“God’s Plan for a Forever Family,” Liahona, Dec. 2025.
ຂ່າວສານປະຈຳເດືອນ Liahona, ເດືອນທັນວາ 2025
ແຜນຂອງພຣະເຈົ້າສຳລັບຄອບຄົວນິລັນດອນ
ຄອບຄົວທີ່ຮັບເອົາແຜນຂອງພຣະເຈົ້າ, ຮັກດັ່ງທີ່ພຣະຜູ້ຊ່ວຍໃຫ້ລອດຮັກ, ແລະ ໃຫ້ກຽດແກ່ພັນທະສັນຍາຂອງເຂົາເຈົ້າ ຈະໄດ້ຮັບມໍລະດົກ “ພອນແຫ່ງຊີວິດນິລັນດອນ ແລະ ຄວາມສົມບູນແຫ່ງຄວາມຊື່ນຊົມ” ໃນມື້ໜຶ່ງ.
ເມື່ອໃກ້ຈະສິ້ນສຸດການເຜີຍແຜ່ເຕັມເວລາຂອງຂ້າພະເຈົ້າ, ຂ້າພະເຈົ້າຮູ້ສຶກດີໃຈຫລາຍທີ່ໄດ້ຮັບຂອງປະທານສັກສິດ ແລະ ຜະນຶກເຂົ້າກັບພໍ່ແມ່ຂອງຂ້າພະເຈົ້າໃນພຣະວິຫານເຊົາປາໂລ ບຣາຊິນ.
ພໍ່ແມ່ຂອງຂ້າພະເຈົ້າ, ອັບປາເຣຊິໂດ ແລະ ເມີເຊເດສ, ມາຈາກພື້ນຖານທາງສາດສະໜາທີ່ແຕກຕ່າງກັນ, ແຕ່ປະສົບການຊີວິດຂອງພວກເພິ່ນໄດ້ກຽມພວກເພິ່ນໃຫ້ຍອມຮັບພຣະກິດຕິຄຸນທີ່ຖືກຟື້ນຟູ.
ພໍ່ຂອງຂ້າພະເຈົ້າໄດ້ເຕີບໂຕມາໃນຄອບຄົວທີ່ດີ ແຕ່ບໍ່ເຊື່ອຖືສາດສະໜາ. ເຖິງຢ່າງໃດກໍຕາມ, ໃນໄວໜຸ່ມເພິ່ນໄດ້ສົນໃຈສາດສະໜາ. ເພິ່ນໄດ້ອ່ານພຣະຄຣິສຕະທຳຄຳພີ, ເຂົ້າຮ່ວມຫ້ອງຮຽນພຣະຄຣິສຕະທຳຄຳພີ, ແລະ ໄດ້ສຶກສາພຣະຊົນຊີບຂອງພຣະເຢຊູຄຣິດ. ການສຶກສາຂອງເພິ່ນເຮັດໃຫ້ເພິ່ນສົນໃຈທັງພຣະກິດຕິຄຸນຂອງພຣະຜູ້ຊ່ວຍໃຫ້ລອດ ແລະ ຄອບຄົວ, ເຮັດໃຫ້ເພິ່ນປາດຖະໜາທີ່ຈະແຕ່ງງານກັບຄົນທີ່ມີຄວາມຄິດເໝືອນກັນ.
ກົງກັນຂ້າມ, ແມ່ຂອງຂ້າພະເຈົ້າໄດ້ມາຈາກຄອບຄົວທີ່ເຄັ່ງຄັດເລື່ອງສາດສະໜາ. ເຂົາເຈົ້າຮັບເອົາຫລັກທຳພຣະກິດຕິຄຸນ, ໄດ້ໄປໂບດ, ແລະ ປະຕິບັດຕາມສາດສະໜາຂອງເຂົາເຈົ້າຢ່າງຊື່ສັດ. ເມື່ອເຕີບໂຕໃນສະພາບແວດລ້ອມແບບນັ້ນ, ແມ່ຂອງຂ້າພະເຈົ້າໄດ້ກາຍເປັນຄົນທີ່ໄປໂບດບໍ່ເຄີຍຂາດ.
