“An Kot Kokkot fan iten eu Famini Feinfeino,” Liahona, Dec. 2025.
Porous ren Liahona Iteiten Maram, December 2025
An Kot Kokkot fan iten eu Famini Feinfeino
Famini ekkewe ra etiwa an Kot kokkot, tong usun ewe Chon Amanau a tong, me sufonu ar pwon mi pin fan eu repwe angei “ekkewe feiochun manau ese much me eu unusen pwapwa.”
Arap ngeni omuchunon ai we angangen misin, ua pwapwa nupwen ua endow me ririfengen ngeni semei me inei kewe non ewe São Paulo Brazil Tempel.
Semei me inei, Apparecido me Mercedes, ra feito seni sokofesenin pekin namanam, nge nonnomun manauer a amonnareta ar repwe etiwa ewe kapas allim mi niwinsefanito.
Semei we a marita me non eu ochun famini nge rese namanam. Nge inamo, atun emon anuon i a mochen kaeo namanam. A anneani ewe Paipen, fiti klasin Paipen, me kaeo ewe manauen Jises Kraist. An kaeo a efisi i an epwe watte an mochen sinei non ir me ru an ewe Chon Amanau kapas allim me ewe famini, a fori an epwe mochen punuweni emon mi usun chok i.
Ren sokofesenin, inei we a feito seni eu famini mi watte anonononen ar namanam. Ra etiwa ekkewe nongonongen kapas allim, fiti fenin mwichefen, me nikitu ne apwonueta ar namanam. An marita non ena sokkun nikinik, inei we a winiti ewe sokkun aramas ese tongeni an esap kouno ne fiti eu mwichen mwichefen.
Iwe, mwirin an semei me inei apupunu me pwi kewe unumon me ngang aua uputiw, ra fori ar wesen tongeni ne amari kem non ewe saramen ar miriten ekkewe nongonongen kapas allim. Non eu ran tettenin inei we, ewe emon mi patapateno memperun Ewe Mwichefenin Jises Kraist ren Aramas mi Pin non Fansoun Soponon, a apasa ngeni semei we, “Achengicheng, a wor fomon noum at. Ika ka wesen mochen amarata eu famini epwe anonga Kraist me anomu Kot non om famini, mi namot ngonuk ai mwichefen.”
Semei we a rong met a apasa, nge ese fori och mettoch usun tori ewe ran ekkewe misineri ra eto fichifich asam non neniem we, ra fichifich won asamem we, me poputa ne aiti kem. A mwitir apareni pwe ra tupuni ewe mwichefen tettenin inei ewe a fen pesei i epwe katon.
Saram me Ennet
Eu me nein ekkewe mettoch mi akkom emeseika semei me inei kewe me non ewe kapas allimen Jises Kraist mi niwinsefanito ina ewe auchea minne ewe Mwichefen a anomu won ewe famini me ewe osukun pwe “unusenapen an Kot angangen amanau me manau mi tekia a tawe me ren famini.” Me mwen ar papatais, semei me inei kewe ra fokkun ingeno ren met ra kaeo iwe ra etiwa chon orur kewe repwe fitir non ekkewe nesenin misineri.
Eu me nein ekkewe mettoch mi akkom emeseika semei me inei kewe me non ewe kapas allimen Jises Kraist mi niwinsefanito ina ewe auchea minne ewe Mwichefen a anomu won ewe famini.
Nupwen ra churi ekkewe misineri, me soposopono ne kaeo ewe kapas allim mwirin ar papatais, semei me inei kewe ra kaeo usun anen ar repwe amarata [nour] kewe semirit non saram me ennet me ifa usun repwe onumu imwer we non pekin ngun (Doctrine and Covenants 93:40, 43).
Ra kaeo pwe “ewe famini ina nukanapen an ewe Chon For kokkot fan iten fetanin manau esemuch an Noun semirit” me “pwapwa non famini mi tongeni fisioch nupwen mi kouta won nongonongen an ewe Samon Jises Kraist kewe afanafan.”
Ra kaeo pwe “fetanochun pupunu me famini mi fefeita ra fis me mamarita won nongonongen nuku, iotek, aier, omusomus, sufon, tong, umoumoch, angang, me unusen urumotun föfföroch.”
