“Ti Naragsak a Dana ti Katulagan,” Liahona, Peb. 2026.
Binulan a Mensahe iti Liahona , Pebrero 2026
Ti Naragsak a Dana ti Katulagan
Ti nakaskasdaaw ken kinatan-ok dagiti miembro ti pamilia a naisinggalut iti imatang ti Ama ken ti Anak ti mangyeg iti nalablabes a panagraem ken rag-o iti kararuak ken mangpunno kaniak iti espiritu ti panagyaman.
Ni Elder Patrick Kearon ken ti asawana a ni Jennifer
Idi pimmanaw da Israel ken Elizabeth Haven Barlow iti Nauvoo, Illinois, nga agturong iti Salt Lake Valley idi 1848, pinanawanda ti maysa nga ubing a lalaki a naitabon iti bassit a sementerio ti Nauvoo. Ti inauna nga anakda a ni James Nathaniel Barlow ket natay kalpasan la unay ti pannakayanakna idi Mayo 1841.
Iti ipapanawda nga agturong iti Salt Lake Valley, saan a ninamnama da Israel ken Elizabeth a makitada manen ti tanem ti anakda. Ngem idi naawagan ni Israel nga agserbi iti mision idiay Inglatera sumagmamano a tawen kalpasanna, limmasat iti Nauvoo bayat ti panagdaliasatna nga agpadaya. Iti kiddaw ni Elizabeth, nagsardeng tapno birokenna ti tanem ti anakda ket iyakarna ti bangkayna iti kangrunaan a sementerio, iti daya ti ili.
Kalpasan ti maysa nga aldaw a saan a naballigi a panagsapul, nagkiddaw ni Israel iti tulong manipud iti lokal a caretaker. Kabigatanna, nasarakanda ti tanem, nga adda iti abay ti kasinsin ni James a ni Mary. Nakalkaldaang ta narunot ken narakrak dagiti lungon. Iti suratna ken baketna, imbaga ni Israel, “Isu nga immadayoak ket inkeddengko a baybay-ak idan sadiay agingga iti masanguanan.”
Saan pay a nakaadayo manipud iti tanem idi nangngegna ti maysa a timek. Iti pananglagipna iti padasna, insuratna, “Saan a mangngeg, ngem nalawag unay iti panunotko ta diak mailibak daytoy: ‘Daddy, dinak baybay-an ditoy.’” Nagsubli ni Israel iti tanem, a nangikeddeng a mangiyakar iti ubing a lalaki nga anakna. “Nariknak ti naisangsangayan a kinakalma ken talna ti panunot a diak pay pulos a narikna idi. … Daytoy laeng ti maibagak: a diak pay pulos ad-adda a nabigbig ti aniaman a pagrebbengan a naaramidko iti biagko.”
Idi Septiembre 2, 1853, inyakar ni Israel Barlow ken ti caretaker dagiti bangkay da James ken Mary iti kangrunaan a sementerio ti Nauvoo, a minarkaanda ti lugar babaen kadagiti “bato iti ulo ken saka dagiti tanem.”
Imbaga ni Israel ken ni Elizabeth a bayat ti panagtalinaedna iti sibay ti tanem, “Nariknak ti tarigagay a mangitadon iti bagik ken amin a mabalinko nga awagan a kukuak kadagiti ima ti Apo, tapno maibilangak a maikari a mapagungar a kadua ni [James] iti bigat ti Umuna a Panagungar.”
Ti debosion ni Israel iti ebanghelio ni Jesucristo, agraman ti panangdayawna kadagiti sagrado a katulagan ti mangipalubos ken Cristo a mangpabalin iti agnanayon a biag—dayta a kadakkelan kadagiti amin a bendision—a posible para kenkuana, kadagiti kapuonanna, ken kaputotanna.
Pudno met dayta para kadatayo amin.
Rinetrato ni Jerry Garns, mabalin a makopia para iti panagusar laeng iti Simbaan
Dagiti Sagrado a Kari
Ti Nailangitan nga Amatayo ken ti Anakna a ni Jesucristo ket ay-ayatenda ti tunggal maysa kadatayo iti labes ti aniaman a mapanunottayo. Awan sadinoman nga ad-adda a pakaiparangarangan ti ayatda ngem kadagiti naikari a bendision a nainaig kadagiti katulagan a naipaay kadatayo iti panagbuniag ken iti balay ti Apo.
