Plano sang Dios para sa Walay Katapusan nga Pamilya

Isa sa mga butang nga una nga nagpainteres sa akon mga ginikanan sa ginpanumbalik nga ebanghelyo ni Jesucristo amo ang importansya nga ginahatag sang Simbahan sa pamilya kag ang pagtudlo nga “ang kalabanan sang buluhaton sang Dios sa kaluwasan kag pangkahitaasan ginatuman paagi sa panimalay.” Antes sila bunyagan,nagdayaw gid ang akon mga ginikanan sa ila natun-an amo nga gin-agda nila ang mga kaingod nga magbuylog sa ila para sa mga leksyon sang misyonero.

Sang nakigkita sila sa mga misyonero, kag nagpadayon sa pagtuon sang ebanghelyo pagkatapos sang ila bunyag, ang akon mga ginikanan nakatuon sang mga paagi “sa pagpadako sang [ila] mga anak sa kasanag kag kamatuoran” kag kon paano espirituhanon nga “magpahamtang sang [ila] kaugalingon nga panimalay” (Doktrina kag mga Kasugtanan 93:40, 43 ).

Natun-an nila nga “ang pamilya amo ang sentro sang plano sang Tagtuga para sa wala katapusan nga kapalaran sang Iya mga anak” kag nga “ang kalipay sa kabuhi sang pamilya labing posible nga matigayon kon napasad sa mga panudlo ni Ginuong Jesucristo.”

Natun-an nila nga “ang madinalag-on nga mga pag-asawahay kag mga pamilya napahamtang kag ginapadayon sa mga prinsipyo sang pagtuo, pangamuyo, paghinulsol, pagpatawad, pagtahod, pagpalangga, kaluoy, trabaho, kag makapaayo nga mga kahiwatan sa paglingawlingaw.”

Natun-an nila nga ang mga pamilya mahimo nga mangin walay katapusan kag nga ang “amo man nga pag-inupdanay nga nagapatunga sa aton diri magapatunga sa aton didto, ugaling ini pagaupdan sang walay katapusan nga himaya” (Doktrina kag mga Kasugtanan 130:2).

Kag natun-an nila nga “ang katapusan nga katuyoan sang tagsa ka pagpanudlo, tagsa ka kahiwatan sa Simbahan amo nga ang mga ginikanan kag ang ila mga kabataan malipayon sa puluy-an, naselyohan sa isa ka walay katapusan nga pag-asawahay, kag naangot sa ila mga henerasyon.”

Sa sina nga ihibalo, naghandum sila nga maselyohan bilang isa ka walay katapusan nga pamilya.

Pagkatapos nga mabunyagan ang akon mga ginikanan, ginhimo nila ang ila ginatun-an, naghalin sa kalibutan pakadto sa ginharian sang ebanghelyo. Nagpangabudlay sila sa paghiusa sang amon pamilya paagi sa paghiwat sang home evening kag pagtuon sa balaan nga mga kasulatan bilang pamilya, matutum nga pagtambong sa mga miting sa Simbahan, kag paghimo sang hilikuton sa family history. Sa sinang mga panikasog padulong sa paghiliusa, naglaum sila nga magtuga sang isa ka pamilya nga nasentro sa plano sang kaluwasan nga may panulok padulong sa walay katapusan.

Sang 1965, ang tuig nga ginbunyagan ang akon mga ginikanan, ang pinakamalapit nga templo sa São Paulo, Brazil, amo ang Mesa, Arizona, halos 6,000 ka milya (9,650 km) ang kalayuon. Ang pagbiyahe pwerte ka mahal para sa amon pamilya, gani ang akon mga ginikanan kinahanglan maghulat sa dedikasyon sang templo sa São Paulo Brazil sang 1978 antes sila makabaton sang ila mga ordinasa sa templo kag maselyohan. Sina nga tion, nagaalagad ako sa misyon sa Rio de Janeiro.

Mga duha ka bulan antes ko mahuman ang akon misyon sang Pebrero 1980, ang akon mission president nagtugot nga ako kag ang akon companion mabiyahe sa bilog nga gab-i upod ang mga miyembro sa stake halin sa Rio de Janeiro pakadto sa templo sang São Paulo agud nga ma-endow ako kag maselyo sa akon mga ginikanan. Pareho sa akon mga ginikanan, naghulat ako sang tinuig para sa ginpromisa nga mga bugay sang mga ordinansa kag mga kasugtanan sa templo.

Ina nga eksperiyensia nagbag-o sang akon panan-awon sa palaabuton kag naghatag sa akon sang akon una nga pagtan-aw sa kamatuoran sang mga pulong ni Pangulong Russell M. Nelson sang nagligad lang: “Ang tion sa templo magabulig sa imo nga magpamensar sang selestiyal kag makilala kon sin-o ka gid bala, sin-o ka mahimo nga mangin, kag ang sahi sang kabuhi nga pwede mo maangkon sa katubtuban.”

Ang akon malip-ot nga tion sa templo sadto nga higayon nag-impluwensya sing dako sa nabilin nga tion sang akon pag-alagad sa misyon. Sa sina nga bag-o nga panan-aw, ang pagpamatuod sa templo kag ang kaimportante sang plano sang Dios para sa mga pamilya may padayon man nga epekto sa akon kabuhi.

Sang ako kag ang akon asawa, nga si Rosana, nagpakasal duha ka tuig pagkatapos sang akon misyon, ginselyo kami sa templo nga may panan-awon nga magpasad sang amon kaugalingon nga walay katapusan nga pamilya. Agud mahimo ini, nagbuligay kami sa paghimo sang mga tradisyon sang pamilya pareho sang mga gintudlo sa amon sang amon mga ginikanan, tanan nakasentro sa Manluluwas, sa Iya mga pinanudlo, kag sa mga pinanudlo sang Iya nga mga propeta sining modernong panahon.

