Na Salatu ni Veiyalayalati Rekitaki

iTaba maivei Jerry Garns, e rawa ni lavetaki me baleta wale ga na veika ni Lotu

Yalayala Tabu

Na Tamada Vakalomalagi kei na Luvena, o Jisu Karisito, e rau lomani keda vakayadudua vakalevu cake mai na veika eda rawa ni vakasamataka rawa. E sega tale ni dua na vanua e vakatakilai vakalevu cake kina na Nodrau loloma me vakataka na veivakalougatataki yalataki e salavata kei na veiyalayalati a soli vei keda ena papitaiso kei na vale ni Turaga.

“E dua vei ira na ivakavuvuli bibi ni lotu sa vakatakilai mai sa ikoya e dua na veiyalayalati tabu,“ e vakavulica o Peresitedi Russell M. Nelson (1924–2025). “Ena vosa vakalawa, na veiyalayalati sai koya na ivakatakilakila ni nodrau veidinadinati e rua se sivia na tamata. Ia ena vakasama vakalotu, e bibi cake sara na veiyalayalati. Sa dua na yalayala tabu vata kei na Kalou.“

Na yalayala tabu yadua kece sara eda cakava ka maroroya ena vakalougatataki keda. Erau vinakata na Tamada Vakalomalagi kei na noda iVakabula o Jisu Karisito meda toro voleka yani vei Rau. E rau vinakata me rau vukei keda meda vuli ka tubu cake ena vakabauta kei na kila ka. E rau vinakata me rau vakalougatataki keda ena kaukauwa vakalomalagi. E rau vinakata meda kunea na veivakabulai kei na vakacegu ena vuravura e dredre me kune mai kina na veivakalougatataki vakaoqo. E rau vinakata meda vakila na reki ena bula oqo kei na bula sa bera mai. Ni drodro mai na loloma uasivi sara oqo, Rau sa solia vei keda na madigi meda curu kina dua na ivau ni veiyalayalati vata kei Rau. Sa noda na veivakalougatataki meda vakalesui kina veiyalayalati oqori ena veimacawa ena soqoni ni sakaramede.

Eda vakaivotavota ena sakaramede ena yalo ni vakavinavinaka baleta ni tiko vei keda na veivakalougatataki rekitaki ni da taura na yaca i Jisu Karisito, nanumi Koya kei na Nona loloma me baleti keda e vakaraitaki ena isolisoli ni Nona Veisorovaki—ni a vakararawataki, tiri Nona dra, ka mate ena vukuda. Na sakaramede e vakalougatataki keda talega ena dua na madigi vakamacawa me da vakaraitaka kina na noda lomasoli me da muria na Nona ivakaro, vakavouya na noda veiyalayalati, ka cakava e dua na veiyalayalati vou (raica na Vunau kei na Veiyalayalati 20:77, 79).

Sa vakawasoma, niu dau rogoca ni tukuni ni da vakayagataka na sakaramede me vakavoui kina na veiyalayalati e vakayacori ena papitaiso. Me vaka ga ni dina oqori, ia e levu cake sara mai na ka oqori,“ a kaya o Peresitedi Nelson. “Au sa vakayacora e dua na veiyalayalati vou. O ni sa vakayacora na veiyalayalati vou. Ia sa kena isau oqo ni sa mai kaya [na Turaga] ni na dau tiko ga kei keda na Nona Yalo Tabu. Sa veivakalougatataki cecere!“

Nida veivutuni ka vakaivotavota ena sakaramede ena yalo savasava, eda ciqoma na Yalo Tabu ka da “vakasavasavataki mai na ivalavala ca me vaka ga eda a papitaisotaki tale. Oqo na inuinui kei na loloma veivueti nei Jisu sa solia vei keda vakayadua.“

Sa dua dina na reki meda veivutuni ka vosoti ena loloma veivueti i Karisito!

