Mga Umalambit sang Kinaugali nga Diosnon

(2 Pedro 1:4)

Ni Elder David A. Bednar

Sang Korum sang Dose ka Apostoles

Ang ihibalo parte sa plano sang kaluwasan nagahatag sing importante nga perspektibo, nagapadugang sang aton kalipay, kag nagapabakod sa aton agud madaug ang aton mga hangkat kag mga kabudlayan.

ilustrasyon kay Cristo nga nagatawag sang duha ka disipulo

Ang Apostoles nga si Pedro nagapahanumdum sa aton nga para sa mga disipulo ni Jesucristo, ang Iya “diosnon nga gahum naghatag sa aton sang tanan nga butang nga parte sa kabuhi kag pagkadiosnon, bangod sa pagkilala sa iya nga nagtawag sa aton sa himaya kag pagkahalangdon:

“Bangod sini gintugot sa aton ang hamili kag tama kadako nga mga promisa: agud nga paagi sini sa ila mangin mga umalambit sang kinaugali nga diosnon” (2 Pedro 1:3–4; emphasis gindugang).

Ang plano sang Amay nga Langitnon nagalaragway sang tuman ka dako kag importante nga mga kamatuoran kag mga promisa nga nagapat-od sang aton wala katapusan nga pagkatawo kag katuyoan.

Suno sa ginpaathag sa “Ang Panimalay: Isa ka Proklamasyon sa Kalibutan”:

“Ang tanan nga tawo—lalaki kag babayi—gintuga sa dagway sang Dios. Ang kada isa isa ka pinalangga nga espiritu nga anak nga lalaki ukon anak nga babayi sang langitnon nga mga ginikanan, kag tungod sina, ang kada isa may diosnon nga kinaiya kag kapalaran. …

“Sa kalibutan sang wala pa mabun-ag, ang espiritu nga mga anak nga lalaki kag mga anak nga babayi nakakilala kag nagasimba sa Dios bilang ila Wala’y Katapusan nga Amay kag nagbaton sang Iya plano nga paagi sa sini ang Iya mga kabataan sarang makaangkon sing isa ka pisikal nga lawas kag makaagom sang dutan-on nga inagihan sa pag-uswag padulong sa kahimpitan kag sa katapusan makalab-ot sa ila diosnon nga kapalaran bilang mga manunubli sang kabuhi nga wala’y katapusan.”

Ang Amay nga Langitnon nagapromisa sa Iya mga anak nga kon sundon nila ang mga prinsipyo sang Iya plano kag ang ehemplo sang Iya Hinigugma nga Anak, tumanon ang mga kasugoan, kag magpadayon sa pagtuo tubtob sa katapusan, “magaangkon [sila] sang kabuhi nga wala’y katapusan, nga sa diin ini nga dulot ang pinakadako sa tanan nga dulot sang Dios” (Doktrina kag mga Kasugtanan 14:7).

Ang buluhaton sang Dios nakatutok sa pag-uswag kag pagpahitaas sang Iya mga anak. Ang tagsa ka aspeto sang Iya plano gindesinyo sa pagbugay sang Iya mga anak nga lalaki kag mga anak nga babayi tungod “dako ang bili sang mga kalag sa [Iya] panan-awan” (Doktrina kag mga Kasugtanan 18:10).

Ang Plano sang Amay

Sa premortal council, ginpresentar sang Amay nga Langitnon sa Iya espiritu nga mga anak ang Iya plano para sa ila wala katapusan nga pag-uswag kag kalipayan.

“Mahimo kita sang duta nga sa diin ang mga ini makapuyo;

“Kag tilawan naton sila sa sini, agud mahibaloan kon himuon nila ang tanan nga butang nga isugo sa ila sang Ginuo nga ila Dios;

“Kag sila nga magatipig sang ila una nga kahimtangan pagadugangan; kag sila nga indi magtipig sang ila una nga kahimtangan indi makaangkon sang himaya sa amo man nga ginharian upod sinang magatipig sang ila una nga kahimtangan; kag sila nga magatipig sang ila ika-duha nga kahimtangan pagadugangan sang himaya sa ila mga ulo tubtob sa wala’y katapusan.

“Kag ang Ginuo nagsiling: Sin-o ang akon ipadala? Kag may isa nga nagsabat nga pareho sa Anak sang Tawo: Yari ako, ipadala ako. Kag ang isa pa gid nagsabat kag nagsiling: Yari ako, ipadala ako. Kag ang Ginuo nagsiling: Ipadala ko ang una.

