Dagiti Katulagan, Bileg, ken Kari

Maysa a Nadayag a Lawag—Templo iti Kirtland, ni Glen S. Hopkinson, saan a mabalin a kopiaen

Apay A Nakaad-adu dagiti Templo?

"Impadto dagiti kapuonantayo a dagiti templo ti mangpunno iti buya ti daga ti North ken South America, dagiti isla ti Pacifico, Europe, ken sadino man," kinuna ni Presidente Ezra Taft Benson (1899–1994) sumagmamano a dekadan ti napalabas. "No maaramid daytoy pangsubbot nga aramid iti nasken koma, ginasgasut a templo ti kasapulan."

Kinuna ni Presidente Russel M. Nelson nga agbangbangontayo kadagiti templo iti awan kapadana a kapardas. Makatulong dagiti bendision ti templo a mangummong iti Israel iti agsumbangir ti belo. Makatulong pay dagitoy a bendision a mangisagana kadagiti tao a tumulong a mangisagana iti lubong para iti Maikadua nga Yaay ti Apo!”

Iti kararagna a pangidaton iti Templo iti Kirtland, ni Joseph Smith inkararagna “nga amin a tao a sumrek iti salinong ti balay ti Apo mariknada ti bilegna. …

“Ket dawatenmi kenka Nasantuan nga Ama, a rummuar iti daytoy a balay dagiti katulongam a maikkan iti bilegmo, ken adda koma kadakuada ti naganmo, ken mabalkotda koma iti dayagmo, ket saluadan ida dagiti anghelmo” (Doktrina ken Katulagan 109:13, 22; nainayon ti panangyunay-unay, kitaen met ti bersikulo 23).

Idi binasak dagita a bersikulo, mapanunotko ti parmata ni Nephi maipapan kadagiti ud-uduna nga aldaw. Kitaen ti kasta met la a pangisao: “Ket napasamak a siak, ni Nephi, naimatangak ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo, a naiwaraswaras iti rabaw ti amin a daga; ken naarmasanda iti kinalinteg ken addaanda iti nadayag a bileg ti Dios” (1 Nephi 14:14; nainayon ti panangyunay-unay).

Mamatiak a dagiti templo iti ud-udina nga aldaw ket adda napateg nga akemda iti pannakaipatungpal ti padto ni Nephi ken kangrunaan iti pannakasaluad ken bileg a naikari kadagiti napudno sakbay ti Maikadua a Yaay.

Sumagmamano a tawen ti napalabas, bayat ti panagserbik a kas bishop ti university ward, nangnangruna nga inawis ti imatangko ti maysa ng agtutubo a babai iti wardko. Awisenna pay laeng ti imatangko agingga ita. Maam-ammoyo isuna kas Presidente Emily Belle Freeman, Sapasap a Presidente ti Young Women. Iti kallabes a mensahe iti sapasap a komperensia, insurona a babaen ti templo, itag-aynatayo ni Jesucristo iti nangatngato a naespirituan a kasasaad.

"Tunggal kanito a bumallasiwak iti salinong ti balayna, mapadasak ti naun-uneg a natulagan a pannakinaigko Kenkuana," kinuna ni Presidente Freeman. “Madalusannak babaen ti Espirituna, maipaay kaniak ti bilegna, ken ma-set apart-nak a mangbangon iti pagarianna.”

Masansan nga insao ni Presidente Nelson maipapan iti bileg ni Jesucristo a sidadaan a magun-od babaen dagiti katulagan iti templo. "Ti panangisangolyo iti bagiyo iti Mangisalakan kaipapananna a maaramatyo ti pigsa ken pangsubbot a bilegna," kinunana. Insuro pay ni Presidente Nelson:

“No tungpalentayo dagiti katulagantayo iti templo, ad-adda a magun-odtayo ti makapabileg a pannakabalin ti Apo. Iti templo, umawattayo iti proteksion manipud kadagiti panangdangran ti lubong."

