“Chirongwa chaMwari cheMhuri Yokusingaperi,” Liahona (Riahona), Zvita 2025.
Shoko reMwedzi Woga Woga reLiahona (Riahona), Zvita 2025
Chirongwa chaMwari cheMhuri Yokusingaperi
Mhuri dzinotambira chirongwa chaMwari, dzinoda sokuda kwakaita Muponesi, uye dzinokudza zvibvumirano zvadzo nerimwe zuva dzinozogara nhaka “yemaropafadzo eupenyu hwokusingaperi uye nokuzara kwemufaro.”
Pedyo nekumagumo kwehushumiri hwangu, ndakafara pandakatora endaumenti uye ndikasunganidzwa kuvabereki vangu muTemberi yeSão Paulo Brazil.
Vabereki vangu, Apparecido naMercedes, vaibva kuzvitendero zvakasiyana, asi zviitiko zveupenyu hwavo zvakavagadzirira kugamuchira vhangeri rakadzorerwa.
Baba vangu vakarerwa mumhuri yakanaka asi yaiva isina chitendero. Zvisinei, semukomana wechidiki vaifarira zvechitendero. Vaiverenga Bhaibheri, vaipinda makirasi eBhaibheri, uye vainzvera upenyu hwaJesu Kristu. Kunzvera kwavo kwakavakonzera kuti vave nechido chikuru muzvose vhangeri raMuponesi uye mumhuri, zvikaita kuti vave nechido chekuchata nemunhu ane pfungwa dzakafanana nedzavo.
Mukusiyana, amai vangu vaibva kumhuri yaitenda zvikuru mune zvechitendero. Vaigamuchira misimboti yevhangeri, vaipinda minamato yechechi, uye vaitevedzera chitendero chavo nerutendeko. Vakurira mumamiriro ezvinhu iwayo, amai vangu vakava rudzi rwemunhu aiva asingambofi akarega kuenda kumisangano yechechi.
Uye nokudaro, mushure mokunge vabereki vangu vachata uye ini nemadzikoma angu matatu tazvarwa, vakaita zvose zvavaikwanisa kutirera muchiedza cheruzivo rwavo rwemisimboti yevhangeri. Rimwe zuva vatete vangu, avo vaiva nhengo isisina kusimba yeChechi yaJesu Kristu yeVatendi vaMazuva Ekupedzisira, vakati kuna baba vangu, “Une vakomana vana, mudikanwi. Kana uchida zvechokwadi kurera mhuri yakamisirwa muna Kristu uye kuva naMwari mumhuri yako, unofanira kuenda kuchechi yangu.”
Baba vangu vakanzwa zvavakataura, asi hapana chavakaita kusvika pazuva iro vashumiri venguva yose pavakauya kuzodzidzisa munharaunda yedu, vakagogodza pamusuwo wedu, uye vakatanga kutidzidzisa. Baba vangu vakakurumidza kuona kuti vaimiririra chechi iyo vatete vangu yavakanga vavakurudzira kuti vatsvage nezvayo.
Chiedza neChokwadi
Chimwe chezvinhu zvakafadza vabereki vangu pokutanga muvhangeri rakadzorerwa raJesu Kristu chaiva kukosha kunoiswa neChechi pamhuri uye dzidziso yokuti “zhinji rebasa raMwari reruponeso nekusimudzirwa kumusoro-soro rinozadzikiswa kuburikidza nemhuri.” Vasati vabhabhatidzwa, vabereki vangu vakafadzwa zvikuru nezvavakanga vachidzidza zvokuti vakakoka vavakidzani kuti vabatane navo pazvidzidzo zvevashumiri.
Chimwe chezvinhu zvakafadza vabereki vangu pokutanga muvhangeri rakadzorerwa raJesu Kristu chaiva kukosha kunoiswa neChechi pamhuri.
Apo pavaisangana nevashumiri, uye pavairamba vachinzvera vhangeri mushure morubhabhatidzo rwavo, vabereki vangu vakadzidza nezvenzira “dzokukudza vana [vavo] muchiedza nechokwadi” uye “vangagadzirisa zvakanaka imba [yavo]” sei pane zvepamweya (Dzidziso neZvibvumirano 93:40, 43).
Vakadzidza kuti “mhuri yakakosha zvikuru muchirongwa cheMusiki chemugumisiro wokusingaperi wevana Vavo” uye kuti “mufaro muupenyu hwemhuri unonyanya kuwanikwa apo painenge yakamisirwa padzidziso dzaIshe Jesu Kristu.”
Vakadzidza kuti “michato nemhuri dzinobudirira zvakamisirwa uye zvinochengetwa pamisimboti yerutendo, munamato, rutendeuko, ruregerero, ruremekedzo, rudo, mutsa, basa, uye zviitwa zvekutandara zvakanaka.”