Ra kaeo pwe famini ir mi tongeni fochofoch me ewe chok mwicheich minne mi fis me neich iei epwe pwan fis me neich ikenan, nge epwe chok pachengeni ning esemuch (Doctrine and Covenants 130:2).
Me ra kaeo pwe “ewe omuchunon popun meinisin osukun, meinisin mwokutukut non ewe Mwichefen ina pwe sam me in me nour kewe semirit ra pwapwa non imw, riri fengen non eu apupunu esemuch, me fofo ngeni ar kewe neuo.”
Ren ena mirit, ra mochen repwe riri fengen usun eu famini feinfeino.
Eu Ekiek Ngeni Fansoun esemuch
Mwirin semei me inei kewe ra papatais, ra fori met ra kaeo, mwokut seni ewe fonufan ngeni ewe muun kapas allim. Ra angang ar repwe ochufengeni am we famini ran ar efisi pwinin famini me an famini kaeo ekkewe pukefel, nikitu ne fiti mwichen Mwichefen, me fori angangen uruon famini. Ren ekkena achocho ngeni etipew, ra epinukunuk ne forata eu famini mi nom nukanapen ewe kokkoten amanau ren eu ekiek ngeni fansoun esemuch.
Non 1965, ewe ier semei me inei kewe ra papatais, ewe tempel mi arapeto ngeni São Paulo, Brazil, a nom non Meza, Arizona, arap ngeni 6,000 mwain (9,650 km) towawenon. Sai a wesen mwomwong ngeni am we famini, iwe semei me inei ra ewititiwi tori ewe epinipininon ewe São Paulo Brazil Tempel non 1978 me mwen ar repwe tongeni angei ar angangepinen tempel me riri fengen. Non ena fansoun, ua angangen misin non Rio de Janeiro.
Ina epwe ru maram me mwen upwe awesano ai misin non February 1980, nei we presetenin misin a mut ngeni ai we companion me ngang am aupwe sai unusen ewe pwinin fiti chon ewe steik seni Rio de Janeiro ngeni ewe tempel non São Paulo pwe upwe tongeni endow me riri ngeni semei me inei kewe. Usun semei me inei kewe, ua witiwit chommong ier fan iten ewe pwonen ekkewe feiochun angangepinen tempel me pwon mi pin.
Met ena a fis a siwini ai kokkoten fansoun mwan me ngeniei ai akkaewin kuna ewe ennetin an Preseten Russell M. Nelson kewe minafon kapas: “Fansoun non ewe tempel epwe anisuk ne ekiek selestial me kuna nemasepwin ika wesen en ion, ion kopwe tongeni winiti, me ewe sokkun manau kopwe manaueni tori fefeino.”
Ai mwitirin fansoun non ewe tempel non ena fansoun a wesewesen siwini nusunuon ai we angangen misin. Ren ena minafon kokkot, pwarata usun ewe tempel me ewe auchean an Kot kokkot fan iten famini a pwan nakatam pochokunan won manauei.
Nupwen punuwei ewe, Rosana me ngang aua pupunu ru ier mwirin ai we misin, aua riri fengen me non ewe tempel fiti eu kokkoten am aupwe amari am pwisin famini esemuch. Ren am aupwe fori, aua angang fengen ne fori orenien famini usun ekkewe semem me inem kewe ra aiti kem, meinisin ra fot won ewe Chon Amanau, An osukun, me ekkewe osukun an Noun soufosen ikenai.
Ikenai noum kewe ra amari nour semirit ren ekkewe chok pwan nongonongen kapas allimen pwapwa. Me rem, famini a kon auchea pokiten aua weweiti ewe aucheanapen ewe famini me non an Kot kokkot.
Usun emon Meinap Unus, a wor rei ewe feioch ai eriri fengeni nei kewe unumon ngeni punuwer kewe me non ewe tempel. Ai nenenong non meser ewe fansoun ra fotopukutiw ren ewe rong non ewe tempel a eu mettoch mi fokkun ning. Ua tongeni kuna mwirimwiri ra feioch ren ekkena chok pwan nongonongen kapas allim semei me inei kewe ra aitiei me Rosana me angang aua aitir. Ua tongeni kuna ekkena feioch ra soposopono non fansoun mwirimwiri. Me ua achechem usun ion a fori ekkei mettoch meinisin repwe tufich.