“Maysa kadagiti kapatgan a konsepto ti naipalgak a relihion ket ti maysa a sagrado a katulagan,” ti insuro ni Presidente Russell M. Nelson (1924–2025) . “Iti legal a pagsasao, ti maysa a katulagan ket kaaduanna a kaipapananna ti maysa a tulag iti nagbaetan ti dua wenno ad-adu pay a partido. Ngem iti narelihiosuan a konteksto, ad-adda a napateg ti maysa a katulagan. Maysa daytoy a sagrado a kari iti Dios.”
Bendisionannatayo ti tunggal sagrado a kari nga aramiden ken tungpalentayo. Kayat ti Nailangitan nga Amatayo ken ti Mangisalakantayo a ni Jesucristo nga umasidegtayo kadakuada. Kayatdatayo a tulongan nga agsursuro ken dumakkel iti pammati ken pannakaawat. Kayatda nga ikkandatayo iti nailangitan a bileg. Kayatda a makasaraktayo iti pannakapaimbag ken talna iti lubong a narigat a magun-od dagiti kasta a bendision. Kayatda a mapasarantayo ti rag-o iti daytoy a biag ken iti sumaruno a biag. Gapu ta agayus manipud iti daytoy naan-anay nga ayat, ipaayda kadatayo ti gundaway a sumrek iti maysa a singgalut ti katulagan kadakuada. Adda kadatayo ti bendision ti panagkumit manen kadagita a katulagan iti linawas bayat ti miting ti sakramento.
Makiranudtayo iti sakramento iti espiritu ti panagyaman gapu ta adda kadatayo ti naragsak a bendision a mangawat iti bagitayo ti nagan ni Jesucristo, a manglaglagip kenkuana ken ti panagayatna kadatayo a naipakita babaen ti sagut ti Pannubbotna—nga isu ket nagsagaba, nagdara, ken natay para kadatayo. Ti sakramento bendisionannatayo met iti linawas a gundaway a mangipakita iti kinatuloktayo a mangtungpal kadagiti bilinna, mangpabaro kadagiti katulagantayo, ken mangaramid iti baro a katulagan (kitaen iti Doktrina ken Katulagan 20:77, 79).
“Masansan a, mangngegko ti pannakayebkas a makiranudtayo iti sakramento tapno mapabarotayo dagiti katulagantayo a naaramid iti panagbuniag. Idinto a pudno dayta, dakdakkel ti kaipapananna dayta,” kinuna ni Presidente Nelson. “Nagaramidak iti baro a katulagan. Nagaramidka kadagiti baro a katulagan. … Ita kas supapak ti inlanad [ti Apo] a kanayon nga addanto kadatayo ti Espirituna. Anian a parabur!”
No agbabawitayo ken makiranudtayo iti sakramento a buyogen ti nadalus a puso, awatentayo ti Espiritu Santo ken “madalusantayo iti basol a kasla nabuniagantayo manen. Daytoy ti namnama ken asi nga idiaya ni Jesus iti tunggal maysa kadatayo.”
Anian a rag-o ti agbabawi ken mapakawan babaen ti manangsubbot nga ayat ni Cristo!
Ladawan ti Templo iti Nauvoo Illinois ni Jennifer Rose Maddy
Ti Balay ti Ragsakna
Kalpasan ti panagbalinna a presidente ti Ti Simbaan ni Jesucristo dagiti Santo iti Ud-udina nga Aldaw, masansan a nagsao ni Presidente Nelson maipapan iti dana ti katulagan, a nangrugi iti umuna a mensahena iti publiko kas presidente ti Simbaan. Sumrektayo iti dayta a dana babaen ti “panagbabawi ken pannakabuniag babaen ti danum” (2 Nephi 31:17), kinunana iti maysa nga okasion, ken “kalpasanna ad-adda a naan-anay a sumrektayo iti templo.”
