ພັນທະສັນຍາ, ອຳນາດ, ແລະ ຄຳສັນຍາ

A Glorious Light—Kirtland Temple [ຄວາມສະຫວ່າງທີ່ຮຸ່ງເຫລື້ອມ—ພຣະວິຫານເຄີດແລນ], ໂດຍ ກະເລັນ ແອັສ ຮອບຄິນສັນ, ຫ້າມຄັດລອກ

ເປັນຫຍັງຈຶ່ງມີພຣະວິຫານຫລາຍແຫ່ງ?

“ຜູ້ມີຊີວິດກ່ອນເຮົາໄດ້ທຳນາຍໄວ້ວ່າ ພຣະວິຫານຫລາຍແຫ່ງຈະຢາຍຢູ່ທົ່ວທຸກພື້ນທີ່ຂອງອາເມຣິກາເໜືອ ແລະ ໄຕ້, ໝູ່ເກາະປາຊີຟິກ, ເອີຣົບ, ແລະ ສະຖານທີ່ອື່ນໆ,” ປະທານເອຊະຣາ ແທັບ ເບັນສັນ (1899-1994) ໄດ້ກ່າວໄວ້ເມື່ອ​ຫລາຍ​ທົດ​ສະ​ວັດ​ກ່ອນ. “ຖ້າວ່າວຽກງານແຫ່ງການໄຖ່ນີ້ຈະຕ້ອງເຮັດໃນລະດັບທີ່ຕ້ອງເຮັດແລ້ວ, ຈຳ​ເປັນ​ຕ້ອງ​ມີ​ພຣະ​ວິ​ຫານ​ຫລາຍຮ້ອຍ​ແຫ່ງ.”

ປະທານຣະໂຊ​ເອັມ ແນວສັນ ໄດ້ກ່າວວ່າ ພວກເຮົາສ້າງພຣະວິຫານດ້ວຍຄວາມໄວທີ່ບໍ່ເຄີຍມີມາກ່ອນໃນຍຸກນີ້ “ຍ້ອນພຣະຜູ້ເປັນເຈົ້າໄດ້ສັ່ງເຮົາໃຫ້ເຮັດເຊັ່ນນັ້ນ. ພອນຂອງພຣະວິຫານຊ່ວຍເຕົ້າໂຮມອິດສະຣາເອນຢູ່ທັງສອງຟາກມ່ານ. ພອນເຫລົ່ານີ້ກໍຊ່ວຍກຽມຜູ້ຄົນທີ່ຈະຊ່ວຍກຽມໂລກສຳລັບການສະເດັດມາຄັ້ງທີອງຂອງພຣະຜູ້ເປັນເຈົ້າ!”

ໃນຄຳອະທິຖານອຸທິດພຣະວິຫານເຄີດແລນຂອງເພິ່ນ, ໂຈເຊັບ ສະມິດ ໄດ້ອະທິຖານວ່າ “ຜູ້ຄົນທັງປວງທີ່ຈະເຂົ້າສູ່ທາງເຂົ້າບ້ານຂອງພຣະຜູ້ເປັນເຈົ້າຈະຮູ້ສຶກເຖິງອຳນາດຂອງພຣະອົງ.​…

“ແລະ ພວກຂ້າພຣະອົງທູນຂໍພຣະອົງ, ພຣະບິດາຜູ້ບໍລິສຸດ, ໃຫ້ຜູ້ຮັບໃຊ້ຂອງພຣະອົງອອກໄປຈາກບ້ານແຫ່ງນີ້ ໂດຍມີອຳນາດຂອງພຣະອົງເປັນອາວຸດ, ແລະ ໃຫ້ພຣະນາມຂອງພຣະອົງຢູ່ກັບເຂົາເຈົ້າ, ແລະ ໃຫ້ລັດສະໝີພາບຂອງພຣະອົງຢູ່ອ້ອມຮອບເຂົາເຈົ້າ, ແລະ ເຫລົ່າທູດຂອງພຣະອົງຮັບຜິດຊອບດູແລເຂົາເຈົ້າ” (ຄຳສອນ ແລະ ພັນທະສັນຍາ 109:13, 22; ເນັ້ນຄຳເນີ້ງ; ເບິ່ງຂໍ້ທີ 23 ນຳອີກ).