“Kag ang ika-duha naakig, kag wala nagtipig sang iya una nga kahimtangan; kag, sina nga adlaw, madamo ang nagsunod sa iya” (Abraham 3:24–28).

Talupangda nga isa lang ka plano ang ginpresentar sa premortal council—ang plano sang Amay. Ang aton Amay nga Langitnon wala nagpamangkot, “Ano ang aton himuon?” Wala Sia nagpangita sang mga ideya, nagpangayo sang mga rekomendasyon, ukon nagpangabay sang mga suhestyon. Kundi, ginpresentar Niya ang tig-una nga mga elemento sang Iya plano kag nagpamangkot, “Sin-o ang akon ipadala?” Ang sentro sang Iya pamangkot nakatutok sa kon sin-o ang dapat ipadala nga maghikot sang mga termino kag mga kondisyon sang Iya plano.

Ang mga konsikwensya sang pagrebelde sang kaaway ginalaragway man sa balaan nga mga kasulatan.

“Gani, bangod inang si Satanas nagrebelde sa akon, kag nagtinguha sa pagguba sang kahilwayan sa pagpili sang tawo, nga ginhatag ko … sa iya, kag bangod man, nga ihatag ko ang akon kaugalingon nga gahum sa iya … , ginsugo ko nga tabugon sia;

“Kag sia nangin si Satanas, … ang yawa, ang amay sang tanan nga kabutigan, nga magpatalang kag magbulag sang mga tawo, kag dal-on sila sa pagkaulipon sa iya pagbuot, bisan pa ang tanan nga indi magpamati sa akon tingug” (Moises 4:3–4; emphasis gindugang).

Si Lucifer wala nagpresentar sang plano nga ginsikway sang kalabanan sang mga partisipante sa premortal council. Sia indi nga isa ka makaluluoy nga tinuga nga napierde sa eleksyon. Nagrebelde sia! Ang bugal, pagkaarogante, kag pagkamaiyaiyahon ang nagtulod sa iya nga magrebelde batok sa plano sang Amay.

Ang Plano sang Amay kag ang Ebanghelyo sang Manluluwas

Ang plano nagalaragway sang mga buluhaton sang Amay kag sang Anak nga nagapatigayon sa tanan nga katawhan sang mga bugay sang kabuhi nga wala katapusan.

Ang ebanghelyo ni Jesucristo nagalakip sang paagi kon sa diin makabaton kita sang mga bugay nga ginpromisa sa plano sang Dios, bisan pa ang doktrina, mga prinsipyo, mga ordinansa, kag mga kasugtanan nga dapat ginapati kag ginasunod sang mga lalaki kag mga babayi. “Wala na sing iban pa nga ngalan nga ginhatag sa idalom sang langit luwas sa sining Jesucristo … nga paagi sa iya ang tawo mahimo nga maluwas” (2 Nefi 25:20). Matuod nga ang Ginuong Jesucristo amo “ang dalan, ang kamatuoran, kag ang kabuhi: wala’y nagaabot sa Amay, kundi paagi sa [Iya]” (Juan 14:6; emphasis gindugang).

Si Pangulong Russell M. Nelson nagpaathag:

“Ang plano nagkinahanglan sang Pagtuga, kag bangod sini nagkinahanglan dayon sang Pagkahulog kag Pagbayad-sala. Ini ang tatlo ka panguna nga mga bahin sang plano. Ang pagtuga sang paraisuhanon nga planeta naghalin sa Dios. Ang kabuhi sa duta kag kamatayon nagluntad sa kalibutan paagi sa Pagkahulog ni Adan [tan-awa sa 2 Nefi 2:25; Moises 6:48]. Ang pagkawala’y kamatayon kag ang posibilidad sang kabuhi nga wala katapusan ginhatag sang Pagbayad-sala ni Jesucristo [tan-awa sa 2 Nefi 2:21–28]. …

“… Nagakari kita sa duta para sa malip-ot lamang nga tion, nagabatas sang aton mga pagtilaw, kag nagahanda nga magpadayon kag padulong sa mahimayaon nga pagpauli [tan-awa sa Salmo 116:15; Alma 42:8]. Ang aton mga panghunahuna kag mga buhat samtang [sa duta] pat-od nga mangin mas mapuslanon kon mahangpan naton ang plano sang Dios kag nagapasalamat para sa kag nagatuman sang Iya mga kasugoan [tan-awa sa Doktrina kag mga Kasugtanan 59:20–21].”

