Ang Makalilipay nga Banas sang Kasugtanan

Ni Elder Patrick Kearon

Sang Korum sang Dose ka Apostoles

Ang katahum kag kahalangdon sang mga miyembro sang pamilya nga nahugpong sa presensya sang Amay kag sang Anak nagadala sing tuman nga kadayawan kag kalipay sa akon kalag kag nagapuno sa akon sang espiritu sang pagpasalamat.

Si Elder Patrick Kearon kag iya asawa nga si Jennifer

Sang si Israel kag Elizabeth Haven Barlow naghalin sa Nauvoo, Illinois, sa pagpadulong sa Salt Lake Valley sang 1848, ginbilin nila ang ila lapsag nga lalaki nga nalubong sa gamay nga sementeryo sang Nauvoo. Ang diutay nga si James Nathaniel Barlow, ila una nga bata, napatay wala madugay pagkatapos nga natawo sia sang Mayo 1841.

Sa ila paghalin pakadto sa Salt Lake Valley, si Israel kag Elizabeth wala nag-ekspektar nga magtulok pa liwat sa lulubngan sang ila anak. Pero pagligad sing pila ka tuig sang si Israel gintawag para sa isa ka misyon sa England, nag-agi sia sa Nauvoo sang nagbiyahe sia pa-este. Sa pangabay ni Elizabeth, nagpundo sia agud pangitaon ang lulubngan sang ila anak kag isaylo ang iya bangkay sa mayor nga sementeryo sa este sang banwa.

Pagkatapos sing isa ka adlaw nga pagpangita, nangayo sing bulig si Israel sa tagadidto nga manugbantay. Pagkadason nga adlaw, nakita nila ang lulubngan nga ara sa tupad sang pakaisa ni James nga si Mary. Masubo lang nga ang mga lungon gabok kag guba na. Nagsulat si Israel sa iya asawa, “Gani naglakat na lang ako kag nagdesisyon nga ibilin ko sila didto tubtob sa dason.”

Wala pa sia nakapalayo sa lulubngan sang may nabatian sia nga tingug. Sa pagdumdum niya sang ina nga eksperiyensia, iya ginsulat, “Indi sia matunog, pero daw ka klaro gid sa akon hunahuna nga indi ko pwede bale-walaon: ‘Daddy, indi ako pag-ibilin diri.’” Si Israel nagbalik sa lulubngan, kag nagdesisyon nga kuhaon na lang ang iya anak didto. “Nakabatyag ako sing lain gid nga kaumpawan kag kalinong sa hunahuna nga wala ko nabatyagan antes sini. … Amo lang ini ang akon mahambal: nga wala pa gid ako sang pareho sini katalalupangdon nga tulumanon sa akon kabuhi.”

Sang Septyembre 2, 1853, ginsaylo ni Israel Barlow kag sang manugbantay ang mga bangkay ni James kag Mary sa mayor nga sementeryo sang Nauvoo kag ginmarkahan ang nahamtangan sang “mga bato sa ulohan kag tiilan sang mga lulubngan.”

Ginsugiran ni Israel si Elizabeth nga sang nagtiner sia sa kilid sang lulubngan, “Nakabatyag ako sang kaluyag nga idedikar ang akon kaugalingon kag ang tanan nga matawag ko nga akon sa mga kamot sang Ginuo, agud maisip ako nga nagakaangay nga magbangon upod ni [James] sa aga sang Una nga Pagkabanhaw.”

Ang katutum ni Israel sa ebanghelyo ni Jesucristo, upod ang pagtahod sang sagrado nga mga kasugtanan, nagatugot kay Cristo nga himuon ang kabuhi nga wala katapusan—inang pinakadako sa tanan nga bugay—nga posible para sa iya, iya mga katigulangan, kag iya kaliwatan.

Ang amo man matuod sa aton tanan.

Litrato kuha ni Jerry Garns, mahimo kopyahon para gamiton sa Simbahan lamang

Sagrado nga mga Promisa

Ang aton Amay nga Langitnon kag Iya Anak nga si Jesucristo nagahigugma sa tagsa sa aton sing labaw pa sa aton mahunahuna. Labi nga makita ang Ila gugma sa ginpromisa nga mga bugay nga angot sa mga kasugtanan nga ginhatag sa aton sa bunyag kag sa balay sang Ginuo.

