“Ewe Anen Pwon mi Apwapwa,” Liahona, Feb. 2026.
Porous Ren LiahonaIteiten Maram, February 2026
EweApwapwan Anen Pwon
Ewe amwararen me eingeingen chon ewe famini ra fofo fengen mwen mesen Kot me ewe Nau a wato wachemuken amwarar me pwapwa ngeni nguni me amasowaei ren ew ngunun kinisou.
Elter Patrick Kearon me punuwan, Jennifer
Nupwen Israel me Elizabeth Haven Barlow ra no seni Nauvoo, Illinois, ren ewe Salt Lake Valley non 1848, ra nikitano emon monukon at a peias non ew kukkun nenien peias Nauvoo. Kukkun James Nathaniel Barlow, nour ewe akaewin semirit, a mano ekis chok fansoun mwirin an uputiw May 1841.
Fiti ar ra no ren ewe Salt Lake Valley, Israel me Elizabeth rese mo fen pwan ekieki pwe repwe nengen sefani peiasen nour ewe. Nge nupwen Israel a kokko ngeni won ew misin ngeni England ekkoch ier mwirin, a sai seni Nauvoo nupwen a sai ngeni notou. Ren an Elizabeth tingor, a kouno an epwe kuta peiasen noun ewe me omokutu peirakin kewe ngeni ewe popunapen nenien peias otiwen ewe neni a watte seni ew sopw, kukkun seni ew teninimw.
Mwirin ew ranin an kut, Israel a tingor aninis seni ewe chon ewe neni chon tumun. Ewe ran mwirin, ra kuna ewe peias, a nom unukun peiasen James tetenin mongeen Mary. Anetipengawan, pwe kewe pwor ra minen nom me ra ta. Non echo taropwe ngeni punuwan ewe, Israel a makkei, “Ina minne ngang ua kunuseni me awesano pwe ngang upwe nikitireno ikanan tori ewe fansoun mwach.”
Ese mo fetan towaw seni ewe peias nupwen a rongorong ew mongungu. Chemensefani met ewe a fisingeni, a makkei, “Esap ew wesetan kapas, nge a fatengeni ai ekiek pwe use tongeni upwe mwaken: ‘Papa, kosap nikitieino ikei.’” Israel a niwin sefani ngeni ewe peias, awesano ren an a angeano noun kukkun at. “Ua mefi ew memef mi fen weires ai upwe weweiti ai uwa mefi an ekieki a masosotiw me kinamwe minne use mefi me akkom. … Iei chok ukukun upwe apasa: pwe use mo fan ew ai upwe kon fen weweiti sokkun wis epwe fis non manauei.”
Non September 2, 1853, Israel Barlow me ewe chon tumunu nenien peias ra omokutu inisin James me Mary ngeni an Nauvoo ewe ionapen nenien peias, ra esisina ewe neni ren “fau unun mokuran me unun pechen kewe peias”
Israel a ureni Elizabeth pwe nupwen an ewe a ekis nomotam ikewe , “ua mefi ew mochen ai upwe fangeno inisi me meinisin minne uwa eita ngeni pwe ai ngeni nepoun ewe Samon, pwe upwe pachenong nein mi nimenimoch ne feito fiti [James] non ewe sosoran ren ewe Aewin Manausefan.”
An Israel nikitu ngeni ewe kapas allimen Jises Kraist, a echiechi ngeni afona ekkewe pwon mi pin, a mut ngeni Kraist an epwe fori manau esemuch—pwe ewe a kon eingeing me nein feioch meinisin—epwe tufich fan itan, an kewe neuo me tappin aramas non fansoun mwach.
A pwan iei usun ren kich meinisin.
Sasing seni Jerry Grans, mi ok epwe kapi ren an Mwichefen epwe nounou.
Pwon mi Pin
Samach won Nang me Noun we, Jises Kraist, ra tongei emon me emon kich pekinon kewe mettoch sia tongeni ekieki. Ese wor ian Ar tong a kon pwa me ian nap seni ekkewe feioch mi pwon echiechi ngeni ekkewe pwon mi pin ra kawor ngeni kich atun papatais me non ewe imwen ewe Samon.
“Ew me nein kewe a kon auchea menapen porousen ew watten angang ina ren ew pwon mi pin,” Preseten Russell M. Nelson (1924–2025) a osukuna “Non kapas non pekin annuk, ew annuk mi pin a awora ew etipeew nefinen ruu ika chommong mwich. Nge non ew nonnomun namanam, ew annuk mi pin mi kon auchea. Mi ew pwon mi pin ngeni Kot.”