Sa karon ang amon kabataan nagapadako sang ila mga kabataan sa pareho man nga mga prinsipyo sang kalipay. Para sa amon, ang pamilya amo ang tanan tungod naintiendihan namon ang pagkasentro sang pamilya sa plano sang Dios.

Bilang isa ka General Authority, nakaangkon ako sang kahigayonan nga maselyohan ang akon tatlo ka kabataan sa ila mga tiayon sa templo. Ang tulokon sila sa ila mga mata sa tion nga nagluhod sila sa altar sa templo isa ka matahom nga eksperiyensia. Akon makita ang akon mga kaliwat nga ginabugayan sang amo man nga mga prinsipyo sang ebanghelyo nga gintudlo sa akon sang akon mga ginikanan kag gintudlo namon ni Rosana sa ila. Makita ko inang mga bugay nga nagapadayon sa palaabuton nga mga henerasyon. Kag ginpadumdom ako sini kon sin-o ang naghimo sini nga posible.

Isa ka Pahanumdum sa Paskwa

Ang pamilya amo ang sentro sa plano sang kalipayan sang Dios, pero kon wala ang Manluluwas nga si Jesucristo, ang ina nga plano indi mangin posible. Ang Iya Pagbayad-Sala kag ang mga ordinansa kag mga kasugtanan nga makita sa Iya ebanghelyo ang nagapatigayon sang promisa sang pagpahitaas.

Si Pangulong Nelson nagsiling: “Ang pagpahitaas pangpamilya nga hilikuton. Paagi lamang sa nagaluwas nga mga ordinansa sang ebanghelyo ni Jesucristo nga ang mga pamilya mahimo nga mapahitaas. Ang pinakamataas nga katuyoan nga aton ginatinguhaan amo nga kita mangin malipayon bilang isa ka pamilya—gintugyanan, ginselyohan, kag ginhanda para sa kabuhi nga walay katapusan sa presensya sang Dios.”

Kon magbisita ako sa mga lugar nga wala ko pa makadtui, nagatinguha ako nga makakita sang isa ka magamay nga talan-awon sang Pagkabun-ag nga nagapadumdum sa amon ni Rosana sang Manluluwas. Nagatipon ako sang daw isa ka koleksyon.

Samtang akon ginapulupanumdum ang mga mapainubuson nga mga talan-awon sa Pagkabun-ag, ako kag ang akon asawa kis-a sadto nagpaminagbinag, “Ano gid bala ang pinakaimportante sa aton mga kabuhi?” Ang sabat, siyempre, amo ang Manluluwas, ang Iya ebanghelyo, kag ang amon pamilya. Agud mapadumdom sang pagpalangga sang aton Amay nga Langitnon para sa aton kag nga paagi sa Manluluwas nga ang promisa sang walay katapusan nga mga pamilya nangin posible, antes sang Paskwa sang nagligad nga pila ka tuig ginbutang namon ang tanan namon nga mga bagay-bagay sang Pagkabun-ag sa duha ka dalagko nga estante sa amon balay—kag ginpabilin ini imbes nga taguon pagkatapos sang panahon sang Paskwa. Ina nga tradisyon nagbulig sa amon nga mapabilin ang espiritu sang Paskwa sa amon balay sa bilog nga tuig.

Kada adlaw nga ginatulok namon atong mga talan-awon sang Pagkabun-ag, malulo nga ginapahanumdom nila kami sang panguna nga papel sang Manluluwas sa amon mga kabuhi. Ginapahanumdom kami sini nga ang paghidaet sa duta karon (tan-awa sa Lucas 2:14) kag ang walay katapusan nga kalipay sa masunod nga kalibutan nagadepende sa Manluluwas kag sa pagpasidungog sang mga kasugtanan nga aton ginhimo upod sa Iya. Kag ginapahanumdom kami sini “nga nagkadto sia sa kalibutan, bisan pa si Jesus, agud ilansang sa krus para sa kalibutan, kag pas-anon ang mga sala sang kalibutan, kag agud pakabalaanon ang kalibutan, kag agud tinloan ini halin sa tanan nga indi matarong;

“Nga paagi sa iya ang tanan maluwas, sila nga ginbutang sang Amay sa iya gahum kag iya nga gintuga” (Doktrina kag mga Kasugtanan 76:41–42).

Kay natun-an namon ini nga mga kamatuoran sa amon mga ginikanan, gintinguhaan man namon ni Rosana nga mapasa ini sa amon kabataan. Karon ginatudlo man sang amon kabataan ining amo man nga mga kamatuoran sa ila kabataan. Ang mga liso nga gintanom sa tagipusuon sang akon mga ginikanan 60 ka tuig na ang nagligad sa amon gamay nga puluy-an sa Brazil nagpamulak kag nagpamunga “nga labing malahalon, nga matam-is labaw sa tanan nga matam-is, kag maputi nga labaw sa tanan nga maputi, huo, puraw nga labaw sa tanan nga puraw” (Alma 32:42).

Nagasaksi ako nga yadtong nagabaton sang plano sang Dios para sa mga pamilya, nagahigugma pareho sang paghigugma sang Manluluwas, kag nagatahod sang ila mga kasugtanan sa pila ka adlaw magapanubli sang “mga bugay sang kabuhi nga walay katapusan kag sang kabug-osan sang kalipay” upod ang ila mga pinalangga kag upod ang Amay kag Anak.