“Isa sang pinakaimportante nga mga konsepto sang ginpahayag nga relihiyon amo ang sagrado nga kasugtanan,” tudlo ni Pangulong Russell M. Nelson (1924–2025). “Sa legal nga konteksto, ang kasugtanan sa kabilogan nagakahulugan sang pag-ugyonay sang duha ukon kapin pa nga mga grupo. Pero sa relihiyoso nga konteksto, ang kasugtanan labi pa gid ka importante. Sagrado ini nga promisa sa Dios.”

Ang tagsa ka sagrado nga promisa nga aton ginahimo kag ginatuman nagabugay sa aton. Luyag sang Amay nga Langitnon kag sang aton Manluluwas nga si Jesucristo nga magpalapit kita sa Ila. Luyag Nila kita buligan nga makahibalo kag magtubo sa pagtuo kag paghangop. Luyag Nila kita hatagan sang langitnon nga gahum. Luyag Nila nga masalapoan naton ang pag-ayo kag paghidaet sa kalibutan kon sa diin ang amo nga mga bugay mabudlay matigayon. Luyag Nila nga maeksperiyensyahan naton ang kalipay sa sining kabuhi kag sa kabuhi sa palaabuton. Halin sa sining perpekto nga gugma, ginatanyag Nila sa aton ang oportunidad nga magsulod sa kasugtanan upod sa Ila. Ginapakamaayo kita nga bag-ohon liwat ang mga kasugtanan kada semana sa sakrament miting.

Nagaambit kita sang sakramento sa espiritu sang pagpasalamat tungod may ara kita sang makalilipay nga pagpakamaayo sa pagdala sa aton mga kaugalingon sang ngalan ni Jesucristo, pagdumdum sa Iya kag Iya gugma para sa aton nga ginapakita paagi sa dulot sang Iya Pagbayad-sala—nga nag-antos Sia, nagpaagay sang dugo, kag napatay para sa aton. Ang sakramento nagabugay man sa aton sang oportunidad kada semana nga ipakita ang aton kahanda nga tumanon ang Iya mga kasugoan, bag-ohon ang aton mga kasugtanan, kag maghimo sang bag-o nga kasugtanan (tan-awa sa Doktrina kag mga Kasugtanan 20:77, 79).

“Sa masami, akon mabatian ang hambalanon nga nagaambit kita sang saramento sa pagbag-o sang mga kasugtanan nga ginhimo sa bunyag. Bisan nga matuod ina, mas masobra pa ini sa sina,” siling ni Pangulong Nelson. “Nakahimo ako sang bag-o nga kasugtanan. Nakahimo kamo sang bag-o nga mga kasugtanan. … Karon kabaylo sina naghambal [ang Ginuo] nga aton dalayon nga maangkon ang Iya Espiritu sa pag-upod sa aton. Daw ano nga pagpakamaayo!”

Kon maghinulsol kita kag mag-ambit sang sakramento nga may putli nga tagipusuon, ginabaton naton ang Balaan nga Espiritu kag “ginatinloan halin sa sala nga daw ginbunyagan kita liwat. Amo ini ang paglaum kag kaluoy nga ginatanyag ni Jesus sa tagsa sa aton.”

Daw ano nga kalipay nga maghinulsol kag mapatawad paagi sa nagatubos nga gugma ni Cristo!

Litrato sang Nauvoo Illinois Temple ni Jennifer Rose Maddy

Iya Balay sang Kalipay

Pagkatapos nga nangin Pangulo sang Ang Simbahan ni Jesucristo sang mga Santos sa Ulihing mga Adlaw, si Pangulong Nelson pirme nagahambal parte sa banas sang kasugtanan, nga nagsugod sa iya una nga pampubliko nga mensahe bilang Pangulo sang Simbahan. Nagasulod kita sa sina nga banas paagi sa “paghinulsol kag bunyag paagi sa tubig” (2 Nefi 31:17), siling niya sang ulihi, kag “dayon nagasulod kita sa sini sing mas lubos sa templo.”

