Nyankopɔn ne Nhyehyɛɛ ma Afebɔɔ Ebusua

Adze kor a ahyɛse no ɔmaa m’awofo hɔn enyi gyee Jesus Christ n’asɛmpa a wɔdze asan ananmu aba no ho nye mbrɛ ebusua si hia ankasa ma Asɔr no na nkyerɛkyerɛ dɛ “Nyankopɔn no nkwagye na nkwagye ntowdo dwuma ne kɛse noara nam ebusua do na ɔhyɛ mã.” Ansaana worubonuma hɔn no, nna m’awofo hɔn enyi agye dza worusũa no ho ara ma dɛ wɔtoo nsa frɛɛ hɔn fipamfo dɛ wɔmbɛka hɔn ho ma wonsũa asɛmpasomafo adzesũa no.

Ber a wohyiaa asɛmpasomafo no, na wɔkɔɔr do sũaa asɛmpa no wɔ hɔn enuma ekyir no, m’awofo sũaa akwan a “wɔbɛtsetse [hɔn] mbofra wɔ kan na nokwar mu” na mbrɛ sunsum mu no “wobesiesie [hɔn] ankasa hɔn fie” (Nkyerɛkyerɛ na Ahyɛmudzi 93:40, 43).

Wosũaa dɛ “Bɔadze Ne nhyehyɛɛ ma Ne mba hɔn onnyiewiei nkrabea ne fapem nye ebusua” na dɛ “Nsa botum akã ebusua abrabɔ mu enyigye no sɛ wɔtow ne fapem wɔ Jesus Christ ne nkyerɛkyerɛ no do.”

Wosũaa dɛ Awar na ebusua ebusua a wɔkɔ do yie no, wɔkyekyer na wɔkora do wɔ gyedzi, mpaabɔ, nnuhu, fakyɛ fakyɛ, enyidzi, ɔdɔ, ayamuhyehye, edwumayɛ, na agodzi dwumadzi a odzi mu fapem do.”

Wosũaa dɛ ebusua ebusua botum ayɛ afebɔɔ na dɛ “mbrɛ yɛtse ase ekuwekuw wɔ ha yi, dɛmara so na yɛbɛtsena wɔ hɔ so, soronko a ɔbɛba mu ara nye dɛ yebenya onnyiewiei enyimnyam akã ho” (Nkyerɛkyerɛ na Ahyɛmudzi 130:2).

Na wosũaa dɛ “nkyerɛkyerɛ biara, dwumadzi biara a ɔwɔ Asɔr no mu no botae tsitsir nye dɛ awofo na hɔn mbofra hɔn enyi agye wɔ fie, wɔasɔw hɔn ano wɔ onnyiewiei awar mu, na wɔnye hɔn ebusuasantsen wɔ nkitahodzi.”

Wɔdze dɛm nyimdzee no, wɔpɛɛ dɛ wɔbɔsɔw hɔn ano dɛ afebɔɔ ebusua.

M’awofo hɔn enuma ekyir no, wɔdze dza nna worusũa no bɔɔ bra, a worifi wiadze no akɔ asɛmpa ahenman no mu. Wɔnam ewimbir fie nhyiamu na ebusua kyerɛwsɛm nsũae, nokwar mu ara wɔrokɔ asɔr nhyiamu horow na wɔreyɛ ebusua abakɔsɛm do dzii dwuma dze nkabɔmu brɛɛ hɛn ebusua. Wɔdze dɛm mbɔdzembɔ a ogya kɔ nkabɔmu no, wonyaa enyidado a ntsimii wɔ mbersantsen do no ka ho dɛ wɔbɛkyekyer ebusua a otsim wɔ nkwagye nhyehyɛɛ no do.

1965 mu no, afe a wonumaa m’awofo no, nna temple a ɔbɛn São Paulo, Brazil, wɔ Mesa, Arizona, bɛyɛ aborɔfo kwansin 6000 (9,650 km) fi São Paulo, Brazil. Nna akwantu no bo yɛ dzen dodow ma hɛn ebusua, ntsi nna ɔwɔ dɛ m’awofo tweɔn kɛpem ber a wotuu São Paulo Brazil Temple hyɛɛ Nyankopɔn nsa wɔ afe 1978 mu ansaana hɔn nsa reka temple ayɛdze horow na wɔasɔw hɔn ano. Dɛm aber no, nna morosom dɛ asɛmpasomafo wɔ Rio de Janeiro.

