppān, Rej letok n̄an kōj iien eo em̧m̧an n̄an deļo̧n̄e juon bujen jemjerā Ippāer. Epād jeraam̧m̧an eo ippad n̄an bar kōkāāl bujen ko kajjojo wiik ilo kweilo̧k in kwojkwoj eo.

Jej bōk m̧ōttan kwojkwoj eo ilo juon jitbōn kam̧m̧oolol kōnke ewōr ippād kōjeraam̧m̧an eo ekam̧ōņōņō n̄an bōk iood make etan Jisōs Kraist, keememej E im iakwe eo An kwaļo̧k ilo mennin letok an Pinmuur eo An—bwe E ekar en̄taan, to̧o̧rļo̧k bōtōktōk, im mej kōn kōj. Kwojkwoj eo ej barāinwōt kōjeraam̧m̧an kōj kōn juon iien em̧m̧an wiik otemjej n̄an kwaļo̧k ad m̧ōņōņō n̄an kōjparok kien ko An, kōkāāl bujen ko ad, im kōm̧m̧ane juon bujen kāāl (lale Katak im Bujen Ko 20:77, 79).

“Emakijkij, aō ron̄ ennaan eo bwe jej bōk kwojkwoj eo n̄an kōkāāl bujen ko kar kōm̧m̧ani ilo iien peptaij eo. Ilo an m̧ool, ekanooj ļapļo̧k jān men jab in,” Būreejtōn Nelson ear ba. “Iar kōm̧m̧ane juon bujen kāāl. Kom̧ kar kōm̧m̧ani bujen ko. … Kiiō n̄an karo̧o̧lļo̧k n̄an Eo me ej kōm̧m̧ane ennaan eo ke Jetōb eo An en maron̄ pād ippād iien otemjej. Ej juon jeraam̧m̧an!”

N̄e jej ukweļo̧k im bōk m̧ōttan kwojkwoj eo kōn juon bōro em̧ool, jej bōk Jetōb Kwojarjar eo im “bōk erreo jān jerawiwi ko āinwōt n̄e jaar bar peptaij. Menin ej kōjatdikdik im tūriam̧o eo Jisōs ej letok n̄an kajjojo iaad.”

Juon mennin lan̄lōn̄ n̄an ukweļo̧k im bōk jeorļo̧k bōd jān iakwe in lo̧mo̧o̧r eo an Kraist.

Pija in Nauvoo Illinois Tampeļ jān Jennifer Rose Maddy

M̧ōn Kam̧ōņōņō eo Im̧ōn

Ālkin an kar erom Būreejtōn an Kabun̄ eo an Jisōs Kraist im Armej ro Rekwojarjar ilo Raan ko Āliktata, Būreejtōn Nelson ekar emakijkij an kōnono kōn iaļ in bujen eo, jino ennaan eo an kein kajuon ilo lo̧bwilej āinwōt Būreejtōn an Kabun̄ in. Jej deļo̧n̄e iaļ eo kōn “ukweļo̧k im peptaij kōn dān” (2 Nipai 31:17), ekar ba ilo juon iien tokālik, “innām jej lukkun deļo̧n̄e ilo tampeļ.”

Bōk m̧ōttan kwojkwoj eo ej kakeememej kōj kōn bujen ko ad im kōjeraam̧m̧an ko rej jāni, barāinwōt kōm̧m̧an jerbal ilo tampeļ. Ilo ad jerbali kain̄i ko n̄an ro em̧ōj aer jako, jej keememej kallim̧ur ko rekwojarjar jaar kōm̧m̧ani im kōjeraam̧m̧ane ko jenaaj buki.