iTaba ni Valetabu e Nauvoo Illinois mai vei Jennifer Rose Maddy

Na Nona Vale ni Reki

Ni yaco me sa Peresitedi ni Lotu i Jisu Karisito ni Yalododonu Edaidai, a dau vosa vakawasoma o Peresitedi Nelson me baleta na salatu ni veiyalayalati, a tekivu ena imatai ni nona itukutuku raraba vaka Peresitedi ni Lotu. Eda curuma na salatu o ya ena “veivutuni kei na papitaiso ena wai“ (2 Nifai 31:17), a kaya ena dua na gauna e muri, ka da “qai curuma vakataucoko sara ena valetabu.“

Me vaka ga ni noda taura na sakaramede e vakavotuya vei keda na noda veiyalayalati kei na kena veivakalougatataki ni tiko kina, sa vakakina na noda cakava na cakacaka ni veisosomitaki ena valetabu. Nida vakayacora na cakacaka vakalotu ni veisosomitaki vei ira sa mate oti, eda nanuma na yalayala tabu eda sa vakayacora kei na veivakalougatataki yalataki eda na ciqoma.

Mai na salatu ni veiyalayalati, eda sa yaco kina meda vakaivotavota ena veivakalougatataki kece sara a yalataki vei Eparaama, Aisake, Jekope, kei ira na nodratou kawa. Dina ga ni yaco na veivakalougatataki yalataki oqo, a sega ni yaco vei Eparama, Aisake, kei Jekope na bula rawarawa, sa vakakina vei keda. Me vakataki ratou, eda na sotava na dredre, na cudruvi, kei na mate ni da na “ vakatovolei ena ka kecega“ (Vunau kei na Veiyalayalati 136:31; raica talega na 101:4–5). Ia me vakataki ira ga na parofita kei na Yalododonu savasava ena gauna makawa, eda kila o cei eda rawa ni nuitaka (raica na 2 Nifai 4:19).

Na noda bula vakayago e dua walega na gauna ni noda bula, ia na gauna o ya—ena so na gauna e dredre sara—sa ka bibi tawamudu sara. Io, e vinakata na Tamada Vakalomalagi meda vuli ka tubu. Io, na tubu oqori ena so na gauna ena oka kina na lomaleqa kei na veivakararawataki. Ia e gadreva o Koya me totoka ka vakainuinui na noda bula. Me yacova mai oqori, ka me vakamamadataka na noda ilakolako lesu Vua, sa vakarautaka tu o Koya e dua na iVakabula, o koya “na ivakadei“ ni noda veiyalayalati kei Tamana. Mai na Veisorovaki i Jisu Karisito, e vakayacora vakataucokotaka kina na Tamada na yalayala a vakayacori vei ira na Luvena ena valetabu.

Mai na Nona loloma kei na solibula veisorovaki, sa mai walia kina ka vakabula na noda iVakabula na veika kecega eda na sotava ena noda bula. Ia ena vuku ni Nona vale savasava—Nona vale ni reki—ena vinaka na tamata kecega veitalia ga na veika dredre. Na iwali o ya na maroroi ni veiyalayalati ena kauta tani na lomaleqa, mosi, rarawa, kei na yaloluluqa. Me da kakua ni lomaleqa se rere. Ia, eda rawa ni rekitaka ni sa saumi oti na isau ni noda vakabulai (raica na 1 Korinica 6:20) ka sa vakotori oti na salatu ni veiyalayalati kina bula tawamudu.

Na salatu ni veiyalayalati sa salatu dina ni loloma veivueti. Nida rokova na veiyalayalati eda vakayacora ena valetabu, eda na ciqoma na veivakalougatataki ni kaukauwa cecere, loloma cecere cake, loloma veivueti cecere, kila vinaka cake, kei na inuinui e cecere cake. Na qoroqoro kei na lagilagi ni veivauci ena valetabu—vei ira na lewe ni matavuvale era vauci vata ena loloma me baleta na veigauna tawamudu taucoko—e kauta mai na qoroqoro kei na reki vakalevu sara ki yaloqu ka vakasinaiti au ena yalo ni vakavinavinaka.

