Te fa’anahora’a a te Atua nō te ’ūtuafare mure ’ore

Te hō’ē o te mau tuha’a o te ’evanelia a Iesu Mesia i fa’aho’ihia mai ’o tei fa’a’ana’anatae i tō’u nā metua i te ha’amatara’a, ’o te faufa’a ïa o te ’utuāfare nō te ’Ēkālesia ’e te ha’api’ira’a ē « e ha’amanuiahia te tuha’a rahi o tā te Atua ’ohipa nō te fa’aorara’a ’e te fa’ateiteira’a nā roto i te ’utuāfare. » Hou rāua i bāpetizohia ai, ’ua fa’ahiahia roa tō’u nā metua i tā rāua i ha’api’i mai ē tae atu ’ua ani manihini rāua i te mau ta’ata tupu ’ia haere mai nō te mau ha’api’ira’a misiōnare.

I fa’ari’i ai rāua i te mau misiōnare, ’e i tuatāpapa noa mai ai i te ’evanelia nā muri mai i tō rāua bāpetizora’ahia, ’ua ha’api’i mai tō’u nā metua i te mau rāve’a « ’ia ha’apa’ari i tā rāua mau tamari’i i roto i te māramarama ’e te parau mau » ’e nāhea e « fa’a’āfaro ïa i tō [rāua] iho ’utuāfare » (Te Ha’api’ira’a Tumu ’e te mau Fafaura’a 93:40, 43).

’Ua ha’api’i mai rāua ē « tei rōpū te ’utuāfare i tā te ta’ata Poiete fa’anahora’a nō te hope’a mure ’ore o tāna mau tamari’i » ’e « e roa’a te ’oa’oa i roto i te orara’a ’utuāfare mai te mea ē, ’ua ha’amauhia te reira i ni’a i te mau ha’api’ira’a a te Fatu ra ’o Iesu Mesia. »

’Ua ha’api’i mai rāua ē « te manuia o te mau fa’aipoipora’a ’e o te mau ’utuāfare ’ua fa’atumuhia ïa ’e ’ua ha’amauhia ïa i ni’a i te mau parau tumu nō te fa’aro’o, te pure, te tātarahapa, te fa’a’orera’a hara, te fa’atura, te here, te aroha, te ’ohipa, ’e te mau fa’a’oa’oara’a maita’i. »

’Ua ha’api’i mai rāua ē e nehenehe te ’utuāfare e riro ’ei mea mure ’ore ’e te « huru hoara’a e vai nei i rotopū ia tātou i ’ō nei, e vai ato’a ïa i rotopū ia tātou i reira, terā rā e ’āpitihia atu te reira i te hanahana mure ’ore » (Te Ha’api’ira’a Tumu ’e te mau Fafaura’a 130:2).

’E ’ua ha’api’i mai rāua ē « te ’ōpuara’a mau o te mau ha’api’ira’a ato’a, ’e te mau ’ātivite ato’a i roto i te ’Ēkālesia ’o te ’oa’oara’a ïa te mau metua ’e te mau tamari’i i roto i te fare, tā’atihia i roto i te hō’ē fa’aipoipora’a mure ’ore, ’e tā’amuhia i tō rātou mau tupuna.

Ma teie ’itera’a, ’ua hina’aro rāua ’ia tā’atihia ’ei ’utuāfare mure ’ore.

I muri mai i tō rāua bāpetizora’ahia, tē fa’a’ohipa ra rāua i tā rāua i ha’api’i mai ra, tē haere ra rāua mai te ao nei i te bāsileia o te ’evanelia. ’Ua ha’a rāua ’ia ’āmui i tō mātou ’utuāfare nā roto i te mau pō ’utuāfare ’e te tuatāpapara’a ’ei ’utuāfare i te mau pāpa’ira’a mo’a, te haerera’a ma te fa’aro’o i te mau ’āmuira’a a te ’Ēkālesia, ’e te ravera’a i te ’ohipa ’ā’amu ’utuāfare. Nā roto i teie mau tauto’ora’a i te hō’ēra’a, ’ua ti’aturi rāua i te hāmani i te hō’ē ’utuāfare tei fa’atumuhia i ni’a i te fa’anahora’a nō fa’aorara’a ’e ma te hō’ē mata i fāriuhia i te tau mure ’ore.

I 1965, ’oia ho’i te matahiti i bāpetizohia ai tō’u nā metua, te hiero i fātata roa a’e i São Paulo, Peretīria, i roto ïa i Mesa, Arizona, fātata i te 9 650 kilomētera te maoro. ’Ua hau atu te ho’o o te terera’a i tā tō mātou ’utuāfare moni, nō reira ’ua tītauhia ’ia tīa’i tō’u nā metua i te ha’amaura’a i te hiero nō São Paulo, Peretīria i 1978 hou rāua i nehenehe ai i fa’ari’i I taua taime ra, tē tāvini ra vau i te hō’ē misiōni i Rio de Janeiro.

