Vajtswv txoj Hau Kev rau Ib Tsev Neeg uas Nyob Mus Ib Txhis

Ib qho uas kuv niam thiab kuv txiv nyiam txog Yexus Khetos txoj moo zoo uas tau muab txum tim rov qab los yog qhov uas lub Koom Txoos qhia txog tsev neeg thiab tej kev qhia tias “ntau yam ntawm Vajtswv txoj hauj lwm cawm seej thiab kev tsa nto yog uas nyob hauv tsev neeg.” Ua ntej nkawd ua kev cai raus dej, kuv niam thiab kuv txiv tau txais kev tshoov siab heev txog tej yam nkawd kawm, es nkawd caw cov neeg zej zog tuaj koom nkawd thaum nkawd kawm cov tub txib tej zaj lus qhia.

Tom qab nkawd nrog cov tub txib sib ntsib, thiab rau siab kawm txoj moo zoo tom qab nkawd ua kev cai raus dej, kuv niam thiab kuv txiv tau kawm txog lwm yam kom “tu [nkawd] cov me nyuam raws li txoj kev kaj thiab qhov tseeb” thiab “kho [nkawd] tsev neeg kom muaj kab muaj kev” ntawm sab ntsuj plig (Lus Qhuab Qhia thiab Kev Khi Lus 93:40, 43).

Nkawd kawm tias “tsev neeg yog lub ntsiab ntawm Leej Tsim txoj hau kev rau Nws cov me nyuam txoj hmoov nyob mus ib txhis li” thiab “ib tse neeg twg haj yam yuav txais tau kev zoo siab hauv lawv lub neej no thaum tus Tswv Yexus Khetos cov lus qhuab qhia yog lawv lub hauv paus.”

Nkawd kawm tias “tej kev sib yuav thiab tej tsev neeg uas kav ntev tau mus tsa thiab nyob mus li los ntawm tej kev cai xws li kev ntseeg, kev thov Vajtswv, kev hloov siab lees txim, kev zam txim, kev sib hwm, kev hlub, kev khuv leej, kev ua hauj lwm, thiab kev ua si uas tsim nyog ua.”

Nkawd kawm tias tsev neeg nyob tau mus ib txhis thiab “tib txoj kev sib raug zoo uas muaj nyob nrog peb nim no kuj yuav muaj nyob nrog peb thaum ntawd, tsuas yog yuav muaj yeeb koob uas kav mus ib txhis” (Lus Qhuab Qhia thiab Kev Khi Lus 130:2).

Thiab nkawd kawm tias “lub ntsiab ntawm txhua lo lus qhia, txhua txoj kev koom lub Koom Txoos yog kom niam tsev txiv tsev thiab lawv cov me nyuam muaj kev zoo siab tom tsev, sib khi ua ke thaum sib yuav mus ib txhis, thiab sib khi nrog lawv tej xeeb leej xeeb ntxwv.”

Thaum nkawd paub li ntawd, nkawd xav nrog nkawd tsev neeg sib khi ua ke mus ib txhis.

Tom qab kuv niam kuv txiv ua kev cai raus dej, nkawd pib ua li nkawd tau kawm, txav deb ntawm lub ntiaj teb mus rau txoj moo zoo lub nceeg vaj. Nkawd pab peb tsev neeg sib koom siab thaum peb muaj tsev neeg hmo ua ke, tsev neeg kev kawm vaj lug kub, rau siab mus koom txoj kev sib ntsib hauv lub Koom Txoos, thiab nrhiav tsev neeg zaj keeb kwm. Nkawd ua tej ntawd kom muaj kev sib koom siab, thiab nkawd xav tau ib tsev neeg tsom ntsoov rau txoj kev cawm seej thiab tsom ntsoov rau kev mus ib txhis.

Nyob rau xyoo 1965, xyoo uas kuv niam thiab kuv txiv ua kev cai raus dej, lub tuam tsev uas nyob ze São Paulo, Brazil, yog lub tuam tsev nyob hauv Mesa, Arizona, uas yog 6,000 mais (9,650 km) deb. Kim rau kuv tsev neeg mus, ces kuv niam kuv txiv tos mus txog thaum tau muab lub Tuam Tsev hauv São Paulo Brazil fij tseg nyob rau xyoo 1978 ua ntej nkawd txais nkawd tej kab ke hauv lub tuam tsev thiab ua kev cai sib khi. Thaum lub sij hawm ntawd, kuv tseem ua ib tug tub txib hauv Rio de Janeiro.