Vakadzidza kuti mhuri dzinokwanisa kuva dzokusingaperi uye kuti “kudyidzana kumwecheteko uko kuripo pakati pedu pano kunozovapo pakati pedu ikoko, asi kunozosanganisira kubwinya kwokusingaperi” (Dzidziso neZvibvumirano 130:2).
Uye vakadzidza kuti “chinangwa chikurusa chedzidziso yoga yoga, chechiitwa choga choga muChechi ndechekuti vabereki navana vavo vafare kumba, vasunganidzwe mumuchato wokusingaperi, uye vabatanidzwe kuzvizvarwa zvavo.”
Neruzivo irworwo, vakava nechido chokusunganidzwa semhuri yokusingaperi.
Nangiso Yokusingaperi
Mushure mokunge vabereki vangu vabhabhatidzwa, vakaita zvavaidzidza, vachisiya zvepanyika vachienda kuumambo hwevhangeri. Vakashanda kubatanidza mhuri yedu kuburikidza nokuita manheru pamba uye nekunzvera magwaro matsvene kwemhuri, kupinda misangano yeChechi nerutendeko, uye nokuita basa renhoroondo yemhuri. Nokuedza ikoko kuva nerubatano, vaitarisira kuumba mhuri yakamisirwa pachirongwa cheruponeso ine nangiso yokusingaperi.
Muna 1965, gore rakabhabhatidzwa vabereki vangu, temberi yaiva pedyosa neSão Paulo, Brazil, yaiva kuMesa, Arizona, mamaira angangoita 6,000 (makiromita 9,650) kure. Kufamba kwaidhurira mhuri yedu zvikuru, saka vabereki vangu vakafanira kumirira kusvika Temberi yeSão Paulo Brazil yakumikidzwa muna 1978 vasati vakwanisa kugamuchira zvisungo zvavo zvemutemberi uye vasunganidzwa. Panguva iyoyo, ndaishandira semushumiri muRio de Janeiro.
Mwedzi ingangoita miviri ndisati ndapedza hushumiri hwangu muna Kukadzi 1980, mutungamiri wehushumiri wangu akabvumira ini nemufambidzani wangu kuti tiende nenhengo dzehoko kubva kuRio de Janeiro kuenda kutemberi muSão Paulo kuitira kuti ndigonotora endawumenti uye ndisunganidzwe kuvabereki vangu. Savabereki vangu, ndakanga ndamirira kwemakore kuti ndiwane maropafadzo akavimbiswa ezvisungo nezvibvumirano zvemutemberi.
Chiitiko ichocho chakashandura maonero angu eramangwana uye chakandipa nzwisiso yangu yokutanga yehuchokwadi hwemashoko aMutungamiri Russell M. Nelson avakapa chinguva chipfupi chapfuura icho: “Nguva mutemberi inozokubatsira kufunga seresitiyaro uye kunzwisisa kuti uri ani chaizvo, munhu waunokwanisa kuva, uye rudzi rwoupenyu hwaunokwanisa kuva nahwo nariinhi nariinhi.”
Nguva yangu pfupi mutemberi panguva iyoyo yakashandura zvakadzama chikamu chekupedzisira chokushandira kwangu semushumiri. Namaonero matsva iwayo, kupupura nezvetemberi uye kukosha kwechirongwa chaMwari chemhuri kwakavawo neshanduro yezvachose muhupenyu hwangu.
Apo mudzimai wangu, Rosana, neni patakachata makore maviri mushure mehushumiri wangu, takasunganidzwa mutemberi netariro yekurera mhuri yokusingaperi yedu pachedu. Kuti tidaro, takashanda pamwechete kuumba tsika dzemhuri dzakaita seidzo vabereki vedu dzavakanga vatidzidzisa, dzose dzakanangiswa paMuponesi, dzidziso Dzake, uye nedzidziso dzevaporofita Vake vemazuva ano.
Nhasi vana vedu vari kurera vana vavo nemisimboti yevhangeri yemufaro mimwecheteyo. Kwatiri, mhuri ndiyo chinhu chinokoshesesa nokuda kwokuti tinonzwisisa kukosha kwemhuri muchirongwa chaMwari.
SeMutungamiri Mukuru, ndakava neropafadzo rokusunganidza vana vangu vatatu kuvachatidzani vavo mutemberi. Kutarisa mumaziso avo panguva yavakapfugama paatari mutemberi kwaiva chiitiko chakanaka zvikuru. Ndaikwanisa kuona zvizvarwa zvangu zvichikomborerwa nemisimboti yevhangeri mimwecheteyo iyo vabereki vangu yavakanga vandidzidzisa uye iyo Rosana neni yatakanga tavadzidzisa. Ndaikwanisa kuona maropafadzro iwayo achienderera mberi muzvizvarwa zveramangwana. Uye ndakayeuchidzwa kuti ndiani anoita kuti zvose zvikwanisike.
