“Plwacn luhn God nuh ke Sucu Ma Pahtpaht,” Liahona, Dec. 2025.
Pweng ke Liahona ke Mahlwem Nuhkwewa, Tisacmpuh 2025
Plwacn luhn God nuh ke Sucu Ma Pahtpaht
Sucu ma eis plwacn luhn God, luhngse oacna Mwet Lahngo el luhngse uh, ac ahkfuhlwactye olwelah lalos ac fah sie lwen eis “mwe insewowo nuh ke moul ma pahtpaht ac fohnlah luhn engan.”
Ke apkuhran in sahflah misin luhk, nga enganwack ke nga tuh eis akwuck muhtahl luhk lun tempuhl ac tuh sil nuh sin ninac ac pahpah tuhmuhk lun São Paulo Tempuhl fin acn Brazil.
Ninac kiyuck ac pahpah tuhmuhk, Apparecido ac Mercedes, elos tuhkuh ke siena alu, tuhsruhk ma sikyak ke moul lalos ahkoeloslac in eis wosasuc fohlohkyak se inge.
Pahpah tuhmuhk ah taflah ke sie sucu na wowo tuhsruhk elos tiacna wi kuhtwena alu. Ne ohinge, ke el ekihn mukul fuhsr se el pwacr in lohacng nuh ke alu. El riti Pwacpuhl, wi kuhlahs nuh ke Pwacpuhl, ac lutlut ke moul luhn Jisus Kraist. Lutlut lal oruh pwacnwacng elan luhngse na pwacye kwewana wosasuc luhn Jisus Kraist ac sucu lal, pwacnwacng sang nuh sel in kena tuh in pahyuckyak nuh sin sie suc nuhnkuh oacna el.
Tuhsruhktuh, ninac kiyuck el tuhkuh ke sie sucu na luhngse wi alu se. Elos moulkihn mwe luti ke wosasuc, wi alu, ac suwohs ke alu lalos. Ke el mahtuhlah ke ohiyacn sucu se inge, wacngihn sie pacl ninac kiyuck ah tiac wi alu.
Ac pwacnwacng, tukun ninac ac pahpah tuhmuhk pahyuckyak ac nga ac mukul tolu wiyuck tuhkuh nuh facluh, elos sang kuhiyaclos in tuhfwekuhtlac ke etuh lalos ke mwe luti ke wosasuc. Sie lwen ah auntie se luhk, suc tiac arlac fokoko ke Alu luhn Jisus Kraist luhn Mwet Luhlahlfongi ke Lwen Sahflah el tuh fahk nuh sin pahpah tuhmuhk, “Tamuhlwel sacohk, tuhlihk mukul ahkosr pa nuhtum ingacn. Kom fin arulacna ke tuhfahlah sie sucu in etuh ke Kraist ac in oasr God ke sucu lom an, kom enenuh in tuhkuh nuh ke alu luhk.”
Pahpah tuhmuhk el lohng ma el fahk nuh sel, tuhsruhk el tiacna mukwilac kac ne ke na pacl se misinacri ah som muhtwacta ke in puhluhn acn se kuht muhta kac ah, tongtong ke sruhnguhl lasr ah, ac muhtwacwacack luti kuht ah. El sa na akihlenwack lahlah elos fahkwack ke alu se auntie se luhk ah tuh pahtokuhl in tuh som wi sie pacl ah.
Kahlwem ac Pwacye
Sie ma tuh sang pwacr nuh sin ninac ac pahpah tuhmuhk nuh ke wosasuc fohlohkyak luhn Jisus Kraist pa ohiyacn oruh luhn Alu uh in akihlen lah sucu uh pa yohk srihpac emet ac mwe luti sac lah “inkaiyacn orekma luhn God nuh ke molwelah ac moul ma pahtpaht tuhkuh ke sucu uh.” Met liki elos pacptaislac ah, ninac ac pahpah tuhmuhk elos arulacna luhngse ma elos luti uh pwacnwacng elos suli mwet tuhlan lalos in tuh weluhlos lutlut sin misinacri ah.