Ob hlis ua ntej kuv ua tub txib tiav thaum lub Ob Hlis Ntuj xyoo 1980, kuv tus thawj tswj hwm ntawm qhov chaw tshaj tawm txoj moo zoo tau cia kuv thiab kuv tus khub nrog ceg txheem ntseeg cov mej zeej ntawm Rio de Janeiro mus rau lub tuam tsev hauv São Paulo kom kuv thiaj li txais tau kuv vaj txiaj ntsim thiab ua kev cai sib khi nrog kuv niam kuv txiv. Zoo li kuv niam kuv txiv, kuv tau tos ntau xyoos kom txais tau cov koob hmoov uas tau cog lus tseg los ntawm cov kab ke thiab kev khi lus hauv lub tuam tsev.

Lub sij hawm ntawd tau hloov kuv txoj kev pom yav tom ntej thiab cia kuv pom me ntsis txog tej lus tseeb ntawm Thawj Tswj Hwm Russell M. Nelson tej lus: “Kev siv sij hawm hauv lub tuam tsev yuav pab nej xav txog tej yam xilethi-aus thiab paub tias nej yog leej twg tiag, nej muaj peev xwm hloov los ua leej twg, thiab lub neej uas nej muaj tau mus ib txhis li.”

Lub sij hawm kuv nyob hauv lub tuam tsev thaum ntawd tau pab hloov kuv txoj kev ua tub txib ntau heev. Nrog rau lub zeem muag tshiab ntawd, kev ua tim khawv txog lub tuam tsev thiab qhov uas Vajtswv txoj hau kev rau tsev neeg tseem ceeb npau li cas kuj pab kuv hauv kuv lub neej.

Thaum kuv tus poj niam, Rosana, thiab kuv sib yuav ob xyoos tom qab kuv ua tub txib, wb ua kev cai sib khi hauv lub tuam tsev nrog kev xav tias wb yuav tu wb tsev neeg nyob mus ib txhis. Kom ua li ntawd, wb tau ua hauj lwm ua ke kom wb tsev neeg muaj tej kab lig kev cai zoo li wb niam thiab txiv qhia rau wb, kom txhua tus tsom ntsoov rau tus Cawm Seej, Nws tej lus qhia, thiab tej lus qhia ntawm Nws cov yaj saub niaj hnub nim no.

Hnub no wb cov me nyuam tu lawv cov me nyuam qhia tib txoj moo zoo cov ntsiab cai ntawm kev zoo siab. Rau peb, tsev neeg yog txhua yam vim tias peb to taub tias ib tsev neeg yog lub ntsiab ntawm Vajtswv txoj hau kev.

Ua ib tug Tuam Thawj Coj, kuv tau muaj koob hmoov muab kuv peb tug me nyuam ib leeg khi rau ib leeg tus khub hauv lub tuam tsev. Qhov uas kuv ntsia lawv qhov muag thaum lub sij hawm lawv txhos caug ntawm lub thaj hauv lub tuam tsev yeej yog ib lub sij hawm zoo heev. Kuv pom tau tias kuv cov xeeb leej xeeb ntxwv yuav txais cov koob hmoov los ntawm txoj moo zoo tej ntsiab cai uas kuv niam kuv txiv tau qhia rau kuv thiab Rosana thiab kuv tau qhia rau lawv. Kuv pom tau cov koob hmoov ntawd mus rau tej tiam neeg yav tom ntej. Thiab ua rau kuv nco qab tias vim yog leej twg thiaj ua tau txhua yam no.

Txoj Kev Nco Qab Thaum lub Caij Christmas

Tsev neeg yog lub ntsiab ntawm Vajtswv txoj hau kev zoo siab, tiam sis yog tsis muaj Yexus Khetos, ces yeej yuav tsis muaj txoj hau kev ntawd. Nws txoj Kev Theej Txhoj thiab cov kab ke thiab tej kev khi lus uas nyob hauv Nws txoj moo zoo qhib kev rau peb txais tau kev tsa nto raws li Nws tau cog lus tseg lawm.