ແລະ ສະນັ້ນ, ຫລັງຈາກທີ່ພໍ່ແມ່ຂອງຂ້າພະເຈົ້າໄດ້ແຕ່ງງານກັນ, ແລະ ອ້າຍນ້ອງສາມຄົນຂອງຂ້າພະເຈົ້າກັບຂ້າພະເຈົ້າໄດ້ເກີດມາ, ພວກເພິ່ນຈຶ່ງພະຍາຍາມຢ່າງສຸດຄວາມສາມາດ ເພື່ອລ້ຽງດູພວກເຮົາໃນຄວາມສະຫວ່າງ ແລະ ຄວາມຮູ້ຂອງພວກເພິ່ນກ່ຽວກັບຫລັກທຳພຣະກິດຕິຄຸນ. ມື້ໜຶ່ງປ້າຂອງຂ້າພະເຈົ້າ, ຜູ້ທີ່ເປັນສະມາຊິກທີ່ບໍ່ເຂັ້ມແຂງຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ໄດ້ເວົ້າກັບພໍ່ຂອງຂ້າພະເຈົ້າວ່າ, “ເຈົ້າມີລູກຊາຍສີ່ຄົນ. ຖ້າເຈົ້າຢາກສ້າງຄອບຄົວທີ່ມີພຣະຄຣິດເປັນສູນກາງ ແລະ ມີພຣະເຈົ້າໃນຄອບຄົວຂອງເຈົ້າ, ເຈົ້າຕ້ອງໄປໂບດຂອງຂ້ອຍ.”
ພໍ່ຂອງຂ້າພະເຈົ້າໄດ້ຍິນສິ່ງທີ່ເພິ່ນເວົ້າ, ແຕ່ພໍ່ບໍ່ໄດ້ເຮັດຫຍັງເລີຍ ຈົນກວ່າມື້ໜຶ່ງທີ່ມີຜູ້ສອນສາດສະໜາເຕັມເວລາໄດ້ມາເລາະສອນຢູ່ຄຸ້ມບ້ານຂອງພວກເຮົາ, ໄດ້ເຄາະປະຕູຂອງພວກເຮົາ, ແລະ ເລີ່ມຕົ້ນສິດສອນພວກເຮົາ. ເພິ່ນຮູ້ໄດ້ໄວວ່າ ເຂົາເຈົ້າເປັນຕົວແທນຂອງສາດສະໜາຈັກທີ່ປ້າຂອງຂ້າພະເຈົ້າໄດ້ຊຸກຍູ້ໃຫ້ເພິ່ນໄປສຳຫລວດເບິ່ງ.
ຄວາມສະຫວ່າງ ແລະ ຄວາມຈິງ
ສິ່ງໜຶ່ງທີ່ເຮັດໃຫ້ພໍ່ແມ່ຂອງຂ້າພະເຈົ້າສົນໃຈໃນຕອນທຳອິດກ່ຽວກັບພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດຄື ຄວາມສຳຄັນທີ່ສາດສະໜາຈັກໃຫ້ໄວ້ກັບຄອບຄົວ ແລະ ການສິດສອນທີ່ວ່າ “ວຽກງານແຫ່ງຄວາມລອດ ແລະ ຄວາມສູງສົ່ງສ່ວນໃຫຍ່ບັນລຸຄວາມສຳເລັດຜ່ານທາງຄອບຄົວ.” ກ່ອນພວກເພິ່ນຈະຮັບບັບຕິສະມາ, ພໍ່ແມ່ຂອງຂ້າພະເຈົ້າມີຄວາມປະທັບໃຈຫລາຍກັບສິ່ງທີ່ພວກເພິ່ນໄດ້ຮຽນຮູ້ ຈົນວ່າພວກເພິ່ນໄດ້ເຊື້ອເຊີນເພື່ອນບ້ານໃຫ້ມາຮ່ວມຮຽນບົດຮຽນຂອງຜູ້ສອນສາດສະໜາກັບພວກເພິ່ນ.
