“Inou Sarawi kan, Manaman, oh Inou kan,” Liahona, Oakotohpe. 2025.
Padahk en Sounpwong kan Liahona Oakotohpe 2025
Inou Sarawi kan, Manaman, oh Inou kan
Tehnpas sarawi iei poasoahn en inou en manaman oh mehn poadoandoar ohng me pwoson kan mwohn ketdo keriau en Kaun Sises Krais.
Kilel en Sohsep Smith sang Dan Burr
Nan Mei 1833, kapahmen-en ahi pahpa-kahlap Asahel Perry oh ekei kepoakepah seiloak sang Northern New York ong Kirthland, Ohio. Kaidehn irail tohn Mwomwohdiso kapw me kopwurpwurdohr et, ahpw irail men tuhong Soukohp Sohsep Smith. Irail peidi oh patehng keieu en arail pahn koasoane kokoudahn Tehpas Sarawi en Kirthland.
Mwurin tepdahn mihtingo, Soukohpo kasalehda koasoandi en kokoudahn tehnpaso. E ahpw eker irail kan me iang mih mwo irail en kasalehda arail pepehm me pid doadoahk lap wet. Pali tohto kasalehda me Mwomwohdiso wet me nohn semwehmweiong doadoahk wet. Irail nda palien wie ihmw me tikitik, me pahn wiahda ihmw ehu me pwei-tikitik.
Ansou me irail koaskoasone met, Pahpa kahlap Perry oh kempoakepah kan kohpene, diarada neirail mwohni kan, oh kapatpene. Mie neirail mwohni me pahn itarohng arail pahn pwurala oh irail ahpw pahn iang sawas ohng kokoudahn tehnpas wet? Minit kei mwuri, ahi pahpa kahlapo ekeredo Sohsep Smith, kasalehda takai kohl tala-limau oh kihong Soukohpo. (Soangen mwohnio rahnwet e pahn tala epwiki samwa!)
Sohsep kesihnenda mwohn aramas oko oh kolada mwohnio. Eri, koasokoasoi ni ngihl kehlail, e koasoia me “doadoahk wet pahn tepdahr oh Tehnpas [en Kauno] wet pahn kokouda duwehte dahme sansalehr” sang Sises Krais.
Peneinei en Perry mwadangete iangala Mwomwohdiso nan Kirthland, oh alehdi arail kapai en tehnpas sarawi sounpar kei mwuri nan Tehnpas Sarawi en Nauvoo, oh mwurin mwo irail kotehla wahu kan ong Utah.
Ansou me Tehnpas Sarawi en Kirthland kasarawihla nan 1836, E inenen tikitik ohng irail Souleng en Imwin-rahn akan me men iang patehng kasarawio. Ni Mwomwohdisoh ah keikeirda, Souleng kan me anahne iang mihting sarawi kan ni liki tohtola. President James E. Faust (1920–2007), me kin papah nin duwen ahi sdeik preseden ansou me I wia pwutak pwulopwul men oh wia sounsawas men ansou me i alehdi ahi pwukoahn General Authority nan 2007, wiahda ehu ropirop ong keriau en tehnpas sarawi en Mwomwohdiso:
“Mwohn Tehnpas Sarawi en Nauvoo ah imwsekla nan 1846 Souleng kan kin tuhpene liki, limwahn tehnpaso en rong Sohsep oh sounkaweid teikan en Mwomwohdiso arail kin padahk. Ekei pak me kid samwa kak patehng mihting kan”—ekei pak e kin lomwlomwur.
“Ni [Elder] George A. Smith ah kilandaga ahsou wet ni kaperen, ‘Nan mwehi en Soukohp Sohsep … [Mwomwohdiso wet] keirda keieu mwahu liki.’”
Kitail pahn kapingki pwehki nan atail ansou, Mwomwohdiso en Sises Krais en Souleng en Imwin-rahn akan keirdahr likin ihmw, nan ihmw, oh pil wasah kan nan sampa. Keirda pwukat me iangahki kokoudahn tehnpas sarawi kan me sohte kin wiawi mahs “wiepe kan me wihwiawi ansou wet”—wiepe kan me kin kalapw iangahki kapai sawas en palingehn, pwoson, oh tohnmetei.