Fātata e piti ’āva’e nā mua atu i tō’u fa’aotira’a i tā’u misiōni i te ’āva’e nō Fepuare 1980, ’ua fa’ati’a tō’u peresideni misiōni ia māua tō’u hoa misiōni ’ia tere i te pō nā muri i te mau melo nō te titi nō Rio de Janeiro i te hiero i São Paulo ’ia fa’ari’i au i te ’ōro’a hiero ’e ’ia tā’atihia i tō’u nā metua. Mai tō’u nā metua, ’ua tīa’i au e rave rahi matahiti i te fa’ari’ira’a i te mau ha’amaita’ira’a i fafauhia o te mau ’ōro’a o te hiero ’e te mau fafaura’a.

’Ua taui te reira i tō’u hi’ora’a i te tau a muri atu ’e ’ua hōro’a mai i tō’u ’itera’a mātāmua nō ni’a i te parau mau tā te peresideni Russell M. Nelson i parau ’aita i maoro a’enei : « E tauturu te taime i roto i te hiero ia ’outou ’ia feruri tiretiera ’e ’ia fa’ari’i i te hō’ē ’itera’a ē, ’o vai mau ’outou, e riro mai ’outou mai ia vai, ’e i te huru o te orara’a tā ’outou e fa’ari’i ē a muri noa atu. »

’Ua fa’auru roa tō’u taime poto i roto i te hiero i taua taime ra i te hope’ara’a o tā’u tāvinira’a misiōnare. Ma te reira hi’ora’a ’āpī, ’ua fa’atupu tā’u fa’a’ite-pāpū-ra’a nō ni’a i te hiero ’e te faufa’a o tā te Atua fa’anahora’a nō te mau ’utuāfare i te hō’ē tauira’a hope ’ore i tō’u orara’a.

’Ia fa’aipoipo māua tā’u vahine, ’o Rosana, e piti matahiti i muri mai i tā’u misiōni, ’ua tā’atihia māua i roto i te hiero ma te hi’ora’a i te ha’apa’ari i tō māua iho ’utuāfare mure ’ore. Nō te nā reira, ’ua tūtava māua ’ia ha’amau i te mau peu tumu mai tā tō māua nā metua i ha’api’i mai iā māua, fa’atumuhia pau roa i ni’a i te Fa’aora, i tāna mau ha’api’ira’a, ’e i te mau ha’api’ira’a nā tāna mau peropheta nō teie nei tau.

I teie mahana tē ha’apa’ari nei tā māua mau tamari’i i tā rātou tamari’i ma te hō’ē ā mau viretu o te ’oa’oa o te ’evanelia. Nō mātou, e mea fāito ’ore te faufa’a o te ’utuāfare nō te mea ’ua ta’a ia mātou tei rōpū te ’utuāfare i tā te Atua fa’anahora’a.

’Ei huimana fa’atere rahi, ’ua ha’amaita’ihia vau i te tā’ati i tō’u nā tamari’i to’otoru i tō rātou nā hoa i roto i te hiero. E ’ohipa nehenehe mau te hi’ora’a i roto i tō rātou mau mata ’a tūturi ai rātou i te fata o te hiero. ’Ua ti’a iā’u ’ia ’ite tē ha’amaita’ihia ra tō’u huā’ai e te hō’ē ā mau viretu o te ’evanelia tā tō’u nā metua i ha’api’i mai iā’u ’e tā māua ’o Rosana i ha’api’i ia rātou. ’Ua ti’a iā’u ’ia ’ite i te reira mau ha’amaita’ira’a i te tupu noa nō te mau u’i a muri atu. ’E ’ua fa’aha’amana’ohia vau iāna ’o tē fa’ati’a i te reira tā’āto’a.

E fa’aha’amana’ora’a nō Noela

Tei rōpū te ’utuāfare i tā te Atua fa’anahora’a nō te ’oa’oa, terā rā ’āhani ’aita te Fa’aora ’o Iesu Mesia, e’ita ïa te reira e nehenehe e tupu. ’Ua fa’ati’a tāna tāra’ehara ’e te mau ’ōro’a ’e te mau fafaura’a i ’itea i roto i tāna ’evanelia i te fafaura’a o te fa’ateiteira’a.