ສິ່ງໜຶ່ງທີ່ເຮັດໃຫ້ພໍ່ແມ່ຂອງຂ້າພະເຈົ້າສົນໃຈໃນຕອນທຳອິດກ່ຽວກັບພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດຄື ຄວາມສຳຄັນທີ່ສາດສະໜາຈັກໃຫ້ໄວ້ກັບຄອບຄົວ.
ໃນຂະນະທີ່ພວກເພິ່ນໄດ້ພົບກັບຜູ້ສອນສາດສະໜາ, ແລະ ສືບຕໍ່ສຶກສາພຣະກິດຕິຄຸນຫລັງຈາກການບັບຕິສະມາຂອງພວກເພິ່ນ, ພໍ່ແມ່ຂອງຂ້າພະເຈົ້າໄດ້ຮຽນຮູ້ວິທີທີ່ “ຈະລ້ຽງດູລູກໆ [ຂອງພວກເພິ່ນ] ໃນຄວາມສະຫວ່າງ ແລະ ຄວາມຈິງ” ແລະ ວິທີທີ່ຈະ “ຈັດບ້ານເຮືອນ [ຂອງພວກເພິ່ນ] ເອງທາງວິນຍານ” (ຄຳສອນ ແລະ ພັນທະສັນຍາ 93:40, 43).
ພວກເພິ່ນໄດ້ຮຽນຮູ້ວ່າ “ຄອບຄົວເປັນຈຸດໃຫຍ່ໃຈກາງຕໍ່ແຜນຂອງພຣະຜູ້ສ້າງ ສຳລັບຈຸດໝາຍປາຍທາງນິລັນດອນຂອງລູກໆຂອງພຣະອົງ” ແລະ ວ່າ “ຄອບຄົວຈະມີຄວາມສຸກກໍຕໍ່ເມື່ອເຂົາເຈົ້າດຳເນີນຊີວິດຕາມຄຳສອນຂອງອົງພຣະເຢຊູຄຣິດເຈົ້າ.”
ພວກເພິ່ນໄດ້ຮຽນຮູ້ວ່າ “ການແຕ່ງງານ ແລະ ຄອບຄົວຈະມີຄວາມສຳເລັດໄດ້ໃນຊີວິດກໍຕໍ່ເມື່ອເຂົາເຈົ້າໝັ້ນຄົງຢູ່ໃນຫລັກທຳແຫ່ງສັດທາ, ການອະທິຖານ, ການກັບໃຈ, ການໃຫ້ອະໄພ, ການນັບຖື, ຄວາມຮັກ, ຄວາມເມດຕາ, ວຽກງານ, ແລະ ກິດຈະກຳທີ່ໃຫ້ການພັກຜ່ອນຢ່ອນອາລົມທີ່ເປັນປະໂຫຍດຕ່າງໆ.”
ພວກເພິ່ນໄດ້ຮຽນຮູ້ວ່າ ຄອບຄົວສາມາດເປັນນິລັນດອນ ແລະ ວ່າ “ສັງຄົມດຽວກັນທີ່ມີຢູ່ໃນບັນດາພວກເຮົາຢູ່ທີ່ນີ້ ຈະມີຢູ່ໃນບັນດາພວກເຮົາຢູ່ທີ່ນັ້ນ, ພຽງແຕ່ມັນຈະຖືກຄຽງຄູ່ໄປກັບລັດສະໝີພາບນິລັນດອນ” (ຄຳສອນ ແລະ ພັນທະສັນຍາ 130:2).
ແລະ ພວກເພິ່ນໄດ້ຮຽນຮູ້ວ່າ “ຈຸດປະສົງສູງສຸດຂອງທຸກໆຄຳສອນ, ທຸກໆກິດຈະກຳໃນສາດສະໜາຈັກຄື ພໍ່ແມ່ ແລະ ລູກໆຂອງເຂົາເຈົ້າມີຄວາມສຸກຢູ່ທີ່ບ້ານ, ໄດ້ຖືກຜະນຶກເຂົ້າກັນໃນການແຕ່ງງານນິລັນດອນ, ແລະ ເຊື່ອມໂຍງເຂົ້າກັບຫລາຍໆລຸ້ນຄົນຂອງເຂົາເຈົ້າ.”