Marain Lingaling—Tehnpas Sarawi en Kirthland, sang Glen S. Hopkinson, sohte me pahn kopih.
Dahme Karehda Diren Tehnpas Sarawi?
“Atail soukohp akan en mahs oko kohpadahr me tehnpas sarawih pahn audehla pali mese oh pali kapi en Amerika, sahpw deke kan en Europe, oh wasa koaros,” President Eza Taft Benson (1899–1994) koasoia sounpar kei samwalahro. “Ma doadoahk en komourla wet kak wiawi pohn mehn paun e pahn anahne tehnpas sarawi epwiki samwa.”
President Russell M. Nelson masanih me kitail kaukauwada tehnpas sarawi tohto sang mahs “pwehki Kauno me kin padahkiong kitail en wiahda. Kapai kan en tehnpas sarawi kin sewese kopwurpwurpenehn mehn Isrehl kan me momour oh me melahr kan. Kapai pwukat pil pahn sewese kaunopadahn aramas akan me pahn sewese kaunopadahn sampah ong Ketdo Keriau en Kauno!”
Nan ah kapakap en kasarawi en Tehnpas Sarawi en Kirthlando, Sohsep Smith kapakapki me “aramas koaros me pahn pidelong nan wenihmw en tehnpas en Kauno pahn kehn sapwillime manaman. …
“Oh se peki rehmwi, Sahm Sarawi, me sapwellimomwi ladu pwukat en pwuralahsang nan tehnpas wet silasilkihdi sapwellimomwi manamano, oh mwahromwi wet en ketket pohrail, oh sapwellimomwi lingan en kapilirail pene, oh sapwellimomwi tohnleng kan en sinsileirail” (Doctrine and Covenants109:13, 22; emphasis added; pil kilang ire tikitik 23).
Ansou me I wadek iretikitik pwukat, I medewe duwen ahn Nehpi kaudialo me duwen rahnpwukat. Kilang Oh e ahpw wiawiher me Ngehi, Nipahi, kilangadahr manaman en Simpwul en Koht me e ketididohr pohn souleng kan en mwomwohdiso en Simpwulo, oh pohn irail sapwellimen Kauno seri en inou kan, me milahr wasa koaros pohn sampah; oh irail silasilkidier pwung oh manaman en Koht ni lingan lapalap” (1 Nephi 14:14; emphasis added).
I kamehlele me tehnpas sarawi en imwin-rahn akan wia mehkot kesempwal oh kaimwsekala ahn Nipahi kaudiahlo oh wia poahsoan en mehn poadoandoar oh inou en manaman ong irail me pwoson kan mwohn ketdo keriauo.
Sounpar ekei samwalahro, ni ahi wia bishop men ong university ward, I inenen pwuriamweikihla emen serepein pwulopwul sang nan ahi wardo. E pil kowpkopwuriamwei ongiehte. Kumwail ese ih ni ede Preseden Emily Belle Freeman, Preseden lap ong serepein pwulopwul kan. Nan kapokon lap ahpwtehn neko, e padahngki me nan tehnpas sarawi kan, Sises Krais kin pwokitaildahlahng wasa me ileile sang mahs.
Preseden Freemen koasoia “Pak kaoros me I pidohlang Sapwellime tehnpaso, uwen loal en ahi inou sarawihkan ong Ih lalaudla.” “I sarawikihla Sapwellime Ngehno, wiahda inou ki Sapwellime manamano, oh kasarawiala ong kauwadahn Sapwellime wehi.”
Inou en Manaman
Preseden Nelson kin kalapw koasoia duwen sapwellimen Sises Krais manaman ah kin kak kohda ansou en wiahda Inou nan tehnpas sarawi. E masanih, “katengetengieng pein kumwail ong Sounkomouro wehwehki me kumwail kak alehda Sapwellime kehl oh manaman en poadoandoarala.” Preseden Nelson pil padahngki:
“Ni atail kolokol atail inou en tehnpas sarawi kan, kitail ahpw pahn alehda Sapwellimen Kauno manaman en kakehlail. Nan tehnpas sarawihkan, kitail alehdi silasil sang kasongosong en sampah.”