Sie ma tuh sang pwacr nuh sin ninac ac pahpah tuhmuhk nuh ke wosasuc fohlohkyak luhn Jisus Kraist pa ohiyacn oruh luhn Alu uh in akihlen lah sucu uh pa yohk srihpac emet.
Ke elos ohsun nuh sin misinacri, ac tahfwelah na in lutlut ke wosasuc se inge tukun pacptaislac lalos, ninac ac pahpah tuhmuhk lotwelah ke inkacnek “in tuhfahlah tuhlihk [nahtuhlos] ke kahlwem ac pwacye” ac in “kol lohm [selos] ke suwohs” (Doctrine and Covenants 93:40, 43).
Elos lotwelah lah “sucu uh pa yohk srihpac ke plwacn luhn God nuh ke moul ma pahtpaht luhn tuhlihk nahtuhl ” ac lah “engan in sucu kuh in oreklac muhkwena fin elos moulkihn mwe luti luhn Leum Jisus Kraist.”
Elos lotwelah lah “Pahyuck ac sucu wowo uh oreklac ac fahsrkihn ip yohk ke luhlahlfongi, pruhe, auliyak, nuhnak muhnahs, ahkfuhlwactye, luhngse, pahkomuhta, orekma, ac kain in mukwikwi wo sahyac pac.”
Elos lotwelah lah sucu uh kuh in wacngihn sahflahiyac ac lah “kuhtuh ohiyac ma oasr inmahsrlosr inge fah oasr inmahsrlosr we tuh ac fah wi pac engan ma pahtpaht suc engan se ma wacngihn sesr ingena” (Doctrine and Covenants 130:2).
Ac elos lotwelah lah “srihpac yohk ke mwe luti nuhkwewa, toeni nuhkwewa ke Alu uh pa ninac ac pahpah ac tuhlihk nahtuhlos in engan e lohm selos, sil ke pahyuck ma pahtpaht, ac kuhpahsri nuh sin fihl nuh ke fihl lalos.”
Ke elos etuh ma inge uh, elos kena tuh elos in sil ekihn sie sucu ne tok ma pahtpaht.
Ngwetngwet nuh ke Ma Pahtpaht
Tukun ninac ac pahpah tuhmuhk elos pacptaislac ah, elos moulkihn ma elos lotwelah ah kais kuhtuh na fahsr liki ma luhn facluh ac siyac na tohkohsrahi luhn wosasuc. Elos orekma upac in orwacni sucu lasr uh ke toeni in ekuh in sucu ac lutlut ke ma suhmuhslah ke pacl luhn sucu, wi alu pacl nuhkwewa, ac orekma ke tahk sucu lalos. Ke srihke lalos nuh ke ma se fanna, elos finsraki in oraclah sie sucu ma moulkihn yohk plwacn in molwelah ac ngwetngwet nuh ke ma pahtpaht.
Ke 1965, yac se ma ninac ac pahpah tuhmuhk ah elos pacptaislac ah, tempuhl se ma fototo emet nuh São Paulo, Brazil, oasr fin acn Mesa, Arizona, apkuhran in mael 6,000 (9,650 km) liki acn kuht muhta we. Forfor uh arulacna yohk molo nuh sin sucu lasr uh, pwacnwacng ninac ac pahpah tuhmuhk ah enenuh in sano kihsaclah luhn Tempuhl São Paulo fin acn Brazil ke 1978 met liki elos kuh in eis akwuck muhtahl lalos lun tempuhl ac siliyucki. Ke pacl se ingacn, nga kuhlwacnsap ke misin luhk fin acn Rio de Janeiro.
