“Ana Babaire te Atua ibukin te Utu ae Akea Tokina,” Riaona, Ritembwa 2025.
Rongorongo man te Riaona ni Katoa Namwakaina, Ritembwa 2025
Ana Babaire te Atua ibukin te Utu ae Akea Tokina
Utu ake a butimwaea ana babaire te Atua, a tangira n aron ana tangira te Tia Kamaiu, ao a karinei aia berita aika tabu n te bong teuana ao a na karekei “kakabwaia ibukin te maiu are akea tokina ao bwaninin te kimwareirei.”
Ngke e nang raabane au mwakuri ni mitinare ae bwanin taina, I bon rootaki n te kimwareirei ngke I entaau ao ni kabaeaki nakoia au karo n te Sao Paulo Brazil Tembora.
Au karo, aika Apparecido ao Mercedes, a roko man aaro aika a kakaokoro, ma aia taneiai ni maiuia a katauraoiia ni butimwaea te euangkerio ae e kaokaki.
E ikawairake tamau inanon te utu ae tamaroa ma aki taua te aro. E ngae n anne, ngke te ataeinimwaane ngaia bon iai nanona n taekan te aro. E wareware n te Baibara, e iriiri taian kiraati ibukin te Baibara, ao ni kamatebwaia maiun Iesu Kristo. Ana kamatebwai are e a karikirakea nanona ae moan te korakora n ana euangkerio te Tia Kamaiu ao te utu, e a kauekea nanona ni kan mare ma temanna are e booraoi ana iango ma ngaia.
Ma te kaokoro, bwa tinau e roko man te utu ae a rangi n taua te aro. A butimwaea tuan te euangkerio, a nanako n taromauri, ao a kakaonimaki ni maiuakina aia aro. N ikawairake n te tabo anne, e a riki tinau bwa te aekaki n aomata are e bon aki kona n ae e na aki ira bootakin te aro.
Ao ngaia are i mwiin mareia au karo ao Ngai ma tariu aika teniman ti a bungiaki, a karaoa aia kabanea n tamaroa ni kaikawaira inanon ootaia ma aia atatai n tuan te euangkerio. Te bong teuana ai tinau, are bon kaain te aro ae aki bati ni kakaonimaki n Ana Ekaretia Iesu Kristo ibukiia Aika Itiaki ni Boong aika Kaitira, e taku ana taeka nakon tamau, “Iai aman am ataeinimwaane, naewa. Ngkana ko tangiria raoi bwa ko na kaikawa am utu ae boboto i aon Kristo ao n iai te Atua inanon am utu, ko riai n nakon au aro.”
E ongo tamau te bwai ae e taekinna neiei nakoina ma akea te bwai ae e karaoia ni karokoa te bong are e roko te mitinare are e bwainin ana tai ni kawara ara tabo ao e karebwerebwe i aon ara mataroa, ao a moanna n reireiniira. E waekoa n ataia bwa a tei man te aro are e kaungaaki iroun ai tinau bwa e na kakaenako ao n ukora koauana.
Te Ota ao te Koaua
Teuana te bwai are e anaaki iai nanoia au karo n ana euangkerio Iesu Kristo ae kaokaki bon kakawakin te utu n te Ekaretia ao te reirei are “angin ana mwakuri te Atua ibukin te kamaiuaki ao te karietataaki e bon kakoroaki bukina rinanon te utu.” I mwaain ae a bwabetitoaki, a rangi ni kukurei nanoia au karo n te bwai are a reiakinna are a kaoiia kaain rarikia bwa a na raoniia ibukin aia reirei mitinare.
Teuana te bwai are e anaaki iai nanoia au karo n ana euangkerio Iesu Kristo ae kaokaki bon kakawakin te utu n te Ekaretia.
Ngke a kaitibo ma mitinare, ao n reitinako ni kamatebwaia te euangkerio i mwiin bwabetoakiia, au karo a reiakini kawai “ni kaikawaia [natia] i nanon te oota ao te koaua“ ao a na kanga aroia n te maiu n tamnei “ni bairea raoi oin [aia] auti” (Reirei ao Berita aika Tabu 93:40, 43).
A reiakinna bwa “te utu e kakawaki ibukin ana babaire te tia karikibwai ibukin tokin kawaia Natina ae akea tokina” ao bwa “te kukurei ni maiun te utu e bon koro nanona ngkana e aanaki i aon ana reirei te Uea ae Iesu Kristo.”
A reikinna bwa “maare ao utu aika nakoraoi a kateaki ao ni kateimatoaki iaon botoniango n te onimaki, te tataro, te rairannano, kabwarabure, karinerine, te tangira, te nanoanga, te beku, ao kakibotu aika itiaki.”