Jān iaļ in bujen eo, jej erom rijolet ro n̄an aolep kōjeraam̧m̧an ko kar kallim̧ur kaki n̄an Ebream, Aisek, Jekab, im ro ineer. Mekarta kōjeraam̧m̧an ko kar kallim̧ur kaki, Ebream, Aisek, im Jekab raar jab mour mour ko repidodo, im kōj barainwōt. Āinwōt er, jej jelm̧ae kapo, kauwe, im jako ko ilo ad “mālejjon̄ ilo men ko otemjeļo̧k” (Katak im Bujen Ko 136:31; bar lale 101:4–5). Ak āinwōt rikaan ro im Armej ro Rekwojarjar etto, jejelā wōn jemaro̧n̄ lōke (lale 2 Nipai 4:19).

Mour in ad ioon laļ jidik wōt iien, ak iien in—jet iien elukun pen—ej juon aorōk eļap. Aaet, Jemādwōj Ilan̄ ekōņan bwe jen katak im eddōkļo̧k. Im, aaet, eddōkļo̧k in jet iien ej itok inepata im en̄taan ippāntok. Bōtaab E kōņaan bwe mour ko ad ren aiboojoj im kōjatdikdik. Kōn menin, im n̄an kapidodoikļo̧k iaļ eo ad n̄an Ippān, E ekar letok juon Rilo̧mo̧o̧r, eo ej “ri kakūrm̧ool” bujen ko ad Ippān Jemān. Jān Pinmuur eo an Jisōs Kraist, Jemād ej kakūrm̧ool kallim̧ur ko ear kōm̧m̧ane n̄an ro Nejin ilo tampeļ.

Kōn iakwe eo An im en̄taan in pinmuur eo, ad Rilo̧mo̧o̧r ekar jerbalke kōn im kemour aolep men jenaaj kar jelm̧ai ilo mour. Im kōnke kōn m̧weo Im̧ōn ekwojarjar—m̧weo Im̧ōn ekam̧ōņōņō—jenaaj aolep jokane jekdo̧o̧n kapo. Kein kōmour eo an bujen ej pookļo̧k liāājļol, metak, būrom̧ōj, im inepata. Jejjab aikuj inepata ak mijak. Ijello̧kin, jemaron̄ lan̄lōn̄ bwe wōņāān lo̧mo̧o̧r eo ad em̧ōj kōļļaiki (lale 1 Korint 6:20) im bwe iaļ in bujen eo n̄an mour indeeo em̧ōj ejaake.

Iaļ in bujen eo ej ilo m̧ool juon iaļ in iakwe lo̧mo̧o̧r. Ilo ad kautiej bujen ko jaar kōm̧m̧ani ilo tampeļ eo, jej būki kōjeraam̧m̧an ko an eļapļok kajoor, eļapļo̧k iakwe, eļapļo̧k tūriam̧o kake, eļapļo̧k meļeļe, im eļapļo̧k kōjatdikdik. Kabwilōn̄lōn̄ im wōj ļapļap eo an liāp ko an tampeļ—an ro uwaan baam̧ļe rej korak ippān doon ilo iakwe n̄an aolep indeeo—ej bōktok eļapļo̧k jān bwilōn̄ im lan̄lōn̄ n̄an jetōb eo aō im ej kobrak eō kōn en̄jake in kam̧m̧oolol.

“Jabdewōt iien jabdewōt men rej waļo̧k ilo mour eo am̧, jikin eo ejokne tata n̄an mour ilo jetōb ej mour ilowaan bujen ko am̧ ilo tampeļ eo!” Būreejtōn Nelson ekar kapilōk. Ijeļā jān en̄jake eo aō make em̧m̧an im jet iien enana an mour wabanban m̧ool eo an naan ko.

Kōmeļeļe jān Allen Garns

Kakuk tok Er ilo Jikier

Ālkin an Israel Barlow kōjjem̧ļo̧k ippān ļaddik jidikdik eo nejin, ekar jeje n̄an lio pāleen, Ļōmņak ko kōn jako eo aō ilo aō ettoļo̧k, ejjeļo̧k eļapļo̧k ilo mour eo aō n̄an bar jepļaakļo̧k n̄an lōb eo an [James], ilukkuun būrom̧ōj jon̄an būruō elukkuun in rup, im ij jan̄ ioon lōb eo an ļeo nejirro.”