Meinisin pwon mi pin sia fori me aponueta a efeiochukich. Samach won Nang me ach Chon Amanau Jises Kraist ra mochen sipwe arap ngeni Ir. Ra mochen ar repwe anisi kich. Ra mochen repwe ngeni kich niffang fiti manamanen nang. Ra mochen kich sipwe kuna chikar me kinamwe non ew fonufann ikewe kewe feioch mi weires ach sipwe kuna. Ra mochen sipwe mefi pwapwa non ei manau me non ewe manau epwe feitto. Puputo seni ei tong mi unusoch, Ra ngeni kich ewe tufich ach sipwe tonong non ew ririn pwon ngeni Ir. A wor rech ewe feiochun niwin ngeni ekkana pwon mi pin iteiten wik non fansoun mwichen sakramen.
Sia angei ewe sakramen non ew ngunun kinisou pokiten sia aani ewe feiochun pwapwan wata woch ewe iten Jises Kraist, chechemeni I me An tong fan itach a pwa seni ewe niffangen An Achasefan—iwe I a riaffou, mononeni cha, me mano fan itach. Ewe sakramen a pwan efeiochu kich ren ew tufich iteiten wik ne pwarano ach mochen sipwe aponueta An annuk, asofosefani ach kewe pwon, me fori ew minefon pwon. (nengeni Doctrine and Covenants 20:77, 79).
“Fan chommong, ua rongorong ewe foforun pwe sia angei ewe sakramen ach sipwe asofosefani ekkewe pwon ra for atun papatais. Nupwen ena mi pung, afen watte seni ena,” Preseten Nelson a apasa. “Uwa fen fori ew minafon pwon mi pin. Ka fen fori minafon pwon mi pin. … Iwe ren niwinin ren minne [ewe Samon] a fori ewe pworous pwe Ngunun epwe nonomw rech fansoun meinisin. Met me kinisouch ren ei feioch!”
Nupwen sia aier me angei ewe sakramen fiti ew nimenimochun netip, sia angei ewe Ngun mi Fel me sia “nimoch seni tipis ussun nge sia pwan papatais sefan. Iei ewe epinukunuk me umoumouch Jises a ngeni emon me emon kich.”
Met me apwapwan ach aier me musono seni An Kraist tongen angasano!
Sasingin Nauvoo Illinois Tempel seni Jennifer Rose Maddy
Imwan imwen pwapwa
Mwirin an a winiti Presetenin Ewe Mwichefenin Jises Kraist ren Aramas mi Pin non Fansoun Soponon, Preseten Nelson a kapas fan chommong ussun ewe anen pwon, poputa ren an aewin porous non nenien aramas chommong ussun Presetenin ewe Mwichefen. Sia tonong non ena an seni “aier me papatais ren konik” (2 Nifai 31:17), a apasa fan ew mwiring me “mwirin sia tonong non ren unusan non ew tempel.”
Nupwen chok ach angei ewe sakramen a achema ngeni kich kewe pwon me ar nongonongun pung me mwan, nge a fori ei angang fan iten ekkoch non ewe tempel. Nupwen sia fori ekkewe angangepin ren ach fori fan iten ekkoch ren ekkana rafen mano, sia chechemeni ekkewe pwon mi pin sia fori me ekkewe pwonen feioch sipwe angei.
Seni ewe anen pwon, sia winiti chon anemwir ngeni meinisin ekkewe pwonen feioch ngeni Abraham, Isaac, Jacob me meinisin tapin aramas non fansoun mwach. Inamo ren ekkana pwonen feioch, Abraham, Isaac, me Jacob ese mecheres ar emweni manauer, me esap pwan kich. Chok usur, sia mesengeni weiresikis, nonomongaw, me poutunon tufich “sotuni non mettoch meinisin” (Doctrine and Covenants 136:31; pwan nengeni 101:4–5). Nge ussun kewe soufos me souneng mi tupwon me nom, sia sinei ion sipwe ani epinukunuk (nengeni 2 Nifai 4:19).
Manauach iei mi nge ew fansoun non ach nonnom, nge ena fansoun—fan ekkoch a fokkun weires—mi auchea feinfeino. Ewer, Samach won Nang a mochen kich sipwe kaeo me marita. Me, ewer, ena marita fan ekkoch a wewennetipengaw me riaffou. Nge I a mochen manauach repwe ningoch me epinukunuk. Ngeni ena soponon, me ach sipwe okukunatiw ach niwinsefan ngeni I, I a fen awora emon Chon Amanau, mi ewe “chon awora pwon” ren ach pwon mi pin ngeni Saman we. Seni ewe Achasefan an Jises Kraist, ewe Sam a ounusochuono ekkewe pwon a fori ngeni noun semirit non ewe tempel.
Seni An tong me asoren achasefan, ach Chon Amanau a wisen atawei me echikara mettoch meinisin sia mese ngeni non manau. Me pokiten Imwan mi pin—Imwan imwen pwapwa—meinisin repwe murinno inamo ren weiresin nonomuch. Ewe safeen aponueta pwon mi pin a pirumeno netipengaw, metek, netipechou, me kokotongaw. Ese namot sipwe ourek ika nuokus Iwe nge, sia tongeni pwapwa pwe ewe niwinin ach ngaseno a fen kamo (nengeni 1 Corinthians 6:20) me ewe anen pwon ngeni manau esemuch a fen pwar.
