Irail me kin ale Sapwellimen Koht Inou Kan

Nan pwihn en sawas en mour mwohn mour wet, Sahm Nanleng kasalehiong Sapwelime seri ngehn kan Sapwelime pilahn en kekeirida potopot oh peren soutuk.

“Kitail pahn wiahda ehu sampah wasa irail kak kousoan ie;

“Oh kitail pahn kasalehiong irail mepwukat, irail en kilang ma irail kak wiahda soahng koaros me Kauno arail Koht masanihong irail;

“Oh ma kitail pahn kapwaiada atail irair keieuo me laudsang pahn kohieng kitail, oh ma kitail sohte kapwaiada atail irair keieuo kitail sohte pahn ahniki kilohri nan wehi ohte rehn irail me kapwaiada arail irair keieuo, oh irail akan me kapwaiada arail irair keriauo pahn alehdi kilohri pohn moangarail kan kohkohlahte.

“Eri Sahmo mahsanih, Ihs me I pahn kadarala? Eri emen sapeng nin duwen Nein Aramas: Iet ih Ngehi, komw kadariehla, Oh emen sapeng oh kosoia: Iet ih ngehi, kadariehla. Eri Kauno masanih: ih pahn kadarala me tepio.

“Eri me keriau o lingeringer da, oh sohte kolokol te ah sohso keieu o; oh, rahno, me tohto idahwenla ih“ (Abraham 3:24–28).

Intingihdi me pilahn ehu te me kasansalada nan tuhpeneo—iei sapwelimen Sahmo pilahno. Samatail Nanleng soht kihda peideko, “Dahme kitail en wia?“ E sohte rapahki dahme e pahn kapatahiong, kaweid teikan, de peki iren kaweid kan. Ahpw, E kasalehda te Sapwelime pilahn oh peidek. “Ihs me ih pahn kadarala?“ Mour en Sapwelime peidek wet poasohnda sang ihs e pahn pekederla oh kalowehdi irair koaros oh kosonidi kan en Sapwelime pilahn.

Kalokepen imwitihtiho pil sansalada nan pwuhk sarawi kan.

“Eri, pwehki Sehdan ah uhwong iehda, oh rapahki pwehn kawehla mehn pilipil en aramas, me ih … kihong ih, oh pil, me iehn pil kihong ih pein ai manaman … , me elehiong ah pisikendilah pah;

“Eri ih wiahla Sehdan, … tepel o, pahpa en likamw koaros, en pitih oh kamaskunihla aramas, oh kahreiong irail arail lohdiong pah, pil iangahki koaros me sohte pahn rong ai mahsen“ (Moses 4:3–4; emphasis added).

Lucifer sohte kihda ah pilahn me pahn usuhsda sang pali tohto en irail akan me iang mihting wet nan mour teio. Kaidehn ih aramas mwahu men me luhs ni usuhs ehu. E uhwongada! Pohnmwahso, aklapalap, oh medewehte pein kowe iei mwomwen ah uhwongada sapwelimen Sahmo pilahno.

Pilahn o kawewehda doadoahk en Sahmo oh Naho me kahreiong aramas koaros ah kak iang sosohki mour soutuk.

Rongamwahu en Sises Krais kin kawewehda ahl me kitail en kak iang alehdi kapai kan me Koht inoukihdi nan sapwelime pilahno, pil iangahki padahk kesempwal akan, me mehlel kan, tiahk sarawi kan, oh inou kan me ohl oh lih emen en kamelele oh idahwen. “Sohte pahn mie ehu mwahr tohrohr pohn sampah likin Sises Krais … me aramas pahn kak komourkihla”(2 Nephi 25:20). Ni mehlel, Kaun Sises Krais “me ahl, me mehlel, oh me mour: sohte me kak kohla rehn Sahm, ma sohte [Ih]” (Sohn 14:6; mehn kapatapat).