ດ້ວຍຄວາມຮູ້ນັ້ນ, ພວກເພິ່ນໄດ້ປາດຖະໜາທີ່ຈະຜະນຶກເຂົ້າກັນເປັນຄອບຄົວນິລັນດອນ.
ດ້ວຍຕາເບິ່ງໄປທີ່ຄວາມເປັນນິລັນດອນ
ຫລັງຈາກພໍ່ແມ່ຂອງຂ້າພະເຈົ້າໄດ້ຮັບບັບຕິສະມາ, ພວກເພິ່ນໄດ້ປະຕິບັດຕາມສິ່ງທີ່ພວກເພິ່ນກຳລັງຮຽນຮູ້, ຍ້າຍຈາກໂລກໄປສູ່ອານາຈັກແຫ່ງພຣະກິດຕິຄຸນ. ພວກເພິ່ນໄດ້ພະຍາຍາມເຮັດໃຫ້ຄອບຄົວຂອງພວກເຮົາເປັນນ້ຳໜຶ່ງໃຈດຽວກັນໂດຍການຈັດການສັງສັນໃນຄອບຄົວ ແລະ ການສຶກສາພຣະຄຳພີເປັນຄອບຄົວ, ການໄປຮ່ວມປະຊຸມໂບດຢ່າງຊື່ສັດ, ແລະ ການເຮັດວຽກງານສືບປະຫວັດຄອບຄົວ. ດ້ວຍຄວາມພະຍາຍາມເຫລົ່ານັ້ນ ເພື່ອຄວາມເປັນນ້ຳໜຶ່ງໃຈດຽວກັນ, ພວກເພິ່ນຫວັງທີ່ຈະສ້າງຄອບຄົວທີ່ມີຈຸດສູນກາງຢູ່ທີ່ແຜນແຫ່ງຄວາມລອດ ດ້ວຍຕາເບິ່ງໄປທີ່ຄວາມເປັນນິລັນດອນ.
ໃນປີ 1965, ປີທີ່ພໍ່ແມ່ຂອງຂ້າພະເຈົ້າໄດ້ຮັບບັບຕິສະມາ, ພຣະວິຫານທີ່ໃກ້ທີ່ສຸດກັບເມືອງເຊົາປາໂລ, ປະເທດບຣາຊິນ, ແມ່ນຢູ່ໃນເມືອງເມສາ, ລັດອາຣິໂຊນາ, ຫ່າງໄກເກືອບເຖິງ 6,000 ໄມ (9,650 ກມ). ການເດີນທາງຕ້ອງມີຄ່າໃຊ້ຈ່າຍຫລາຍສຳລັບຄອບຄົວຂອງພວກເຮົາ, ສະນັ້ນພໍ່ແມ່ຂອງຂ້າພະເຈົ້າຈຶ່ງໄດ້ລໍຖ້າຈົນກວ່າຈະເຖິງການອຸທິດພຣະວິຫານເຊົາປາໂລ ບຣາຊິນ ໃນປີ 1978 ກ່ອນທີ່ພວກເພິ່ນຈະສາມາດໄດ້ຮັບພິທີການພຣະວິຫານ ແລະ ຮັບການຜະນຶກ. ໃນເວລານັ້ນ, ຂ້າພະເຈົ້າກຳລັງຮັບໃຊ້ເຜີຍແຜ່ຢູ່ເມືອງຣຽວ ເດ ຈາເນໂຣ.