Ewe anen pwon ew ennetin anen tongen angasano. Nupwen sia afona kewe pwon mi pin sia fori non ewe tempel, sia angei ekkewe feiochun watten manaman, watten tong, watten umoumoch, watten mirit, me watten epinukunuk. Ewe eingeingan me amwararen riri non tempel—ren chochon ewe famini chufengen non tong fein feino—a wato watten nununon eingeingen me apwapwa ngeni nguni me amasouaei ren ew ngunun kinisou.
Nupwen och sokkun awosukosuk a fis non manauemi, ewe neni mi tumun ren ngunumw ren omw kopwe nonomw non omw pwonen non tempel! Preseten Nelson a auroura kich. Ua sinei seni pusin ai fansoun mi ngarangar me kipwin ua mefi ewe ennetin ekkana kapas.
James Nathaniel Barlow, ewe aemonun semirit noun Israel me Elizabeth Barlow, a mano ekis chok fansoun mwirin an uputiw non May 1841. Chommong ier mwirin, i a riri ren emon a fori fan itan ngeni inan me saman non ewe Logan Utah Tempel.
Sasing seni Allen Garns
Ochufengenir Neimw
Mwirin an Israel Barlow a awora an omuchunon kapong ngeni noun ewe kukkun at, i a mak ngeni punuwan ewe, “Ekkewe ekiekin ai upwene atowawano inisi esap chiwen fan ew upwe chiwen niwin ngeni peiasen [James] ewe, ese pung ngeni ewe amuchunon metekin tong ua mwarei tori an epwe tano fiti kechiw won peiasan ewe.”
Ua anchangei ena chommongun surun chonun mas—ei fansoun surun chonun mas ren pwapwa—ra surutiw won December 4, 1889. Won ena ran, kukkun Jame Nathaniel Barlow a riri ngeni saman me inan kewe non ewe Logan Utah Tempel. Mwirin, Israel a mano, nge ekkoch ra uta ar repwe fori fan itan me James.
Sister Kearon me ngang a wor am memefin me watten tong fan iten Israel me Elizabeth. Neum ewe aemonun semirit, emon at itan Sean, a mano non atun an wor angangen reirei won ngasangasan nupwen i a chok karan unungat wikan. Ei a ew watten tatakis ngenikich. Ren ewe fansoun, am ouwa ekieki ika sipwe tongeni manau. Am oua peiaseni i non ew ametekin kukkun peias non England. Engon me nimu ier mwirin, ach famini a mokut seni imwach ewe non ewe United Kingdom ren am oupwe fori angangen Mwichefen, iwe am ouwa nikitano ena kukkun peias.
Nouch ewe monukon ese pout senikem won ewe nakatamen sai won peche me eotiw, me sise ani riaffoun ewe weires sise tongeni weweiti an kewe Barlows, nge a wor ach poputan ew wewe ren met a fisi ngenir. Peiasen nouch ewe monukon a fokkun towaweno, iwe nge usun ekkewe Barlows, a wor ach nuku non ewe Manausefan an Jises Kraist me ewe nonomun ach famini ese much seni ewe pwonen riri mi pin.
Kich meinisin a wor ach neuo me ekkoch atongeach pekinon ewe peias ra urenikich, “Ousap nikitieino ikei.” Pokiten ekkewe pwonen non tempel mi pin ese wor emon epwe nomotiw. Kokkoch pwe sipwe tonger, angang ngenir, me anisir ne ioni ionifengenirenong neimw.
Samach won Nang a tongekich, en me ngang. I a fen ngenikich ekkewe tempel “minne met [sia] fotekini won fonufan epwe pwan fotek non nang” (Doctrine and Covenants 128:8; pwan nengeni Matthew 18:18). I a tinato Noun we Anamon an epwe ataeno ekkewe fofon mano, asosonochu ewe an ren fofo ese much me chusefan fengenin famini fochofoch.
Ina pwata a wor ach angangepin. Ina pwata sia fori pwon mi pin. Ina pwata sia oueta ekkewe tempel. Ina pwata sia fangeno inisich ngeni An Kot angang me ning (nengeni Moses 1:39). Me ina pwata sia kechiwen pwapwa, ach sinei pwe ew chusefan feinfeino a utikich me atongeach kewe non ewe fansoun ren ewe Sam me ewe Nau.
Amo sipwe kuna pwapwa me kinamwe nupwen sia aponueta ach kewe pwon mi pin me fiti ewe Samon non An ningen angangen amanau.
© 2026 by Intellectual Reserve, Inc. Meinisin pung mi kawor. Mi katou non USA. Kapunguno non fosun Merika: 6/19. Kapungunon chiakun: 6/19. Chiakun Porous ren Liahona Iteiten Maram, February 2026. Chuukese. 19933 901