“Wuhlweacng, Kuh, ac Olwelah,” Liahona, Ohktohpa 2025.
Mahlwem Nuhkewa Liahona Pweng, Ohktohpa 2025
Wuhlweacng, Kuh, ac Olwelah
Tempuhl el yohk srihpac in mwe kuh ac mwe karihngihn se ma uliyuck nuh selos mwet luhlahlfongi meet liki Tuhkuh Ahkluo luhn Leum Jisus Kraist.
sroacl se kacl Joseph Smith sel Dan Burr
Ke Mei 1833, pahpah mahtuh ahk-ahkosr tuhmuhk Asahel Perry ac wi kuhtuh kawuck lal oruh suhrak se lac New York nuh Kirtland, Ohio. Elos tiac mempucr ke Alu sasuc se ma fohlohkihnyuckyak ah, tuhsruhk elos ke ohsun nuh sel Mwet pahluh Joseph Smith. Elos ai tuh falyang wi toeni se emet ahkfahsryeyuck in aetuhilac ke muhsahiyen Kirtland Tempuhl.
Ke toeni sac, Mwet pahluh el akacsruhi srihpen toeni sac in muhsahi tempuhl. Na el eis nuhnak luhn mwet wi toeni sac in fahk ma elos puhla nuh ke muhsah luhlahp se inge. Inkaiyaclos topuk fahk lah Alu uh kacoh tiac kuh in sruok oruh kain mukwikwi se. Elos ngihsre in muhsah srihsrihk, ma tiac sislah mani luhlahp.
Ke pacl se orek sramsram ingacn, Pahtmahtuh Perry ac kawuck lal ah maeni, eslah mani lalos, ac sang tahfelah. Kuh oasr suhna selos in molwelah fohlohk lalos ah ac elos sang kahsruh muhsah ke tempuhl ah? Mihnit ekahsr tohkoh, pahpah mahtuh tuhmuhk ohsun nuh sel Joseph Smith, eslah tala limekohsr ke kohtoh gold, ac sang nuh sel Mwet pahluh. (Kohtoh se nuh ke pacl misenge el oacna tala siofok!)
Joseph el tu ye muhtuhn walihl sac ac olwack kohtoh ah. Na, ke puhlaik, el fahk lah “orekma uh e fahsr na ac Lohm [sin Leum] e muhsahlah fal nuh ke pactuhn ma akwucki” sin Leum Jisus Kraist.
Tok sucu Perry welah Alu uh fin acn Kirtland, eis mwe insewowo lalos tempuhl yac ekahsr tohkoh ke Tempuhl Nauvoo, ac tiac paht wi fahsr ahluhkwelah acn oalal som nuh Utah.
Ke pacl se Kirtland Tempuhl kihsackihnyucklac ke 1836, srihklaclac in nwacnwack kewa Mwet Luhlahlfongi ke Lwen-sahflah ma luhngse wi kihsac se ingacn. Ke Alu uh kapwack, puhseni pihsen Mwet Luhlahlfongi muhta lihkihnihm ke toeni inge. Prestuhn James E. Faust (1920–2007), el pa tuh stek prestuhn luhk ke nga mwet fuhsr ac mwet in kahsruh se luhk ke nga pahng nuh ke General Authority ke 2007, oraclah kahlwem liye lal ke tempuhl ahkluo luhn Alu uh:
“Meet liki sahflah Nauvoo Temple ke 1846 Mwet Luhlahlfongi elos e tuhkeni lihkihnihm ah, sisken tempuhl, in lohng sel Joseph ac kuhtuh mwet kol sahyac ke Alu uh. Kuhtuh pacl uh sun tausin mwet wi toeni ingacn”—fine puhlan pacl ah tiac wo.
“Oacna ke [Elder] George A. Smith el akihlen ke ohiyac wo lal, ‘Ke pacl se lal Mwet pahluh Joseph … [Alu uh] kapwack yohk lihkihn sruhnguhl ah.’”
Kuht kulohkihn lah pacl lasr misenge uh, Alu luhn Jisus Kraist luhn Mwet Luhlahlfongi ke Lwen-sahflah kapwack lihkihnihm, lin lohm, ac fin facluh nohfohn. Kapwack se ingacn tuhkuh ke muhsah pihsrpihsr luhn tempuhl “fal nuh ke pactuhn ma akwucki”—pahtuhn se ma sruokyac kewa mwe insewowo, ma muhtahl, luhlahlfongi, ac mwe kihsac.