Ew Achechemen Kirisimas
Famini ina ewe nukanapen an Kot kokkoten pwapwa, nge me nukun ewe Chon Amanau Jises Kraist, ena kokkot esap tufich. An Achasefan me ekkewe angangepin me pwon mi pin ra pwa me non An kapas allim ra otufichi ewe pwonen manau mi tekia.
Preseten Nelson a fan affata: “Manau mi tekia eu angangen famini. Seni chok ewe amanauen ekkewe angangepinin ewe kapas allimen Jises Kraist famini ra tongeni manau tekia. Ewe omuchunon nesoponon ren minne sia achocho ngeni ina pwe sipwe pwapwa usun eu famini—endow, ririfengen, me monneta fen manau ese much me mwen Kot.”
Nupwen ua churi neni use mwo kukuna akkom, ua achocho ne kutta eu kukkunun kewe nios ra esisinata Uputiwen Jises ewe a achema Rosana me ngang usun ewe Chon Amanau. Ua awatten ekkewe uwa uonir.
Nupwen aua ekiek won ekkena tekisonun nios ra esisinata Uputiwen Jises, punuwei we me ngang fan eu aua ekipwichi, “Met ewe a kon ennetin namot non manauem?” Ewe ponuwan, ennetin, ewe Chon Amanau, An kapas allim, me am famini. Ne achema ngeni kem usun an Semem won Nang tong fan item me seni ewe Chon Amanau minne ekkewe pwonen famini esemuch ra tufich, me mwen Kirisimas ekkoch ier a no aua anomu meinisin noum kewe nios ra esisinata Uputiwen Jises kewe won ru sanif non imwem we—me onomureno am ause isonareno mwirin Kirisimas. Ena oreni a anisi kem ne anomu ewe ngunun Kirisimas non imwem we unusen ewe ier.
Iteiten ran nupwen aua nenengeni ekkewe nios ra esisinata Uputiwen Jises kewe, ra apwetetei ne achema ngeni kem usun ewe auchean wisen ewe Chon Amanau non manauach. Ra achema kem pwe kinamwe won fonufan iei (nengeni Luke 2:14) me pwapwa esemuch non ewe fonufan mwirin a anongonong won ewe Chon Amanau me won am sufonu ekkewe pwon mi pin aua fen fori ren I. Me ra achema kem “pwe i a feito ngeni ewe fonufan, pwan mwo Jises, an epwe irapengesino fan iten ewe fonufan, me an epwe mwarei tipisin ewe fonufan, me an epwe epinano ewe fonufan, me epwe nimeti seni mettoch meinisin ese wenechar;
“Pwe seni i meinisin aramas repwe tongeni ngaseno i minne ewe Sam a fen wanong an manaman me a fori seni i” (Doctrine and Covenants 76:41–42).
Usun chok ach kaeo ekkei ennet seni samach me inach, Rosana me ngang aua fen angang am aupwe passinir ngeni noum kewe semirit. Iei noum kewe semirit ra osukuna ekkei pwan chok ennet ngeni nour semirit. Ekkewe ra fot me non netipen semei me inei kewe 60 ier a no non imwem we kukkun non Brazil a fen mar me uwa “minne mi fokkun auchea, minne a ngarangar nap seni mettoch mi ngarangar meinisin, me minne mi pwechepwech naps seni mettoch mi pwechepwech meinisin, ewer, me nimenimoch nap seni mettoch mi nimenimoch meinisin”(Alma 32:42).
Ua pwarata pwe ekkewe ra etiwa an Kot kokkot fan iten famini, tong usun ewe Chon Amanau a tong, me sufonu ar pwon mi pin non eu ran repwe angei “ekkewe feiochun manau ese much me eu unusen pwapwa” ren atonger kewe me ren ewe Sam me ewe Nau.
© 2025 seni Intellectual Reserve, Inc. Meinisin pung mi kawor. Mi katou non USA. Kapunguno non fosun Merika: 6/19. Kapungunon chiakun: 6/19. Chiakun Porouse ren Liahona Iteiten Maram, December 2025. Chuukese. 19614 901