iTuvatuva ni Kalou me baleta e dua na Matavuvale Tawamudu

E dua vei ira na ka erau a taleitaka taumada na noqu itubutubu ena kosipeli vakalesui mai i Jisu Karisito sa ikoya na kena dau vakabibitaka na Lotu na matavuvale kei na ivakavuvuli ni “vuqa na cakacaka ni veivakabulai kei na bula vakacerecerei ni Kalou e rawati mai na matavuvale.” Ni bera ni rau papitaiso, erau a rui vakauqeti sara na noqu itubutubu ena veika erau a vulica tiko ni rau sureti ira sara kina na wekadrau vakaitikotiko mera mai tomani rau ena vuli lesoni ni kaulotu.

Ni rau dau sota voli kei ira na daukaulotu, ka tomana tiko na vulici ni kosipeli ni oti na nodrau papitaiso, rau a vulica na noqu itubutubu na sala eso me rau “vakavulici ira [kina na luvedrau] ena rarama kei na dina” kei na sala me rau “vakavulici ira vinaka [kina] na lewe ni [nodrau] matavuvale” (Vunau kei na Veiyalayalati 93:40, 43).

Erau a vulica ni “sa itakele ni nona ituvatuva na Dauveibuli ena nodra icavacava tawamudu na luvena na matavuvale” ka “ena qai kune na marau ena bula vakamatavuvale ni sa yavutaki ena ivakavuvuli ni Turaga o Jisu Karisito.”

Erau a vulica ni “sa yavu ka ivakadei ni bula vakawati kei na matavuvale e tudei na ivakavuvuli ni vakabauta, masumasu, veivutuni, veivosovosoti, veidokai, veilomani, yalololoma, cakacaka, kei na golevi ni itavi qaravi vivinaka.”

Erau a vulica ni rawa ni tawamudu na matavuvale ka “na ivakarau ni veimaliwai sa tu vei keda eke, ena tu talega vei keda mai kea, ia ena vakaikuritaki toka ena lagilagi tawamudu” (Vunau kei na Veiyalayalati 130:2).

Ka rau vulica ni “inaki cecere ni veivakavulici yadua, na itaviqaravi yadua ena Lotu o ya me ra marau e vale na itubutubu kei ira na luvedra, era vauci ena vakamau tawamudu, ka semati tu ki na nodra kawa.”

Ena kila oqori, erau a gadreva kina me keitou vauci me dua na matavuvale tawamudu.

Ni rau a papitaiso oti na noqu itubutubu, rau a bulataka na veika rau sa vulica tiko, ka toki tani mai vuravura ki na matanitu ni kosipeli. Erau a cakacakataka me vakaduavatataki na neitou matavuvale ena lotu vakamatavuvale kei na vuli ivolanikalou vakamatavuvale, dau tiko ena yalodina ena veisoqoni ni Lotu, ka cakava na cakacaka ni tuva kawa. Ena veisasaga oqori ki na duavata, erau a nuitaka me bulia e dua na matavuvale e yavutaki ena ituvatuva ni veivakabulai ena dua na mata ki na veigauna tawamudu.

Ena 1965, na yabaki erau a papitaiso kina na noqu itubutubu, na valetabu voleka duadua ki São Paulo, Brazil, a tiko mai Mesa, Arizona, voleka ni 6,000 na maile (9,650 na km) na kena yawa. A rui sau levu sara ki na neitou matavuvale na veilakoyaki, ka rau waraka ga na noqu itubutubu me yacova ni sa vakatabui na Valetabu e São Paulo Brazil ena 1978 ni bera ni rau ciqoma na nodrau cakacaka vakalotu ni valetabu ka vauci talega. Ena gauna oya, au a kaulotu voli kina e Rio de Janeiro.

Ni vo toka e rua na vula me cava na noqu kaulotu ena Feperueri ni 1980, a vakadonuya o noqu peresitedi ni kaulotu me keirau lako bogi taucoko kei noqu itokani vata kei ira na lewe ni iteki mai Rio de Janeiro ki na valetabu e São Paulo me rawa niu vakaedaumeni kina ka vauci vei rau na noqu itubutubu. Me vakataki rau na noqu itubutubu, au a wawa tu ena vica na yabaki me baleta na veivakalougatataki yalataki ni cakacaka vakalotu kei na veiyalayalati ni valetabu.

Na ka oqori a veisautaka na noqu rai me baleta na veisiga ni mataka kau irova kina vakadua na dina ni vosa nei Peresitedi Russell M. Nelson: “Na gauna ena valetabu ena vukei iko mo vakasama vaka silesitieli ka ciqoma na raivotu se o cei mada o iko, o cei o rawa ni ucuya, kei na mataqali tamata vakacava o rawa ni vakataka me tawamudu.”

Na noqu gauna lekaleka e valetabu ena gauna oya a vakauqeta vakatitobu na vo ni noqu veiqaravi vakadaukaulotu. Na raivotu vou oqori, a vakamawe sara talega ena noqu bula niu dau ivakadinadinataka na valetabu kei na bibi ni ituvatuva ni Kalou me baleta na matavuvale.

Ni keirau a vakamau kei na watiqu o Rosana ni oti e rua na yabaki mai na noqu kaulotu, keirau a vauci ena valetabu ena dua na raivotu me keirau susuga cake na neirau matavuvale tawamudu. Me vakayacori oqori, keirau a cakacaka vata me bulia na itovo vakamatavuvale me vaka erau a vakavulica vei keirau na neirau itubutubu, ni vakanamata taucoko tu vua na iVakabula, Nona ivakavuvuli, kei na nodra ivakavuvuli na Nona parofita ena gauna oqo.