ເມື່ອຂ້າພະເຈົ້າອ່ານຂໍພຣະຄຳພີເຫລົ່ານັ້ນ, ຂ້າພະເຈົ້າຄິດເຖິງພາບນິມິດຂອງນີໄຟກ່ຽວກັບຍຸກສຸດທ້າຍ. ສັງເກດຖ້ອຍຄຳທີ່ຄ້າຍກັນນີ້: “ແລະ ເຫດການໄດ້ບັງເກີດຂື້ນຄື ຂ້າພະເຈົ້າ, ນີໄຟ, ໄດ້ເຫັນອຳນາດຂອງພຣະເມສານ້ອຍຂອງພຣະເຈົ້າ, ລົງມາເທິງໄພ່ພົນຂອງສາດສະໜາຈັກຂອງພຣະເມສານ້ອຍ, ແລະ ຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ, ຊຶ່ງກະຈັດກະຈາຍໄປຕາມແຜ່ນດິນໂລກ; ແລະ ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່” (1 ນີໄຟ 14:14; ເນັ້ນຄຳເນີ້ງ).

ຂ້າພະເຈົ້າເຊື່ອວ່າພຣະວິຫານໃນຍຸກສຸດທ້າຍມີບົດບາດສຳຄັນໃນການບັນລຸຕາມຄຳທຳນາຍຂອງນີໄຟ ແລະ ເປັນສູນກາງຂອງການປົກປ້ອງ ແລະ ອຳນາດທີ່ສັນຍາໄວ້ໃຫ້ກັບຜູ້ທີ່ມີສັດທາກ່ອນການສະເດັດມາຄັ້ງທີສອງ.

ຫລາຍປີຜ່ານມາ, ໃນຂະນະທີ່ຂ້າພະເຈົ້າຮັບໃຊ້ເປັນອະທິການຂອງຫວອດໃນມະຫາວິທະຍາໄລ, ຂ້າພະເຈົ້າຮູ້ສຶກປະທັບໃຈເປັນພິເສດກັບຍິງໜຸ່ມຄົນໜຶ່ງໃນຫວອດຂອງຂ້າພະເຈົ້າ. ລາວກໍຍັງເປັນທີ່ປະທັບໃຈຂອງຂ້າພະເຈົ້າຢູ່ຕອນນີ້. ພວກທ່ານຮູ້ຈັກລາວໃນຖານະປະທານເອັມມະລີ ແບວ ຟຣີແມນ, ປະທານອົງການຍິງໜຸ່ມສາມັນ. ໃນການກ່າວຄຳປາໄສທີ່ກອງປະຊຸມໃຫຍ່ບໍ່ດົນມານີ້, ລາວໄດ້ສິດສອນວ່າ ຜ່ານທາງພຣະວິຫານ, ພຣະເຢຊູຄຣິດຍົກເຮົາຂຶ້ນໄປສູ່ລະດັບຈິດວິນຍານທີ່ສູງກວ່າ.

“ທຸກເທື່ອທີ່ຂ້າພະເຈົ້າຍ່າງຜ່ານເຂົ້າໄປໃນບ້ານຂອງພຣະອົງ, ຂ້າພະເຈົ້າປະສົບກັບຄວາມສຳພັນແຫ່ງພັນທະສັນຍາທີ່ເລິກເຊິ່ງຫລາຍຂື້ນກັບພຣະອົງ,” ປະທານຟຣີແມນໄດ້ກ່າວໄວ້. “ຂ້າພະເຈົ້າຖືກເຮັດໃຫ້ ບໍລິສຸດ ດ້ວຍພຣະວິນຍານຂອງພຣະອົງ, ໄດ້ຮັບຂອງປະທານສັກສິດ ດ້ວຍອຳນາດຂອງພຣະອົງ, ແລະ ຖືກແຕ່ງຕັ້ງ ເປັນທາງການ ເພື່ອສ້າງອານາຈັກຂອງພຣະອົງ.”

ປະທານແນວສັນໄດ້ກ່າວຫລາຍຄັ້ງກ່ຽວກັບອຳນາດຂອງພຣະເຢຊູຄຣິດທີ່ມີໃຫ້​ຜ່ານ​ທາງພັນທະສັນຍາພຣະວິຫານ. “ການທຽມແອກຂອງທ່ານກັບພຣະຜູ້ຊ່ວຍໃຫ້ລອດໝາຍຄວາມວ່າທ່ານໄດ້ເຂົ້າເຖິງຄວາມເຂັ້ມແຂງ ແລະ ອຳນາດແຫ່ງການໄຖ່ ຂອງພຣະອົງ,” ເພິ່ນໄດ້ກ່າວ. ປະທານແນວສັນຍັງສິດສອນຕຶ່ມອີກວ່າ:

“ເມື່ອເຮົາຮັກສາພັນທະສັນຍາພຣະວິຫານຂອງເຮົາ, ເຮົາຈະສາມາດເຂົ້າເຖິງອຳນາດແຫ່ງການເສີມ​ຄວາມ​ເຂັ້ມ​ແຂງ​ຂອງພຣະຜູ້ເປັນເຈົ້າໄດ້ຫລາຍຂື້ນ. ໃນພຣະວິຫານ, ເຮົາໄດ້ຮັບການປົກປ້ອງຈາກການໂຈມຕີຂອງໂລກ.”