Preseden Russell M. Nelson kawewehda:

“Pilahno anahne Kapikipikdao, oh pwehki mwo e anahne Pwopwilahu oh Tomwo. Iet mepwukat me wia poahson en pilahn o. Koapikipikdahn sampah me duwehte paradis o kohsang reh Koht. Mour en uduk oh mehla kohdo sampah wet sang ni Pwopwilahn Adam [kilang 2 Nephi 2:25; Moses 6:48]. Mour mwurin mour wet oh atail kak ahneki mour soutuk kohdo sang ni Tomwpen Sises Krais [kilang 2 Nephi 2:21–28]. …

“… Kitail mih pohn sampah ahnsou tikitik te, dadaur atail tes kan oh kahpwal kan, oh kounopada en wonla mwowe oh powe ong ni pwurehng sapahl lingano [kilang Psalm 116:15; Alma 42:8]. Atail madamadau oh wiewia kan ansou [nan mour wet] pahn ahneki kahrepe ma kitail wewehki sapwelimen Koht pilahn oh kapingki oh peikiong Sapwelimen kosonned akan { [kilang Doctrine and Covenants 59:20–21].”

Kitail kin esehla mehlel kesempwal akan sang ni atail kilikilang oh ononopiki songesongen oaralap kan ong sapwelimen Sahmo pilahn kan nan Pwuhk en Mormon: Ehu Kadehdepen Sises Krais. Ni karasepe, medewe oaralap kan me pilipildahr pah:

“Pilahn kaselel en Ih me Kapikadahr sohng koaros“ (2 Nephi 9:6).

“Sapwellimen Koht pilahn“ (2 Nephi 9:13).

“Pilahn en komour“ (Jarom 1:2; Alma 24:14).

“Pilahn en doarehla“ (Alma 12:25, 26, 30, 32, 33; 42:11, 13).

“Pilahn en kapwurupwurdo“ (Alma 41:2).

“Pilahn en peren“(Alma 42:16).

“Pilahn Lap en mahk“ (Alma 42:31).

Oaralap pwukat kin sewese kitail en esehla laud duwen inou kan me kohsang pilahn en Sahmo oh kin kalaudehla marain en kahrepen oh wehwehn atail mour kan.

Mehlel, oaralap me keieu wad ong sapwellimen Koht pilan nan Pwuhk en Mormon inenlahng doarehlahn aramas me wiawi pwehki Tomwpen Sises Krais.

Alma kosoia, “ma e sohte pahn mie koasoandi en poadoandoaralao, me wiawihda sang ni tepin sampah eh wiawihda, e sohte pahn mie iasadahn me mehla; ahpw mie koasoandi en poadoandoarala wiawihda, me pahn kahrehda iasadahn me mehla“ (Alma 12:25).

Alma koasoia, “tepida kamehlele Sapwellimen Kohto, me e pahn ketido oh doarehla sapwellime aramas akan, oh me e pahn lokolongki oh pwoula pwe en tomwkihla diparail akan; oh me e pahn iasada sang me melahr akan, me pahn tapiada iasadao, pwe aramas koaros pahn uh mwowe, pwe re en pakadeikda ni imwin rahno iei rahn en kadeik, nin duwen ar wiewia kan.”(Alma 33:22).

Palingenitail kan en audaukilahr kaping ni atail medewe sapwelimen Koht pilahn en komouro, doarehpetail, kapwurehdo, mahk, oh peren. Marain en Sapwelime pilahn kin wahdo songesongen koahiok tohto, kin kalaudehla atail peren, oh kin kakehlailih kitail en kalowehdi atail kahpwal akan oh kasongosong kan.

Samatail Nanleng kupwuriki laud kitail en pwurala Reh. E kin ketin luke oh inoukihda kapai kan, ahpw E sohte pahn iding, de idingohng uhk en wia mehkot, de saliedi kowe sang omw pilipil kan me E ketikiong kitail. Kitail anahne mwekid oh pwurala Reh sang idahwen karasaras en Sapwelime Iehroso.

His Hand Is Stretched Out Still, by Elizabeth Thayer

“Ahlo kounopadahr, oh ma kitail pahn kilang, kitail ahpw pahn kak momour kokolahte“ (Alma 37:46;).

I wia emen soun kadehde me Sahm Nanleng me koasoanehdi pilahn kaselel ong Sapwelime seri kan. Sises Krais iei atail Sounkomour oh Soundor. Oh ni ai wia emen sapwellimen Kauno Wahnpoarahn ni imwin-rahn akan , ih kadehdeki me ie Ih “me ahl, me mehlel, oh me mour“ (Sohn 14:6;).