’Ua fa’a’ite te peresideni Nelson : « Te fa’ateiteira’a, e ’ohipa ’utuāfare ïa. Nā roto ana’e i te mau ’ōro’a fa’aora o te ’evanelia a Iesu Mesia e ti’a ai i te mau ’utuāfare ’ia fa’ateiteihia. Te hōpe’ara’a rahi roa tā tātou e tūtava nei ’ia tāpae, ’o te ’oa’oara’a ïa ’ei ’utuāfare—’ua fa’ari’ihia te ’ōro’a hiero, ’ua tā’atihia ’e ’ua fa’aineinehia nō te ora mure ’ore i mua i te aro o te Atua. »

’Ia haere ana’e au i te mau vāhi ’aita vau i ’ite a’enei, ’ua tāmata vau ’ia ’imi i te hō’ē pupu ti’i ri’iri’i nō te fānaura’a o Iesu ’o tē fa’aha’amana’o ia māua ’o Rosana i te Fa’aora. E hāmani au i te hō’ē ha’aputuputura’a nehenehe.

’A hi’o ai māua ma te feruri i taua mau hōho’a o te fānaura’a ha’eha’a o Iesu, ’ua mana’o māua tā’u vahine, « E aha te mea faufa’a mau i roto i tō māua nā orara’a ? » Te pāhonora’a pāpū, ’o te Fa’aora ïa, tāna ’evanelia, ’e tō māua ’utuāfare. Nō te fa’aha’amana’o ia māua i tō te Metua i te ra’i here nō tātou ’e i te mea ē nā te Fa’aora te fafaura’a o te mau ’utuāfare mure ’ore e fa’ati’a, hou te Noela tau matahiti i ma’iri a’enei ’ua tu’u māua i tā māua mau pupu ti’i ri’iri’i nō te fānaura’a o Iesu i ni’a i nā pa’epa’e e piti i roto i tō māua fare—’e ’ua vaiiho noa māua i te reira ’eiaha rā i te tu’u-’ē-ra’a atu i te reira nā muri mai i te tau Noela. E tauturu teie peu tumu ’ia vai noa te huru nō Noela i roto i tō māua fare i te roara’a o te matahiti tā’āto’a.

I te mau mahana ’a hi’o ai māua i taua mau hōho’a o te fānaura’a o Iesu, e fa’aha’amana’o marū te reira i te ’ohipa faufa’a tā te Fa’aora e rave i roto i tō māua nā orara’a. E fa’aha’amana’o te reira ia māua ē ’ia noa’a te hau i ni’a i te fenua nei i teienei (hi’o Luka 2:14) ’e te ’oa’oa mure ’ore i te ao i muri a’e, e mea ti’a te Fa’aora ’e tō tātou ha’apa’ora’a i te mau fafaura’a tā tātou i rave iāna ra. ’E e fa’aha’amana’o te reira ia māua ē « ’ua haere mai ’oia i te ao nei, ’oia ’o Iesu, ’ia fa’asātaurohia nō te ao nei, ’e ’ia hopoi i te mau hara nō te ao nei, ’e ’ia ha’amo’a i te ao nei, ’e ’ia tāmā atu i te reira i te parau ti’a ’ore ato’a ra ;

« ’Ia ora nā roto iāna ’o rātou ato’a tā te Metua i tu’u atu i roto i tōna ra mana ’e ’o tei hāmanihia ho’i e ana » (Te Ha’api’ira’a Tumu ’e te mau Fafaura’a 76:41–42).

Mai tā māua i ha’api’i mai i teie mau parau mau nā tō māua nā metua, ’ua ’ohipa māua ’o Rosana ’ia ha’api’i atu i te reira i tā māua mau tamari’i. I teienei e ha’api’i atu tā māua mau tamari’i i te hō’ē ā mau parau mau i tā rātou mau tamari’i. ’Ua tupu i te rahi te mau huero tā tō’u nā metua i tanu 60 matahiti i ma’iri a’enei i roto i tō mātou fare iti i Peretīria ’e ’ua hōro’a mai i te hotu, « e faufa’a rahi tō te reira, ’e ’ua hau tōna monamona i tō te mau mea monamona ato’a ra, ’e ’ua rahi tōna teatea i tō te mau mea teatea ato’a ra ; ’oia ïa, ’e ’ua hau tōna maitai i tō te mau mea maita’i ato’a ra » (Alama 32:42).

Tē fa’a’ite pāpū nei au ē ’o rātou ’o tē fa’ari’i i tā te Atua fa’anahora’a nō te mau ’utuāfare, tē here mai tā te Fa’aora i here, ’e tē ha’apa’o i tā rātou mau fafaura’a, i te hō’ē mahana e fa’ari’i rātou i « te mau ha’amaita’ira’a o te ora mure ’ore ’e te ’īra’a o te ’oa’oa » i pīha’i iho i tō rātou feiā here ’e i te Metua ’e te Tamaiti.