Ij pijaikļo̧k bwe elōn̄ļo̧k kōmejaaļaļ ko—kōmejaaļaļ in lan̄lōn̄ ko ilo iien—kar to̧o̧rļok ilo Tijem̧ba 4, 1889 eo. Ilo raan jab in, James Nathaniel Barlow eo edik kear liāp n̄an ippān jinen im jemān ilo Logan Utah Tampeļ. Ilo iien in, Israel em̧ōj an kar jako, kōn menin ro jet raar bōk jikin im James.

Sister Kearon im n̄a ewōr am̧ro iakwe eman̄itn̄it im eļap n̄an Israel im Elizabeth. Ļaddik eo nejimro m̧oktata, juon ļaddik kar etan Sean, ekar mej ilo iien m̧wijm̧wij menono eo ke ekar jilu wōt wiik rūtto in. Jako in ekar lukkun ļap n̄an kōmro. Ilo tōre eo, kōm ar kōlm̧enļo̧kjen eļan̄n̄e kōm naaj kar mour. Kōm kar kalbwini ilo metak ilo juon lōb ilo England. Jon̄oul ļalem iiō ko tokālik, kar kajjitōk ippān baam̧le eo am n̄an em̧m̧akūt jān kapijuknen eo am ilo United Kingdom n̄an jerbal ilo Kabun̄ in, im kōm kar em̧m̧akūt jān lōb jidikdik eo.

Kōm kar jab luuji nin̄nin̄ eo nejim ilo iaļ eo an n̄an irilik, im kōm kar jab en̄taan kōn apan̄ jab keidi an Barlow ko, bōtaab kōm kar bōk juon meļeļe kōn ta eo raar ioone. Lōb eo an nin̄nin̄ eo edik nejim elukkun ettoļo̧k, aaet āinwōt Barlow ro, ekar wōr ippām tōmak eo ilo Jerkakpeje eo an Jisōs Kraist im paotk indeeo eo an baam̧le eo am kōn bujen liāp kwojarjar eo.

Kōj aolep ewōr ro jibud im jim̧m̧aad im ro jet jej iakwe er rejako ro rej jiron̄ kōj, “Jab likūt eō ijin.” Kōnke kōn bujen ko an tampeļ, ejjeļo̧k ej aikuj ļe likin m̧wi. Kūr eo ad ej n̄an iakwe er, jerbal n̄an er, im jipan̄ aintok er n̄an kapijuknen.

Jemādwōj Ilan̄ ej iakwe kōj, kwe im n̄a. E ekar letok n̄an kōj tampeļ bwe “jabdewōt [jej] liāpe ioon laļ enaaj liāpe ilo lan̄” (Katak im Bujen Ko 128:8; bar lale Matu 18:18). E ekar jilkintok Nejin n̄an rupe to ko an mej, kōmetal iaļ eo n̄an kōtaan ko n̄an indeeo im koba ko an baam̧le indeeo

En̄in ej etke ewōr kain̄i ko. En̄in ej etke jej kōm̧m̧an bujen ko. En̄in ej etke jej kalōk tampeļ ko. En̄iin ej etke jej ajeļo̧k kōj make n̄an jerbal im aiboojoj eo an Anij (lale Moses 1:39). Im en̄iin ej etke jej kōmjaaļal ilo m̧ōņōņō, ilo jeļā bwe juon iioon doon ej kōttar kōj im ro jej iakwe er im̧aan mejān Jemān im Nejin.

Jen lo lan̄lōn̄ im aenōm̧m̧an eo ilo ad kōjparok bujen ko ad im koba ippān Irooj ilo jerbal in lo̧mo̧o̧r eo eaiboojoj An.