Pareho nga ang pag-ambit sang sakramento nagapahanumdum sa aton sang aton mga kasugtanan kag ila sini upod nga mga pagpakamaayo, amo man ang paghimo sang buluhaton sa templo para sa iban. Kon nagahikot kita sang mga ordinansa paagi sa pagtal-os para sa sinang mga nagtaliwan na, ginadumdum naton ang sagrado nga mga promisa nga aton ginhimo kag ang ginpromisa nga mga pagpakamaayo nga aton mabaton.

Paagi sa banas sang kasugtanan, kita mangin mga manunubli sang tanan nga pagpakamaayo nga ginpromisa kay Abraham, Isaac, Jacob, kag sa ila kaliwatan. Bisan pa sinang ginpromisa nga mga pagpakamaayo, indi nangin mahapos ang kabuhi nanday Abraham, Isaac, kag Jacob, kag amo man kita. Pareho sa ila, nagapangatubang kita sang mga kabudlayan, mga silot, kag pagkadula sang mga pinalangga tungod “[gina]tilawan [kita] sa tanan nga butang” (Doktrina kag mga Kasugtanan 136:31; tan-awa man sa 101:4–5). Pero pareho sa mga propeta kag matarong nga mga Santos sang una, nakahibalo kita kon kay sin-o kita makasalig (tan-awa sa 2 Nefi 4:19).

Ang aton mortal nga kabuhi malip-ot lang nga tion sa aton pagluntad, pero inang malip-ot nga tion—nga kon kaisa tuman ka budlay—may wala katapusan nga importansya. Huo, luyag sang aton Amay nga Langitnon nga makahibalo kita kag magtubo. Kag, huo, ang ina nga pagtubo kon kaisa nagatuga sang kapaslawan kag pag-antos. Pero gusto Niya nga mangin matahum kag malaumon ang aton mga kabuhi. Agud mahimo ini, kag agud pahapuson ang aton pagbalik sa Iya, naghatag Sia sang Manluluwas, nga amo “ang nagagarantiya” sang aton mga kasugtanan sa Iya Amay. Paagi sa Pagbayad-sala ni Jesucristo, ginatuman sang Amay ang mga promisa nga ginhimo sa Iya mga anak sa templo.

Paagi sa Iya gugma kag nagabayad-sala nga sakripisyo, gin-atubang kag gin-ayo sang aton Manluluwas ang tanan nga aton maeksperiyensyahan sa kabuhi. Kag tungod sang Iya balaan nga balay—Iya balay sang kalipay—ang tanan mangin maayo lang sa pihak sang mga kabudlayan. Ang nagapasulhay nga kinaiya sang pagtuman sang mga kasugtanan nagapaumpaw sang kasubo, kasakit, kalisud, kag kapaslawan. Indi kita dapat magkabalaka ukon magkahadlok. Kundi, makapangalipay kita nga ang bili sang aton pagtubos ginbayaran na (tan-awa sa 1 Mga Taga-Corinto 6:20) kag ang banas sang kasugtanan padulong sa kabuhi nga wala katapusan napahamtang na.

Sa pagkamatuod ang banas sang kasugtanan isa ka banas sang nagatubos nga gugma. Sa pagtuman naton sang mga kasugtanan nga ginahimo naton sa templo, nagabaton kita sang mga pagpakamaayo sang mas dako nga gahum, mas dako nga gugma, mas dako nga kaluoy, mas dako nga paghangop, kag mas dako nga paglaum. Ang katahum kag kahalangdon sang mga pagselyo sa templo—sang mga miyembro sang pamilya nga nahugpong sa gugma sa wala katapusan—nagadala sing tuman nga kadayawan kag kalipay sa akon kalag kag nagapuno sa akon sang espiritu sang pagpasalamat.

“Kon may bisan ano nga pagtay-og nga nagakatabo sa inyo kabuhi, ang lugar nga pinakamalayo sa espirituhanon nga disgrasya amo ang pagtiner sa sulod sang inyo mga kasugtanan sa templo!” Naglaygay si Pangulong Nelson. Nakahibalo ako halin sa akon kaugalingon nga matam-is kag kon kaisa mapait nga mortal nga eksperiyensia sang pagkamatuod sinang mga pulong.