A reiakinna bwa utu a kona n akea tokina ao bwa te “iwawaki anne are e riki i buakora ikai e na riki i buakora ikekei ma e na tii raonaki ma te mimitong ae akea tokina” (Reirei ao Berita aika Tabu 130:2).
Ao a reiakinna bwa “te kaantaninga ae uaiakinaki ibukin reirei, waaki ni kakakurei n te Ekaretia n tatabeua nako bwa kaaro ao natiia a kukurei inanon mweengaia, a kabaeaki n te mare ae akea tokina, ao n reitaki nakoia rooro nako.”
Ma te atatai anne, a tangiria ni kabaeaki bwa te utu ae akea tokina.
Te Mata nakon te Maiu ae Akea tokina
I mwiin bwabetitoakiia au karo, a maiuakina te bwai are a reiakinna, a mwaing man te aonaaba nakon abanuean te euangkerio. A mwakuri ni katiteuanaa ara utu man karaoan te bootaki n utu n te tairiki ao kamatebwaian booki aika tabu n te utu, te kakaonimaki n irii bootakin te Ekaretia, ao karaoan te mwakuri ibukin rongorongon te utu. Ma kekeiaki akanne nakon te katiteuanaaki, a kaantaingaia bwa a na katea te utu ae boboto i aon te babaire ni kamaiu ma te mata nakon te maiu ae akea tokina.
N 1965, te ririki are a bwabetitoaki iai au karo, te kabanea ni kaan n tembora nako São Paulo, Brazil, e mena i Mesa, Arizona, e kaaniia 6,000 te maaire (9,650 km) raroana. E rangi ni boobuaka aron te mwananga ibukia au utu, ngaia are au karo a riai n tataninga ni karokoa are e katabuaki iai te São Paulo Brazil Tembora n 1978 i mwaain are a na konaa ni karekea aia otenanti n te tembora ao ni kabaeaki. N te tai anne, I bon karaoa au mwakuri ni mitinare i Rio de Janeiro.
Tao uoua te namwakaina i mwaain tokin au mition ni Beberuare 1980, e anganai te kariaiakaki ma toau au beretitenti n te mition bwa ti na mwananga n te bwakanakontai ma kaain te titeiki mai Rio de Janeiro nakon te tembora i São Paulo bwa I aonga n entaau ao ni kabaeaki nakoia au karo. N aroia au karo, I tataninga inanon ririki ibukin kakabwaia ake a tia ni beritanaki ibukin otenanti n te tembora ao berita aika tabu.
Te taneiai anne e bita miiu ibukin taai aika a na roko ao n anganai moan nooran koauan ana taeka ae nako Beretitenti Russell M. Nelson: “Te tai inanon te tembora e na buokiko n iangoa te tiretio ao ni karekea taraakim bwa antai raoi ngkoe, ao n riki bwa aekakira, ao te aekaki ni maiu are ko na konaa ni karekea n akea tokina.”
Au tai ae uarereke inanon te tembora n te tai ane e onoti anne e rangi ni uaana n nikiran nako au mwakuri ni mitinare. Ma te nonori ane e boou anne, n taetaekina koauan te tembora ao kakawakin ana babaire te Atua ibukiia utu e rangi ni korakora uaana nakon maiu.
Ngke ti mareaki, Ngai ma kainnabau ae Rosana, uoua te ririki i mwiin au mition, ti kabaeaki n te tembora ma te mii ni karikirakea oin ara utu ae akea tokina. Ni karaoan anne, ti ikarekebai ni mwakuri ni katein ara utu n aron are a reireiniira iai ara karo, ni bane ni katurui maiura i aon te Tia Kamaiu, Ana reirei, ao aia reirei ana burabeti ni boong aikai.
Ni boong aikai ao natira a kaikawaia natiia ma tuan te euangkerio anne ibukin te kukurei. Iroura, te utu bon te bwai ae kakawaki i aon bwaai nako ibukina bwa ti ataa kakawakin ana babaire te Atua ibukin te utu.
Ngkai te Mataniwi ni Kabuta, I karekea te kakabwaia ni kabaeia natiu aika teniman nakoia buuia inanon te tembora. N taraakin mataia n te tai are a katorobubua i aon te baonikarea inanon te tembora bon te taneiai ae rangi n tamaroa. I kona n nooria kanoau ni kakabwaiaaki man tuan te euangkerio anne are a tia n reireinai iai au karo ao Ngai ma Rosana are ti a tia n reireiniia iai. I kona n noori kakabwaia akanne n reitinako inanon rooro n taai aika a na roko. Ao I kauringaki bwa antai ae kona ni kakoroi bukin bwaai ni kabane.
