Bujen ko, Kajoor eo, im Kallim̧ur ko

Juon Meram Aiboojoj—Kirtland Tampeļ, jān Glen S. Hopkinson, ejjab maron̄ kape.

Etke Ekanooj Lōn̄ Tampeļ ko?

“Rikanaan ro ad m̧okta kar kanaan bwe tampeļ ko renaaj kobrak aolep jikin ko ilo Turear im Turilik in Amedka, āne ko ilo Pacific, Europe, im jabdewōt jikin,” Būreejtōn Eza Taft Benson (1899–1994) ekar ba jejjo n̄oul iiō ko remootļo̧k. “Eļan̄n̄e jerbal in lo̧mo̧o̧r in ej aikuj kōm̧m̧an ilo juon kein baun ej aikuj in, būki tampeļ ko naaj kar aikuji.”

Būreejtōn Russell M. Nelson ekar ba jej kalōk tampeļ ko ilo juon jekjek ban kōjake rainin “Kōnke Irooj eaar jiron̄ kōj n̄an kōm̧m̧ane. Kōjeraam̧m̧an ko an tampeļ rej jipan̄ aiintok Israel jim̧or ilo ron̄ol nuknuk eo. Kōjeraam̧m̧an kein rej barāinwōt jipan̄ n̄an kōpooj juon armej eo enaaj jipan̄ kōpooj laļ in n̄an Itok Eo Kein Karuo an Irooj!”

Ilo jar in aje eo an an Kirtland Tampeļ, Josep Smith ekar jar “bwe aolep armej ro renaaj deļo̧n̄ ilo im̧aan kōjām eo an m̧wiin im̧ōn Irooj ren maron̄ en̄jake kajoor eo. …

“Im kōmij kajjitōk Ippam̧, Jemām Ekwōjarjar, bwe rein karejeram̧ ren maron̄ ilo̧k jān m̧wiin Im̧ōm pālpel kōn kajoor eo Am̧, im bwe Etam̧ en maron̄ pād ioer, im Am̧ aiboojoj en jepooļe er, en wōr aer eddo ioer” (Katak im Bujen Ko 109:13, 22; naan eo kar kobaiktok; lale bar 23).

N̄e ij riiti eoon ko, ij ļōmņak kōn visōn eo an Nipai kōn raan ko āliktata. Kile naan eo āinwōt: “Im ālkin men kein, n̄a, Nipai, iaar lo iaar lo kajoor in Lamb an Anij, im ioon armej in bujen ko an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap” (1 Nipai 14:14; naan eo kar kobaiktok).

Ij tōmak bwe tampeļ ko ilo raan ko āliktata rej kōm̧m̧ane juon jerbal emenin aikuj n̄an kakūrm̧ool kanaan eo an Nipai im rej dilep eo n̄an kōjparok im kajoor eo kar kallim̧ur kake n̄an ritiljek ro m̧okta jān Itok Eo Kein Karuo.

Jejjo iiō ko remootļo̧k, ke ikar jerbal āinwōt juon bisop in juon university ward, ikar lukkuun bwilōn̄ kōn juon jiron̄ ilo ward eo aō. Liin ej kabwilōn̄ wōt eō. Kwojeļā kajjien āinwōt Būreejtōn Emily Belle Freeman, Būreejtōn eo Eutiej an Doulul eo an Jiron̄ ro. Ilo juon ekōnono ilo kweilo̧k eo eļap kiiō epaak, liin ekar katakin bwe kōn tampeļ, Jisōs Kraist ej ļōn̄aj kōj n̄an juon jon̄ak in jetōb eutiejļo̧k.

“Kajjojo iien ij etal eļļā jen m̧weo Im̧ōn, ij en̄jake m̧wilaļ in bujen jemjerā eo Ippān,” Būreejtōn Freeman ekar ba. “Iaar kwojarjar kōn Jetōb eo An, kar bōk menin letok kwojarjar kōn kajoor eo An, im kar kōjenolo̧k n̄an kalōk aelōn̄ in kiin̄ eo An.”

Būreejtōn Nelson emakijkij an kar kōnono kōn kajoor eo an Jisōs Kraist an pād kōn bujen ko an tampeļ. “Ak juon wōt ippān Rilo̧mo̧o̧r ej meļeļe bōk An kajoor im kajoor in pinmuur,” ekar ba. Būreejtōn Nelson eaar bar ba:

“Ilo ad kōjparok bujen tampeļ ko ad, jej bōk eļapļo̧k bōke kajoor eo an Irooj. Ilo tampeļ, jej bōk katak ko n̄an jipan̄ kōj anjo̧ jān laļ in.”