“Ni yaco na veimataqali ua ena nomu bula, na vanua taqomaki ga mo tiko kina vakayalo o ya mo bula e loma ni nomu veiyalayalati ni valetabu!“ E vakasalataka o Peresitedi Nelson. Au kila mai na veika kamica kei na veika ca ni noqu bula au sotava ena so na gauna e vuravura ni sa ka dina sara na veivosa oqori.

Droini mai vei Allen Garns

Vakasokumuni Ira ki Vale

Ena iotioti ni nona vakamoce o Israel Barlow vei nona gonetagane lailai, a vola vei watina, “Na vakasama meu sa lako tani sara vakayawa, ka sega tale vakadua ena bula oqo meu lesu tale kina ibulubulu nei [James], a coviraka na iotioti ni wa ni loloma a tu vei au me yacova ni sa kavoro ena waini mataqu ena nona ibulubulu.“

Au raitayalotaka na wainimata levu cake—wainimata ni reki ena gauna oqo—a tuturu ena ika 4 ni Tiseba, 1889. Ena siga oya, a vauci o James Nathaniel Barlow vei rau na nona itubutubu ena Valetabu e Logan Utah. Ni oti o ya, e sa takali yani o Israel, ka so tale era sa qai tu mera veisosomitaki vua kei James.

Keirau sa qai dau vakanananu titobu sara kei Sisita Kearon ka lomani rau vakalevu sara o Israel kei Elizabeth. Na imatai ni luvei keirau, e dua na gonetagane na yacana o Sean, a mate ena gauna a sele kina na utona ni se qai macawa.tolu tiko. A vakacacana sara ga na neirau bula e vuravura na mate oqo. Ena gauna oya, keirau a vakataroga se rawa ni keirau bula se sega. Keirau a buluti koya ena dua na ibulubulu lailai rarawa mai Igiladi. Ni oti e tinikalima na yabaki, a kerei na neitou matavuvale me toki tani mai na neitou itikotiko mai United Kingdom me laki veiqaravi tudei ena Lotu, ka keirau biuta mai na ibulubulu lailai o ya.

Keirau a sega ni vakayalia na luvei keirau ena ilakolako kina ra, ka keirau sega ni sotava na nodrau dredre na Barlows e sega ni vakasamataki rawa, ia sa tu vei keitou na itekivu ni kena kilai na veika rau a sotava. Na ibulubulu nei neirau gonetagane lailai e yawa sara, ia me vakataki rau na Barlows, e tudei tu na neirau vakabauta na Tucaketale nei Jisu Karisito kei na ituvaki tawamudu ni neitou matavuvale ena veiyalayalati tabu ni veivauci.

Era tiko kece na tubuda kei ira na noda daulomani ena taudaku ni ibulubulu era kaya tiko vei keda, “Kakua ni biuti au eke.“ Me baleta na veiyalayalati ni valetabu, ena sega ni gadrevi me dua me guilecavi. Sa noda veikacivi meda lomani ira, qaravi ira, ka vukea mera vakasoqoni vata mai ki vale.

Na Tamada Vakalomalagi e lomani keda, o iko kei au. Sa solia tu vei keda na valetabu me rawa kina “ni veika [eda] vauca e vuravura sa vauci mai lomalagi“ (Vunau kei na Veiyalayalati 128:8; raica talega na Maciu 18:18). A tala mai na Luvena me musuka na ivau ni mate, ka taqomaka na sala ni isema tawamudu kei na veisotari ni matavuvale tawamudu.

Oqori na vuna era tu kina na cakacaka vakalotu. Oqori na vuna eda cakava kina na veiyalayalati. Oqori na vuna eda tara kina na valetabu. Oqori na vuna eda vakatabui keda kina ki na cakacaka kei na lagilagi ni Kalou (raica na Mosese 1:39). Oqori na vuna e tuturu kina na wainimata ni reki, ni kilai tiko ni dua na veivakaduavatataki tawamudu e waraki keda tu kei ira na noda daulomani ena iserau ni Tamada kei na Luvena.

Meda sa kunea na reki kei na vakacegu nida maroroya na noda veiyalayalati ka tomana na Turaga ena Nona cakacaka lagilagi ni veivakabulai.