“Dagiti napapateg nga ordinansa ti [Mangisalakan] ti mangibegkes kadatayo Kenkuana babaen kadagiti sagrado a katulagan iti priesthood. Kalpasanna, no tungpalentayo dagiti katulagantayo, ipaayannatayo iti pagpaimbag, pangpapigsa a bilegna. Ken o, talaga a kasapulantayo ti bilegna kadagiti sumangbay nga aldaw."

“Ti moral ken naespirituan a bileg a kasapulan dagiti taotayo ita ken kadagiti aldaw a sumaruno ket ti bileg ti Dios nga Ama ken ti Anakna, ni Jesucristo. Magun-odtayo ti bilegda babaen ti panangaramid ken panagtungpal kadagiti katulagan Kadakuada.”

Napateg ti nailangitan a bileg, kakabsat, gapu ta agbibiagtayo iti dakes unay a lubong. No awan ti bileg, ditayo kabaelan nga "agtalinaed iti aldaw ti yaayna" wenno "makapagtakder inton agparang isuna” (Malakias 3:2). Ditayo ammo no kaanonto dayta nga aldaw, ngem naibaonen ti mensaherona a "mangisagana iti dalan” para iti yaayna (Malakias 3:1). Itatta, saan a sitatalna a mayakar ti lubong iti dayta nga aldaw.

Kasapulantayo ti bileg a naikari kadagiti napudno a mangtulong kadatayo.

• Bay-an nga agballigi ti Dios iti biagtayo.

• Agbabawi ket umasideg nga ad-adda iti Apo.

• Mangbendision, mangliwliwa, mangiturong, ken agministro.

• "Sarkedan dagiti pannubok, pannulisog, ken panagladingit a nasaysayaat” (Mosiah 3:19).

• Mangsarak iti talna ken rag-o ken ni Cristo bayat iti pannagnatayo iti dana ti katulugan.

• Agsagana “iti aldaw a pannakapuor” ken “iti didigra dagiti nadangkes” (Doktrina ken Katulagan 109:46).

• Mangipatungpal iti aramid ti Apo sakbay ti Maikadua a Yaayna.

Ladawan ti dome ti Tucson Arizona Temple ni James Whitney Young

Dagiti Agbambantay (Sentinels) ti Pannakaisalakan

Aramid ken gloria ti Nailangitan nga Ama ti “mangipatungpal iti saan nga ipapatay ken agnanayon a biag ti tao” (Moises 1:39). Agtakder ti tunggal templo kas maysa a naindagaan nga agbambantay (sentinel) iti plano ti Dios iti pannakaisalakan, a mangitudtudo iti kangrunaan nga akem ti Mangisalakan iti dayta nga aramid ken gloria.

Naipaayan iti bilegna, tunggal lalaki ken babai nga agtungtungpal iti katulagan—naasawaan man wenno saan—a sipupudno nga agtungpal kadagiti katulagan iti templo ket mabendisionanto iti daytoy a biag ken iti umay a biag.

Inkari ni Presidente Nelson: "Ti gibus a panangikarigatan ti tunggal maysa kadatayo ket maaddaan iti bileg iti balay ti Apo, mailantip kas pamilia, napudno iti katulagan a naaramid iti templo a mangpaikari kadatayo iti kaindaklanan a sagut ti Dios—dayta ti agnanayon a biag. Dagiti ordinansa ti templo ken dagiti katulagan nga aramidenyo idiay ket tulbek iti panangpapigsa iti biagyo, panagasawa ken pamiliayo, ken ti kabaelanyo a mangparmek iti darup ti kabusor. Ti panagdaydayawyo iti templo ken ti serbisioyo idiay para kadagti kapuonanyo ti mangbendisionto kadakayo iti nayon a bukod a paltiing ken talna ken mangpapigsanto iti panagkumityo nga agtalinaed iti dana ti katulagan."

Kas maysa nga Apostol ni Apo Jesucristo, paneknekak a pudno dagitoy a banag.