Mga Tig-ulo sang Plano sa Libro ni Mormon

Mahibaloan naton ang importante nga mga kamatuoran paagi sa pagkilala kag pagtuon sang madamo nga lainlain nga mga tig-ulo sang plano sang Amay sa Libro ni Mormon: Isa pa ka Katipan parte kay Jesucristo. Halimbawa, hunahunaa ang masunod nga ginpili nga sampol sang mga tig-ulo:

“Ang maluluy-on nga plano sang dako nga Tagtuga” (2 Nefi 9:6).

“Ang plano sang aton Dios” (2 Nefi 9:13).

“Ang plano sang kaluwasan” (Jarom 1:2; Alma 24:14).

“Ang plano sang pagtubos” (Alma 12:25, 26, 30, 32, 33; 42:11, 13).

“Ang plano sang pagpanumbalik” (Alma 41:2).

“Ang plano sang kalipayan” (Alma 42:16).

“Ang dako nga plano sang kaluoy” (Alma 42:31).

Ang tagsa sining mga tig-ulo nagabulig sa aton nga mahangpan sing mas maathag ang importante nga mga promisa sang plano sang Amay kag nagapasangkad sang aton paghangop parte sa mga katuyoan kag kahulugan sang aton mortal nga kabuhi.

Talalupangdon nga ang masami gid nga ginagamit nga tig-ulo sa plano sang Dios sa Libro ni Mormon nagatutok sa pagtubos nga ginhimo nga posible paagi sa Pagbayad-sala ni Jesucristo.

Si Alma nagpahayag, “Kon indi tungod sang plano sang pagtubos, nga ginpahamtang halin pa sa pagtuga sang kalibutan, wala kuntani sing matabo nga pagkabanhaw sang mga minatay; apang may isa ka plano sang pagtubos nga ginpahamtang, nga magapahanabo sang pagkabanhaw sang mga minatay” (Alma 12:25).

Nagpaandam man sia, “Magsugod sa pagpati sa Anak sang Dios, nga magakari sia agud tuboson ang iya katawhan, kag magaantos sia kag mapatay agud magbayad para sa ila mga sala; kag magabangon sia liwat halin sa mga minatay, nga magapahanabo sang pagkabanhaw, agud ang tanan nga tawo magatindog sa iya atubang, agud hukman sa katapusan nga adlaw kag adlaw sang paghukom, suno sa ila mga binuhatan” (Alma 33:22).

Ang Alagyan Ginhanda

Ang aton mga kalag dapat mapuno sang pagpasalamat sa aton paghunahuna sang dako nga plano sang kaluwasan sang Dios, pagtubos, pagpanumbalik, kaluoy, kag kalipayan. Ang ihibalo parte sa Iya plano nagahatag sing importante nga perspektibo, nagapadugang sang aton kalipay, kag nagapabakod sa aton nga madaug ang aton mga hangkat kag mga kabudlayan.

Gusto gid sang Amay nga Langitnon nga makapauli kita sa Iya. Nagaagda Sia kag nagapromisa sang mga bugay, pero indi gid Sia magpamilit, magpuwersa, ukon magpugong sang paggamit naton sang kahilwayan sa pagpili nga ginhatag Niya sa aton. Kinahanglan kita mag-akto kag magpili nga magbalik sa Iya paagi sa pagsunod sang ehemplo sang Iya Hinigugma nga Anak.

ilustrasyon sang kamot sang isa ka bata nga nagalab-ot sang kamot ni Jesucristo

“Ang alagyan ginhanda, kag kon magtulok kita mabuhi kita tubtob sa wala’y katapusan” (Alma 37:46; emphasis gindugang).

Malipayon ako nga nagapamatuod nga ang Amay nga Langitnon ang ginhalinan sang diosnon nga plano para sa Iya mga anak. Si Jesucristo ang aton Manunubos kag Manluluwas. Kag bilang isa sang ulihing-adlaw nga mga Apostoles sang Ginuo, nagasaksi ako nga Sia matuod gid nga amo “ang dalan, ang kamatuoran, kag ang kabuhi” (Juan 14:6; emphasis gindugang).

© 2026 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, January 2026. Hiligaynon. 19932 861