ປະມານສອງເດືອນກ່ອນທີ່ຂ້າພະເຈົ້າຈະສິ້ນສຸດການເຜີຍແຜ່ຂອງຂ້າພະເຈົ້າໃນເດືອນກຸມພາ ປີ 1980, ປະທານເຜີຍແຜ່ຂອງຂ້າພະເຈົ້າໄດ້ອະນຸຍາດໃຫ້ຄູ່ຂອງຂ້າພະເຈົ້າ ແລະ ຂ້າພະເຈົ້າເດີນທາງໄປກັບສະມາຊິກສະເຕກ ຈາກເມືອງຣຽວ ເດ ຈາເນໂຣ ໄປພຣະວິຫານຢູ່ເມືອງເຊົາປາໂລ ເພື່ອວ່າຂ້າພະເຈົ້າຈະສາມາດຮັບຂອງປະທານສັກສິດ ແລະ ຜະນຶກເຂົ້າກັບພໍ່ແມ່ຂອງຂ້າພະເຈົ້າ. ເຊັ່ນດຽວກັບພໍ່ແມ່ຂອງຂ້າພະເຈົ້າ, ຂ້າພະເຈົ້າໄດ້ລໍຖ້າຫລາຍປີສຳລັບພອນທີ່ສັນຍາໄວ້ຂອງພິທີການ ແລະພັນທະສັນຍາໃນພຣະວິຫານ.
ປະສົບການນັ້ນໄດ້ປ່ຽນວິໄສທັດຂອງຂ້າພະເຈົ້າກ່ຽວກັບອະນາຄົດ ແລະ ເຮັດໃຫ້ຂ້າພະເຈົ້າເຫັນຄັ້ງທຳອິດເຖິງຄວາມຈິງຂອງຄຳເວົ້າລ່າສຸດຂອງປະທານຣະໂຊ ເອັມ ແນວສັນ ທີ່ວ່າ: “ເວລາໃນພຣະວິຫານ ຈະຊ່ວຍໃຫ້ທ່ານ ຄິດກ່ຽວກັບຊັ້ນສູງ ແລະ ໃຫ້ທ່ານມີວິໄສທັດກ່ຽວກັບວ່າ ແທ້ຈິງແລ້ວທ່ານແມ່ນໃຜ, ທ່ານສາມາດກາຍເປັນໃຜໄດ້, ແລະ ຊີວິດແບບໃດທີ່ທ່ານສາມາດມີຕະຫລອດໄປ.”
ຊ່ວງເວລາອັນສັ້ນໆໃນພຣະວິຫານໃນຄັ້ງນັ້ນ ມີອິດທິພົນຢ່າງເລິກເຊິ່ງຕໍ່ການຮັບໃຊ້ເຜີຍແຜ່ທີ່ເຫລືອຢູ່ຂອງຂ້າພະເຈົ້າ. ດ້ວຍວິໄສທັດໃໝ່ນັ້ນ, ການເປັນພະຍານເຖິງພຣະວິຫານ ແລະ ຄວາມສຳຄັນຂອງແຜນຂອງພຣະເຈົ້າສຳລັບຄອບຄົວ ກໍມີຜົນກະທົບທີ່ຍາວນານຕໍ່ຊີວິດຂອງຂ້າພະເຈົ້າເຊັ່ນກັນ.
ເມື່ອພັນລະຍາຂອງຂ້າພະເຈົ້າ, ໂຣຊານາ, ແລະ ຂ້າພະເຈົ້າໄດ້ແຕ່ງງານກັນສອງປີຫລັງຈາກການເຜີຍແຜ່ຂອງຂ້າພະເຈົ້າ, ພວກເຮົາໄດ້ຜະນຶກເຂົ້າກັນໃນພຣະວິຫານດ້ວຍວິໄສທັດທີ່ຈະລ້ຽງດູຄອບຄົວນິລັນດອນຂອງຕົວເອງ. ເພື່ອເຮັດແນວນັ້ນ, ພວກເຮົາໄດ້ເຮັດວຽກນຳກັນເພື່ອສ້າງປະເພນີຄອບຄົວຄືກັບທີ່ພໍ່ແມ່ຂອງພວກເຮົາໄດ້ສິດສອນພວກເຮົາ, ທັງໝົດສຸມໃສ່ພຣະຜູ້ຊ່ວຍໃຫ້ລອດ, ຄຳສອນຂອງພຣະອົງ, ແລະ ຄຳສອນຂອງສາດສະດາໃນຍຸກປະຈຸບັນຂອງພຣະອົງ.