Thawj Tswj Hwm Nelson tau hais tias: “Kev tsa nto yog txoj hauj lwm rau ib tsev neeg. Tsuas yog los ntawm tej kab ke cawm seej ntawm Yexus Khetos txoj moo zoo, tsev neeg thiaj li txais tau kev tsa nto xwb. Qhov zoo tshaj plaws uas peb xav tau yog los ua ib tsev neeg zoo siab—txais vaj txiaj ntsim, ua kev cai sib khi, thiab npaj txais txoj sia nyob mus ib txhis nyob hauv Vajtswv lub xub ntiag.”

Thaum kuv mus xyuas tej qhov chaw uas kuv tsis tau mus dua, kuv nrhiav cov me nyuam roj hmab txog lub sij hawm Yexus yug uas pab Rosana thiab kuv nco txog tus Cawm Seej. Kuv twb khaws tau ntau tus lawm.

Thaum kuv xav txog cov me nyuam roj hmab txog lub sij hawm Yexus yug, kuv tus poj niam thiab kuv tau xav tias, “Qhov tseem ceeb tshaj hauv wb lub neej yog dab tsi?” Wb yeej teb hais tias yog tus Cawm Seej, Nws txoj moo zoo, thiab wb tsev neeg. Kom pab wb nco qab txog wb Leej Txiv Saum Ntuj Ceeb Tsheej txoj kev hlub rau peb thiab nco txog qhov uas tsuas yog los ntawm tus Cawm Seej thiaj li muaj tsev neeg nyob mus ib txhis, ob peb xyoos tas los ua ntej hnub Christmas wb tau muab tag nrho wb cov me nyuam roj hmab txog lub sij hawm Yexus yug tso saum txee hauv wb tsev—thiab cia lawv nyob ntawd tom qab Christmas twb tas lawm. Qhov uas wb ua li no pab wb nco txog lub ntsiab ntawm lub caij Christmas tag niaj xyoo.

Txhua hnub wb ntsia cov me nyuam roj hmab txog lub sij hawm Yexus yug ntawd, tej ntawd ua rau wb nco txog tus Cawm Seej tus uas tseem ceeb tshaj plaws hauv wb lub neej. Cov ntawd ua rau wb nco ntsoov tias kev kaj siab lug hauv lub ntiaj teb (saib Lukas 2:14) thiab txoj kev zoo siab mus ib txhis nyob ntawm tus Cawm Seej thiab peb txoj kev ua raws peb tej kev khi lus uas peb tau nrog Nws khi. Thiab cov ntawd ua rau wb nco ntsoov hais tias “nws los rau hauv lub ntiaj teb, tus uas yog Yexus, los mus raug muab ntsia rau saum ntoo khaub lig theej neeg ntiaj teb, thiab los ris neeg ntiaj teb tej kev txhaum, thiab los ua rau neeg ntiaj teb hloov ua neeg dawb huv, thiab los ntxuav lawv tawm ntawm tag nrho tej kev ua tsis ncaj ncees;

“Hais tias los ntawm nws tag nrho sawv daws cov uas Leej Txiv tau muab tso rau nws lub hwj chim kav thiab cov uas nws tau tsim yuav txais kev cawm dim” (Lus Qhuab Qhia thiab Kev Khi Lus 76:41–42).

Ib yam li wb kawm tej lus tseeb los ntawm wb niam wb txiv, Rosana thiab kuv twb qhia tej ntawd rau wb cov me nyuam. Tam sim no wb cov me nyuam qhia tej lus tseeb no rau lawv cov me nyuam. Cov noob uas tau cog rau hauv kuv niam kuv txiv lub siab 60 xyoo tas los nyob hauv Brazil tau tawg paj thiab txi txiv “uas yog cov muaj nuj nqis tshaj, uas yog cov qab zib tshaj txhua yam qab zib, thiab uas yog cov dawb tshaj txhua yam dawb, muaj tseeb tiag, thiab huv tshaj txhua yam huv” (Amas 32:42).

Kuv ua tim khawv tias cov uas muab siab npuab Vajtswv txoj hau kev rau tsev neeg, hlub li tus Cawm Seej hlub, thiab ua raws li lawv tej kev khi lus yuav muaj ib hnub thaum lawv txais tau “cov koob hmoov ntawm txoj sia nyob mus ib txhis thiab muaj kev xyiv fab puv npo” nrog cov uas lawv hlub thiab nrog Leej Txiv thiab Leej Tub.