A Glorious Light—Kirtland Tempuhl, sel Glen S. Hopkinson, tiac enenuh in orek copy
Efuh Puhslac Tempuhl?
“Mwet somlah lasr ah palye muh tempuhl uh fah nwacklah acn tuhpahsrpahsr ke acn North ac South America, ac tuhka in meoa Pacific, Europe ac acn sahyac pac,” Prestuhn Eza Taft Benson (1899–1994) el fahk ke yac puhs somlah ah. “Fin orekma luhn molwelah se inge sahflah fin srihkeyucki fal, siofok tempuhl ac enenweyuck.”
Prestuhn Russell M. Nelson el fahk lah kuht muhsahi tempuhl pihsrpihsr misenge “ke srihpen Leum El sapkihn nuh sesr in oruh ohinge. Mwe insewowo ke tempuhl kahsruh in usacni Israel ke kwewana siskac ke lihsrlihsr uh. Mwe insewowo inge oacyacpac kahsruh in ahkolah mwet ma e fah kahsruh facluh nuhke Tuhkuh Ahkluo luhn Leum!!”
Ke pruhe in kihsaclah lal ke Tempuhl Kirtland, Joseph Smith el pruhe siyuck tuh mwet nuhkewa ma ilyak nuh ke muhtuhnpot lohm sin Leum fah puhlakihn kuh se loac ah. …
Ac kuht siyuck sum, Pahpah Muhtahl, tuh mwet kuhlacnsap Lom fah tifoklac liki lohm se inge nekyucklac ke kuh, ac Inem in fah an faclos, ac wolacna Lom fah rauneloslac, ac lipufacn Lom fah karuhnguhnuhlos (Doctrine and Covenants 109:13, 22; mwe ahkuhtweyac ituckyang; liye pac fuhs 23).
Ke nga riti fuhs ingacn, nga motko ke aruhruhma se lal Nephi nuh ke lwen sahflah. Akihlen kahs oacna sie kac inge: “Ac tukun ma inge nga, Nephi, liye kuh luhn Lahm nuhtin God, puhtati nuh fin mwet luhlahlfongi ke alu luhn Lahm, ac nuh fin mwet wuhlweacng luhn Leum, suc fahsrelihk nuh fin facluh nohfohn; ac elos nuklac ke suwohswohs ke kuh luhn God ke wolacna yohk” (1 Nephi 14:14; mwe ahkuhtweyac ituckyang).
Nga luhlahlfongi lah tempuhl ke lwen misenge uh orekma nuh ke kunohkohn yohk srihpac se in ahkpwacyeelah palye se lal Nephi ah ac mwe karihngihn ac kuh se uliyucklac nuh sin mwet luhlahlfongi meet liki Tuhkuh Ahkluo.
Yac ekahsr tari ah, ke nga kuhlwacnsap ekihn pisap se ke university ward se, nga tuh arulacna lut sin sie tuhlihk muhtwacn fuhsr ke ward sac. Nga srackna lut sel ne ingena. Kom e etacl inel pa Prestuhn Emily Belle Freeman, Prestuhn luhn Muhtwacn Fuhsr. Ke sramsram se lal ke sie toeni luhlahp tuhfahna tari, el luti lah lin tempuhl, Jisus Kraist El sruhk kuhtyak nuh ke acn fuhltwact muhtahl se.
“Pacl nuhkewa nga fahsr fahlac ke motonoac ke lohm Sel, nga puhla fokokoi wuhlweacng luhk nuh Sel,” Prestuhn Freeman el fahk. “Nga nwacsnwacslah ke Nguhn Lal, nukumyucklac ke kuh Lal, ac srihsrngiyucki solac in muhsahi tohkohsrai Lal.”
Kuh Uliyucklac
Prestuhn Nelson el kwacna sramsram ke kuh luhn Jisus Kraist ma tuhkuh ke wuhlwacng tempuhl. “Kalmacn sang srenenuh lom nuh sin Mwet Lahngo pa oasr inkacnek lom nuh ke kuh ac molwelah Lal,” el fahk. Prestuhn Nelson el oacyacpac luti:
“Ke kuht liacacng olwelah lasr in tempuhl, yohkwelihk lwelah lasr nuhke kuh luhlahp luhn Leum. Lun tempuhl, kuht eis karihngihnyuck liki ma koluk luhn facluh.”