“ພິທີການທີ່ຈຳເປັນຂອງ [ພຣະຜູ້ຊ່ວຍໃຫ້ລອດ] ຈະຜູກມັດເຮົາໄວ້ກັບພຣະອົງ ຜ່ານທາງພັນທະສັນຍາຂອງຖານະປະໂລຫິດທີ່ສັກສິດ. ແລ້ວ, ເມື່ອເຮົາຮັກສາພັນທະສັນຍາຂອງເຮົາ, ພຣະອົງຈະມອບອຳນາດທີ່ປິ່ນປົວ, ແລະ ເສີມສ້າງ ຂອງພຣະອົງໃຫ້ກັບເຮົາ. ແລະ ໂອ້, ເຮົາຈະຕ້ອງການອຳນາດຂອງພຣະອົງຫລາຍເທົ່າໃດ ໃນວັນຂ້າງໜ້າ.”

“ພະລັງທາງສິນລະທຳ ແລະ ທາງຈິດວິນຍານທີ່ຜູ້ຄົນຂອງເຮົາຕ້ອງການໃນປະຈຸບັນນີ້ ແລະ ໃນວັນຂ້າງໜ້າຄືພະລັງຂອງພຣະເຈົ້າ​ອົງ​ເປັນ​ພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ. ເຮົາເຂົ້າເຖິງອຳນາດຂອງພວກພຣະອົງໄດ້ໂດຍການເຮັດ ແລະ ການຮັກສາພັນທະສັນຍາກັບພວກພຣະອົງ.”

ພະລັງຈາກສະຫວັນແມ່ນສິ່ງທີ່ສຳຄັນ, ອ້າຍເອື້ອຍນ້ອງທັງຫລາຍ, ຍ້ອນວ່າເຮົາດຳລົງຊີວິດຢູ່ໃນໂລກອັນຊົ່ວຮ້າຍ. ຖ້າປາດສະຈາກອຳນາດນັ້ນ, ເຮົາຈະບໍ່ສາມາດ “ຢູ່ໃນວັນທີ່ພຣະອົງສະເດັດມາ” ຫລື “ມີຊີວິດລອດຢູ່ໄດ້ເມື່ອພຣະອົງມາປະກົດ” (ມາລາກີ 3:2). ເຮົາບໍ່ຮູ້ຈັກໄດ້ວ່າວັນນັ້ນຈະມາເຖິງເມື່ອໃດ, ແຕ່ຜູ້ແຈ້ງຂ່າວຂອງພຣະອົງໄດ້ຖືກສົ່ງມາເພື່ອ “ຕຽມທາງ” ໄວ້ສຳລັບການສະເດັດມາຂອງພຣະອົງ (ມາລາກີ 3:1). ໃນຂະນະດຽວກັນ, ໂລກກໍບໍ່ໄດ້ຂັບເຄື່ອນໄປຢ່າງສະຫງົບເມື່ອມຸ້ງໜ້າສູ່ວັນນັ້ນ.

ເຮົາຕ້ອງການອຳນາດທີ່ສັນຍາໄວ້ກັບຜູ້ທີ່ຊື່ສັດເພື່ອຊ່ວຍເຮົາ:

• ໃຫ້ພຣະເຈົ້າໄຊຊະນະໃນຊີິວິດຂອງເຮົາ.

• ກັບໃຈ ແລະ ຫຍັບເຂົ້າໃກ້ພຣະຜູ້ເປັນເຈົ້າຫລາຍຂື້ນ.

• ໃຫ້ພອນ, ປອບໂຍນ, ນຳພາ, ແລະ ປະຕິບັດສາດສະໜາກິດ.

• “ຕ້ານທານກັບການທົດລອງ, ການລໍ້ລວງ, ແລະ ຄວມເຈັບປວດຂອງເຮົາໄດ້ດີກວ່າເກົ່າ” (ເບິ່ງ ໂມ​ໄຊ​ຢາ 3:19).

• ພົບສັນຕິສຸກ ແລະ ຄວາມຊື່ນຊົນໃນພຣະຄຣິດໃນຂະນະທີ່ເຮົາເດີນ​ໄປ​ໃນ​ສັ້ນທາງແຫ່ງພັນທະສັນຍາ.