Bɛyɛ abosoom ebien ansaana morobowie m’asɛmpasomafo dwumadzi wɔ Kwakwar 1980 mu no, m’asɛmpasom president maa emi na m’adamfo kwan ma yɛnye stake no mu mba tuu kwan fi Rio de Janeiro kɔr temple a ɔwɔ São Paulo ama meetum ayɛ endowment na wɔasɔw emi na m’awofo ano. Tse dɛ m’awofo no, nna maatweɔn temple ayɛdze na ahyɛmudzi horow no ho anohoba nhyira mfe pii.

Dɛm sũahu no sesaa m’enyido-adzehu faa ndaamba ho na ɔmaa muhun President Russell M. Nelson ne nsɛm a ndaansa yi ɔkaa no no nokwar a ɔyɛ: “Mber wɔ temple mu no bɔboa wo ma adwen celestial adwen na enya enyido-adzehu wɔ wo nyimpa ban ankasa, nyia dabi ibotum abɛyɛ, na abrabɔ a ibotum enya no afebɔɔ.”

Me mber tsiabaa a medzii wɔ temple dɛm aber no nyaa nhyɛdo a ɔkɔ bun mu wɔ m’asɛmpasomafo som nda nkaa no do. Medze dɛm enyido-adzehu fofor no, meregye temple na Nyankopɔn ne nhyehyɛɛ ma ebusua ebusua no ho hia a ohia ho dase nyaa daapem nhyɛdo wɔ m’abrabɔ do.

Ber a me yer, Rosana, na emi waree mfe ebien ekyir a mowiee m’asɛmpasomafo som no, wɔsɔɔw hɛn ano wɔ temple mu a nna yɛwɔ botae bi dɛ yɛbɛtsetse hɛn ankasa hɛn afebɔɔ ebusua. Ama yɛaayɛ dɛm no, yɛyɛɛ edwuma bɔɔ mu dze yɛɛ ebusua amambra tse dɛ dza hɛn awofo dze akyerɛkyerɛ hɛn no, ne nyina tsim Agyenkwa no do, Ne nkyerɛkyerɛ, na Ne ndɛ-mber yi nkɔnhyɛfo hɔn nkyerɛkyerɛ do.

Ndɛ, hɛn mba dze dɛm asɛmpa fapem horow a ɔyɛ enyigye kor no ara retsetse hɔn mbofra. Hɛn dze, ebusua yɛ adze tsitsir ma hɛn osiandɛ yɛtse hia a ebusua ho hia wɔ Nyankopɔn Ne nhyehyɛɛ mu no ase.

Dɛ Wiadze Mfɛndzanan Asɔrpanyin no, minyaa nhyira dɛ mosɔɔw me mba baasa nye hɔn ahokãfo hɔn awar ano wɔ temple mu. Morohwɛ hɔn enyiwa mu ber a wobuu ntwɛr wɔ afɔrbukyia a ɔwɔ temple mu ho no nna ɔyɛ sũahu a ɔyɛ fɛw ankasa. Nna mutum hu m’asefo a nokwar fapem a m’awofo dze kyerɛkyerɛɛ me na emi na Rosana dze akyerɛkyerɛ hɔn no rehyira hɔn. Nna mutum hu dɛm nhyira no ɔrokɔ do wɔ ndaamba ebusuasantsen mu. Na ɔyɛɛ nkaadze maa me wɔ nyia ɔma ne nyina yɛ yie no ho.

Borɔnya ho Nkaa

Ebusua yɛ Nyankopɔn n’enyigye ho nhyehyɛɛ ne fapem, mbom sɛ Jesus Christ nnka ho a, dɛm nhyehyɛɛ no nnkɛyɛ yie. No Werdambɔ na ayɛdze na ahyɛmudzi horow a ɔwɔ N’asɛmpa mu no ma nkwagye ntowdo ho anohoba no yɛ yie.