Mahlwem luo met liki nga ahksahfyelah misin luhk ke Fepweri 1980, misin prestuhn luhk el lwelah nga ac mwet se ma wiyuc ah in wi mempuhr ke stek se fin acn Rio de Janeiro nuh ke tempuhl se fin acn São Paulo nga in kuh in wi ninac ac pahpah tuhmuhk eis akwuck muhtahl lun tempuhl ac siliyucki nuh selos. Nga tuh tuhpan yac nuh ke yac in eis mwe insewowo ke akwuck lun tempuhl ac olwelah lun tempuhl oacna ninac ac pahpah tuhmuhk ah.
Ma se ma sikyak inge ekuhllah liye luhk ke pacl fahsruh uh ac use nuh sihk in liye ke pwacyeiyacn kahs lal Prestuhn Russell M. Nelson: “Pacl lom lun tempuhl ac kahsrwekom in motko celestial ac in liye na pwacye lah suc na pwacye kom uh, suc kom kuh in eklac nuh kac, , ac moul fuhkah kom kuh in eis ne tok ma pahtpaht.”
Pacl fototo luhk lun tempuhl ke lwen se ingacn lihksrweni na mokleyuc ke lusen pacl luhlah luhk ke kuhlwacnsap ke misin luhk. Ke liye sasuc se luhk inge, fahkwack ke tempuhl ac ke yohk srihpaciyacn plwacn luhn God nuh ke sucu mokleyuc ke lusen moul luhk nohfohn.
Ke muhtwacn kiyuck, Rosana ac nga tuh pahyuckyak ke yac luo tukun misin luhk, kuht tuh sil lun tempuhl ac siyac in tuhfahlah sucu lasr sifacna ne tok ma pahtpaht. Kuht tuhkweni orekma in oraclah facsin luhn sucu lasr oacna ma ninac pahpah tuhmwacsr luti kuht me, nohfohn lihksrweni kuhpahsr kacl Mwet Lahngo, mwe luti Lal, ac mwe luti luhn mwet pahluh Lal in pacl misenge uh.
Misenge tuhlihk nahtuhsr uh ingena tuhfuh tuhlihk nahtuhlos ke ip yohk ke luhlahlfongi ke engan oacna ke kuht oruh nuh selos ah. Nuh sesr, sucu pa ma nuhkwewa ke srihpen kuht kahlwem ke yohk srihpaciyacn sucu ke plwacn luhn God.
Ke nga ekihn sie General Authority se uh, nga ahkinsewowoyeyuck in siliyac tolu sin tuhlihk nuhtihk uh nuh sin mwet elos pahyuck se lun tempuhl. Ke nga liye muhtahlos ke pacl se elos sikuck muhtuhntei ke altar se lun tempuhl ah el sie pacl na wolacna in moul luhk uh. Nga kuh in liye fihlin tuhlihk nuhtihk ahkinsewowoyeyuck ke ip yohk ke luhlahlfongi ke wosasuc ma ninac ac pahpah tuhmuhk tuh lutiyuc me pacna ac pa pacna nga ac Rosana sang lotwelos kac. Nga kuh in liye mwe insewowo ingacn tuhtahflah na fahlac na ke fihl ke pacl fahsruh uh. Ac ahkacsmakihnyeyuck nga lah suc oruh ma inge kuh in sikyak uh.
Sie Mwe Ahkacsmak Nuh ke Krismas
Sucu yohk srihpac nuh ke plwacn luhn God nuh ke engan, tuhsruhk fin Mwet Lahngo Jisus Kraist el wacngihn, plwacn se ingacn tiac kuh in oreklac. Iwaclah Lal ac akwuck ac olwelah sukokyak ke wosasuc Lal uh oruh kuh in sikyak olwelah nuh ke moul ma pahtpaht yurun God.
Prestuhn Nelson el tuh fahk: “Moul ma pahtpaht yurun God ma luhn sucu. Ke akwuck ke wosasuc luhn Jisus Kraist muhkwena pa sucu uh kuh in eis moul ma pahtpaht yurun God. Ma sahflah yohk se kuht kampare nuh kac uh pa in ekihn sie sucu engan—endowed, siliyucki, ac ahkolah nuh ke moul ma pahtpaht ye muhtuhn God.”