• ກຽມພ້ອມ “ທີ່ຈະຕ້ານທານກັບວັນແຫ່ງການເຜົາໄໝ້” ແລະ “ຄວາມເສຍຫາຍຂອງຄົນຊົ່ວ” (ຄຳສອນ ແລະ ພັນທະສັນຍາ 109:46).

• ສຳເລັດວຽກງານຂອງພຣະຜູ້ເປັນເຈົ້າກ່ອນການສະເດັດມາຄັ້ງທີສອງຂອງພຣະອົງ.

ຮູບຖ່າຍຈອມພຣະວິຫານທູສານ ອາຣິໂຊນາ ໂດຍ ເຈມສ໌ ວິດນີ ຢັງ

ຜູ້ພິທັກຮັກສາແຫ່ງຄວາມລອດ

ວຽກງານ ແລະ ລັດສະໝີພາບຂອງພຣະບິດາເທິງສະຫວັນຄື “ການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ” (ໂມເຊ 1:39). ພຣະວິຫານແຕ່ລະແຫ່ງຢືນເປັນເໝືອນດັ່ງຜູ້ພິທັກຮັກສາທາງໂລກຂອງແຜນແຫ່ງຄວາມລອດຂອງພຣະເຈົ້າ, ໂດຍຊີ້ໃຫ້ເຫັນເຖິງບົດບາດສຳ​ຄັນຂອງພຣະຜູ້ຊ່ວຍໃຫ້ລອດໃນວຽກງານ ແລະ ລັດສະໝີພາບນັ້ນ.

ໂດຍທີ່ມີອຳນາດຂອງພຣະອົງເປັນອາວຸດ, ຜູ້ທີ່ຮັກສາພັນທະສັນຍາ ທັງ​ຊາຍ ແລະ ຍິງ—ແຕ່ງງານແລ້ວ ຫລື ບໍ່ທັນໄດ້ແຕ່ງງານ—ຜູ້ທີ່ຮັກສາພັນທະສັນຍາພຣະວິຫານຢ່າງຊື່ສັດຈະໄດ້ຮັບພອນໃນຊີວິດນີ້ ແລະ ຊີວີດທີ່ຈະມາເຖິງ.

ປະທານແນວສັນໄດ້ສັນຍາວ່າ: “ທີ່ສຸດດັ່ງກ່າວ ທີ່ເຮົາແຕ່ລະຄົນພະຍາຍາມໄປເຖິງ ແມ່ນການຮັບເອົາຂອງປະທານສັກສິດ ພ້ອມດ້ວຍພະລັງ ຢູ່ໃນບ້ານຂອງພຣະຜູ້ເປັນເຈົ້າ, ໄດ້ຜະນຶກເຂົ້າກັບຄອບຄົວ, ຊື່ສັດຕໍ່ພັນທະສັນຍາທີ່ໄດ້ເຮັດຢູ່ໃນພຣະວິຫານ ຊຶ່ງຊ່ວຍເຮົາໃຫ້ເໝາະສົມກັບຂອງປະທານທີ່ຍິ່ງໃຫຍ່ທີ່ສຸດຂອງພຣະເຈົ້າ—ຄືຊີວິດນິລັນດອນ. ພິທີການຂອງພຣະວິຫານ ແລະ ພັນທະສັນຍາທີ່ທ່ານເຮັດຢູ່ໃນນັ້ນ ຄືສິ່ງສຳຄັນທີ່ຈະເພີ່ມຄວາມເຂັ້ມແຂງໃຫ້ແກ່ຊີວິດ, ການແຕ່ງງານ ແລະ ຄອບຄົວ, ແລະ ຄວາມສາມາດຂອງທ່ານ ໃນການຕໍ່ຕ້ານກັບການໂຈມຕີຂອງຜູ້ປໍລະປັກ. ການນະມັດສະການຂອງທ່ານໃນພຣະວິຫານ ແລະ ການຮັບໃຊ້ຂອງທ່ານຢູ່ທີ່ນັ້ນເພື່ອບັນພະບຸລຸດຂອງທ່ານ ຈະເພີ່ມການເປີດເຜີຍສ່ວນຕົວ ແລະ ຄວາມສະຫງົບໃຫ້ທ່ານ ແລະ ຈະປົກປ້ອງຄວາມຕັ້ງໃຈຂອງທ່ານ ທີ່ຈະຍຶດໝັ້ນຢູ່ໃນເສັ້ນທາງແຫ່ງພັນທະສັນຍາຂອງທ່ານ.”

ໃນຖານະອັກຄະສາວົກຂອງ​ອົງພຣະເຢຊູຄຣິດ​ເຈົ້າ, ຂ້າພະເຈົ້າເປັນພະຍານວ່າສິ່ງເຫລົ່ານີ້ເປັນຄວາມຈິງ.