“Kain̄i ko raorōk [an Rilo̧mo̧o̧r eo] rej liāpe kōj n̄an E kōn bujen ko rekwojarjar an priesthood. Innām, ilo ad kōjparoki bujen ko ad, E ej letok n̄an kōj An kōmour, kajoor in kōkajoorļo̧k. Im o, ekōjkan ad naaj aikuji kajoor eo An ilo raan ko rej pād im̧aan.”

“Kajoor eo ilo kanniōk im jetōb me armej ro ad rej aikuj kiiō im n̄an raan ko tok im̧aan ej kajoor eo an Anij Jemān im Nejin, Jisōs Kraist. Jej bōk maron̄ eo n̄an bōk kajoor eo Aer kōn kōm̧m̧an im kōjparok bujen ko Ippāer.”

Kajoor eo an lan̄ ej aorōk, ro jeiū im jatū, kōnke jej mour ilo juon laļ elukkuun nana. Ilo an jako kajoor jab in, jejjamin naaj maron̄ in “pād ilo raan in An itok” ak “jutak n̄e Ej jade” (Malakai 3:2). Jejjab jeļā n̄aat eo raan jab in enaaj itok, bōtaab ribōkļo̧k ennaan eo An em̧ōj kadede kar jilkintok n̄an “kōpooj iaļ eo” n̄an itok eo An(Malakai 3:1). Ilo iien in, laļ in ejjab meļak an m̧akūtkūt n̄an raan jab en.

Jej aikuji kajoor eo kar kallim̧ur kake n̄an ritiljek ro n̄an jipan̄ kōj:

• Kōtļo̧k bwe Anij en anjo̧ ilo mour ko ad.

• Ukweļo̧k im epaakeļo̧k Irooj.

• Kōjeraam̧m̧an, kaenōm̧m̧an, tōl, im jerbal in karejar.

• “Jutak ņae apan̄ ko ad, kapo ko, im būrom̧ōj ko” (lale Mosaia 3:19).

• Pukot aenōm̧m̧an im lan̄lōn̄ ilo Kraist ilo ad etetal ilo iaļ in bujen eo.

• M̧aajabpopo “ņae raan in kattil eo” im “kan̄iājo an ro rinana” (Katak im Bujen Ko 109:46).

• Kadedeļo̧k jerbal eo an Irooj m̧okta jān Itok Eo An Kein Karuo

Pija in doom eo ilo Tucson Arizona Tampeļ jān James Whitney Young

Ribaar ro an Lo̧mo̧o̧r

Jerbal im aiboojoj eo an Jemādwōj Ilan̄ ej “n̄an kakūrm̧ool jab wabanban im mour indeeo an armej” (Moses 1:39). Kajjojo tampeļ ej jutak āinwōt juon ribaar in laļ an karōk in lo̧mo̧o̧r eo an Anij, kwaļo̧k jerbal eo eļap an Rilo̧mo̧o̧r eo ilo jerbal in aiboojoj jab in.

Pālpel kōn kajoor eo An, aolep m̧aan im kōrā in bujen-kōjparok—m̧are ak jaab—ro rej tiljek kōjparok tampeļ bujen ko aer naaj jeraam̧m̧an ilo mour in im mour eo ej itok.

Būreejtōn Nelson ekar kallim̧ur: “Jemļo̧k eo me kōj kajjojo jej kajjieon̄ in erom̧ ej n̄an bōk menin letok eo ekwojarjar an kōn kajoor ilo juon em̧ im̧ōn Irooj, liāp āinwōt baam̧le ko, tiljek n̄an bujen ko jekar kōm̧m̧ani ilo juon tampeļ me ej kōkarbab kōj n̄an menin letok eo eļaptata an Anij—me an mour indeeo. Kain̄i ko an tampeļ im bujen ko kwoj kōm̧m̧ane rej kii n̄an kōkajoorļo̧k mour eo am̧, m̧are eo am̧, im am̧ maron̄ n̄an jum̧ae menin kapo ko an rikōjdāt eo. Am̧ kabun̄jar ilo tampeļ eo im am̧ jerbal in jipan̄ ijeņ kōn rūtto ro jibum̧ im jim̧m̧am̧ me em̧ōj aer jako naaj kōjeraam̧m̧an eok im kōļapļo̧k revelesōn eo am̧ make im aenōm̧m̧an im naaj kakwojarjar kallim̧ur eo am̧ n̄an dim wōt ilo iaļ in bujen eo.”

Āinwōt juon Rijilōk an Irooj Jisōs Kraist, ij kam̧ool bwe men kein rej m̧ool.