ທຸກວັນນີ້ລູກໆຂອງພວກເຮົາກໍກຳລັງລ້ຽງດູລູກໆຂອງເຂົາເຈົ້າດ້ວຍຫລັກທຳພຣະກິດຕິຄຸນແຫ່ງຄວາມສຸກແບບດຽວກັນ. ສຳລັບພວກເຮົາ, ຄອບຄົວແມ່ນທຸກສິ່ງທຸກຢ່າງ ເພາະວ່າພວກເຮົາເຂົ້າໃຈເຖິງຈຸດໃຫຍ່ໃຈກາງຂອງຄອບຄົວໃນແຜນຂອງພຣະເຈົ້າ.
ໃນຖານະເຈົ້າໜ້າທີ່ຊັ້ນຜູ້ໃຫຍ່, ຂ້າພະເຈົ້າໄດ້ຮັບພອນທີ່ໄດ້ຜະນຶກລູກທັງສາມຄົນຂອງຂ້າພະເຈົ້າເຂົ້າກັບຄູ່ຄອງຂອງເຂົາເຈົ້າໃນພຣະວິຫານ. ເມື່ອຫລຽວເບິ່ງຕາຂອງເຂົາເຈົ້າໃນຂະນະທີ່ເຂົາເຈົ້າຄຸເຂົ່າລົງຢູ່ທີ່ແທ່ນບູຊາໃນພຣະວິຫານນັ້ນ ເປັນປະສົບການທີ່ສວຍງາມ. ຂ້າພະເຈົ້າສາມາດເຫັນລູກຫລານຂອງຂ້າພະເຈົ້າໄດ້ຮັບພອນຈາກຫລັກທຳພຣະກິດຕິຄຸນທີ່ພໍ່ແມ່ຂອງຂ້າພະເຈົ້າໄດ້ສິດສອນຂ້າພະເຈົ້າ ແລະ ສິ່ງທີ່ໂຣຊານາ ແລະ ຂ້າພະເຈົ້າໄດ້ສິດສອນເຂົາເຈົ້າ. ຂ້າພະເຈົ້າສາມາດເຫັນພອນເຫລົ່ານັ້ນສືບຕໍ່ໄປໃນຄົນລຸ້ນຕໍ່ໆໄປ. ແລະ ຂ້າພະເຈົ້າໄດ້ຖືກເຕືອນໃຈວ່າໃຜເປັນຜູ້ທີ່ເຮັດໃຫ້ທຸກສິ່ງເປັນໄປໄດ້.
ຄຳເຕືອນໃຈກ່ຽວກັບວັນຄຣິດສະມາດ
ຄອບຄົວເປັນຈຸດໃຫຍ່ໃຈກາງໃນແຜນແຫ່ງຄວາມສຸກຂອງພຣະເຈົ້າ, ແຕ່ຖ້າບໍ່ມີພຣະຜູ້ຊ່ວຍໃຫ້ລອດ ພຣະເຢຊູຄຣິດ, ແຜນນັ້ນຈະເປັນໄປບໍ່ໄດ້. ການຊົດໃຊ້ຂອງພຣະອົງ ແລະ ພິທີການ ແລະ ພັນທະສັນຍາທີ່ພົບໃນພຣະກິດຕິຄຸນຂອງພຣະອົງ ເຮັດໃຫ້ຄຳສັນຍາແຫ່ງຄວາມສູງສົ່ງເປັນໄປໄດ້.
ປະທານແນວສັນໄດ້ປະກາດວ່າ: “ຄວາມສູງສົ່ງເປັນວຽກງານຂອງຄອບຄົວ. ໂດຍຜ່ານພິທີການແຫ່ງຄວາມລອດຂອງພຣະກິດຕິຄຸນຂອງພຣະເຢຊູຄຣິດເທົ່ານັ້ນ ຄອບຄົວຈຶ່ງຈະສາມາດຮັບຄວາມສູງສົ່ງໄດ້. ຈຸດໝາຍສູງສຸດທີ່ເຮົາພະຍາຍາມແມ່ນເພື່ອໃຫ້ເຮົາມີຄວາມສຸກໃນຖານະຄອບຄົວ—ໄດ້ຮັບຂອງປະທານສັກສິດ, ຮັບການຜະນຶກ, ແລະ ກຽມສຳລັບຊີວິດນິລັນດອນ ໃນທີ່ປະທັບຂອງພຣະເຈົ້າ.”