“Akwuck yohk srihpac luhn [Mwet Lahngo] kapsrekuhtyang nuh Sel ke wuhlweacng muhtahl ke pristut. Na, ke kuht karuhnguhnwacng wuhlweacng lasr uh, El ukiyac nuh facsr onwelah, kuh fokoko Lal. O na, fuhkah enenweyacn kuh Lal nuh sesr ke lwen suc ac fah tuhkuh.”
“Kuh fokoko se in etuh ke ma wo ac ma koluk ac ma ke nguhn ma kuht mwet uh enenuh ingena ac nuh ke pacl fahsruh uh pa kuh luhn God pa Pahpah ac Wen Nahtuhl, Jisus Kraist. Kuht kuh in eis kuh Lalos ingacn kuht fin oraclah ac karihngihn wuhlweacng lasr nuh Selos.”
Kuh inkuhsrao uh yohk srihpac, tamuhlwel ac tahmtahel, ke srihpen kuht muhta ke facl na koluk se. Fin wacngihn kuh se ingacn, kuht e tiac kuh in “muteng len sac ke El tuku” kuh “painmoulla ke El ac sikme” (Malachi 3:2). Kuht tiac etuh lah lwen fuhkah se ingacn, tuhsruhk mwet tuhtahf Lal suhpweyuckme tari in “akoela inkanek” nuh ke tuhkuh Lal (Malachi 3:1). Oruh, facl se inge tiac na mihs tuhpan lwen sacn.
Kuht enenuh kuh ma uliyuck nuh sin mwet luhlahlfongi in kasre kuht:
-
Lwelah God Elan kuhtanglah ke moul lasr uh.
-
Auliyak ac fototoi nuh sin Leum.
-
Ahkinsewowoye, ahkwoye, kol, ac kahsruh.
-
“Kuhtanglah elyah, mwe sruhf, ac mwe lokoalok lasr in wolac” (liye Mosiah 3:19).
-
Konwacack mihs ac engan kacl Kraist ke kuht fahsr ke inkacnek in wuhlweacng.
-
Ahkolah nuh ke lwen se e kuhnanuclac ke e sac ac kuhnuhnuclac luhn mwet koluk (Liye Doctrine and Covenants 109:46).
-
Ahksahfyelah orekma luhn Leum meet liki Tuhkuh Ahkluo Lal.
Petsac se ke dome ke Tempuhl Tucson Arizona sel James Whitney Young
Solse in Molwelah
Orekma ac wolacna lal Pahpah Inkuhsrao pa in sang moul kawihl ac moul ma pahtpaht nuh sin mwet (liye Moses 1:39). Kais sie tempuhl el oacpacna in solse luhn nuh ke placn in molwelah luhn God, srihsrngiyac na orekma yohk srihpac luhn Mwet Lahngo nuh ke orekma ac wolacna sacn.
Apihsyucki ke kuh Lal, mukul ac muhtwacn wuhlweacng nuhkewa—macruht kuh tiac—ma insacneacng in karihngihn wuhlweacng lalos in tempuhl e fah ahkinsewowoyeyuck ke moul se inge ac moul se fahsruh uh.
Prestuhn Nelson el olwelah: “Sahflah se suc tuh kuht kais sie kwacfweacng in olwelah ke kuh lun lohm sin Leum, sil ekihn sucu, luhlahlfongi nuh ke olwelah oreklac lun tempuhl ma ahkoekuhtlac nuh ke mwe sang yohk luhn God—suc pa moul ma pahtpaht. Akwuck luhn tempuhl ac olwelah kom oraclah oasr ki in ahkkweye moul lom, pahyuck ac sucu lom, ac kuh lom in lain ma koluk. Ahkfuhlwact lom lun tempuhl ac kuhlwacnsap lom we kacn mwet mahtuh lom fah ahkinsewowoye kom ahkyohkyelihk fwackyuck lom sifacna ac mihs ac fah ahkkapye orekma lom in muhtana ke inkacnek in olwelah.”
In ekihn sie Mwet Sap luhn Leum Jisus Kraist, nga fahkwack lah ma inge kewa pwacye.
© 2025 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Pweng ke Mahlwem Nuhkwewa ke Liahona, Ohktohpa 2025.Kosraean 19611 868