Te Kauring ibukin te Kiritimati
Te utu e kakawaki nakon ana babaire ni kakukurei te Atua, ma ngkana akea te Tia Kamaiu ae Iesu Kristo, e na bon aki kona ni koro bukin te babaire anne. Ana Mwakuri ni Kamaiu ao taian otenanti ao berita aika tabu ake a kuneaki n Ana euangkerio e kakoroa bukin te berita n te karietataaki.
Beretitenti Nelson e taekinna: “Te karietataaki bon tibwangan te utu. Bon ti rinanon otenanti ni kamaiu n ana euangkerio Iesu Kristo ae a kona ni karietataaki iai utu. Nakon te tia are ti uaiakinna bwa ti na kukurei n aron te utu—entaau, kabaeaki, ao ni katauraoi ibukin te maiu ae akea tokina ni maeka ma te Atua. ”
Ngke I kawari taabo ake I bon tuai man nonoori mai i mwaaina, I kataia ni kakaea te tamnei ae uarereke ae tamnein Bungiakin Iesu are e kauringai ma Rosana taekan te Tia Kamaiu. I tabe n ikotii bwaai n te tai teuana ma teuana.
Inanon iangoan tamnein Bungiakin Iesu ae mangori, n tetaina ao Ngai ma kainnabau ti iangoia raoi inanora, “Tera te bwai ae rangi ni kakawaki riki inanon maiura?” Te kaeka, ni koauana, bon te Tia Kamaiu, Ana euangkerio, ao ara utu. Ni kauringiira ibukin ana tangira Tamara are i Karawa ibukira ao bwa rinanon te Tia Kamaiu bwa te berita ibukiia utu ae akea tokina e kona ni koro bukina, i mwaain te Kiritimati tabeua te ririki n nako ti katoka tamnein Bungiakin Iesu i aon uoua ara taibora aika a bubura inanon mweengara—ao ni katikui i eta ikekei nakon are ti na kanakoi i mwiin te Kiritimati. Te katei anne e buokiira ni kateimatoa tamnein te Kiritimati inanon mweengara n te ririki ae bwanin.
Ni katoa bong ngkana ti taraa tamnein Bungiakin Iesu, e bon kauringiira kakawakin taben te Tia Kamaiu inanon maiura. A kauringiira bwa te rau i aon te aba ngkai (taraa Ruka 2:14) ao te kukurei ae akea tokina n te aonaaba are i mwiina e katan i aon te Tia Kamaiu ao i aon karinean berita aika tabu ake ti karaoi ma Ngaia. Ao a kauringiira “bwa e roko nakon te aonaba, ae Iesu, bwa e na tauraki ibukin te aonaba, ao ni uoti buren te aonaba, ao ni katabua te aonaba, ao ni kaitiakia man taian buakaka ni kabane;
“Bwa rinanona a na kamaiuaki ni kabane ake e katukuia te Tama i aan mwaakana ao a karikaki irouna” (Reirei ao Berita aika Tabu 76:41–42).
N aron ae ngkai ti reiakin koaua aikai mairouia ara karo, Ngai ma Rosana ti mwakuri ni kabutia bwa e aonga n reitinako nakoia natira. Ngkai natira anga reirei aekakin naba koaua aikai nakoia natiia. Taian koraa ake a unikaki inanoia au karo 60 te ririki n nako inanon mweengara ae uarereke i Brazil a rikirake ao ni kariki uaa “are bon moan te kakawaki, are e karewerewe riki nakon bwaai aika a karewerewe, ao e mainaina riki iaon bwaai ni kabane aika a mainaina, eng, man itiaki riki iaon bwaai ni kabane aika a itiaki” (Aramwa 32:42).
I kakoaua bwa naake a butimwaea ana babaire te Atua ibukiia utu, n tangira n aron ana tangira te Tia Kamaiu, ao ni karinei aia berita aika tabu n te bong teuana ao a na karekei “kakabwaia ibukin te maiu are akea tokina ao bwaninin te kimwareirei” ma aika a tangiraki irouia ao ma te Tama ao te Nati.
© 2025 by Intellectual Reserve, Inc. All rights reserved. Boretiaki i USA. Kariaiakaki te Ingiriti: 6/19. Kariaiakaki rairana: 6/19. Rairan te Rongorongo man te Riaona ni Katoa Namakaina, Ritembwa 2025. Kiribati. 19614 859