“[Sapwellimen Sounkomouro] tiahk sarawi kesempwal akan katengedi kitail ohng Ih sang ni inou sarawi kan en prihsduhd. Eri, ni atail pahn kolokol atail inou sarawi kan, E pahn ketin kiheng kitail kisakis en Sapwellime manaman en kakehlail oh kamwahu. Oh pil, ia uwen atail pahn anahne Sapwellime manaman nan rahn akan me pahn kohdo.”
“Manaman en palinwar oh palingehn me atail aramas akan anahne ansouwet oh rahn akan me pahn kohdo iei manaman en Koht Sahm oh Sapwellime Iehroso, Sises Krais. Kitail alehdi Sapwellimara manaman sang ni atail wiwiahda oh kolokol inou sarawih kan ong Ira.”
Manaman en Nanleng kesempwal, riei ohl oh lih oko, pwehki kitail koukousoan nan sampah suwed ehu. Ma sohte manaman wet kitail sohte pahn kak “uh ni rahn en sapwellime ketdohu” de “kesinen ansou me e pahn pwaredohu” (Malachi 3:2). Kitail sohte ese iahd rahno, ahpw Sapwellime meninkeder kan pekederdohr pwe en “kaunopada ahlo” ong Ah pahn ketdo (Malachi 3:1). Ni ansouohte, sampa wet sohte pipihr meleilei ong rahno.
Kitail anahne inou en manaman ong pwoson en seweseikitaila:
-
Mweidohng Koht en kaunda atail mour.
-
Koluhla oh keido karaniala Kauno.
-
Kapai, kamwahu, kaweid, oh sawas.
-
“Kitail en keisang atail kahpwal, kasongsong, oh mohngiong ohla kan en mwahula” (kilang Mosiah 3:19).
-
Rapahki meleilei oh popohl rehn Krais ni atail pahn alialu nan ahl en inou sarawi.
-
Kaunopada “pelianda rahn en isihslao” oh “wiwiahn me suwed kan” (Doctrine and Covenants 109:46).
-
Kapwaiada Sapwellimen Kauno doadoahk mwohn Sapwellime Ketdo Keriauo.
Kilel en Pweleng en Tehnpas Sarawi en Tucson Arizona sang James Whitney
Soun apwapwalih Komour
Sapwellimen Sahm Nanleng doadoahk oh lingan iei en “kamourla sapwellime aramas akan ong mour soutuk” (Moses 1:39). Ehu ehu tehnpas sarawi nan sampa wia mehn sawas ong sapwellimen Koht plahn en komour, ulahngete sapwellimen Sounkomouro poasoahn en doadoahk oh lingan.
Silasilkihdi Sapwellime manaman, ohl oh lih akan kaoros me wauniki arail inou sarawihkan—pwopwoud de soh—me kolokol inou sarawi kan en nan tehnpas saraw ni pwoson pahn kapaida nan mour wet oh mour kokohdoh.
Preseden Nelson inoukihdi: “Ni imwilahn dahme emen emen kitail kin nanantiong iei en wiahdi atail inou kan ki manaman en nan tehnpas en Kauno, katengtengpene nin duwen peneinei kan, kapwaiada inou sarawih kan me kitail wiahda nan tehnpas sarawi me pahn karehiong kitail en kak iang alehdi kapai keieu laud en Koht—me iei mour soutuk. Tiahk sarawih kan en tehnpas sarawi oh inou sarawih kan me kumwail wiahda wasao wia mehn kakehlepen amwail mour, amwail inou sarawi oh peneinei, oh amwail kak en powehdi kasongosong kan me pahn kohsang rehn tepelo. Amwail kaudok nan tehnpas sarawi oh amwail sawas ong kadaudokamwail kan wasao pahn kapai kumwailda sang ni eh pahn kalaudehla pein amwail kaudiahl oh meleilei oh pahn kakehlakahla amwail inou en mihmihdihte pohn ahl en inouo.”
Ni ahi wia Wahnparon en Kaun Sises Krais, I kadehdehki me mepwukat mehlel.
© 2025 by Intellectual Reserve, Inc. Pwuhng koaros koasoandier. Ntingda nan USA. Kamanamanla ong ni Lokaiahnwai: 6/19. Kamanamanohng kawehweh: 6/19. Kaweweh en Sounpwong kan Padahk nan Liahona Oakotohp 2025. Pohnpeian. 19611 885