Ke nga muhtwacta nuh ke acn ma nga soenna liye, nga srihke in konwacack ke sie mwe sruhlwaclah ke isuslac lal Jisus ma ahkacsmakihnyeyuc ac Rosana ke Mwet Lahngo. Nga oracni ma na puhs.
Ke nga nuhnkuh ke puhsisacliyacn mwe sruhlwaclah nuh ke isuslac luhn Jisus, nga ac muhtwacn kiyuck tuh motko sie pacl ah, “Meac se ma yohk srihpac emet ke moul lasr uh?” Top nuh kac uh pa, Mwet Lahngo, wosasuc Lal, ac sucu lasr uh. In ahkacsmakihnye kuht ke luhngse luhn Pahpah Inkuhsrao nuh sesr ac lah ke srihpacl Mwet Lahngo pa oruh olwelah nuh ke sucu ma pahtpaht uh kuh in sikyak uh, met liki Krismas ke yac ekahsr met ah kuht fihliyac nohfohn mwe sruhlwaclah ke isuslac lal Jisus fin srwaclf luhlahp luo ke lohm sesr ah—ac fuhlwelah na in oan na finne tari pacl in Krismas uh. Facsin se inge kahsrwekuht in liyacacng nguhn in Krismas lun lohm sesr ac ke yac nuhkwewa.
Lwen nuhkwewa ke kuht liye ma inge uh, ma inge ahkacsmakihnye kuht ke srihpacl Mwet Lahngo nuh ke moul lasr uh. Ma inge ahkacsmakihnye kuht lah mislac fin facluh ingena (liye Luke 2:14) ac engan ma pahtpaht ke moul fahsruh uh tuhkuh nuh sesr kuht fin ukwacl Mwet Lahngo ac liyacacng olwelah kuht orwaclah nuh Sel. Ac ma inge ahkacsmakihnye kuht “lah el tuhkuh nuh fin facluh , finne Jisus, in tuh srihpsrihpyak fin sahksin, ac elah ma koluk fin facluh, ac in ahknwacsnwacsyelah facluh, ac in ahknwacsnwacsyelah liki ma sesuwohs nuhkwewa fin facluh;
“Lah kacl nohfohn na kuh in moliyucklac suc Pahpah el sang nuh in kuh lal ac oraclah” (Doctrine and Covenants 76:41–42).
Oacna ke kuht tuh lotwelah ma pwacye inge sin ninac ac pahpah tuhmwacsr, nga ac Rosana kampare kuht in sang luti pac tuhlihk nahtuhsr uh. Ingena tuhlihk nahtuhsr uh luti ma inge nuh sin tuhlihk nahtuhlos. Fihtac yokuh ke insiacn ninac ac pahpah tuhmuhk ke yac 60 tari ah ke lohm srihsrihk se sesr fin acn Brazil ah ingena foklac nuh ke fukunsahk suc “ma sacohk emet, suc emwem liki ma nuhkwewa ma emwem, ac ma fasrfasr liki ma nuhkwewa ma fasrfasr, ahok, ac nwacsnwacs liki ma nuhkwewa ma nwacsnwacs” (Alma 32:42).
Nga fahkwack lah elos suc eis plwacn luhn God nuh ke sucu, luhngse oacna ke Mwet Lahngo el luhngse, ac liyacacng olwelah lalos fah sie lwen eis “mwe insewowo nuh ke moul ma pahtpaht ac fohnlah luhn engan” wi sucu lalos ac Pahpah Inkuhsrao ac Wen nahtuhl.
© 2025 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Pweng ke Liahona ke Mahlwem Nuhkwewa, Tisacmpuh 2025. Kosraean. 19614 868