No kasano a ti pannakiraman iti sakramento ipalagipna kadatayo dagiti katulagantayo ken dagiti nainaig a bendisionda, kasta met ti panangaramid iti panangisaup para kadagiti pimmusayen iti templo. Bayat ti panangaramidtayo kadagiti ordinansa babaen ti panangisaup (proxy) para kadagiti pimmusayen, lagipentayo dagiti sagrado a kari nga inaramidtayo ken dagiti naikari a bendision nga awatentayo.
Babaen ti dana ti katulagan, agbalintayo nga agtawid kadagiti amin a bendision a naikari kada Abraham, Isaac, Jacob, ken dagiti kaputotanda. Iti laksid dagiti naikari a bendision, saan a nalaka ti panagbiag da Abraham, Isaac, ken Jacob, ken kasta met kadatayo. Kas kadakuada, maipaspasangotayo iti rigat, pannubngar, ken pannakapukaw bayat a “masuboktayo iti amin” (Doktrina ken Katulagan 136:31; kitaen met iti 101:4–5). Ngem kas kadagiti propeta ken nalinteg a Santo idi un-unana, ammotayo no siasino ti pagtalkantayo (kitaen iti 2 Nephi 4:19).
Ti mortal a biagtayo ket apagkanito laeng iti kaaddatayo, ngem dayta a kanito—no dadduma narigat unay—ket agnanayon a napateg. Wen, kayat ti Nailangitan nga Amatayo nga agsursuro ken dumakkeltayo. Ket, wen, dayta a panagdakkel no dadduma iramanna ti pannakaupay ken panagsagaba. Ngem kayatna a napintas ken manangnamnama ti biagtayo. Iti dayta a panggep, ken tapno mapalag-an ti panagdaliasattayo nga agsubli Kenkuana, nangipaay iti Mangisalakan, nga isu “ti manggarantia” kadagiti katulagantayo iti Amana. Babaen ti Pannubbot ni Jesucristo, tungpalen ti Ama dagiti kari nga inaramidna kadagiti annakna iti templo.
Babaen ti panagayatna ken pangsubbot a sakripisiona, tinaming ken pinaimbag ti Mangisalakantayo ti amin a banag a mapasarantayo iti biag. Ket gapu iti nasantuan a balayna—ti balay ti rag-ona—nasayaatto ti amin iti laksid ti rigat. Ti balsamo ti panangtungpal iti katulagan ikkatenna ti ladingit, saem, liday, ken pannakaupay. Masapul a ditayo agdanag wenno agbuteng. Imbes ketdi, makapagrag-otayo ta nabayadanen ti gatad ti pannakasubbottayo (kitaen iti 1 Taga-Corinto 6:20) ken naisaganan ti dana ti katulagan nga agturong iti agnanayon a biag.
Ti dana ti katulagan ket pudno a maysa a dana ti panangsubbot iti ayat. Bayat ti panangraemtayo kadagiti katulagan nga aramidentayo iti templo, umawattayo kadagiti bendision iti dakdakkel a pannakabalin, dakdakkel nga ayat, dakdakkel nga asi, dakdakkel a pannakaawat, ken dakdakkel a namnama. Ti nakaskasdaaw ken kinatan-ok dagiti pannakailantip iti templo—dagiti miembro ti pamilia a naisinggalut iti ayat ken iti amin nga agnanayon—ti mangyeg iti nalablabes a panagraem ken rag-o iti kararuak ken mangpunno kaniak iti espiritu ti panagyaman.
“Ania man a kita ti problema a sumangbay iti biagyo, ti katalgedan a lugar tapno naespirituan a nasaluad ket ti panagbiag iti uneg dagiti katulaganyo iti templo!” Imbalakad ni Presidente Nelson. Ammok manipud iti bukodko a nasam-it ken no dadduma napait a mortal a padas ti kinapudno dagidiay a sasao.
Ni James Nathaniel Barlow, ti inauna nga anak da Israel ken Elizabeth Barlow, ket natay kalpasan la unay ti pannakayanakna idi Mayo 1841. Kalpasan ti adu a tawen, isu ket nailantip babaen ti panangisaup (proxy) kadagiti nagannakna iti Templo ti Logan Utah.
