Plan we God i gat blong wan Famli We I No Save Finis

Wan long ol samting we i mekem paren blong mi i gat interes long stat insaed long gospel blong Jisas Kraes hem i, olsem wanem Jos i mekem famli i impoten mo tijing ia se “plante long ol wok blong God long fasin blong sevem man mo fasin blong kam olsem god i hapen insaed long famli.” Bifo we bae tufala i kasem baptaes, tufala i glad tumas long wanem tufala i stap lanem, mekem se tufala i invaetem ol neba blong joenem tufala long ol misinari lesen.

Taem tufala i stap mitim ol misinari, mo gohed blong stadi gospel afta we tufala i kasem baptaes, papa mo mama blong mi i lanem ol wei “blong resemap ol pikinini blong [tufala] long laet mo trutok” mo long saed blong spirit olsem wanem blong “putum long oda haos blong [tufala]” (Doktrin mo Ol Kavenan 93:40, 43).

Tufala i lanem se “famli i stamba blong plan ia we Krieta i gat long saed blong fiuja ples we i no save finis” mo se “Hapines insaed long famli laef i gat gudfala janis blong kamtru sapos famli i stanap long ol tijing blong Lod Jisas Kraes.”

Tufala i lanem se “i gat sakses oltaem long ol mared laef mo famli, taem oli folem ol stamba tingting blong fet, prea, sakem sin, fasin blong fogiv, respek, lav, fasin blong kea, wok mo ol samting o pleplei we oli gud.”

Oli lanem se ol famli i save stap blong taem we i no save finis mo se “semfala laef wetem ol narafala man we yumi stap gat long wol ia, bae i stap wetem yumi longwe, be nomo, bae i gat, antap long hem, glori ia we i no save finis, mo glori ia, yumi no gat naoia” (Doktrin mo Ol Kavenan 130:2).

Mo oli lanem se “stamba tingting blong evri tijing, evri aktiviti blong Jos i blong ol papa mo mama mo ol pikinini blong olgeta i hapi long hom, blong sil long wan mared we i no save finis, mo joenem ol jeneresen blong olgeta.”

Wetem save ia, tufala i wantem tumas blong sil olsem wan famli we i no save finis.

Afta we papa mo mama blong mi i kasem baptaes, tufala i praktisim wanem tufala i lanem, aot long wol i go long kingdom blong gospel. Tufala i wok blong mekem famli blong mifala i kam wan, tru long ol famli haos naet mo famli skripja stadi, fetful oltaem blong stap go long ol Jos miting, mo mekem famli histri wok. Wetem ol efot ia blong kam wan, tufala i hop blong bildim wan famli we i mekem plan ia blong sevem man i stamba blong evri samting, wetem wan ae we i lukluk i go long taem we i no save finis.

Long 1965, i yia we papa mo mama blong mi i kasem baptaes blong tufala, tempol we i kolosap long Sao Paolo, Bresil, hem i long Mesa, Arisona, blong kolosap 9650 kilometa. Travel ia i ekspensiv tumas blong famli blong mifala, mekem se papa mo mama blong mi i wet kasem dedikesen blong Sao Paolo Tempol long 1978, bifo oli save kasem ol tempol odinens mo sil. Long taem ia, mi stap givim seves olsem wan misinari long Rio de Janeiro.

Blong kolosap tu manis bifo mi finisim misin blong mi long Febwari 1980, misin presiden blong mi, i letem mi mo kompanion blong mi blong travel ova naet wetem ol memba blong stek blong Rio de Janeiro i go long tempol long Sao Paolo blong mi save endao mo sil wetem papa mo mama blong mi. Olsem papa mo mama blong mi, mi bin wet long ol yia blong kasem ol promes blesing blong tempol odinens mo ol kavenan.

Eksperiens ia i jenisim lukluk blong mi abaot fiuja mo i givim fas lukluk blong mi i go long trutok ia we Presiden Russell M. Nelson i jes talemaot: “Taem yu stap insaed long tempol, bae i helpem yu blong tingting selestial mo blong kasem wan visen blong huia yu stret, huia yu save kam, mo wan kaen laef we yu save kasem blong oltaem.”

Smol taem we mi gat insaed long tempol long spesel taem ia i jenisim bigwan misinari seves blong mi, long ol manis we i stap. Wetem niufala lukluk ia, blong stap testifae abaot tempol mo impoten plan ia blong God long ol famli i jenisim laef blong mi tu kasem tedei.

Taem mi mo waef blong mi, Rosana, i bin mared tu yia afta we mi kambak long misin blong mi, mitufala i bin sil long tempol wetem wan lukluk blong resemap famli blong mitufala blong taem we i no save finis. Blong mekem hemia, mitufala i wok tugeta blong krietem ol famli tradisen olsem we papa mo mama i tijim mifala, evri samting i lukluk nomo long Sevya, ol tijing blong Hem, mo ol tijing we i kam long ol profet blong Hem long taem blong tedei.