President Nelson apaa mu akã dɛ: Nkwagye ntowdo yɛ ebusua asodzii. Ɔnam Jesus Christ n’asɛmpa no nkwagye ayɛdze horow no nko do na ebusua ebusua benya nkwagye ntowdo. Dza ɔkrɔn koraa a ewiei no yɛper dɛ yebenya no nye dɛ hɛn enyi bɛgye dɛ ebusua—yeenya tum a ofi sor, na yesiesie hɛn ho ama onnyiewiei nkwa wɔ Nyankopɔn enyim.”

Sɛ mesera mbea a munnhunii da a, mobɔ mbɔdzen dɛ mobɔhwehwɛ Christ n’awoo ho mfonyin a ɔkaa emi na Rosana fa Agyenkwa no ho. Meenya mfonyin yi mu piinara.

Ber a morodwendwen dɛm ahobrɛase mfonyin horow yi, dakor emi na me yer dwendwenee, “Ebɛnadze na nkowar mu ara ohia tsitsir wɔ hɛn abrabɔ mu?” Ampaara nyiano no nye, Agyenkwa no, N’asɛmpa, na hɛn ebusua. Ama wɔakaa hɛn fa Ɔsor Egya no dɔ ma hɛn ho na dɛ ɔnam Agyenkwa no do na anohoba dɛ onnyiewiei ebusua botum ayɛ yie no, mfe kakra abasen kɔ no, ansaana borɔnya ber bɛba no yɛdze hɛn Borɔnya mfonyin no nyina sisii apon akɛse ebien bi do wɔ hɛn fie—na yegyaa hɔn wɔ hɔ Borɔnya afahyɛ n’ekyir no. Dɛm amambra no boa hɛn ma yenya Borɔnya sunsum no wɔ hɛn fie afe mu no nyina.

Da biara ber a yɛhwɛ dɛm Christ n’awoo ho mfonyin no, botooyɛ mu no ɔkaa hɛn fa Agyenkwa no dwuma tsitsir wɔ hɛn abrabɔ mu. Wɔkaa hɛn dɛ asomdwee wɔ asaase do sesei (hwɛ Luke 2:14) na onnyiewiei enyigye wɔ wiadze a ɔtoa do no gyina Agyenkwa no na irisie ahyɛmudzi a yɛnye No ayɛ no do. Na wɔkaa hɛn dɛ “na ɔbaa wiadze, Jesus no mpo, ama wɔaabɔ no mbeamudua mu dze ama wiadze, na ɔaasoa wiadze bɔn, na ɔaatsew wiadze ho, na ɔaatsew ho efi dza ɔnntsen nyina ho;

“Ama wɔnam no do aagye obiara nkwa, hɔn a Egya yɛɛ hɔn na ɔdze hɔn ahyɛ no tum mu no” (Nkyerɛkyerɛ na Ahyɛmudzi 76:41–42).

Dɛ mbrɛ yesũa dɛm nokwar yinom fi hɛn awofo hɔ no, Rosana na emi ayɛ edwuma dɛ yɛdze bɛkyerɛkyerɛ hɛn mbofra. Sesei hɛn mbofra no rekyerɛkyerɛ hɔn mbofra dɛm nokwar kor yinom ara. Amba a woduae wɔ m’awofo hɔn akoma mu mfe 60 a wɔabasen kɔ wɔ hɛn fie kakraba mu wɔ Brazil no asow eduaba a ɔsom bo mapã na ɔyɛ dɛw kyɛn eduaba nyina na ɔhoa kyɛn adze biara a ɔhoa, nyew, na noho tsew kyɛn adze biara a noho tsew” (Alma 32:42).

Megye dase dɛ hɔn a wofua Nyankopɔn ne nhyehyɛɛ ma ebusua, wɔdɔ dɛ mbrɛ Agyenkwa no dɔe, na wosie hɔn ahyɛmudzi horow no nye hɔn adɔfo nye Egya na Ɔba no benya “onnyiewiei nkwa na dɛwdzi ne mãhyɛ” ndaamba bi.