Chiyeuchidzo cheKirisimasi
Mhuri yakakosha zvikuru kuchirongwa chaMwari chemufaro, asi pasina Muponesi Jesu Kristu, chirongwa ichocho hachaizokwanisiki. Rudzikinuro Rwake uye zvisungo nezvibvumirano zvinowanikwa muvhangeri Rake zvinoita kuti vimbiso yekusimudzirwa kumusoro-soro ikwanisike.
Mutungamiri Nelson vakazivisa kuti: “Kusimudzirwa kumusoro-soro inyaya yemhuri. Kuburikidza chete nezvisungo zvinoponesa zvevhangeri raJesu Kristu ndiko kunoita kuti mhuri dzikwanise kusimudzirwa kumusoro-soro. Mhedzisiro hurusa iyo yatinovavarira ndeyokuti tive tinofara semhuri—takatora endawumenti, takasunganidzwa, uye takagadzirira upenyu hwokusingaperi pamberi paMwari.”
Apo pandinoshanyira nzvimbo dzandisati ndamboona, ndinoedza kuwana zvivezwa zvidiki zvechiitiko cheKuzvarwa kwaJesu izvo zvinoyeuchidza Rosana neni nezveMuponesi. Ndiri kuungadza zvakawanda chose.
Apo pataifungisisa nezvezvivezwa zvechiitiko cheKuzvarwa kwaJesu izvozvo zvakaninipa, ini nemudzimai wangu takambofunga kuti, “Chii icho chakakoshesesa zvirokwazvo muhupenyu hwedu?” Mhinduro yacho, hongu, Muponesi, vhangeri Rake, uye mhuri yedu. Kuti tizviyeuchidze nezverudo rwaBaba vedu Vokudenga kwatiri uye kuti kuburikidza neMuponesi kunoita kuti vimbiso yemhuri dzokusingaperi ikwanisike, Kirisimasi isati yasvika makore mashoma apfuura takaisa zvivezwa zvechiitiko cheKuzvarwa kwaJesu zvedu zvose pamasherufu maviri makuru mumba medu—uye tikazvisiya zviripo pane kuzvibvisa mushure mezororo reKirisimasi. Tsika iyoyo inotibatsira kuchengetedza mweya weKirisimasi mumba mwedu gore rose.
Zuva roga roga patinotarisa pazvivezwa zvechiitiko cheKuzvarwa kwaJesu izvozvo, zvinotiyeuchidza zvinyoronyoro nezvebasa guru reMuponesi muupenyu hwedu. Zvinotiyeuchidza kuti runyararo panyika iyezvino (ona Ruka 2:14) uye mufaro wokusingaperi munyika inotevera zvakamisirwa paMuponesi uye pakukudza zvibvumirano zvatakaita Naye. Uye zvinotiyeuchidza “kuti akauya munyika, kunyangwe Jesu, kuti azoroverwa pamuchinjikwa kuitira nyika, uye kuzotakura zvivi zvenyika, uye kuzotsvenesa nyika, uye nokuishanangura kubva kukusarurama kwose;
“Kuti kuburikidza nemaari, vose vagoponeswa avo Baba vavakanga vaisa musimba rake uye vakasikwa naye” (Dzidziso neZvibvumirano 76:41–42).
Sekudzidza kwatakaita zvokwadi izvi kubva kuvabereki vedu, Rosana neni takashanda nesimba kuti tizvipfuudze kuvana vedu. Iye zvino vana vedu vari kudzidzisa zvokwadi zvimwechetezvo kuvana vavo. Mbeu dzakadyarwa mumwoyo yevabereki vangu makore makumi matanhatu apfuura mumusha wedu mudiki muBrazil dzakatumbuka uye dzikabereka muchero “uyo unova wakakosha zvikurusa, uyo unotapira kupfuura zvimwe zvose izvo zvinotapira, uye uri muchena kupfuura zvimwe zvose zvichena, hongu, uye wakarurama kupfuura zvimwe zvose izvo zvakarurama” (Aruma 32:42).
Ndinopupura kuti avo vanotambira chirongwa chaMwari chemhuri, vanoda sokuda kwakaita Muponesi, uye vanokudza zvibvumirano zvavo nerimwe zuva vanozogara nhaka “yemaropafadzo eupenyu hwokusingaperi uye kuzara kwemufaro” navadikanwi vavo uye naBaba neMwanakomana.
© 2025 ne Intellectual Reserve, Inc. All rights reserved. Chakadhindwa muUSA. Mvumo yemuChirungu: 6/19. Mvumo yeDudziro: 6/19. Dudziro yeMonthly Liahona Message, Zvita 2025. Shona. 19614 731