ເມື່ອຂ້າພະເຈົ້າໄປຢ້ຽມຢາມສະຖານທີ່ຕ່າງໆທີ່ຂ້າພະເຈົ້າບໍ່ເຄີຍເຫັນມາກ່ອນ, ຂ້າພະເຈົ້າພະຍາຍາມຊອກຫາສາກເລື່ອງລາວການກຳເນີດຊຸດນ້ອຍໆ ທີ່ເຕືອນໃຈໂຣຊານາ ແລະ ຂ້າພະເຈົ້າເຖິງພຣະຜູ້ຊ່ວຍໃຫ້ລອດ. ຂ້າພະເຈົ້າໄດ້ສະສົມຫລາຍສົມຄວນ.
ຂະນະທີ່ຄຸ້ນຄິດເຖິງສາກເລື່ອງລາວການກຳເນີດທີ່ຖ່ອມຕົວເຫລົ່ານັ້ນ, ພັນລະຍາຂອງຂ້າພະເຈົ້າ ແລະ ຂ້າພະເຈົ້າເຄີຍໄດ້ໄຕ່ຕອງວ່າ, “ແມ່ນຫຍັງທີ່ສຳຄັນທີ່ສຸດໃນຊີວິດຂອງພວກເຮົາແທ້ໆ?” ຄຳຕອບ, ແນ່ນອນ, ແມ່ນພຣະຜູ້ຊ່ວຍໃຫ້ລອດ, ພຣະກິດຕິຄຸນຂອງພຣະອົງ, ແລະ ຄອບຄົວຂອງພວກເຮົາ. ເພື່ອເຕືອນໃຈພວກເຮົາເຖິງຄວາມຮັກຂອງພຣະບິດາເທິງສະຫວັນຂອງພວກເຮົາທີ່ມີຕໍ່ພວກເຮົາ ແລະ ວ່າຜ່ານທາງພຣະຜູ້ຊ່ວຍໃຫ້ລອດ ທີ່ຄຳສັນຍາຂອງຄອບຄົວນິລັນດອນເປັນໄປໄດ້, ກ່ອນວັນຄຣິດສະມາດ ສອງສາມປີກ່ອນ ພວກເຮົາໄດ້ວາງສາກເລື່ອງລາວການກຳເນີດທັງໝົດຂອງພວກເຮົາໄວ້ເທິງຊັ້ນວາງຂະໜາດໃຫຍ່ສອງຊັ້ນ ໃນບ້ານຂອງພວກເຮົາ—ແລະ ປະໄວ້ແບບນັ້ນ ແທນທີ່ຈະເກັບມ້ຽນຫລັງຈາກເທດສະການຄຣິດສະມາດ. ປະເພນີນັ້ນຊ່ວຍໃຫ້ພວກເຮົາຮັກສາວິນຍານແຫ່ງຄຣິດສະມາດໄວ້ໃນບ້ານຂອງພວກເຮົາຕະຫລອດທັງປີ.