Nikua era sa susugi ira tiko na luvedra na luvei keirau ena ivakavuvuli vata ga ni kosipeli ni bula marau. Vei keirau, e sa ka kece sara na matavuvale baleta ni keirau kila vinaka na bibi ni matavuvale ena ituvatuva ni Kalou.

Me vaka e dua na Vakaitutu Raraba, au kalougata niu vauci iratou e tolu na luvequ vei iratou na watidratou ena valetabu. Niu raica na matadratou ena gauna eratou a tekiduru kina ena icabocabo ni soro ena valetabu a dua na ka totoka. Au a raici ira rawa na noqu kawa ni ra sa vakalougatataki ena ivakavuvuli ni kosipeli vata ga erau a vakavulica vei au na noqu itubutubu ka keirau a vakavulici ratou kina kei Rosana. Au a rawa ni raica na veivakalougatataki oqori ni tomani tiko yani ena veitabatamata ni mataka. Kau a qai vakananumi mai vei cei e rawa kina na ka kece oqo.

Dua na iVakananumi ni Siganisucu

Na matavuvale sa itakele ni ituvatuva ni marau ni Kalou, ia ke sega na iVakabula o Jisu Karisito, ena sega ni rawa na ituvatuva oya. Na Nona Veisorovaki kei na cakacaka vakalotu kei na veiyalayalati e kunei ena Nona kosipeli e rawa kina na yalayala ni bula vakacerecerei.

A vakaraitaka o Peresitedi Nelson: “Na bula vakacerecerei sa cakacaka ni matavuvale. Na bula ni veivakacerecerei ni matavuvale ena rawa ga ena loma ni cakacaka ni veivakabulai vakalotu ni kosipeli nei Jisu Karisito. Na icavacava ni noda sasaga meda marau kina vakamatavuvale—ni da sa taura na noda edaumeni, vauci vata, ka vakarautaki ki na bula tawamudu ena iserau ni Kalou.”

Niu dau sikova na veivanua au se bera vakadua ni bau raica e liu, au tovolea meu kunea e dua na iyaloyalo lailai ni Siganisucu ka dau vakananumi Rosana kei au me baleta na iVakabula. Au sa bau taracake tiko kina e dua na ikumuni vinaka.

Ni keirau vakananuma tiko na iyaloyalo ni Siganisucu malumalumu oya, keirau a vakasamataka vakatitobu vakaveiwatini, “Na cava sara mada na ka bibi dina duadua ena nodaru bula?” E dina sara, na isaunitaro, sa ikoya na iVakabula, Nona kosipeli, kei na neirau matavuvale. Me vakavotuya vei keirau na nona loloma na Tamada Vakalomalagi ena vukuda ka sa mai vua na iVakabula na kena rawati na yalayala ni matavuvale tawamudu, ni bera na Siganisucu ena vica na yabaki sa oti keirau a biuta kece na neirau ivakatakarakara ni Siganisucu ena rua na vata lelevu ena neitou itikotiko—ka biuta tu ga kina ka sega ni kauta laivi ni oti na vakacagicagi ni Siganisucu. Na ivakarau oqori e dau vukei keirau me maroroya na yalo ni Siganisucu ena neitou itikotiko ena yabaki taucoko.

Ena veisiga kece ni keirau raica na iyaloyalo ni Siganisucu oqori, era dau vakananuma vakamalua vei keirau na itavi bibi ni iVakabula ena neirau bula. Era vakananuma vei keirau ni vakacegu e vuravura ena gauna oqo (raica na Luke 2:14) kei na marau tawamudu ena vuravura ka tarava e vakatau vua na iVakabula kei na rokovi ni veiyalayalati keirau sa cakava vata kei Koya. Ka ra vakananuma vei keirau “ni a lako mai ki vuravura ko koya, io ko Jisu, me mai vakamatei ena kauveilatai ena vukui vuravura, ka me colata na ivalavala ca ni vuravura, ka me vakatabuya na vuravura, ka vakasavasavataka mai na veika tawadodonu kecega;

“Raica era na vakabulai ena vukuna ko ira kecega, me vaka na kaukauwa kei na lewa sa solia vua ko Tamana” (Vunau kei na Veiyalayalati 76:41–42).

Me vaka ga na neirau vulica na dina oqo mai vei rau na neirau itubutubu, keirau sa cakacaka vata kei Rosana me keirau solia vei ira na luvei keirau. Ia oqo era sa vakavulica tiko na luvei keirau na dina vata ga oqo vei ira na luvedra. Na sorenikau a teivaki ena lomadrau na noqu itubutubu ena 60 na yabaki sa oti ena neitou itikotiko lailai e Brazil sa seraka ka vuataka na vuanikau “sa taleitaki duadua, ka sa kamica duaduda vei ira na ka kamikamica taucoko, ka sa vulavula sara vei ira na ka vulavula kecega, io, ka sa savasava sara mai vei ira na ka savasava kecega” (Alama 32:42).

Au vakadinadinataka nio ira era vakamareqeta na ituvatuva ni Kalou me baleta na matavuvale, ka dauloloma me vaka a dauloloma na iVakabula, ka dau doka na nodra veiyalayalati era na rawata ena dua na siga “na veivakalougatataki ni bula tawamudu kei na taucoko ni reki” vata kei ira na nodra daulomani kei na Tamana kei na Luvena.