Si James Nathaniel Barlow, ang una nga bata ni Israel kag Elizabeth Barlow, napatay wala madugay pagkatapos nga natawo sia sang Mayo 1841. Pagligad sing pila ka tuig, ginhugpong sia paagi sa tal-os sa iya mga ginikanan sa Logan Utah Temple.

Drowing ni Allen Garns

Tipona Sila Pauli

Pagkatapos nga magpaalam si Israel Barlow sa iya diutay nga anak, nagsulat sia sa iya asawa, “Ang paghunahuna nga malayo ako katama, nga indi na magbalik pa sa lulubngan [ni James], tuman gid nga nagpalisud sa akon nga daw malupok ang akon dughan kag naghilibion sa iya lulubngan.”

Ginahunahuna ko nga mas madamo nga luha—mga luha sang kalipay na sa sini nga tion—ang nagtululagay sang Disyembre 4, 1889. Sa sina nga adlaw, ang diutay nga si James Nathaniel Barlow ginhugpong sa iya mga ginikanan sa Logan Utah Temple. Sa sina nga tion, nagtaliwan na si Israel, gani may mga nagtal-os para sa iya kag kay James.

Ako kag si Sister Kearon may pinasahi nga paghangop kag dako nga kaluoy para kay Israel kag Elizabeth. Ang amon una nga bata nga lalaki nga si Sean napatay sang ginaoperahan sia sa korason sang nagaedad pa lang sia sing tatlo ka semana. Halos daw katapusan na sang kalibutan para sa amon ang iya pagkadula. Sadto nga tion, naghunahuna kami kon bala malampuwasan namon ini. Ginlubong namon sia sa gamay nga lulubngan sa England. Pagligad sing kinse ka tuig, ginpangabay ang amon pamilya nga magsaylo halin sa amon puluy-an sa United Kingdom agud magserbe sing bug-os sa Simbahan, kag ginbilin namon inang gamay nga lulubngan.

Wala nadula sa amon ang amon anak sa pagpanglakaton pa-weste, kag wala man kami nag-antos sinang di-matungkad nga mga kabudlayan sang mga Barlow, pero amat-amat nga nahangpan namon kon ano ang ila naagihan. Ang lulubngan sang amon anak layo katama, apang pareho sa mga Barlow, may dalayon kami nga pagtuo sa Pagkabanhaw ni Jesucristo kag sa wala katapusan nga kinaiya sang amon pamilya paagi sa balaan nga kasugtanan sang paghugpong.

Tanan kita may mga katigulangan kag iban pa nga mga pinalangga nga nagtaliwan na nga nagasiling sa aton, “Indi ako pag-ibilin diri.” Bangod sa mga kasugtanan sa templo, wala sang dapat nga mabilin. Ang amon panawagan amo nga palanggaon sila, serbisyohan sila, kag buligan nga matipon sila pauli.

Ang aton Amay nga Langitnon nagapalangga sa aton, sa imo kag sa akon. Ginhatagan Niya kita sang mga templo agud nga “kon ano man ang [aton] hugpongon sa duta pagahugpongon sa langit” (Doktrina kag mga Kasugtanan 128:8; tan-awa man sa Mateo 18:18). Ginpadala Niya ang Iya Anak agud mabugto ang mga gapos sang kamatayon, nga nagbukas sang dalan para sa wala katubtuban nga mga kaangtanan kag wala katapusan nga pag-inupdanay sang mga pamilya.

Amo ina nga may mga ordinansa kita. Amo ina nga nagahimo kita sang mga kasugtanan. Amo ina nga nagapatindog kita sang mga templo. Amo ina nga nagadedikar kita sang aton mga kaugalingon sa buluhaton kag himaya sang Dios (tan-awa sa Moises 1:39). Kag amo ina nga nagahibi kita sa kalipay kay nakahibalo kita nga ang wala katapusan nga pag-inupdanay nagahulat sa aton kag sa aton mga pinalangga sa presensya sang Amay kag sang Anak.

Kabay nga masalapoan naton ang kalipay kag paghidaet sa aton pagtuman sang aton mga kasugtanan kag pag-upod sa Ginuo sa Iya mahimayaon, nagaluwas nga buluhaton.

© 2026 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, February 2026. Hiligaynon. 19933 861