ທຸກມື້ທີ່ພວກເຮົາຫລຽວເບິ່ງສາກເລື່ອງລາວການກຳເນີດເຫລົ່ານັ້ນ, ມັນຊ່ວຍເຕືອນໃຈພວກເຮົາຢ່າງອ່ອນໂຍນເຖິງບົດບາດສຳຄັນຂອງພຣະຜູ້ຊ່ວຍໃຫ້ລອດໃນຊີວິດຂອງພວກເຮົາ. ມັນເຕືອນໃຈພວກເຮົາວ່າ ສັນຕິສຸກຢູ່ເທິງໂລກໃນເວລານີ້ (ເບິ່ງ ລູກາ 2:14) ແລະ ຄວາມສຸກນິລັນດອນໃນໂລກທີ່ຈະມາເຖິງ ຂຶ້ນຢູ່ກັບພຣະຜູ້ຊ່ວຍໃຫ້ລອດ ແລະ ການໃຫ້ກຽດແກ່ພັນທະສັນຍາທີ່ພວກເຮົາໄດ້ເຮັດກັບພຣະອົງ. ແລະ ມັນເຕືອນໃຈພວກເຮົາ “ວ່າພຣະອົງໄດ້ມາສູ່ໂລກ, ແມ່ນແຕ່ພຣະເຢຊູ, ເພື່ອຖືກຄຶງເພື່ອໂລກ, ແລະ ເພື່ອຮັບເອົາບາບຂອງໂລກ, ແລະ ເພື່ອເຮັດໃຫ້ໂລກບໍລິສຸດ, ແລະ ເພື່ອຊຳລະລ້າງມັນຈາກຄວາມບໍ່ຊອບທຳທັງໝົດ;
“ວ່າໂດຍຜ່ານພຣະອົງ ທຸກຄົນຈະໄດ້ຮັບການຊ່ວຍໃຫ້ລອດ ຜູ້ຊຶ່ງພຣະບິດາໄດ້ໃຫ້ຢູ່ໃນອຳນາດຂອງພຣະອົງ ແລະ ຖືກສ້າງໂດຍພຣະອົງ” (ຄຳສອນ ແລະ ພັນທະສັນຍາ 76:41–42).
ເຊັ່ນດຽວກັບທີ່ພວກເຮົາໄດ້ຮຽນຮູ້ຄວາມຈິງເຫລົ່ານີ້ຈາກພໍ່ແມ່ຂອງພວກເຮົາ, ໂຣຊານາ ແລະ ຂ້າພະເຈົ້າກໍໄດ້ພະຍາຍາມເພື່ອສົ່ງມັນຕໍ່ໃຫ້ລູກໆຂອງພວກເຮົາ. ບັດນີ້ລູກໆຂອງພວກເຮົາກຳລັງສິດສອນຄວາມຈິງດຽວກັນນີ້ໃຫ້ກັບລູກໆຂອງເຂົາເຈົ້າ. ເມັດພືດທີ່ປູກໄວ້ໃນໃຈຂອງພໍ່ແມ່ຂອງຂ້າພະເຈົ້າ ເມື່ອ 60 ປີກ່ອນ ໃນເຮືອນຫລັງນ້ອຍຂອງພວກເຮົາໃນປະເທດບຣາຊິນ ໄດ້ເບັ່ງບານ ແລະ ອອກຜົນ “ຊຶ່ງຫວານເໜືອກວ່າທຸກສິ່ງທີ່ຫວານ, ແລະ ຂາວເໜືອກວ່າທຸກສິ່ງທີ່ຂາວ, ແທ້ຈິງແລ້ວ, ແລະ ບໍລິສຸດເໜືອກວ່າທຸກສິ່ງທີ່ບໍລິສຸດ” (ແອວມາ 32:42).
ຂ້າພະເຈົ້າເປັນພະຍານວ່າ ຜູ້ທີ່ຮັບເອົາແຜນຂອງພຣະເຈົ້າສຳລັບຄອບຄົວ, ຮັກດັ່ງທີ່ພຣະຜູ້ຊ່ວຍໃຫ້ລອດຮັກ, ແລະ ໃຫ້ກຽດແກ່ພັນທະສັນຍາຂອງເຂົາເຈົ້າ ຈະໄດ້ຮັບມໍລະດົກ “ພອນແຫ່ງຊີວິດນິລັນດອນ ແລະ ຄວາມສົມບູນແຫ່ງຄວາມຊື່ນຊົມ” ໃນມື້ໜຶ່ງ” ກັບຄົນທີ່ເຂົາເຈົ້າຮັກ ແລະ ກັບພຣະບິດາ ແລະ ພຣະບຸດ.
© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, December 2025. Laotian. 19614 331