Panangiladawan ni Allen Garns
Ummongen Ida nga Agawid
Kalpasan ti maudi a panagpakada ni Israel Barlow iti bassit nga anakna a lalaki, insuratna iti asawana, “Ti panangpampanunotko a pumanawak iti adayo, a diak pulos agsublin iti tanem [ni James], ti nangdadael iti maudi a sinulid ti panagayatko agingga a naburak dayta kadagiti luak iti tanemna”
Mailadawak dayta nga ad-adu pay a lua—dagiti lua ti rag-o iti daytoy a gundaway—ti nagarubos idi Disiembre 4, 1889. Iti dayta nga aldaw, ti bassit nga ubing a ni James Nathaniel Barlow ket nailantip kadagiti nagannakna iti Templo ti Logan Utah. Iti daytan a panawen, pimmusayen ni Israel, isu a nagtakder dagiti dadduma kas proxy para kenkuana ken ni James.
Adda naisangsangayan a panangngaasi ken dakkel a pannakipagriknami ken ni Sister Kearon kada Israel ken ni Elizabeth. Natay ti inauna nga anakmi, maysa nga ubing a lalaki nga agnagan Sean, bayat ti pannakaoperana iti puso idi tallo laeng a lawasna. Daytoy ket maysa a nakaro unay a ladingit a pannakapukaw para kadakami. Iti dayta a tiempo, pinampanunotmi no makalasatkami. Intabonmi isuna iti nasaem a bassit a tanem idiay Inglatera. Sangapulo ket lima a tawen kalpasanna, nakiddaw iti pamiliami nga umakar manipud iti pagtaenganmi nga agturong iti United Kingdom tapno agserbi iti full time iti Simbaan, ket pinanawanmi dayta bassit a tanem.
Saanmi a napukaw ti maladagami a lalaki iti panagdaliasatmi nga agpalaud, ken saankami a nagsagaba kas kadagiti rigat dagiti Barlow, ngem addaankami iti pangrugian ti pannakaawat no ania ti napasaranda. Adayo unay ti tanem ti anakmi a lalaki, ngem kas iti pamilia Barlow, addaankami iti natibker a pammati iti Panagungar ni Jesucristo ken iti agnanayon a kasasaad ti pamiliami babaen ti nasantuan a katulagan ti pannakailantip.
Addaantayo amin kadagiti kapuonan ken dadduma pay a patpatgen iti labes ti tanem a mangibagbaga kadatayo, “Dinakam baybay-an ditoy.” Gapu kadagiti katulagan iti templo, awan ti masapul a mabaybay-an. Ti awagtayo ket ti panangipateg kadakuada, panagserbi kadakuada, ken panangtulong a mangummong kadakuada nga agawid.
Ay-ayatennatayo ti Nailangitan nga Amatayo, sika ken siak. Intedna kadatayo dagiti templo tapno “no ania man ti mapagkappeng iti daga agkappengdanto iti langit” (Doktrina ken Katulagan 128:8; kitaen met iti Mateo18:18). Imbaonna ti Anakna a mangparmek iti ipapatay, a nanglukat iti dalan para kadagiti agnanayon a singgalut ken agnanayon a panagtitipon manen ti pamilia.
Dayta ti gapuna nga addaantayo kadagiti ordinansa. Dayta ti gapuna nga agaramidtayo kadagiti katulagan. Dayta ti gapuna a mangbangontayo kadagiti templo. Dayta ti gapuna nga idatontayo ti bagitayo iti aramid ken gloria ti Dios (kitaen iti Moises 1:39). Ket dayta ti gapuna a nagluatayo iti rag-o, nga ammotayo nga agur-uray kadatayo ti agnanayon a panagtitipon manen ken dagiti ay-ayatentayo iti imatang ti Ama ken ti Anak.
Sapay koma ta masarakantayo ti rag-o ken talna bayat a tungpalentayo dagiti katulagantayo ken makikaduatayo iti Apo iti nadayag a panangisalakan nga aramidna.
© 2026 by Intellectual Reserve, Inc. All rights reserved. Naimaldit iti Pilipinas. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, February 2026. Ilokano. 19933 864