Tedei ol pikinini blong mitufala i stap resemap ol pikinini blong olgeta wetem ol semmak prinsipol blong gospel blong hapines. Long mifala, famli i impoten tumas from mifala i andastanem se famli i stamba blong evri samting long plan blong God.

Olsem wan Jeneral Atoriti, mi kasem blesing ia blong save silim ol trifala pikinini blong mi wetem ol hasban/waef blong olgeta insaed long tempol. Blong stap lukluk long ae blong olgeta long taem we oli nildaon long alta insaed long tempol i wan naesfala eksperiens tumas. Mi save luk fiuja jeneresen blong mi i bles long ol semmak prinsipol blong gospel we papa mo mama i tijim long mi, mo mi mo Rosana i bin tijim long olgeta. Mi save luk ol blesing ia i gohed long ol fiuja jeneresen. Mo mi bin tingbaot man we i mekem evri samting ia i posibol.

Wan Krismes Rimaenda

Famli i stamba blong evri samting insaed long plan ia blong God blong hapines, be sapos i no Sevya Jisas Kraes, plan ia bae i no save wok. Atonmen blong Hem mo ol odinens blong kavenan we yumi faenem insaed long gospel blong Hem i mekem i posibol ol promes blong kam olsem wan god.

Presiden Nelson i bin talemaot se: “Blong kam olsem wan god i bisnis blong famli. Tru nomo long olgeta odinens blong sevem laef insaed long gospel blong Jisas Kraes bambae ol famli oli save kam olsem ol god. En ia we yumi evriwan i stap traehad from, i blong yumi kam hapi olsem wan famli—we yumi endao, sil, mo rere blong kasem laef we i no save finis wetem God.”

Taem mi visitim ol ples we mi neva bin luk bifo, mi traem blong faenem ol smol Nativiti pleiplei we i save mekem mi mo Rosana i tingbaot Sevya. Naoia mi gat fulap long haos blong mi.

Blong stap tingting hevi long ol Nativiti pleiplei ia, wan taem mi mo waef blong mi i tingting hevi long kwestin ia, “Wanem nao hem i impoten tumas long laef blong yumi?” Ansa i, yes, hem i Sevya, gospel blong Hem, mo famli blong yumi. Blong rimaenem yumi abaot lav we Papa blong yumi long Heven i gat long yumi, hem i tru long Sevya se bae ol promes blong wan famli we i no save finis i hapen, bifo Krismes blong sam yia i pas mifala i putum ol Nativiti pleiplei blong mifala antap long tu bigfala self long haos blong mifala—mo lego i stap antap ia be mifala i no sakemaot afta we Krismes holidei i finis. Famli tradisen ia i helpem mifala blong kipim spirit blong Krismes long hom truaot long yia.

Evri dei taem mifala i lukluk long ol pleiplei ia, i rimaenem mifala long impoten wok blong Sevya long laef blong yumi. Oli rimaenem yumi se pis long wol naoia (luk long Luk 2:14) mo hapines we i no save finis long nekis wol i dipen long Sevya mo blong yumi kipim ol kavenan we yumi mekem wetem Hem. Mo hem i rimaenem yumi “se hem i bin kam long wol, hem we i Jisas, blong oli nilim hem long kros from wol ia, mo blong hem i tekem ol sin blong wol, mo blong hem i mekem wol ia i kam tabu, mo blong hem i klinim wol ia long evri fasin we i no stret mo i no gud;

“Blong mekem se, tru long hemwan, bae hem i sevem evriwan, evriwan ia we Papa i bin putum anda long paoa blong hem mo hem i bin mekem” (Doktrin mo Ol Kavenan 76:41–42).

Olsem we yumi lanem abaot ol trutok ia from ol papa mo mama blong yumi, Rosana mo mi i wok blong pasem i go long ol pikinini blong mitufala. Naoia ol pikinini blong mitufala i stap tijim semmak trutok ia long ol pikinini blong olgeta. Ol sid ia we oli planem long hat blong papa mo mama blong mi 60 yia i pas long wan smol hom long Bresil i gro i kam antap gud mo i karem frut “we praes blong hem i gudgudfala, we hem i moa swit bitim evri samting we i swit, mo we hem i moa waet bitim evri samting we i waet, yes, mo i moa klin gud bitim evri samting we i klin gud” (Alma 32:42).

Mi testifae se olgeta we oli lavem plan blong God long ol famli, oli gat lav olsem we Sevya i gat, mo ona long ol kavenan blong olgeta bae wan dei oli kasem “ol blesing blong laef we i no save finis mo wan glad we i fulwan” wetem olgeta we oli lavem mo wetem Papa mo Pikinini blong Hem.